Busongo Ibugwasya Kuba Alukkomano Mumukwasyi
Cikwati alimwi abana nzipego zitaliboteli kuzwa ku Mulengi wesu. Uyanda kuti tube abuumi bwamumukwasyi bukkomanisya. Aboobo kwiinda mubbuku lisetekene, watupa busolozi ibukonzya kutugwasya kuba abuumi bwamumukwasyi buli kabotu alimwi bukkomanisya. Amubone lulayo oolu lwabusongo lutobela.
Nobalumi, Amubayande Bamakaintu Banu
‘Balumi beelede kuyanda bakaintu babo mbuli mbobayanda mibili yabo beni. Mwaalumi uuyanda mukaintu wakwe ulaliyanda mwini, nkaambo kunyina muntu wakasulide kale mubili wakwe mwini, pele ulausanina akuubamba kabotu.’—BAEFESO 5:28, 29.
Mulumi ngomutwe wamukwasyi. (Baefeso 5:23) Pele mulumi uuli kabotu tali silunya naa sikudyaaminina. Ulamuyanda kapati mukaintu wakwe akumubikkila maano kujatikizya nzyayandika kumubili alimwi akumupa kulimvwa kuyandwa. Alimwi ulasolekesya kumukkomanisya, ikutali kuzumanana kucita zintu nzyayanda lwakwe. (Bafilipi 2:4) Cakwaanguluka, ulamwaambila mbwalimvwa ambwayeeya alimwi ulaswiilila ciindi mukaintu wakwe naambaula. Alimwi ‘tamunyemeni cakuzwa munzila,’ kumuuma naa kumwaamba zintu zitali kabotu.—Bakolose 3:19.
Nobakaintu, Amubalemeke Balumi Banu
‘Mukaintu weelede kumulemeka kapati mulumaakwe.’—BAEFESO 5:33.
Ikuti mukaintu kamulemeka mulumaakwe alimwi akumugwasyilizya muzintu nzyasala, upa kuti mumukwasyi kamuli luumuno. Ikuti naa walubizya, kunyina namufwubaazya, pele ulazumanana kukkazika moyo alimwi akumulemeka. (1 Petro 3:4) Ciindi nayanda kubandika amulumaakwe kujatikizya penzi limwi, ulasala ciindi cili kabotu alimwi akubandika anguwe cabulemu.—Mukambausi 3:7.
Amusyomeke Kumuntu Ngomukwetene Limwi
‘Mwaalumi uyookakatila kumukaintu wakwe, alimwi bayooba mubili omwe.’—MATALIKILO 2:24.
Ciindi mwaalumi amukaintu nobakwatana, baba acilongwe ciyumu kapati. Aboobo banabukwetene beelede kubeleka canguzu kutegwa cikwati cabo cizumanane kuyuma kwiinda mukubandika alimwi akucitilana tuntu tusyoonto-syoonto twaluyando. Alimwi beelede kusyomeka kuli umwi amweenzinyina kwiinda mukutoonana amuntu ngobatakwetene limwi. Kutasyomeka kumuntu ngomukwetene limwi, ndunya. Kupa kuleka kusyomana alimwi kulakonzya kwaandaanya mukwasyi.—Bahebrayo 13:4.
Nobazyali, Amubayiisye Bana Banu
“Koyiisya mwana inzila njayelede kweendela; noliba leelyo aakukomena takazwi mulinjiyo pe.”—TUSIMPI 22:6.
Leza wakapa bazyali mukuli wakuyiisya bana babo. Eeci cibikkilizya kubayiisya mbobeelede kulilemeka alimwi akubapa cikozyanyo cibotu. (Deuteronomo 6:6, 7) Ciindi mwana naatalilemeka munzila iili kabotu, muzyali musongo taciindizyi kumunyemena. Muciindi caboobo, ‘ulafwambaana kuswiilila, kumuka kwaambaula, akumuka kukalala.’ (Jakobo 1:19) Ikuti muzyali wabona kuti mwana ooyo uyandika lulayo, ulacita oobo munzila yaluyando, ikutali ciindi nanyemede.
Nobana, Amubamvwide Bazyali Banu
“Nobana, amumvwide bazyali banu . . . ‘Lemeka bauso abanyoko’”—BAEFESO 6:1, 2.
Bana beelede kubamvwida bazyali babo alimwi akubalemeka. Ciindi bana nobatondezya bulemu kubazyali babo, bapa kuti kakuli lukkomano mumukwasyi alimwi aluumuno. Bana bapati balabalemeka bazyali babo kwiinda mukubalanganya. Eeci cilakonzya kubikkilizya akubagwasya kubamba ŋanda yabo naa kubapa mali ciindi nokwayandika.—1 Timoteyo 5:3, 4.