October

Tatukonzyi kuzyiba izili mumyoyo yabamwi mbuli Jehova alimwi a Jesu. Nokuba boobo, tulakonzya kusoleka kumvwisya mbobalimvwa bamwi alimwi anzyobayandika. (2Kor. 11:29) Mukwiimpana abantu baliyanda ibatuzingulukide, tulasolekesya ‘kutabikkila buyo maano kuzintu nzyotuyanda swebo, pele akuzintu nzyobayanda bamwi.’ (Flp. 2:4) Kwaambisya baalu bambungano beelede kutondezya lweetelelo. Bayoolyaambilila kuli Jehova kweelana ambobazilanganya mbelele zyakwe. (Heb. 13:17) Kutegwa bagwasye bakombinyina, baalu beelede kuba alweetelelo. Mbuti baalu mbobakonzya kutondezya lweetelelo? Mwaalu silweetelelo ulajana ciindi cakuba abakwesu alimwi abacizyi Banakristo. Ulabuzya mibuzyo mpoonya akuswiililisya cakukkazika moyo. Eeci cilayandika kapati ikuti umwi wambelele eezyi kayanda kwaamba mbwalimvwa pele kacimukatazya kwaambaula. (Tus. 20:5) Ciindi mwaalu najana ciindi cakuba amukwesu cakuliyandila, cilongwe cabo cilayuma.—Mil. 20:37. w19.03 17 ¶14-17

Kulumba kuli mbuli cakulya cibotu, cilakkomanisya kapati ciindi notwaabana abamwi. Ciindi notulimvwa kuti ibamwi balalumba akaambo kazintu nzyotucita, tulakkomana. Ciindi notutondezya kulumba, tupa kuti bamwi bakkomane. Imuntu ooyo ngotulumba ulazyiba kuti mulimo ngwaakabeleka ikutugwasya, naa zintu nzyaakatupa nzyotwakali kuyandika, zyakatugwasya ncobeni. Aboobo cilongwe cesu amuntu ooyo cilayuma. Majwi eesu aakutondezya kulumba alayandika kapati, mbubwenya mbokwaambwa mulugwalo lwabuzuba bwasunu. Amuyeeyele buyo mbolikonzya kuboneka kabotu apele libambidwe aangolida libikkidwe mumbale yansiliva! Alimwi amuyeeye buyo mbolinookkomaninwa! Ino inga mwalimvwa buti ikuti mwapegwa cipego cili boobu? Mbubwenya buyo, majwi aakulumba ngomwaambila bamwi alakonzya kukkomanisya. Amulange kaambo kamasimpe aaka: Apele libambidwe aangolida lilakonzya kukkala kwaciindi cilamfwu. Ncimwi buyo, majwi aanu aakulumba alakonzya kuyeeyegwa alimwi akubonwa kuti alayandika kapati kuli baabo mbomwaambila mubuumi bwabo boonse. w19.02 15 ¶5-6

Ciindi ba Adamu a Eva nobakalya mucelo kuzwa kucisamu cakuzyiba bubotu abubi, bakatondezya caantangalala kwiinda mumicito yabo mbobakali kulimvwa kujatikizya Jehova alimwi azyeelelo zyakwe. Bakasala kulibikkila zyeelelo zyabo beni kujatikizya zintu ziluzi alimwi azitaluzi. Pele amuyeeye buyo zintu nzyobakasweekelwa. Bakasweekelwa cilongwe cabo a Jehova. Alimwi bakasweekelwa coolwe cakupona mane kukabe kutamani alimwi akuyambukizya bana babo cibi alufwu. (Rom. 5:12) Amweezyanisye kujatikizya ncobakacita ba Adamu a Eva aceeco ncaakacita muna Etiopiya uulemekwa ciindi Filipo naakamukambaukila. Muntu ooyo uulemekwa wakalumba kapati kuzintu nzyaakamucitila Jehova alimwi a Jesu cakuti wakabbapatizyigwa mpoonya-mpoonya. (Mil. 8:34-38) Ciindi notulyaaba kuli Leza, akubbapatizyigwa mbubwenya mbuli mbwaakacita muntu ooyo uulemekwa, tulatondezya caantangalala mbotulimvwa kujatikizya Jehova alimwi azyeelelo zyakwe. Tulatondezya kuti tulalumba kapati kuzintu nzyaakatucitila Jehova alimwi a Jesu. Alimwi tulatondezya kuti tulamusyoma Jehova alimwi tulizyi kuti ngonguwe weelede kubikka zyeelelo kujatikizya zintu ziluzi alimwi azitaluzi. w19.03 2 ¶1-2

Caboola kulindiswe tobabelesi ba Leza, kusyomeka caamba kumuyanda camoyo woonse alimwi akulyaaba cakutazungaana kuli Jehova, kubikka kuyanda kwakwe mubusena bwakusaanguna muzintu zili zyoonse nzyotuyandika kusala. Mu Bbaibbele, ibbala lya Chihebrayo ilyakasandululwa kuti “kusyomeka” lyaamba cintu cimaninide, naa citajisi kampenda. Mucikozyanyo, bana Israyeli bakali kutuula zituuzyo zyabanyama kuli Jehova, alimwi Mulawo wakali kwaamba kuti banyama tiibakeelede kuba akampenda. (Lev. 22:21, 22) Bantu ba Leza tiibakali kuzumizyigwa kutuula munyama iwatakajisi kuulu, kutwi, naa liso; alimwi tiibakeelede kutuula munyama uuciswa. Jehova wakali kuyanda kuti munyama kakkwene, kataciswi, naa kanyina kampenda. (Malk. 1:6-9) Tulakonzya kumvwisya kaambo Jehova ncabikkila maano kapati kujatikizya kubula kampenda naa kumaninina. Ciindi notuyanda kuula cintu cimwi, ambweni mucelo, bbuku, naa cibelesyo, inga tiitwayanda kuula mucelo uutali kabotu, bbuku litajisi mapeeji aamwi naa cibelesyo icitajisi zibeela zimwi. Tuyanda ceeco icikkwene naa icinyina kampenda. Jehova mbwalimvwa oobo ciindi notumuyanda alimwi akumusyoma. Tweelede kucita oobo cakumaninina naa kakunyina kampenda. w19.02 3 ¶3

Kutegwa tukwabilile moyo wesu, tatweelede buyo kukaka kuyungwa amizeezo mibyaabi pele alimwi tweelede kutambula mizeezo iili kabotu. Kaindi mulindizi waamulyango wakali kujala milyango yaminzi kutegwa sinkondo atabalwani, pele zimwi ziindi wakali kwiijalula milyango kutegwa zyakulya alimwi azintu zimwi zinjizyigwe. Ikuti noyatakali kujalulwa milyango, bantu bamumunzi bakali kukonzya kufwa nzala. Mbubwenya buyo, tweelede kuujalula moyo wesu lyoonse kutegwa katweendelezyegwa amizeezo ya Leza. Bbaibbele lijisi mizeezo ya Jehova, aboobo ciindi lyoonse notulibala, tuzumizya mizeezo ya Jehova kweendelezya mbotuyeeya, mbotulimvwa alimwi ambotucita zintu. Ino mbuti mbotukonzya kugwasyigwa kapati mukubala Bbaibbele kwesu? Mupailo ulayandika kapati kutegwa kautugwasya ‘kubona bwini mbozibede zintu zibotu kapati’ izili mu Jwi lyakwe. (Int. 119:18) Alimwi tweelede kuzinzibala kuyeeya nzyotubala. Ciindi notupaila, kubala alimwi akuzinzibala kuyeeya, Jwi lya Leza lilanjila “mumoyo [wesu],” alimwi tulaiyanda mizeezo ya Jehova.—Tus. 4:20-22. w19.01 18 ¶14-15

Jehova ulizyi kuti tuliindene mbotucita zintu alimwi abukkale, alimwi ulazikkomanina zipaizyo nzyotukonzya kumupa. Amuyeeye kujatikizya musyobo wazipaizyo nzyaakali kutambula kuzwa kubana Israyeli. Bana Israyeli bamwi bakali kucikonzya kupa mbelele naa mpongo. Pele muna Israyeli mucete wakali kukonzya kupa “nziba zyobilo naa bana bankwilimba bobilo.” Alimwi ikuti naa muna Israyeli tacikonzyi kupa zintu eezyi, Jehova wakali kutambula “cipaanzi cakkumi caefa cafulaulu mubotu.” (Lev. 5:7, 11) Fulaulu tiiwakali kudula, pele Jehova wakali kucilumba cipaizyo cili boobu, kufwumbwa buyo kuti kauli “fulaulu mubotu.” Leza wesu siluzyalo mbwalimvwa amazuba aano. Ciindi notwiingula, talangili kuti toonse tube mbuli Apolo iwakali kupasaula kukanana naa mbuli Paulo iwakali kubandika munzila iisika amoyo. (Mil. 18:24; 19:8) Jehova uyanda buyo kuti katwiingula kweelana ambotukonzya. Amuyeeye kujatikizya mukamufwu iwakasanga tukkobili tobilo. Wakayandwa a Jehova nkaambo wakapa ncaakali kukonzya.—Lk. 21:1-4. w19.01 8-9 ¶3-5

Mbotuli basikutobela Kristo, tulangila kusulaikwa. Jesu wakasinsima kuti basikwiiya bakwe bayoopenzyegwa kapati mumazuba aamamanino. (Mt. 24:9; Joh. 15:20) Businsimi bwa Isaya butucenjezya kuti basinkondoma tabakagoleli buyo aakutusulaika pe; pele bayoobelesya zilwanyo ziindene-indene ikutulwana. Zilwanyo eezyo zibikkilizya lweeno, bubeji alimwi akupenzya kapati. (Mt. 5:11) Jehova takabalesyi basinkondoma aaba kubelesya zilwanyo eezyi kutegwa batulwane. (Ef. 6:12; Ciy. 12:17) Pele tatweelede kuyoowa pe. Jehova wakaamba kuti “kunyina cilwanyo” ciyoobelesyegwa kulwana ndiswe “iciyoozwidilila.” (Is. 54:17) Mbubwenya mbuli bwaanda mbobutukwabilila kumvwula yaguwo, mbombubo Jehova mbwatukwabilila ‘kubukali bwabantu basilunya.’ (Is. 25:4, 5) Basinkondoma kunyina nobayoozwidilila kutuletela mapenzi aatamani. (Is. 65:17) Basinkondo babantu ba Leza boonse “bayooba babuyo alimwi bayooloba.”—Is. 41:11, 12. w19.01 6-7 ¶13-16

Nobakubusi, Jehova ulaluyanda lwaanguluko, alimwi uyanda kuti katuluyanda andiswe. Nokuba boobo, aciindi nciconya, uyanda kuti katulubelesya kabotu lwaanguluko lwesu, kucita boobo kuyootukwabilila. Ambweni kuli bamwi mbomuzyi ibeebelela zintu ziletela muzeezo wakoonana naa aabo ibatalilemeki mumakani aakoonana, ibasobana zisobano zikonzya kubanjizya muntenda, naa ibabelesya misamu iikola alimwi akunywa bukoko cakwiindilizya. Kumatalikilo, balakonzya kukkomana kucita zintu eezyi. Pele kanji-kanji zitobela nzibi, ambweni balakonzya kuciswa, kwaalilwa kucileka kucita zintu eezyi naa ambweni akufwa buya. (Gal. 6:7, 8) Masimpe, “lwaanguluko” lwabo ndwakulyeena. (Tit. 3:3) Mukwiimpana, ino bali bongaye bantu mbomuzyi ibakaciswa akaambo kakuti bakatobela zyeelelo zyamu Bbaibbele? Cakutadooneka, kumvwida Jehova kupa kupona buumi bubotu alimwi alwaanguluko lwini-lwini. (Int. 19:7-11) Ciinda kubota kapati ncakuti, ciindi nomubelesya lwaanguluko lwanu cabusongo, nkokuti kweelana amilawo ya Leza iilondokede alimwi azyeelelo, mutondezya Leza alimwi abazyali banu kuti muleelela kupegwa lwaanguluko lwiinda waawo.—Rom. 8:21. w18.12 22-23 ¶16-17

Cibi ca Adamu cakapa kuti kube kucinca. Kucinca kumwi ndufwu, lwalo ilwakali kuyoolujatikizya lukwatano. Tulakonzya kucibona eeci kuzwa kumajwi ngaakalemba mwaapostolo Paulo ciindi naakali kupandulula kuti Banakristo tabali ansi aa Mulawo wa Musa. Wakaamba kuti lufwu lulamana lukwatano alimwi akuti ooyo wasyaala ulakonzya kukwata naa kukwatwa. (Rom. 7:1-3) Mulawo Leza ngwaakapa cisi cabana Israyeli wakapa malailile aajatikizya lukwatano. Wakali kuzumizya maali, cilengwa eeco icakaliko nociba ciindi Leza katanapa bana Israyeli Mulawo. Nokuba boobo, kwakali milawo yakabikkidwe kujatikizya maali, iyakali kukasya kupenzya bamakaintu. Mucikozyanyo, ikuti naa muna Israyeli wakwata muzike mpoonya kumbele wamwaalikila, tanaakeelede kuleka kumupa zyakulya, zyakusama alimwi azyeelede zyamulukwatano mukaintu wakusaanguna. Leza wakalailila kuti wakeelede kuzumanana kumukwabilila alimwi akumulanganya mukaintu ooyo. (Kul. 21:9, 10) Nokuba kuti tatuli ansi aa Mulawo, tulakonzya kubona mbwalubikkila maano lukwatano Jehova. Sena eeci tacimupi kulubikkila maano lukwatano? w18.12 10 ¶3; 11 ¶5-6

Naakamana kubikka mapenzi aakwe mumaanza a Jehova, kweelede kuti Habakuku wakali kuyeeya kujatikizya ncaakali kuyoocita Jehova. Mbwali siluzyalo alimwi Usyi uumvwisya, Jehova wakaaswiilila matongoosi aakwe. Leza wakalizyi kuti wakali kuyanda lugwasyo kumapenzi aakwe. Mumajwi aakagamikidwe kuba Juda bazangi, Jehova wakaambila Habakuku kujatikizya cakali kuyoocitika kumbele. Kweelede kuti Habakuku ngowakali wakusaanguna kwaambilwa a Jehova kuti mamanino aabukkale bwamapenzi oobo akali afwaafwi kapati. Jehova wakamutondezya Habakuku kuti wakalilibambilide kubweza ntaamu. Cisubulo cazyalani eelyo libyaabi alimwi lyankondo cakali afwaafwi. Kwiinda mukwaamba kuti “mumazuba aanu,” Jehova wakatondezya kuti lubeta oolu lwakali kuyooba muciindi ncaakali kupona musinsimi naa muciindi cabantu mbaakali kupona limwi. Jehova tanaakaingula kweelana ambwaakali kuyeeyela Habakuku. Sena oobo mbobwakali bwiinguzi kumapenzi aakwe? Ncaakamwaambila Jehova mubwini cakali kwaamba kuti mapenzi akali kuyooyindila buya kubantu boonse bamu Juda. w18.11 15 ¶7-8

Ino mubabona buti bantu boonse ibatanakazyiba kasimpe? Nokuba kuti mwaapostolo Paulo wakali kubayandaula muzikombelo aabo ibakajisi kale luzyibo kujatikizya Leza, kunyina naakali kuyiisya buyo ba Juda balikke. Mucikozyanyo, mulweendo lwakusaanguna lwabumisyinali lwa Paulo, bantu baku Lukaoniya bakabona kuti walo alimwi a Barnaba bali muciimo cabaleza babo, bakabona mbuli kuti baleza babo bakubeja ba Zusi aba Herme babuka. Sena Paulo a Barnaba bakasunkwa kuti balipangile mpuwo? Sena bakacibona kuba coolwe cakulyookezya akaambo kakuti muminzi yobilo njobakazwa akuswaya bakabapenzya kapati? Sena bakayeeya kuti kuba ampuwo kwakali kukonzya kupa kuti mulimo wakukambauka makani mabotu uyaambele? Peepe! Cakutawayawaya bakakaka kwiinda mukuzapula zisani zyabo akubalikila munkamu yabantu eeyo akoompolola kuti: “Ino nkaambo nzi ncomucitila boobu? Andiswe tuli bantu buyo ibalezya mbubonya mbuli ndinywe.”—Mil. 14:8-15. w18.09 4-5 ¶8-9

Kutegwa tukatambule kasimpe akupona kweelana azyeelelo zyakulilemeka zyamu Bbaibbele tweelede kucinca mbotuyeeya alimwi ambotulilemeka. Amubone ncaakalemba Petro kujatikizya kucinca ooko: “Mbomuli bana baswiilila, amuleke kutobela zisusi nzyomwakajisi musyule mukutazyiba kwanu, pele . . . amusalale mubukkale bwanu boonse.” (1Pet. 1:14, 15) Kutegwa baule kasimpe, bantu bamumunzi wa Korinto ibatakali kulilemeka bakali kuyandika kucinca kapati mubuumi bwabo. Mbubwenya buyo, ibanji mazuba aano babusiya bukkale bwabo butali bwabunaleza kutegwa baule kasimpe. Petro alimwi wakayeezya Banakristo bamumazuba aakwe kuti: “Musyule oomu mwakajisi ciindi cinji cakucita kuyanda kwabamasi nimwakali kweenda mubukkale busesemya, muluunyaunya lwakutalijata, mukuciindizya kunywa makoko, mumapobwe aateendelezyeki, mukuzundana kunywa makoko amukukomba mituni kukasyidwe amulawo.”—1Pet. 4:3. w18.11 6 ¶13

Mbuti mbotukonzya kubazyiba aabo “ibalibambilide kutambula buumi butamani”? Mbubwenya mbocakabede mumwaanda wamyaka wakusaanguna, nzila ilikke mbotukonzya kubajana bantu aabo nkwiinda mukupa bumboni. Aboobo tweelede kucita mbubwenya Jesu mbwaakalailila: “Kufwumbwa mumunzi naa mukanzi momwanjila, amuyandaule muntu weelela.” (Mt. 10:11) Tatulangili kuti bantu batasyomeki, balisumpula, naa aabo bateendelezyegwi azintu zyakumuuya balaatambula makani mabotu. Tuyandaula bantu basyomeka, balicesya, alimwi ibalaanzala yakasimpe. Kuyandaula ooku tulakonzya kukukozyanisya ancaakali kucita Jesu kali mubezi, wakali kuyandaula mapulanga aayelede mukupanga zintu mbuli zijazyo, majoko naa zintu zimwi buyo. Ciindi naakali kwaajana mapulanga aayo, wakali kubweza zibelesyo zyakwe, kubelesya luzyibo lwakwe, alimwi akupanga zintu eezyo. Andiswe tweelede kucita mbubwenya ciindi notuyanda kugwasya bantu babombe myoyo kuba basikwiiya.—Mt. 28:19, 20. w18.10 12 ¶3-4

Filipo mukambausi iwakapa cikozyanyo cibotu walo iwakabikkila maano kapati kumulimo wakwe noliba leelyo bukkale bwakwe nobwakacinca. Mu Jerusalemu, kwakaba kupenzyegwa kuzwa naakajaigwa Sitefano. Aciindi eeco, Filipo wakajisi mulimo mupya. (Mil. 6:1-6) Pele ciindi basikutobela Kristo nobakamwaikizyanya, Filipo kunyina naakakkala buyo kalangilila kakunyina kucita cili coonse. Wakaunka ku Samariya, imunzi ooyo iwatakaninga kambaukilwa kapati makani mabotu aciindi eeco. (Mt. 10:5; Mil. 8:1) Filipo wakalilibambilide kuunka kufwumbwa ooko muuya wa Leza nkowakali kuyoomusololela, aboobo Jehova wakamubelesya kujalula zilawo zipya. Kweelede kuti muuya wakwe wakutasalulula wakabakatalusya bana Samariya, aabo ibakazyibide kusampaulwa aba Juda. Aboobo tacigambyi kuti makamu aabantu bakaswiilila kulinguwe ‘cakubikkila maano’! (Mil 8:6-8) Filipo wakazumanana kubikkila maano kumulimo wakwe wakukambauka, aboobo Jehova wakamulongezya kapati walo alimwi amukwasyi wakwe.—Mil. 21:8, 9. w18.10 30 ¶14-16

Aciindi cimwi Jesu naakali mucooko ca Dekapole, bantu “bakamuletela musinkematwi iwakali sikamaama.” (Mk. 7:31-35) Muciindi cakumuponya aabuleya, Jesu “wakamutola ambali” akumuponya. Nkaambo nzi ncaakacitila boobo? Ambweni bukkale mwaakabede muntu ooyu bwakamupa kutaanguluka aabuleya. Andiza kwiinda mukubona boobo, Jesu wakamuponya kumbali. Masimpe, tatukonzyi kuponya bantu munzila yamaleele. Pele tulakonzya alimwi tweelede kutondezya kuti tulabikkila maano kuzintu nzyobayandika basyomima alimwi ambobalimvwa. Jesu wakazyiba mbwaakali kulimvwa musinkematwi alimwi wakamubikkila maano. Ncimwi buyo, andiswe tweelede kubabikkila maano bacembeede abaciswa. Mbungano ya Bunakristo ilazyibwa, ikutali buyo muzintu nzyoicita, pele kwiinda muluyando. (Joh. 13:34, 35) Luyando oolo lutupa kulyaaba kugwasya bacembeede alimwi abalema kujanika kumiswaangano ya Bunakristo alimwi akukambauka makani mabotu. Tulacita oobo nokuba kuti tabacikonzyi kucita zintu zinji.—Mt. 13:23. w18.09 29-30 ¶7-8

Mbelele ya Jehova iili yoonse ilayandika kapati kulinguwe alimwi akuli Jesu, iwakapa cituuzyo cacinunuzyo. (Gal. 2:20) Tulabayanda kapati bakwesu alimwi abacizyi bakumuuya. Alimwi tuyanda kubalanganya munzila yaluyando alimwi alweetelelo. Kutegwa tube bantu bakulwaizya, “atusungwaalile kucita zintu ziletela luumuno azintu iziyaka umwi aumwi.” (Rom. 14:19) Toonse tulangila kuciindi, nkokuti Paradaiso iiboola, mwalo munoonyina twaambo tunootutyompya! Kunoonyina kuciswa, nkondo, lufwu, kupenzyegwa, kulwana mumaanda, alimwi akutyompwa. Yaakwiinda Myaka Iili Cuulu, bantu banoolondokede. Aabo ibayoozwidilila mumusunko wamamanino bayooba bana ba Jehova Leza baanyika alimwi bayooba “alwaanguluko lwabulemu bwabana ba Leza.” (Rom. 8:21) Aboobo, atuzumanane kutondezya luyando iluyaka alimwi akugwasyanya umwi amweenzinyina kutegwa tukanjile munyika mpya ya Leza. w18.09 14 ¶10; 16 ¶18

Kwiiya Jwi lya Leza takuli kubala cakwiinzya buyo mulawo alimwi tacaambi kwiile buyo kweenga bwiinguzi bwamibuzyo iibuzyigwa. Ciindi notubala, tulalanga-langa makani aayo ncaatwaambila kujatikizya Jehova, nzila zyakwe, alimwi ambwayeeya. Tulasoleka kumvwisya kaambo Leza ncatuzumizya kucita cintu cimwi alimwi ancatatuzumizyi kucita cintu cimwi. Alimwi tulabikkila maano kujatikizya kucinca nkotweelede kucita mubuumi bwesu alimwi amumizeezo yesu. Nokuba boobo, talili lyoonse notukonzya kuzinzibala kuyeeya twaambo toonse ootu ciindi cili coonse notubala. Pele cilayandika kapati kujana ciindi, ambweni cisela caciindi ncotubala, kuzinzibala kuyeeya nzyotwabala. (1Tim. 4:15) Notuzinzibala kuyeeya Jwi lya Leza, ‘tulazyiba’ kuti kuyeeya kwa Jehova kulilondokede. Tulatalika kubona zintu mbuli mbwazibona walo, alimwi tulazizumina. Mizeezo yesu ‘ilacinca,’ aboobo tulacinca mbotuyeeya. (Rom. 12:2) Asyoonto-syoonto, tulatalika kuyeeya mbuli mbwayeeya Jehova. w18.11 24 ¶5-6

Mumwaanda wamyaka wakusaanguna C.E., Paulo wakalyaamba lwakwe mwini alimwi abalongwe bakwe bamwi kuti ‘mbasimilimonyina a Leza’ akaambo kamulimo wabo wakusyanga alimwi akutilila mbuto ya Bwami. (1Kor. 3:6) Mazuba aano, andiswe tulakonzya kuba “basimilimonyina a Leza” kwiinda mukwaaba ciindi, lubono, alimwi anguzu zyesu mumulimo wakukambauka ngwaakatupa Leza. Eelo kaka eeci ncoolwe cipati! Kwaaba ciindi anguzu zyesu mumulimo wakukambauka alimwi akugwasya bantu kuba basikwiiya kulakkomanisya kapati. Banji ibajisi coolwe cakusololela ziiyo zya Bbaibbele ziyaambele balakonzya kumwaambila lukkomano lunji ndobajana. Lukkomano oolo lulaboola kwiinda mukubona bantu aabo mbobakamvwisya kasimpe, mbobakomena mulusyomo, kucinca bukkale bwabo, alimwi akwaambila bamwi nzyobaiya. Awalo Jesu wakakkomana kapati ciindi bakambausi bali 70 mbaakatumide mumuunda ‘nobakapiluka kabakkomene’ akaambo kazintu zibotu zyakabacitikila.—Lk. 10:17-21. w18.08 20 ¶11-12

Inga kaba kakole ikuti twatalika kusyoma maano eesu. Tulakonzya kutalika kulimvwa kuti inga twabulanga-langa bukkale bumwi alimwi akubumvwisya nokuba kuti tatujisi twaambo toonse tujatikizyidwe. Abumbi buyumuyumu mbotukonzya kujana notuyanda kuzyiba makani aamasimpe nciindi nokuli kutamvwana amukwesu umwi mumbungano. Ikuti lyoonse katubikkila maano kujatikizya kutamvwana ooko, tulakonzya kutalika kumudooneka mukwesu. Aboobo, ikuti twamvwa makani aakubeja kujatikizya mukwesu ooyo, tulakonzya kwaasyoma. Ino twiiya nzi? Kubikkilila mukwesu kulakonzya kutupa kumuyeeyela zintu nzyotutasinizyide kuti nzyamasimpe. (1Tim. 6:4, 5) Aboobo, tatweelede kulekela kuyeeya kuli boobo kuzumanana mumoyo wesu. Muciindi cakucita boobo, atuyeeye mulawo ngotupedwe wakuyanda bakwesu alimwi akubalekelela camoyo woonse.—Kol. 3:12-14. w18.08 6 ¶15; 7 ¶18

Akaambo kakuti bakalengwa buya, bantu boonse mbiba Jehova. (Int. 100:3; Ciy. 4:11) Nokuba boobo, kuzwa ciindi bantu nobakatalika kupona, Leza wali kusala bantu bamwi kuba kulubazu lwakwe munzila iilibedelede. Mucikozyanyo, lugwalo lwa Intembauzyo 135 lwaamba bakombi ba Jehova basyomeka bamu Israyeli yansiku kuti ‘ndubono lwakwe luyandisi.’ (Int. 135:4) Alimwi lugwalo lwa Hosea lwakasinsima kuti bantu bamwi ibatakali bana Israyeli bakali kuyooba bantu ba Jehova. (Hos. 2:23) Businsimi bwa Hosea bwakazuzikizyigwa ciindi Jehova naakabikkilizya abantu ibatakali ba Juda kuba abulangizi bwakulela antoomwe a Kristo. (Mil. 10:45; Rom. 9:23-26) “Cisi cisalala” eeci ‘nciinga ca Leza cilibedelede’ munzila yaalubazu, bantu bali mumo balinanikidwe amuuya uusalala alimwi bakasalwa kuyoopona kujulu. (1Pet. 2:9, 10) Ino mbuti kujatikizya Banakristo banji basyomeka mazuba aano ibajisi bulangizi bwakuyoopona anyika? Jehova abalo ubaita kuti ‘mbantu’ bakwe alimwi akuti ‘mbasale bakwe.’—Is. 65:22. w18.07 22 ¶1-2

Banakristo bakasimpe balamwiiya Kristo, walo wakatupa cikozyanyo cibotu cijatikizya muntu mbwakonzya kuba mwaabi. (Mt. 20:28) Umwi aumwi wesu weelede kulibuzya kuti, ‘Sena ndilakonzya kucitobela cikozyanyo ca Jesu kwiinda mbondicita lino?’ (1Pet. 2:21) Tulakonzya kukkomaninwa a Jehova kwiinda mukutobela cikozyanyo cakwe alimwi aca Kristo cilondokede, kwiinda mukubabikkila maano bamwi, alimwi akubona mbotukonzya kubagwasya. Aboobo kwiinda mucikozyanyo camu Samariya mubotu, Jesu wakacisalazya kuti basikumutobela beelede kubabikkila maano bamwi, nobaba baabo ibazwa mubukkale bwiindene abwabo. (Lk. 10:29-37) Sena mulauyeeya mubuzyo iwakapa kuti Jesu aambe cikozyanyo camu Samariya mubotu? Mu Juda wakabuzya Jesu kuti: “Ino mubwini simukoboma nguni?” Bwiinguzi bwa Jesu butondezya kuti tweelede kuba baabi mbubwenya mbuli mu Samariya kutegwa tukkomaninwe a Leza. w18.08 19 ¶5-6

Sena Jehova wakazumanana kutondezya Mariya bulemu bweelede akaambo kakumulanganya alimwi akumukomezya cakusyomeka Mwanaakwe? Inzya, wakacita oobo. Leza wakapa kuti milimo yakwe alimwi amajwi aakwe alembwe mu Bbaibbele. Kulibonya kuti, Mariya tanaakacili kukonzya kweenda a Jesu mumyaka yotatwe acisela yamulimo wakwe. Ambweni akaambo kakuba mukamufwu, Mariya wakalikkede ku Nazareta. Pele nokuba kuti wakaindwa zyoolwe zinji, wakacikonzya kuba a Jesu ciindi naakali kuyanda kufwa. (Joh. 19:26) Pele nokwakainda ciindi, Mariya wakali mu Jerusalemu antoomwe abasikwiiya nobwakali kuyaabuswena buzuba bwa Pentekoste ciindi muuya uusalala nowakatilwa. (Mil. 1:13, 14) Kweelede kuti awalo wakananikwa antoomwe abamwi ibakaliko. Kuti naa mbocakaba oobo, caamba kuti wakapegwa coolwe cakuba kujulu a Jesu mane kukabe kutamani. Eelo kaka takuliboteli kulongezyegwa kuli boobu akaambo kakusyomeka kwakwe! w18.07 9 ¶11; 10 ¶14

Mumulimo wakwe wakukambauka, Jesu wakayiisya kasimpe ikayandika kutegwa abagwasye basikwiiya bakwe kuzyiba zintu zikonzya kucitika akaambo kabube bumwi naa micito. Mucikozyanyo, wakayiisya kuti kuzumanana kukalala kulakonzya kusololela kunkondo alimwi kulangisisya mukaintu naa mwaalumi kulakonzya kusololela kubumambe. (Mt. 5:21, 22, 27, 28) Ikutegwa tube amanjezyeezya aayiisyidwe kabotu, tweelede kulekela njiisyo zya Leza kutusololela alimwi kwiinda mukucita boobo tuyooleta bulemu kuli Leza. Banakristo bobilo, nokuba kuti bajisi manjezyeezya ayiisyidwe Bbaibbele, balakonzya kusala zintu ziindene mumakani aamwi. Amuyeeye kujatikizya makani aabukoko. Bbaibbele talikasyi kunywa bukoko cansaizi. Nokuba boobo, lilacenjezya kujatikizya kunywa bukoko cakwiindilizya alimwi akukolwa. (Tus. 20:1; 1Tim. 3:8) Nokuba kuti Munakristo tanywi bukoko cakwiindilizya, sena eeci caamba kuti tayelede kuyeeya kujatikizya zintu zimwi nzyasala? Peepe. Nokuba kuti manjezyeezya aakwe taamupi mulandu, Munakristo weelede kubikkila maano kumanjezyeezya aabamwi? w18.06 18 ¶10-11

Jesu wakabacenjezya basikwiiya bakwe kujatikizya njiisyo, naa bumena bwaba Farisi, ba Saduki alimwi atubunga twa Heroda. (Mt. 16:6, 12) Amubone kuti, mubandi ooyu wakacitwa kakutanainda ciindi cilamfwu kuzwa ciindi nobakali kuyanda kumubikka kuti abe mwami Jesu. Ciindi bukombi nobusangana amapolitikisi, kulakonzya kubuka nkondo. Jesu wakayiisya basikwiiya bakwe kuti tiibakeelede kujatikizyigwa mubukkale buli boobu. Makani aaya aliswaangene kukaambo kakapa kuti basilutwe babapaizi alimwi aba Farisi bakanze kumujaya Jesu. Bakali kumuyeeyela kuti wakali kuyoobabwezela zyuuno zyabo mumapolitikisi alimwi amubukombi. Bakaamba kuti: “Ikuti tumuleke buyo, bantu boonse balamusyoma eelyo ba Roma balaboola akubweza busena bwesu acisi cesu.” (Joh. 11:48) Aboobo Mupaizi Mupati Kayafa nguwakali kumbele mumakanze aakuti Jesu ajaigwe.—Joh. 11:49-53; 18:14. w18.06 6-7 ¶12-13

Kakole akambi Saatani nkabelesya kapati nkusyoma mizimo. Mazuba aano, upa kuti bantu babikkile maano kumadaimona kwiinda mubukombi bwakubeja alimwi amuzyakulikondelezya. Mafilimu, zisobano zyaakkompyuta, alimwi anzila zimwi zyakumwaya twaambo zipa kuti makani aajatikizya mizimo kaalibonya kuti alakkomanisya. Mbuti mbotukonzya kweeleba kucegwa mukakole aaka? Tatweelede kulangila mbunga ya Leza kutupa mulongo wazyakulikondelezya izili kabotu azitali kabotu. Umwi aumwi wesu weelede kuyiisya manjezyeezya aakwe kutegwa kaayendelana azyeelelo zya Leza. (Heb. 5:14) Nokuba boobo, tuyoosala cabusongo ikuti twalubelesya lulayo lwamwaapostolo Paulo luli atala aawa. Tulakonzya kulibuzya kuti: ‘Sena zyakulikondelezya nzyondisala ziyoopa kuti ndilibonye kuba sikuupaupa ameso? Kuti ziiyo zyangu zya Bbaibbele naa bantu mbondibandika limwi makani aamu Bbaibbele bazibona zyakulikondelezya nzyondisala, sena bayooyeeya kuti ndilazicita nzyondiyiisya?’ Kuti katupona kweelana anzyotuyiisya bantu, tacikatukatazyi kukaka tukole twa Saatani.—1Joh. 3:18. w18.05 25 ¶13

Mbuti mbotukonzya kumwiiya Paulo? Cakusaanguna, tweelede kusolekesya kuba aluyandisisyo lwamumoyo ilwakuyandaula kufwumbwa muntu ‘uuli amoyo mubotu uulibambilide kutambula buumi butamani.’ Cabili, tweelede kumukombelezya Jehova mumupailo kujalula myoyo yababombe myoyo. (Mil. 13:48; 16:14) Ba Silvana, ibali kubeleka kabali bapainiya kwamyaka iili 30 bakaamba kuti, “Kanditanaunka mubukambausi bwakuŋanda aŋanda mucilawo cangu, ndilapaila kuli Jehova, ikumulomba kuti andigwasye kuzilanga munzila yeelede zintu.” Andiswe tweelede kupaila kuli Leza kutegwa bangelo batusololele kubantu babombe myoyo. (Mt. 10:11-13; Ciy. 14:6) Ba Robert, ibali kubeleka kabali bapainiya kwamyaka iinda ku 30, bakaamba kuti, “Cilakkomanisya kubeleka abangelo ibazyi cicitika mumaumi aabantu.” Catatu, tweelede kubona bubotu mubantu. Ba Carl, imwaalu bakaamba kuti, “Ndilabikkila maano kucitondezyo cili coonse icikonzya kuyubununa luyandisisyo ndwajisi muntu, ambweni nkumweta-mweta, mbwalanga calubomba, naa mbwabuzya mibuzyo.” Inzya, mbubwenya mbuli Paulo, tulakonzya kuliyumya mukuzyala micelo. w18.05 15 ¶13; 16 ¶15

Makani aamba zyakusyomeka kwabaabo mbotwakagwasya kaindi alakonzya kuba cintu cikulwaizya ncobeni, kweelana ambocakabede kumwaapostolo Johane, walo iwakalemba kuti: “Kunyina cintu cindipa kukkomana kapati kunze lyaceeci: kuti kandimvwa kuti bana bangu balazumanana kweenda mukasimpe.” (3Joh. 4) Bapainiya banji balakonzya kuzuminizya mbocikulwaizya kulimbabo ikuzyiba kuti bamwi mbobakagwasya kwiiya kasimpe mumyaka yamusyule bazumanana kusyomeka ambweni buya balabeleka kabali bapainiya. Nokuba kuyeezya mupainiya uutyompedwe kujatikizya lukkomano ndwaakajisi kaindi kulakonzya kuletela luumbulizyo ncobeni. Balangizi bamabazu banji balaamba mbobakulwaizyigwa kapati balo abamakaintu babo ciindi nobatambula nokaba kagwalo kakulumba kujatikizya kuswaya kwabo kumbungano imwi. Mbubwenya buyo abalo baalu, bamisyinali, bapainiya alimwi abamukwasyi wa Beteli ibatambula majwi aakubalumba akaambo kamulimo wabo ngobabeleka cakusyomeka balakulwaizyigwa kapati. w18.04 23 ¶14-15

Solomoni tanaakamvwida, mukuya kwaciindi wakakwata bamakaintu ibali 700. Alimwi wakaleta abamwanakasuwa bali 300 muŋanda yakwe. (1Bam. 11:3) Bunji bwabamakaintu bakwe tiibakali bana Israyeli, alimwi bakali kukomba baleza bakubeja. Aboobo, Solomoni awalo wakaunduluzya mulawo wa Leza kwiinda mukukwata bamakaintu beenzu. (Dt. 7:3, 4) Ikuleya kwa Solomoni kuzwa kuzyeelelo zya Jehova ooko ikwakacitika asyoonto-syoonto, kwakamupa kuti mukuya kwaciindi acite cibi cipati. Solomoni wakayaka cipaililo caleza mukaintu wabana Asitoreti alimwi acipaililo acimbi caleza wakubeja wabana Kemosi. Mpoonya wakabasangana bamakaintu bakwe mubukombi bwakubeja kuzipaililo eezyo. Amuciyeeyele buyo, akati kamasena oonse aakaliko, wakayaka zipaililo eezyo acilundu icakalangene a Jerusalemu, ooko nkwaakayakila tempele lya Jehova! (1Bam. 11:5-8; 2Bam. 23:13) Ambweni Solomoni wakalyeena kayeeya kuti Jehova wakali kuyookulanga buyo kutasyomeka kwakwe kufwumbwa buyo kuti wazumanana kutuula zituuzyo kutempele. Pele Jehova kunyina nakulanga buyo kulubizya. w18.07 18-19 ¶7-9

‘Mivwi iiyaka mulilo’ njakonzya kumufwusa Saatani makani aakubeja aajatikizya Jehova, aakuti tamubikkili maano alimwi akuti kunyina uumuyanda. Ida, uujisi myaka yakuzyalwa iili 19 uulaapenzi lyakulimvwa kubula mpindu, wakaamba kuti: “Ziindi zinji ndakali kulimvwa kuti Jehova tandibikkili maano alimwi akuti tayandi kuba Mulongwe wangu.” Ncinzi cimugwasya kuzunda penzi eeli? Wakaamba kuti, “Miswaangano yakandigwasya kapati kuyumya lusyomo lwangu. Tiindakali kutola lubazu mukwiingula, kandiyeeya kuti kunyina wakali kuyanda kumvwa bwiinguzi bwangu. Pele lino ndakatalika kulibambila miswaangano akwiingula ziindi zyobilo naa zyotatwe.” Cakuluula ca Ida citondezya kaambo kamasimpe ikayandika kapati: Ntobo iini iyakali kupegwa basikalumamba tiiyakali kucinca nsaizi, pele ntobo yesu yalusyomo ilakonzya kukomena naa pe. Eeco cili kulindiswe. (Mt. 14:31; 2Tes. 1:3) Eelo kaka cilayandika kapati kuyumya lusyomo lwesu! w18.05 29-30 ¶12-14

Mulindizi wantolongo wakacinca mbwaakali kuzilanga zintu alimwi akulomba lugwasyo lilikke buyo nowakacitika muzuzumo wanyika. (Mil. 16:25-34) Mbubwenya buyo, bantu bamwi mazuba aano ibakaka kutambula mulumbe wamu Bbaibbele balakonzya kucinca akutalika kuyandaula lugwasyo ciindi zintu nozyacinca cakutayeeyelwa mbubwenya mbuli muzuzumo wanyika. Ambweni bamwi cakutayeeyela balakonzya kusweekelwa mulimo ngobali kubeleka kwaciindi cilamfwu calo icikonzya kubapa kulibilika. Bamwi ambweni akaambo kakuti bakajanwa abulwazi bupati, naa ambweni baluuside akaambo kakufwidwa muyandwa wabo. Balakonzya kubuzya mibuzyo kujatikizya mpindu yabuumi eeyo njobatakali kubikkila maano. Ambweni buya balakonzya kweezyeezya kuti, ‘Ino ncinzi ncondeelede kucita kutegwa ndikafwutuke?’ Ciindi notujana bantu bali boobu, balakonzya kuswiilila kumulumbe wesu uupa bulangizi kwaciindi cakusaanguna mubuumi bwabo. Aboobo kwiinda mukuzumanana cakusyomeka mumulimo wesu wakukambauka, tulasinizya kuti tuyoojanika kutegwa tubaumbulizye bantu ciindi ncobanoolibambilide kutambula mulumbe.—Is. 61:1. w18.05 19-20 ¶10-12

Mazuba aano, bunji bwabantu bacoofwaazyidwe aleza wabweende bwazintu oobu alimwi bali mubuzike mumakani aabukombi alimwi abukkale. (2Kor. 4:4) Aboobo ncoolwe kutobela cikozyanyo ca Jesu cakugwasya bantu kutegwa bamuzyibe alimwi akumukomba Jehova, Leza waluumuno. (Mt. 28:19, 20) Ooyu tauli mulimo muuba-uba pe, alimwi kuli buyumu-yumu bunji. Mumasi aamwi, bantu bayaabwiindila kutaubikkila maano mulimo wesu, ibamwi nokuba kukalala buya. Mubuzyo umwi aumwi wesu ngwayelede kulibuzya ngwakuti, ‘Sena lwaanguluko lwangu ndilakonzya kulubelesya kusumpula mulimo wa Bwami?’ Cilakulwaizya kapati kubona kuti ibanji bacibona mbocibindide ciindi cesu alimwi babuubya-ubya buumi bwabo kutegwa batole lubazu mumulimo waciindi coonse. (1Kor. 9:19, 23) Bamwi babelekela muzilawo izili mobakkala; bambi balongela kumasena aabulide. Eelo kaka makani aaya atondezya bubotu buboola akaambo kakulubelesya cabusongo lwaanguluko mukubelekela Jehova!—Int. 110:3. w18.04 11-12 ¶13-14