Nkaambo Nzi Ncotupenga, Kucembaala Alimwi Akufwa?

Tulapenga Akaambo Kancobakacita Bazyali Besu Bakusaanguna

‘Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse.’—BAROMA 5:12.

Leza wakalenga bazyali besu bakusaanguna ba Adamu a Eva kabajisi mizeezo alimwi amibili iilondokede. Alimwi wakabapa munzi waparadaiso anyika, iwakali kwiitwa kuti muunda wa Edeni. Wakabaambila kuti bakali kukonzya kulya kuzisamu zyoonse izyakali muunda, kunze buyo lyacisamu comwe. Nokuba boobo, ba Adamu a Eva bakasala kulya micelo imwi kucisamu eeco cakasyidwe, aboobo bakabisya. (Matalikilo 2:15-17; 3:1-19) Akaambo kakuti tiibakamumvwida Leza, wakabatanda mumuunda ooyu eelyo buumi bwakatalika kubayumina. Mukuya kwaciindi, bakaba abana alimwi abalo buumi bwakabayumina. Bakatalika kucembaala alimwi akufwa. (Matalikilo 3:23; 5:5) Andiswe tulaciswa, tulacembaala alimwi akufwa akaambo kakuti tuzwa kumukwasyi uulya wakusaanguna.

Alimwi Tulapenga Akaambo Kabangelo Bazangi

“Nyika yoonse ili mumaanza aamubi.”—1 JOHANE 5:19.

Ooyo ‘mubi’ wiitwa kuti Saatani. Ncilenge camuuya citalibonyi icakazangila Leza. (Johane 8:44; Ciyubunuzyo 12:9) Mukuya kwaciindi, bangelo bambi abalo bakazanga akutobela Saatani. Bangelo aaba baitwa kuti madaimona. Zilenge eezyi zyamuuya zibyaabi zibelesya nguzu kweena bantu akubatantamuna ku Mulengi wabo. Ziyunga bantu kuti kabacita zintu zibi. (Intembauzyo 106:35-38; 1 Timoteyo 4:1) Saatani alimwi amadaimona aakwe balakkomana kupenzya bantu.

Zimwi Ziindi Tulapenga Akaambo Kakutasala Kabotu

“Kufwumbwa cintu muntu ncasyanga, ncencico eeco ncayootebula.”—BAGALATIYA 6:7.

Mumbazu ziindene-indene, toonse tulapenga akaambo kacibi ncotwakakona alimwi akuyungwa anyika ya Saatani. Pele zimwi ziindi bantu balaliletela mapenzi balikke. Munzila nzi? Ciindi nobacita zintu zitali kabotu naa kutasala kabotu, kanji-kanji balatebula zintu zibyaabi. Pele kulubazu lumbi, ciindi bantu nobacita zintu zili kabotu, balatebula zintu zibotu. Mucikozyanyo, mulumi alimwi usyi bana uusyomeka, uubeleka canguzu, alimwi uuyanda mukwasyi wakwe ulakonzya kujana zintu zibotu zinji akukkomanisya mukwasyi wakwe. Pele ooyo uucita cisobano cakubbeja, kuciindizya kunywa bukoko naa mutolo ulakonzya kuliletela bucete butaambiki antoomwe amukwasyi wakwe. Aboobo inga twacita cabusongo kuswiilila Mulengi wesu. Uyanda kuti tujane zintu zibotu zinji kubikkilizya ‘aluumuno lunji.’—Intembauzyo 119:165.

Tulapenga Akaambo Kakuti Tupona “Kumazuba Aamamanino”

“Kumazuba aamamanino . . . , bantu bayooba basikuliyanda, bayandisya mali, . . .  batamvwidi bazyali, . . . batalilesyi, bakali, batayandi bubotu.”—2 TIMOTEYO 3:1-5.

Mazuba aano, bantu banji bacita zintu nzyoonya zyaambidwe Mulugwalo oolu. Oobu mbumboni bwakuti tupona “kumazuba aamamanino” aanyika eeyi. Alimwi Magwalo akaambilalimwi kuti tuyoozyiba kuti tupona “kumazuba aamamanino” ciindi twaakubona nkondo, nzala, mizuzumo yanyika alimwi amalwazi. (Matayo 24:3, 7, 8; Luka 21:10, 11) Zintu eezyi zileta mapenzi aataambiki alimwi alufwu.