Iciyoolimanina limwi Penzi lyalusalululo

Mamiliyoni aabantu bazibelesya njiisyo izijanika muzibalo zyainda alimwi bazwidilila kulwana cilengwa cakuba alusalululo. Kwaamba masimpe, tatukonzyi kukumana kusalulula koonse munguzu zyesu tobeni. Pele sena eeci caamba kuti lusalululo kunyina noluyoomana?

Mfwulumende Yiinda Kubota

Mfwulumende zyabantu zyaalilwa kulumana lusalululo. Pele sena eeci caamba kuti kunyina mfwulumende iikonzya kulumana lusalululo?

Mfwulumende iikonzya kumanizya lusalululo yeelede

1. 1. Kukulwaizya bantu kucinca mbobayeeya alimwi ambobalimvwa kujatikizya bamwi.

2. 2. Kulwana penzi lipa kuti cibakatazye kubeendelezya kabotu bamwi.

3. 3. Kuba abeendelezi ibasyomeka ibeendelezya bantu mbobalela kakunyina kusalulula.

4. 4. Kukamantanya bantu bazisi zyoonse

Bbaibbele litondezya kuti Leza wakatalisya mfwulumende iili boobu. Mfwulumende eeyi yiitwa kuti “Bwami bwa Leza.”—Luka 4:43.

Amubone zintu nzyoiyakucita mfwulumende eeyi.

1. Kuyiisya Bantu Kuba Abukkale Bubotu

‘Bantu bakkala munyika bayooiya bululami.’—ISAYA 26:9.

“Bululami bwini-bwini buyooleta luumuno, alimwi micelo yabululami bwini-bwini iyooba luumuno akuliiba mane kukabe kutamani.”—ISAYA 32:17.

Ino eeci caamba nzi? Caamba kuti Bwami bwa Leza buyooyiisya bantu cintu ciluzi. Ciindi bantu nobaiya kujatikizya ciluzi alimwi acitaluzi, nkokuti bululami alimwi akutalulama, balacinca kujatikizya mbobababona bamwi. Boonse bayoozyiba kuti cintu ciluzi nkuyanda bantu bamisyobo yoonse.

2. Kuponya

Leza “uyoosindula misozi yoonse kumeso aabo alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—CIYUBUNUZYO 21:4.

Ino eeci caamba nzi? Caamba kuti Bwami bwa Leza buyoomanizya kucisa koonse ikuboola akaambo kakutalulama. Aabo ibatakeendelezyegwa cabululami kunyina nociyoobacisa limbi aakaambo kakucitilwa boobu.

3. Bweendelezi Buli Kabotu

“Takabeteki kweelana azintu nzyaabona buyo ameso aakwe, nokuba kusinsa kweelana azintu nzyaamvwa buyo amatwi aakwe. Bantu bapengede uyoobabeteka cakutasalulula, alimwi uyoosinsa bantu cabululami kuti agwasye babombe myoyo bamunyika.”—ISAYA 11:3, 4.

Ino eeci caamba nzi? Jesu Kristo Mwami wa Bwami bwa Leza bwakujulu, uyoobeendelezya bantu anyika munzila yabululami alimwi kakunyina kusalulula. Jesu kunyina nayanda cisi cimwi alimwi akusulaika cisi cimbi, alimwi ulakonzya kuba masimpe kuti milawo yakwe iiluleme yatobelwa munyika yoonse.

4. Lukamantano

Bwami bwa Leza buyiisya bantu ‘kuba amuzeezo omwe alimwi [akuba] aluyando lukozyenye, kukamantana amoyo woonse, akuyeeya cintu comwe.’—BAFILIPI 2:2.

Ino eeci caamba nzi? Caamba kuti lukamantano ilunooli akati kabalelwa ba Bwami bwa Leza talunooli lwakwaamba buyo kumulomo, pele lunooli lukamantano ncobeni. “Banookamantene cakumaninina” akaambo kakuti banoojisi luyando lwini-lwini kuli umwi amweenzinyina.