Zikombelo Zyakubeja Mbozimusampaula Leza

Ikuti naa Leza nduyando, nkaambo nzi zikombelo izilitaminina kumwiiminina ncozicita zintu zinji zibyaabi? Mubufwaafwi, zikombelo eezyi nzyakubeja; zisampaula Leza. Munzila nzi mozimusampaula? Ino walo ulimvwa buti? Alimwi ino ncinzi ncayoocita kujatikizya kusampaulwa ooko?

1. Mbuti zikombelo zyakubeja mbozimusampaula Leza kwiinda munjiisyo zyanzizyo?

Zikombelo zyakubeja ‘zyakaleka kasimpe ka Leza akutobela bubeji.’ (Baroma 1:25) Mucikozyanyo, zikombelo zinji tazibayiisyi bantu babo zina lya Leza. Nokuba boobo, Bbaibbele lyaamba kuti zina lya Leza lyeelede kubelesyegwa. (Baroma 10:13, 14) Ciindi cintu cibyaabi nocacitika, basololi bazikombelo bamwi baamba kuti nkuyanda kwa Leza. Pele ooko nkubeja. Leza talinguwe uupa kuti zintu zibyaabi kazicitika. (Amubale Jakobo 1:13.) Cuusisya ncakuti, makani aakubeja aaya aambwa abasizikombelo apa kuti cibayumine bantu kumuyanda Leza.

2. Mbuti zikombelo zyakubeja mbozyamusampaula Leza kwiinda mumicito yanzizyo?

Zikombelo zyakubeja tazibeendelezyi bantu mbuli Jehova mbwabeendelezya. Bbaibbele lyaamba kuti ‘zibi zyazikombelo zyakubeja zyalundana kusikila kujulu.’ (Ciyubunuzyo 18:5) Kwamyaanda yamyaka, basizikombelo bali kutola lubazu mumapolitikisi, kukulwaizya naa kutalisya nkondo alimwi akuzumizya kuti bantu banji kabajaigwa. Basololi bazikombelo bamwi bayanda kuvwuba, aboobo balombelela mali kubantu babo. Micito iili boobu itondezya kuti tabamuzyi Leza alimwi tabayandi kumwiiminina.—Amubale 1 Johane 4:8.

3. Ino Leza ulimvwa buti kujatikizya zikombelo zyakubeja?

Ikuti zintu nzyozicita zikombelo zyakubeja zilamunyemya nywebo, ino muyeeya kuti walo Jehova ulimvwa buti? Ulabayanda bantu, pele ulanyema akaambo kazintu nzyobacita basololi bazikombelo ibamusampaula alimwi ibatabeendelezyi kabotu bantu babo. Usyomezya kuti uyoozinyonyoona zikombelo zyakubeja alimwi ‘kunyina noziyoojanwa limbi pe.’ (Ciyubunuzyo 18:21) Lino-lino, Leza uyoozinyonyoona zikombelo zyakubeja zyoonse.​—Ciyubunuzyo 18:8.

AMWIIYE ZINJI

4. Leza tazizumini zikombelo zyoonse

Banji basyoma kuti zikombelo zili mbuli nzila ziindene-indene izisololela kuli Leza. Pele sena aayo masimpe? Amubale Matayo 7:13, 14, akubandika mubuzyo ooyu:

• Ncinzi Bbaibbele ncolyaamba kujatikizya nzila iisololela kubuumi?

Atweebelele VIDIYO, akubandika mubuzyo uutobela.

VIDIYO: Sena Leza Ulabukkomanina Bukombi Boonse?​—Kabeela Buyo (3:22)

• Sena Bbaibbele lyaamba kuti kuli zikombelo zinji nzyazumina Leza?

5. Zikombelo zyakubeja tazitondezyi luyando lwa Leza

Zikombelo zyakubeja zyamusampaula Leza munzila zinji. Nzila imwi iinda kubija, njakujatikizyigwa munkondo. Kutegwa mubone cikozyanyo comwe, atweebelele VIDIYO. Mpoonya akubandika mibuzyo iitobela.

VIDIYO: Zikombelo Mbozyakagwasyilizya mu Nkondo Yabili Yanyika Yoonse (2:22)

• Ncinzi zikombelo zinji ncozyakacita lya Nkondo Yabili Yanyika Yoonse?

• Ino mulimvwa buti kujatikizya ncozyakacita?

Amubale Johane 13:34, 35 a 17:16. Akubandika mibuzyo eeyi:

• Ino muyeeya kuti Jehova ulimvwa buti ciindi zikombelo nozijatikizyigwa munkondo?

• Zikombelo zyakubeja nzyezipa kuti zintu zinji zibyaabi kazicitika. Muunzila nzi momubona kuti zikombelo zyakubeja zyaalilwa kutondezya luyando lwa Leza?

6. Leza uyanda kuti bantu bazwe muzikombelo zyakubeja

Amubale Ciyubunuzyo 18:4,a akubandika mubuzyo ooyu:

• Ino mulimvwa buti kuzyiba kuti Leza uyanda kugwasya bantu ibeenwa azikombelo zyakubeja?

7. Amuzumanane kwiiya kujatikizya Leza wakasimpe

Sena zikombelo zyakubeja zyeelede kucinca mbomumubona Leza? Amweezeezye mwana musankwa, iwakaka lulayo lwabausyi, iwazwa aŋanda akutalika kucita zintu zibyaabi. Bausyi tiibaikkomanina micito yamwanaabo. Nkaambo nzi ncocitali kabotu ikutongooka bausyi akaambo kabukkale bwamwanaabo iwakazanga?

• Sena cili kabotu kutongooka Jehova akucileka kwiiya kujatikizya nguwe akaambo kamicito yazikombelo zyakubeja?

MUBUFWAAFWI

Zikombelo zyakubeja zyamusampaula Leza kwiinda munjiisyo zyakubeja alimwi amumicito mibyaabi. Leza uyoozinyonyoona zikombelo zyakubeja zyoonse.

Ncinzi Ncomwaiya?

• Ino mulimvwa buti kujatikizya ncoziyiisya akucita zikombelo zyakubeja?

• Ino Jehova ulimvwa buti kujatikizya zikombelo zyakubeja?

• Ncinzi Leza ncayoozicita zikombelo zyakubeja?

AMUZYIBE ZINJI

Amubone nzila zyobilo zikombelo zinji mozimunyemya kapati Leza.

“Sena Zikombelo Zyoonse Zilikozyenye? Sena Zyoonse Zisololela Kuli Leza?” (Cibalo caaintaneti)

Nkaambo nzi Jehova ncayanda kuti katumukomba antoomwe abamwi?

“Sena Cilayandika Kuzulilwa Kucikombelo Cimwi?” (Cibalo caaintaneti)

Mupaizi wakali kukatazyigwa akaambo kazintu zyakali kucitika mucikombelo cakwe. Pele eeci kunyina nocakamulesya kwiiya kasimpe kujatikizya Leza.

“Icakapa Mufwundisi Kusiya Cikombelo Cakwe” (Sinsimuka!, February 2015)

Kwamyaka minji, zikombelo zyali kuyiisya makani aakubeja kujatikizya Leza calo capa kuti bantu basyome kuti Leza tatubikkili maano alimwi ngusilunya. Amwiiye makani aamasimpe kujatikizya bubeji oobu botatwe.

“Makani Aakubeja Aakuti Leza Kunyina Uukonzya Kumuyanda” (Ngazi Yamulindizi, November 1, 2013)