March

Ciindi notubala zyaandaano zyobilo zyakusaanguna kubbuku lya Matalikilo, tulakonzya kubona kuti Adamu alimwi a Eva bakalikkomene alwaanguluko lwalo bantu mazuba aano ndobalombozya, mbuli kuba azintu zyoonse, kutayoowa alimwi akutadyaamininwa. Buumi bwabanabukwetene bakusaanguna tiibwakajisi zyakulibilika kujatikizya zyakulya, mulimo, kuciswa alimwi alufwu. (Matl. 1:27-29; 2:8, 9, 15) Caboola kulwaanguluko, kaambo ikayandika nkotweelede kuyeeya nkakuti Jehova Leza alikke nguujisi lwaanguluko cakumaninina. Ino nkaambo nzi? Akaambo kakuti ngo Mulengi wazintu zyoonse alimwi Mwami singuzuzyoonse wabubumbo boonse. (1Tim. 1:17; Ciy. 4:11) Cileelela kuti zilenge zyoonse kujulu alimwi aanyika zilijisi lwaanguluko pele kuli mpolugolela. Zyeelede kuzyiba kuti Jehova Leza nguujisi nguzu zyoonse zyakusala milawo iiluleme, iiyandika, alimwi iyeelela. Mubwini eeco, ncencico Jehova Leza ncaakacita kubantu kuzwa kumatalikilo. w18.04 4 ¶4, 6

Mubweende oobu bwazintu, tulaliyumya kwiinda mulugwasyo lwa Jehova. (2Kor. 4:7, 8) Pele amuyeeye buyo kujatikizya baabo ibatajisi cilongwe a Jehova. Mbubwenya mbuli Jesu, tulabafwida luzyalo, alimwi tulakulwaizyigwa kubaambila “makani mabotu aacintu ciinda kubota.” Aboobo, amubakkazikile moyo aabo mbomuyiisya. Amuyeeye kuti, ambweni tabanabuzuba batumvwa twaambo tumwi twamasimpe tuli mu Bbaibbele ooto swebo ntotuzyi kabotu. Alimwi banji balaziyanda kapati nzyobasyoma. Balakonzya kulimvwa kuti bukombi bwabo ncintu cipati icibakamantanya kumikwasyi yabo, kuzilengwa zyabo alimwi akubantu bamuzilawo mobakkala. Ikuti katuyanda kuti bantu bazileke njiisyo “zyakaindi” nzyobakkomanina kapati, cakusaanguna inga twayandika kubagwasya kuzyiba alimwi akukakkomanina kasimpe “kapya,” nkokuti njiisyo zyamu Bbaibbele eezyo nzyobatazyi ciindi notwatalika kwiiya ambabo. Lilikke buyo ikuti bakazyiba kasimpe ndendilyo nobayoozileka njiisyo zyabo zyakaindi. Cilakonzya kutola ciindi kutegwa tubagwasye bantu kucinca.—Rom. 12:2. w19.03 22 ¶10; 23 ¶12; 24 ¶13

Cikozyanyo ca Jehova mukutondezya luyando alimwi akumukkomanina Mwanaakwe cituyeezya mbociyandika kujana ciindi cakubakulwaizya bamwi. (Joh. 5:20) Tulazwidilila ciindi muntu umwi ngotubikkila maano natondezya luyando kulindiswe alimwi akutulumbaizya akaambo kazintu zibotu nzyotucita. Mbubwenya buyo, bakwesu abacizyi mumbungano alimwi abanamukwasyi bayandika kubatondezya luyando alimwi akubakulwaizya. Ciindi notubalumbaizya bamwi, tuyumya lusyomo lwabo alimwi akubagwasya kubelekela Jehova cakusyomeka. Ikapati bazyali bayandika kubakulwaizya bana babo. Ciindi bazyali nobabalumbaizya bana babo kuzwa ansi aamoyo alimwi akubatondezya luyando, balabagwasya bana babo kuzwidilila. Majwi aakuti: “Ngwekkomanina,” atondezya kuti Jehova wakalijisi lusyomo lwakuti Jesu wakali kuyoocita kuyanda kwa Bausyi cakusyomeka. Akaambo kakuti Jehova ulijisi lusyomo luli boobo ku Mwanaakwe, andiswe tulakonzya kusinizya cakumaninina kuti cakusyomeka Jesu uyoozizuzikizya zisyomezyo zya Jehova zyoonse. (2Kor. 1:20) Ciindi notulanga-langa cikozyanyo ca Jesu, tulaayumya makanze eesu aakwiiya nguwe alimwi akutobela ntaamu zyakwe.—1Pet. 2:21. w19.03 8 ¶3; 9 ¶5-6

Ciindi notuzyiba mbocili ampindu kapati cipego cimwi icidula kapati, tulakulwaizyigwa kutondezya kulumba kuli yooyo iwakatupa. Bana Israyeli kunyina nobakatondezya kulumba kulwaanguluko Jehova ndwaakabapa ciindi naakabaangununa mubuzike mu Egepita. Nokwakainda buyo myezi misyoonto kuzwa nobakaangununwa, bakatalika kulombozya zintu nzyobakali kulya akunywa mu Egepita alimwi bakazitongooka zintu nzyaakali kubapa Jehova, mane buya bakali kuyanda kupiluka ku Egepita. Amweezyeezye buyo, bakabikka ‘nswi, makowa, banamunywa, mahanyisi amagaliki’ mubusena bwakusaanguna ikwiinda lwaanguluko ndwaakabapa Leza lwakukomba Leza mwini-mwini, Jehova. Sena tacigambyi kuti ncencico Jehova ncaakabanyemena kapati bantu bakwe? (My. 11:5, 6, 10; 14:3, 4) Eelo kaka nciiyo kulindiswe! Mwaapostolo Paulo wakakulwaizya Banakristo boonse kuti tabeelede kuubya-ubya lwaanguluko Jehova ndwaabapa caluzyalo kwiinda mu Mwanaakwe, Jesu Kristo.—2Kor. 6:1. w18.04 9-10 ¶6-7

Toonse tulakkomana kuyandwa. Alimwi toonse tulayanda kweendelezyegwa kabotu. Ikuti ziindi zinji katutatondezyegwi luyando alimwi abululami, tulakonzya kulimvwa kubula mpindu alimwi abulangizi. Jehova ulizyi kuti tulayanda kutondezyegwa luyando alimwi abululami. (Int. 33:5) Tulakonzya kuba masimpe kuti Leza ulatuyanda kapati alimwi uyanda kuti katweendelezyegwa kabotu. Eeci cilalibonya ciindi notulanga Mulawo Jehova ngwaakapa cisi ca Israyeli kwiinda muli Musa. Ciindi notubala Mulawo wa Musa, tulazyiba mbwatuyanda Leza wesu, Jehova. (Rom. 13:8-10) Tulakonzya kubona kuti Mulawo wa Musa wakayeeme aluyando akaambo kakuti luyando ndolupa kuti Jehova acite zyoonse nzyacita. (1Joh. 4:8) Jehova wakacita kuti milawo yoonse iyakali kubamba Mulawo wa Musa iyaame amilawo yobilo iiyandika kapati, nkokuti kuyanda Leza, alimwi akuyanda basimukobonyoko. (Lev. 19:18; Dt. 6:5; Mt. 22:36-40) Umwi aumwi akati kamilawo iili 600 alimwi aimwi minji iipanga Mulawo ituyiisya cintu cimwi kujatikizya luyando lwa Jehova. w19.02 20-21 ¶1-4

Jobu wakali kubikkila maano kujatikizya mbwaakali kulilemeka abantu mbaakaindene limwi zizo. (Job. 31:1) Wakalizyi kuti tiicakali kabotu kuyanda mukaintu uumbi uuli woonse kunze lyamukaintu wakwe. Mazuba aano, tukkala munyika motusunkwa kapati kucita bwaamu. Mbubwenya mbuli Jobu, sena tulikanzide kutamulanga munzila iitali kabotu muntu uuli woonse ngotutakwetene limwi? Sena tuyootantamuka kweebelela zifwanikiso izili zyoonse ziletela muzeezo wakoonana? (Mt. 5:28) Ikuti katulyeendelezya munzila iili boobo buzuba abuzuba, tuyooyuma calo ciyoopa kuti tuzumanane kusyomeka. Jobu alimwi wakali kumumvwida Jehova munzila mbwaakali kuzibona zintu zyakumubili. Jobu wakabona kuti, ikubikkila maano kulubono lwakwe kwakali kukonzya kupa kuti acite cibi cipati icakali kukonzya kupa kuti asubulwe. (Job. 31:24, 25, 28) Mazuba aano, tupona munyika bantu mobayandisya kapati zintu zyakumubili. Ikuti katwaabona munzila yeelede mali alimwi alubono, kweelana ambolitulailila kucita Bbaibbele, tuyooyumya makanze eesu aakuzumanana kusyomeka.—Tus. 30:8, 9; Mt. 6:19, 20. w19.02 6 ¶13-14

Munzila iilondokede, Jesu wakalutondezya luyando lupati Jehova ndwajisi kulindiswe muli zyoonse nzyaakacita. (1Joh. 4:8-10) Kwiinda zyoonse, Jesu wakakulwaizyigwa amoyo wakwe woonse kwaaba buumi bwakwe akaambo kandiswe. Kufwumbwa naa tuli bananike naa ‘bambelele zimbi,’ tulagwasyigwa kuluyando oolo Jehova a Mwanaakwe ndobakatutondezya kwiinda mucipaizyo eeco. (Joh. 10:16; 1Joh. 2:2) Alimwi amuyeeye kujatikizya zintu nzyobakabelesya kubamba cakulya ca Ciibalusyo; ziyubununa luyando ndwajisi Jesu alimwi ambwababikkila maano basikwiiya bakwe. Mubuti? Jesu wakatondezya luyando kuli basikumutobela bakwe ibananikidwe amuuya kwiinda mukutalisya bubambe butakatazyi ibujatikizya cakulya cibambidwe munzila nguba-uba kutegwa kababutobela. Mukuya kwaciindi, basikwiiya bananike basyomeka aabo bakeelede kucita Ciibalusyo mwaka amwaka, kucita oobo mubukkale bwiindene-indene, kubikkilizya amuntolongo. (Ciy. 2:10) Sena bakali kukonzya kumuswiilila Jesu? Inzya bakali kukonzya! Kusikila mazuba aano, Banakristo bakasimpe balasolekesya kwiibaluka lufwu lwa Jesu. w19.01 24 ¶13-15

Lwaanguluko oolu lulabikkilizya akwaanguluka kuzwa kubukombi bwakubeja, kutazyiba zintu alimwi amizimo. Alimwi lulabikkilizya azintu zinji zimbi. Kumbele luyoobikkilizya “alwaanguluko lwabulemu bwabana ba Leza.” (Rom. 8:21) Amube alwaanguluko luli boobo noliba lino kwiinda ‘mukuzumanana kuba mujwi lya Kristo,’ naa njiisyo. (Joh. 8:31) Kwiinda mukucita boobo, “muyoozyiba kasimpe” ikutali buyo kwiinda mukukaiya pele alimwi akwiinda mukupona kweelana ankako. Mubweende oobu bwakaindi, nobuba buumi oobo ibubonwa kuti mbuumi bubotu kanji-kanji tabusyomeki alimwi mbwakaindi buyo kaniini. Tatuzyi ciyoocitika juunza. (Jak. 4:13, 14) Aboobo nzila yabusongo, nkuzumanana kweenda munzila iitola ‘kubuumi bwini-bwini,’ nkokuti buumi butamani. (1Tim. 6:19) Mubwini, Leza kunyina natusinikizya kweenda munzila eeyo. Tweelede kulisalila. Jehova aabe ‘cibeela’ canu. (Int. 16:5) Amuzikkomanine “zintu zibotu” zinji nzyamupede. (Int. 103:5) Kuyungizya waawo, amube alusyomo lwakuti ulakonzya kumupa “kukondwa kutaambiki” alimwi ‘alukkomano mane kukabe kutamani.’—Int. 16:11. w18.12 28 ¶19, 21

Banakristo boonse beelede kusolekesya kululemeka lukwatano, mbubwenya buyo Jesu alimwi a Jehova mbobacita. Nokuba boobo, bamwi balaalilwa kucita boobo, akaambo kakuti bantu tabalondokede. (Rom. 7:18-23) Aboobo, taceelede kutugambya kuti Banakristo bamwi mumwaanda wamyaka wakusaanguna lukwatano lwabo lwakali mumapenzi. Paulo wakalemba kuti “mukaintu teelede kwaandaana amulumaakwe”; pele zimwi ziindi eeci cakali kucitika. (1Kor. 7:10) Paulo kunyina naakapandulula icakali kupa kuti banabukwetene kabaandaana. Mucikozyanyo, penzi tiilyakali akaambo kakuti mulumi wakacita bwaamu, calo cakali kukonzya kupa mukaintu kaambo kalimvwisya kuti balekane alimwi akukwatwa kumbi. Paulo wakalemba kuti mukaintu iwakaandaana amulumi wakwe wakeelede ‘kutakwatwa, ikuti kakutali boobo apilukile akuyanzana amulumaakwe.’ Aboobo mumeso aa Leza, bantu aaba bacikwetene. Paulo wakakulwaizya kuti tacikwe makani amapenzi ngobakonzya kujana banabukwetene, ikuti naa kunyina wacita bwaamu, makanze aabo ayelede kuba akuyanzana alimwi. Beelede kulomba lugwasyo kubaalu bambungano. w18.12 13 ¶14-15

Mazuba aano, Leza uyanda kuti bantu bakwe bayumye cilongwe anguwe alimwi akutola lubazu mumulimo wakwe kusikila mpobagolela. (Mt. 28:19, 20; Jak. 4:8) Bantu ibalibonya mbuli kuti bajisi mizeezo iili kabotu balakonzya kusola kunyonganya makanze eesu aakucita boobo. Mucikozyanyo, mbuti kuti basikumulemba mulimo baamba kuti balamusumpula amulimo akumuyungizyila mali ngomuvwola pele kakuli kucita boobo kulakonzya kunyonganya milimo yanu yakumuuya? Ikuti kamuli basicikolo, mbuti kuti mwapegwa coolwe cakuti muzwe aŋanda akuunka kubusena bumbi kutegwa mukatambule lwiiyo luyungizyidwe? Mubukkale buli boobu, sena inga tiimwayandika kupaila akuvwuntauzya, kubuzya bamwi mpoonya akusala cakucita? Mbuti kuti mwazyibila limwi lino kujatikizya mbwayeeya Jehova mumakani aali boobu alimwi akuba amakanze aakutobela mizeezo yakwe? Kuti mwacita oobo, mwaakulijana mubukkale buli boobu, talikamubedi sunko pati kusala cakucita. Mwakalibikkila kale mbaakani zyanu zyakumuuya, mulikanzide mumoyo wanu kuzizuzikizya, cilikke cisyeede, nkucita buyo cintu ncomwakasala kale. w18.11 27 ¶18

Solomoni wakaba mwami wa Israyeli kacili mwana. Kumatalikilo abweendelezi bwakwe, Jehova wakalibonya kulinguwe muciloto akumwaambila kuti: “Kolomba ncoyanda kuti ndikupe.” Solomoni wakaingula kuti: “Ndicili mwana alimwi tandijisi luzyibo lwakweendelezya bantu. . . . Aboobo kondipa ndemubelesi wako moyo uumvwida kutegwa ndibeteke bantu bako.” (1Bam. 3:5-10) “Moyo uumvwida,” eelo kaka kulomba ooku kwakali kutondezya kulibombya! Nkakaambo kaako Jehova wakali kumuyanda kapati Solomoni! (2Sam. 12:24) Leza wesu wakabukkomanina kapati bwiinguzi bwamwami iwakacili mwana cakuti wakapa Solomoni “moyo wabusongo amaano.” (1Bam. 3:12) Ciindi naakali kusyomeka, Solomoni wakali kutambula zilongezyo zinji. Wakalemekwa akaambo kakuyaka tempele “yiitwa azina lya Jehova Leza wa Israyeli.” (1Bam. 8:20) Wakaba aampuwo kapati akaambo kabusongo bwakwe mbwaakamupa Leza. Alimwi zintu nzyaakaamba ciindi naakali kusololelwa amuuya wa Leza zililembedwe mumabbuku otatwe aamu Bbaibbele. Limwi akati kangawo ndibbuku lya Tusimpi. w19.01 14 ¶1-2

Bantu bamwi balakaka kweendelezyegwa amuntu uuli woonse. Baamba kuti, “Ndilaliyeeyela ndemwini.” Nobaamba boobu, ambweni inga bapandulula kuti balalisalila zyakucita alimwi akuti cileelela kucita boobu. Tabayandi kweendelezyegwa alimwi tabayandi kucita zintu mbuli bucita bamwi. Nokuba boobo, masimpe ngakuti, kuba amizeezo yeendelana aya Jehova tacaambi kuti tucinyina lwaanguluko luli loonse. Kweelana alugwalo lwa 2 Bakorinto 3:17, “kuli muuya wa Jehova, kuli lwaanguluko.” Tulaangulukide kuba abube mbotuyanda. Tulakonzya kucita zintu kweelana ambotuyanda alimwi akusala zintu nzyotukkomanina. Masimpe, oobu mbombubo mbwaakatulenga Jehova. Nokuba boobo, lwaanguluko lwesu kuli mpolugolela. (1Pet. 2:16) Caboola kumakani aakusala kucita ciluzi acitaluzi, Jehova uyanda kuti katusololelwa amizeezo yakwe kweelana ambolitondezya Jwi lyakwe. w18.11 19 ¶5-6

Notwakaiya kasimpe, zintu zyakumuuya zyakaba mubusena bwakusaanguna, eelyo zyakumubili twakazibikka mubusena bwabili. Twakaaba zintu zyakumubili kutegwa tweende mukasimpe. Pele mukuya kwaciindi, ambweni tubona bamwi kabaula tuncini tupya naa kabakkomene akaambo kazintu zimwi zyakumubili. Tulakonzya kutalika kulimvwa kuti kuli nzyotwiindwa. Akaambo kakutakkutila azintu nzyotujisi, tulakonzya kubikka zintu zyakumuuya mubusena bwabili kutegwa tuyandaule zintu zyakumubili. Bukkale buli boobu butuyeezya Dema. Kuyandisya “bweende bwazintu obuno” kwakapa kuti acileke kubeleka antoomwe amwaapostolo Paulo. Nkaambo nzi Dema ncaakamusiila Paulo? Ccita naa wakali kuyandisya zintu zyakumubili kwiinda zyakumuuya naa tanaakacili kuyanda kuleka kucita zintu zimwi kutegwa abeleke a Paulo, Bbaibbele kunyina ncolyaamba. Cakutadooneka, tatuyandi kujokela kukuyanda zintu zyakumubili cakuti zintu eezyo zyatupa kucileka kuyandisya kasimpe. w18.11 10 ¶9

Kubeja kwa Saatani kwakali kubyaabi kapati nkaambo wakalizyi kabotu-kabotu kuti, ikuti Eva wamusyoma akulya mucelo, wakali kuyoofwa. Adamu a Eva boonse bakausotoka mulawo wa Jehova alimwi mukuya kwaciindi bakafwa. (Matl. 3:6; 5:5) Cuusisya kapati ncakuti, kwiinda mukulubizya kwabo, “lufwu lwakasikila bantu boonse.” Alimwi buya, “lufwu lwakali kweendelezya mbuli mwami . . . , akuli baabo batakabisya kwiinda mukusotoka mulawo mbuli Adamu.” (Rom. 5:12, 14) Aboobo lino, muciindi cakuti katukkomana abuumi butamani bulondokede kweelana amakanze a Leza aakumatalikilo, bantu bapona buyo myaka “70, naa 80, ikuti muntu kali muyumu kapati.” Nokuba boobo, kanji-kanji buumi bwabo inga ‘buzwide buyo mapenzi amause.’ (Int. 90:10) Zyoonse eezyi zilacitika akaambo kabubeji bwa Saatani! Kapandulula micito ya Diabolosi, Jesu wakaamba kuti: “Kunyina naakakakatila mukasimpe, nkaambo munyina kasimpe mulinguwe.” (Joh. 8:44) Saatani tanaleka kubeja, nkaambo wazumanana ‘kweena nyika yoonse’ abubeji bwakwe. (Ciy. 12:9) Tatuyandi kweenwa a Diabolosi. w18.10 6-7 ¶1-4

Aabo babweza ntaamu yakuleta luumuno bajisi twaambo tubotu tubapa kuba alukkomano. Sikwiiya Jakobo wakalemba kuti: “Mucelo wabululami ulasyangwa muluumuno akati kabaabo baleta luumuno.” (Jak. 3:18) Kuti kwaba kutamvwana amuntu umwi, ambweni mumbungano naa mumukwasyi, tulakonzya kulomba Leza kuti atugwasye kuleta luumuno. Kuti twacita oobo, Jehova uyootupa muuya wakwe uusalala uuyootugwasya kuba abube bubotu, alimwi tuyookkomana kapati. Jesu wakakankaizya kujatikizya mbociyandika kubweza ntaamu kutegwa tulete luumuno ciindi naakaamba kuti: “Lino ikuti uleta cipego cako kucipaililo kumane noli kooko wayeeya kuti munyoko ulaakaambo anduwe, siya cipego cako aawo kumbele lyacipaililo, uunke. Usaangune kumvwana amunyoko, mpoonya upiluke akutuula cipego cako.”—Mt. 5:23, 24. w18.09 21 ¶17

Mubusiku bwamamanino kali abasikwiiya bakwe, Jesu wakalwaamba luyando ziindi zitandila ku 30. Wakatondezya cacigaminina kuti basikwiiya bakwe beelede ‘kuyandana.’ (Joh. 15:12, 17) Luyando akati kabo lwakali kuyoolibonya kapati cakuti lwakali kuyootondezya kuti mbaasikumutobela bakasimpe. (Joh. 13:35) Luyando oolu taluli lwakuupaupa buyo ameso pe. Jesu wakali kwaamba bube buyandika kapati, nkokuti luyando lwakulyaaba. Wakaamba kuti: “Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe. Munooli beenzuma ikuti kamucita nzyondimulailila.” (Joh. 15:13, 14) Luyando lwakulyaaba alimwi alukamantano lwababelesi ba Jehova mazuba aano ncitondezyo cakuti mbantu ba Leza. (1Joh. 3:10, 11) Eelo kaka tulikkomene kuti luyando lwa Kristo nkoluli akati kababelesi ba Jehova, kunyina makani acisi nkobazwa, musyobo, mwaambo, naa bukkale bwabo! w18.09 12 ¶1-2

Jehova uyanda kuti babelesi bakwe kabailanganya mikwasyi yabo. Mucikozyanyo, mweelede kubeleka kutegwa mujane mali ngobayandika bayandwa banu. Bamatumbu banji balacaala aŋanda kutegwa balanganye bana bacili baniini. Alimwi bana ibakakomena bamwi beelede kulanganya bazyali babo ibaciswa. Milimo eeyi ilayandika. Ikuti naa kamujisi mikuli iili boobu, inga tiimwacikonzya kujana ciindi cakucita milimo ya Bunakristo mbuli mbomuyanda. Pele mutatyompwi pe! Jehova ulakkomana ciindi nomuulanganya mukwasyi wanu. (1Kor. 10:31) Kuti naa tamujisi mikuli minji mumukwasyi wanu, sena inga mwabagwasyilizya bakombinyoko ibalanganya bamwi alimwi abaabo ibaciswa, bacembeede, naa aabo ibayandika lugwasyo? Mbuti kuti mwalanga-langa mumbungano yanu akubona baabo ibayandika lugwasyo? Kwiinda mukucita boobo, mulabeleka antoomwe a Jehova mukwiingula mupailo.—1Kor. 10:24. w18.08 24 ¶3, 5

Josefa wakajisi myaka iisika ku 17 ciindi banabokwabo nobakamusambala mubuzike akaambo kabbivwe. Kaatanacitika makani aaya, Josefa ngomwana ngobakali kuyandisya kapati bausyi. (Matl. 37:2-4, 23-28) Kwamyaka iisika ku 13, Josefa wakaliyumya mubuzike alimwi amuntolongo mu Egepita, ikulamfwu akuli bausyi mbaakali kuyandisya, nkokuti Jakobo. Ncinzi cakamugwasya Josefa kutatyompwa alimwi akubijilwa? Ciindi naakali kupenga muntolongo, Josefa weelede kuti wakagamika mizeezo yakwe kuzitondezyo zyazilongezyo zya Jehova. (Matl. 39:21; Int. 105:17-19) Ziloto zyabusinsimi nzyaakalota Josefa naakacili mwana zyeelede kuti azyalo zyakamupa lusyomo lwakuti wakali kukkomaninwa a Jehova. (Matl. 37:5-11) Weelede kuti kwaziindi zinji wakali kumulilila Jehova. (Int. 145:18) Ikwiingula mipailo ya Josefa iyakali kuzwa ansi aamoyo, Jehova wakamupa kukkalwa moyo akuzyiba kuti “wakalaanguwe” mumasunko aakwe oonse. w18.10 28 ¶3-4

Buvwubi nkaambo kamwi ikakonzya kutujatikizya kweelana ambotubabona bamwi. Pele mbuti buvwubi naa bucete bwamuntu mbobukonzya kutujatikizya kweelana ambotumubona? Muuya uusalala wakasololela Solomoni kulemba makani aamasimpe aausisya kujatikizya bantu kweelana ambolwatondezya lugwalo lwabuzuba bwasunu. Ino kasimpi aaka katuyiisya nzi? Kuti tiitwacenjela, tulakonzya kutalika kuyanzana buyo abakwesu bavwubide akuleka kuyanzana abaabo bacete. Nkaambo nzi ncocitali kabotu kubeteka bamwi kwiinda mukubikkila buyo maano kubuvwubi bwabo? Nkaambo kucita boobo kulakonzya kupa kuti kube lusalululo mumbungano. Sikwiiya Jakobo wakaamba kuti penzi eeli lyakali kwaandaanya mbungano mumwaanda wamyaka wakusaanguna. (Jak. 2:1-4) Aboobo tweelede kubikkila maano kutegwa tutalekeli kuyeeya kuli boobu kunyonganya mbungano zyesu mazuba aano. w18.08 10 ¶8-10

Kulumba kwesu kujatikizya cilongwe cilibedelede ncotujisi a Jehova kulalibonya munzila mbotubeendelezya bakombima. Abalo mbantu ba Jehova. Kuti katukabikkila maano kaambo aaka kayandika kapati, lyoonse tunoobeendelezya calubomba alimwi acaluyando bakwesu abacizyi. (1Tes. 5:15) Jesu wakaambila basikumutobela kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu. (Joh. 13:35) Cikkomanisya ncakuti, Malaki wakaamba Jehova kuti ‘ulabikkila maano akuswiilila’ ciindi bantu bakwe nobayanzana. (Malk. 3:16) Masimpe Jehova “ulibazyi aabo bazulilwa kulinguwe.” (2Tim. 2:19) Ulizizyi kabotu zintu zyoonse nzyotucita alimwi anzyotwaamba. (Heb. 4:13) Ciindi notutababikkili kapati maano bakombima, Jehova ‘ulabikkila maano akuswiilila.’ Notusamausya beenzu, notuba baabi, notulekelela, alimwi anotutondezya luse kuli umwi amweenzinyina, tulakonzya kuba masimpe kuti Jehova ulabona.—Heb. 13:16. w18.07 26 ¶15, 17

Ncamaano kukakatila kuli Jehova. Kunyina muntu uulaanguzu, musongo, naa uulaaluyando kwiinda Leza wesu! Nguni akati kesu uutayandi kuba kulubazu lwakwe? (Int. 96:4-6) Nokuba boobo, bakombi ba Jehova bamwi balaalilwa kusala cabusongo ciindi nobalijana mubukkale mobayandika kusala kuba kulubazu lwa Jehova. Amubone makani aajatikizya Kaini. Kunyina naakalitaminina kukomba leza uuli woonse kunze buyo lya Jehova. Nokuba boobo, bukombi bwa Kaini tiibwakatambulika kuli Leza. Kuli zintu zibyaabi nzyaakali kuyeeya mumoyo wakwe. (1Joh. 3:12) Jehova wakabandika a Kaini akumwaambila kuti: “Ikuti naa wacinca akutalika kucita kabotu, sena tokakkomaninwi? Pele kuti utacinci akucita kabotu, kozyiba kuti cibi cilikukkalilide amulyango, alimwi ciyanda kukweendelezya; pele sena uyoocizunda?” (Matl. 4:6, 7) Munzila imwi, Jehova wakali kwaambila Kaini kuti, “Ikuti naa weempwa akuba kulubazu lwangu, andime ndiyooba kulubazu lwako.” Pele Kaini tanaakaluswiilila lulayo. w18.07 17 ¶1, 3; 18 ¶4

Nzila imwi motupa kuti mumuni wesu umunike nkwiinda mukukambauka makani mabotu alimwi akupa bantu kuti babe basikwiiya. (Mt. 28:19, 20) Kuyungizya waawo, tulakonzya kupa kuti Jehova alemekwe kwiinda mukulilemeka kwesu kwa Bunakristo. Bantu mbotujana mumaanda alimwi abasimweenda nzila balabona mbotulilemeka. Mbotumweta-mweta cabulongwe alimwi ambotwaanzya kulayubununa bwini mbotubede alimwi a Leza ngotukomba. Jesu wakaambila basikwiiya bakwe kuti: “Nomunjila muŋanda, amubaanzye bali mumo.” (Mt. 10:12) Kubusena Jesu alimwi abaapostolo bakwe nkobakali kumvwula kukambaukila, cakali cilengwa buya kutambula bantu mbobatazyi kabotu mumaanda aabo. Pele mazuba aano, cilengwa eeci cakamana mumasena manji. Nokuba boobo, ikuti mwabapandulwida cabulemu bantu ikaambo ncomwabaswaila, kanji-kanji balaanguluka. Kumweta-mweta lyoonse kulayandika kapati ciindi notutalika mubandi. Alimwi eeyi nzila yababelekela kabotu bakwesu abacizyi nobatola lubazu mubukambausi bwakubuleya kubelesya kakubikkila mabbuku kakukuba. Mulajana kuti bantu banji bayoowutambula mulumbe akaambo kambomubamwetela-mwetela ambomubaazya. w18.06 22 ¶4-5

Mwaapostolo Petro wakajisi cilengwa cakuyanzana buyo aba Juda. Pele ciindi Leza naakacisalazya kuti Banakristo tabeelede kusalulula, Petro wakamukambaukila Korneliyo, sikalumamba muna Roma. (Mil. 10:28, 35) Mpoonya, Petro wakatalika kulya alimwi akuyanzana a Bamasi ibakali basyomi. Nokuba boobo, nokwakainda myaka, Petro wakacileka kulya a Banakristo ibatakali ba Juda mu Antiokeya. (Gal. 2:11-14) Aciindi aawa, Paulo wakapa Petro lulayo lweelela, lwalo cakutadooneka ndwaakatambula. Ciindi Petro naakalemba lugwalo lwakwe lwakusaanguna kuba Juda alimwi aku Bamasi ibakali Banakristo ku Asia Minor, calukkomano wakaamba kujatikizya ciinga coonse cabakwesu. (1Pet. 1:1; 2:17) Cilisalede kuti, baapostolo bakaiya kucikozyanyo ca Jesu cakuyanda “bantu bamisyobo yoonse.” (Joh. 12:32; 1Tim. 4:10) Nokuba kuti cakatola ciindi, bakabambulula mbobakali kuyeeya. Kwiinda mukusama “buntu bupya,” Banakristo bakusaanguna bakatalika kubona bantu boonse kuti baleelene mumeso aa Leza.—Kol. 3:10, 11. w18.06 11 ¶15-16

Musyobo umwi wacilikwabilizyo cakucamba icakali kusamwa asikalumamba muna Roma mumwaanda wamyaka wakusaanguna cakajisi tubulo twabutale tuyalene. Tubulo ootu twakali koongomekwa kutegwa tukkwane acamba alimwi twakali kwaangililwa atutambo twacikutu kwiinda mukubelesya ngobyo zyalubulo alimwi atujatilizyo kutegwa cikwabilile moyo alimwi azibeela zimbi zyamubili kukuyaswa panga naa mivwi. Eelo kaka cileelela cikozyanyo eeco ikutondezya zyeelelo zya Jehova ziluleme mbozikonzya kukwabilila moyo wesu wacikozyanyo! (Tus. 4:23) Mbubwenya mbuli sikalumamba mbwaatakali kukonzya kucincanya cilikwabilizyo cakucamba cabutale akubweza ceeco citali calubulo luyumu, andiswe tatweelede kutobela mizeezo yesu kujatikizya zyeelelo ziluleme muciindi cakutobela zyeelelo zya Jehova ziluleme. Tatujisi busongo buyandika kutegwa tukwabilile moyo wesu. (Tus. 3:5, 6) Muciindi caboobo, ciindi aciindi tweelede kubona kuti ‘cilikwabilizyo cesu cakucamba’ ncaakatupa Jehova ciluukwabilide moyo wesu. Kuti twazumanana kukayanda kasimpe kajatikizya Leza, ciyootuubila-ubila kunyamuna “cilikwabilizyo cakucamba,” nkokuti, ikupona kweelana azyeelelo zya Leza ziluleme.—Int. 111:7, 8; 1Joh. 5:3. w18.05 28 ¶3-4, 6-7

Nokuba kuti Musa wakabasololela kabotu kwaciindi cilamfwu, bantu bakatongooka kujatikizya kubula maanzi pele alimwi bakamutongooka Musa, mbuli kuti ngowakapa kuti bafwe nyota. (My. 20:1-5, 9-11) Akaambo kakukalala kapati, Musa wakaleka kubomba moyo. Muciindi cakwaambaula calusyomo kundomba, kweelana ambwaakamulailila Jehova, Musa wakaambaula cabukali kubantu akwaamba kuti walo ulacita maleele. Mpoonya, wakauma ndomba ziindi zyobilo kumane maanzi akatalika kupoomoka. Kulisumpula alimwi akunyema kwakapa kuti alubizye kapati. (Int. 106:32, 33) Akaambo kakwaalilwa kubomba moyo kwaciindi cisyoonto, Musa tanaakazumizyigwa kunjila Munyika Yakasyomezyedwe. (My. 20:12) Kuzwa kucikozyanyo eeci, twiiya ziiyo ziyandika kapati. Cakusaanguna, tweelede kuzumanana kubambulula bube bwesu bwakubomba moyo. Ikuti naa twabulekelezya kwaciindi cisyoonto, kulisumpula kulakonzya kutalika akupa kuti tutalike kwaamba akucita zintu cabufwuba-fwuba. Cabili, kukopana mumizeezo kulakonzya kupa kuti cikatazye kubomba moyo, aboobo tweelede kusolekesya kubomba moyo noliba leelyo notuli mubukkale bukatazya kapati. w19.02 12-13 ¶19-21

Sena kutobela mulawo wa Jesu wakukambauka ncintu ciminya? Peepe. Naakamana kwaamba cikozyanyo cakwe camusaansa, Jesu wakaamba kuti mbwaanga tuli bakambausi ba Bwami, tunookondwa. (Joh. 15:11) Mubwini, wakatusyomezya kuti tunookondwa mbubwenya mbuli nguwe. Munzila nzi? Jesu wakalikozyanisya kumusaansa, mpoonya basikwiiya bakwe wakabakozyanisya kumitabi. (Joh. 15:5) Cinyina camusaansa cilaikwabilila mitabi. Kufwumbwa buyo kuti mitabi kaijatilide kulincico, ilatambula meenda alimwi abusani kuzwa kucinyina. Mbubwenya buyo, kufwumbwa kuti twazumanana kukamantana a Kristo kwiinda mukutobela mikondo yakwe, tulajana lukkomano mbubwenya mbuli ndwajisi walo mukucita kuyanda kwa Bausyi. (Joh. 4:34; 17:13; 1Pet. 2:21) Ba Hanne, ibali bapainiya kwamyaka iinda ku 40, bakaamba kuti, “Lukkomano ndondijana ndazwa mumulimo wakukambauka lulandikulwaizya kuzumanana mumulimo wa Jehova.” Masimpe, lukkomano lulatupa nguzu zyakuzumanana kukambauka nomuba muzilawo muli buyumuyumu.—Mt. 5:10-12. w18.05 17 ¶2; 20 ¶14

Mumwaanda wamyaka wakusaanguna, ambweni mwaapostolo iwakabakulwaizya kapati basyominyina wakali mwaapostolo Paulo. Wakatumwa amuuya uusalala kuyookambauka kubantu bamumasi aaba Giriki abana Roma, aabo ibakali kukomba baleza banji. (Gal. 2:7-9) Paulo wakeenda mumasena manji alimwi amasena aali kulamfwu mucisi eeco lino ciitwa kuti Turkey, kubikkilizya acisi ca Greece a Italy, kayaabutalisya mbungano zya Bunakristo akati kabantu ibatakali ba Juda. Aaba ibakazwide aakusanduka kuba Banakristo ‘bakapenzyegwa abasicisinyina’ aboobo bakali kuyandika kuyumya-yumya. (1Tes. 2:14) Mumwaka wakuma 50 C.E., Paulo wakalembela mbungano yaku Tesalonika iyakazwide aakutalisyigwa kuti: “Lyoonse tulamulumba Leza notumubandauka nywebo nyoonse mumipailo yesu, nkaambo tatuleki kuyeeya mulimo wanu walusyomo akubeleka kwanu kwaluyando alimwi akuliyumya kwanu.” (1Tes. 1:2, 3) Kuyungizya waawo, wakabakulwaizya kuyumizyanya kati: “Amuzumanane kukulwaizyanya akuyakana umwi amweenzinyina.”—1Tes. 5:11. w18.04 18-19 ¶16-17

Mukubusi uubikkila maano mubuumi bwakwe kukuyandisya kukkomanisya Jehova ulaubikkila maano kapati mulimo wakukambauka. Mbwaanga mulimo wakukambauka ulayandika kapati, weelede kuba mubusena bwakusaanguna mumulongo wesu wazintu ziyandika kapati nzyotweelede kucita. Sena inga mwalibikkila mbaakani yakuti kamutola lubazu mumulimo wakukambauka ziindi zinji? Sena inga mwacita bupainiya? Pele ino mbuti kuti kamutajani lukkomano lunji kapati mumulimo wakukambauka? Alimwi mbuti mbomukonzya kuyaambele mukupa bumboni? Kuli nzila zyobilo ziyandika izikonzya kugwasya: Amulibambile kabotu, alimwi mutaleki kwaambila bamwi nzyomuzyi. Cilakonzya kumugambya kubona mbomukonzya kukkomana kapati ciindi nomukambauka. Mulakonzya kutalika kwiinda mukujana bwiinguzi kumubuzyo ngobavwula kubuzya basicikolonyoko, mbuli wakuti, “Sena Leza Ulakubikkila Maano Kupenga Kwesu?” Webbusaiti yesu ya jw.org ilijisi zibalo zyakabambilwa kugwasya bakubusi kulijanina bwiinguzi mbobakonzya kupa kumubuzyo ooyo. Muyoojana pepa lyakulembela lijisi mutwe wakuti “Sena Leza Ulakubikkila Maano Kupenga Kwesu?” Cibalo cigwasya kwiiya ciyoomusololela kulibambila bwiinguzi bwanu. w18.04 27 ¶10-11

Nokuba kuti ba Adamu a Eva kumatalikilo bakajisi lwaanguluko munzila ziindene-indene, kuli mpolwakali kugolela. Lwaanguluko lumwi lwakali lwakuzyalwa andulo, nokuba boobo lwakali ampolugolela. Mucikozyanyo bazyali besu bakusaanguna bakalizyi kuti, kutegwa bazumanane kupona, bakeelede kuyoya, kulya, koona alimwi azimwi buyo. Sena bakeelede kulimvwa kusweekelwa lwaanguluko akaambo kazintu eezyi? Peepe, nkaambo Jehova wakabona kuti, ikuti kabazicita zintu eezyi zyabuzuba abuzuba bakali kuyoojana lukkomano alimwi akukkutila. (Int. 104:14, 15; Muk. 3:12, 13) Cakutainda mumbali Jehova wakalailila Adamu a Eva kuti bazuzye nyika akwiilanganya. Sena malailile aaya munzila imwi akali kubasinkila lwaanguluko lwabo? Peepe! Akapegwa kutegwa bantu bacikonzye kutola lubazu mumakanze aa Mulengi wabo, nkokuti kubamba nyika kuti ube munzi waparadaiso nyika yoonse wabantu balondokede kukabe kutamani. (Int. 127:3; Is. 45:18) Kukkomana mucikwati cabo alimwi amumukwasyi kukabe kutamani cakali cilongezyo ncobakali kuyooba ancico ba Adamu a Eva mubuumi. w18.04 4-5 ¶7-8

Ikuti katubakkazikila moyo bantu mumulimo wakukambauka, tatukalangili kuti bayookamvwisya naa kukatambula kasimpe kamu Bbaibbele mbobayookamvwida buyo ciindi cakusaanguna. Mucikozyanyo, amubone mbotukonzya kumugwasya muntu umwi kumvwisya bulangizi bwabuumi butamani muparadaiso anyika. Bantu banji bazyi kuti ciindi muntu afwa, ngamamanino aabuumi bwakwe naa bayeeya kuti bantu boonse ibali kabotu baunka kujulu. Mboobu mukwesu umwi mbwagwasya bantu kumvwisya bulangizi bwakuyoopona kukabe kutamani anyika. Cakusaanguna, ulabala lugwalo lwa Matalikilo 1:28. Mpoonya ulamubuzya mukamwiniŋanda kujatikizya Leza nkwaakali kuyanda kuti bantu kabakkala alimwi abuumi mbwaakali kuyanda kuti kabapona. Bunji bwabantu baingula kuti, “Wakali kuyanda kuti kabapona buumi buli kabotu anyika.” Amana, mukwesu ulabala lugwalo lwa Isaya 55:11 akubuzya kuti naa makanze aa Leza akacinca. Kanji-kanji, mukamwiniŋanda wiingula kuti peepe. Mukumanizya, mukwesu ulabala lugwalo lwa Intembauzyo 37:10, 11 akubuzya kujatikizya mbobunoobede buumi bwabantu kumbele. Kwiinda mukubelesya Magwalo munzila eeyi, wagwasya bantu banji kumvwisya kuti Leza uyanda kuti bantu ibali kabotu bakapone kukabe kutamani mu Paradaiso anyika. w19.03 24 ¶14-15; 25 ¶19

Jehova wakacisalazya kuti uyanda kuti swebo katuswiilila kumajwi aa Mwanaakwe alimwi akumumvwida. Jesu caluyando wakayiisya basikumutobela kujatikizya mbwaakeelede kukambaukwa makani mabotu, alimwi cakwiinduluka-induluka wakabayeezya kuti bazumanane kulangila. (Mt. 24:42; 28:19, 20) Kuyungizya waawo, wakabakulwaizya kubeleka canguzu, alimwi wakabayumya-yumya kuti batatyompwi. (Lk. 13:24) Jesu wakakankaizya mbocakali kuyandika kuli basikumutobela kuti kabayandana alimwi akutobela milawo yakwe. (Joh. 15:10, 12, 13) Lulayo oolu lulayandika kapati mazuba aano mbubonya mbolwakali kuyandika ciindi Jesu naakalupa. Jesu wakaamba kuti: “Muntu woonse uuli kulubazu lwakasimpe ulaliswiilila jwi lyangu.” (Joh. 18:37) Tulatondezya kuti tulaliswiilila jwi lyakwe ciindi ‘notuzumanana kweengelelana akulekelelana camoyo woonse.’ (Kol. 3:13; Lk. 17:3, 4) Alimwi tulatondezya kuti tulaliswiilila jwi lyakwe kwiinda mukukambauka makani mabotu cabusungu “muziindi zili kabotu amuziindi zyamapenzi.”—2Tim. 4:2. w19.03 10 ¶9-10