April

Sena kuli sunko limwi lipati ndyomujisi? Ambweni muntu umwi mumbungano wakamulubizyila. (Jak. 3:2) Ambweni babelesinyoko naa basicikolonyoko balamufwubaazya akaambo kakubelekela Jehova. (1Pet. 4:3, 4) Naa ambweni banamukwasyi balasoleka kumukasya kujanika kumiswaangano naa ikwaambila bamwi kujatikizya lusyomo lwanu. (Mt. 10:35, 36) Ikuti sunko kalili lipati, mulakonzya kulimvwa kuti inga cabota kucileka buyo kubelekela Jehova. Pele amusyome kuti kufwumbwa sunko ndyomukonzya kujana, Jehova uyoomupa busongo alimwi anguzu kutegwa muliyumye. Mu Jwi lyakwe, Jehova wakabikkilizya azikozyanyo zyabantu batalondokede izitondezya mbobakaliyumya mumapenzi aakatazya. Nkaambo nzi? Kutegwa twiiye kuzikozyanyo zyabo. Eeci cileendelana ancaakalemba mwaapostolo Paulo. Kubala zibalo eezyi kulakonzya kutuumbulizya akutupa bulangizi. Pele kutegwa tugwasyigwe, nzinji nzyotweelede kucita muciindi cakulibala buyo Bbaibbele. Tweelede kuzumizya Magwalo kuti atugwasye kucinca mbotuyeeya ambotulimvwa. w21.03 14 ¶1-2

Sena bantu mbomukambaukila mubabona mbuli maila aayelede kutebulwa? Ikuti naa mbocibede oobo, nkokuti muyoocita zintu zyotatwe eezyi. Cakusaanguna, muyookambauka cabusungu mbwaanga mulimo ooyu ulibindide. Ciindi cakutebula cilaampocigolela; aboobo tatweelede kusowa ciindi. Cabili, muyookkomana kubona bantu kabatambula makani mabotu. Bbaibbele lyaamba kuti: ‘Bantu balakondwa ciindi cakutebula.’ (Is. 9:3) Mpoonya catatu, muntu umwi aumwi muyoomubona kuti ulakonzya kuba sikwiiya, aboobo muyootalika mubandi kweelana azintu nzyakkomanina. Basikutobela Jesu bamwi bakali kukonzya kuyeeya kuti ba Samariya kunyina nobakonzya kuba basikwiiya ba Jesu, pele Jesu tanaakayeeya boobo pe. Muciindi caboobo, wakababona kuti balakonzya kuba basikwiiya. Andiswe bantu bamucilawo cesu tweelede kubabona kuti balakonzya kuba basikwiiya ba Kristo. Mwaapostolo Paulo ncikozyanyo cibotu ncotweelede kutobela. Wakalizyi nzyobakali kusyoma aabo mbaakali kukambaukila, wakali kubona zintu nzyobakali kukkomanina, alimwi wakababona kuti bakali kukonzya kuba basikwiiya ba Jesu. w20.04 8-9 ¶3-4

Muciindi cakubeteka muntu kweelana azintu nzyacita, amusolekesye kumvwisya mbwalimvwa. Alikke Jehova nguutumvwisya kabotu-kabotu. Aboobo amumulombe kutegwa amugwasye kubona bamwi mbuli mbwababona walo alimwi akuzyiba mbomukonzya kubatondezya luzyalo. Tamweelede kusala bakwesu alimwi abacizyi mbomweelede kutondezya luzyalo. Boonse balijisi mapenzi alo bunji bwangayo aakozyenye ayaayo ngaakajisi Jona, Elija, Hagare alimwi a Loti. Bunji bwaziindi, bakaliletela mapenzi. Kwaamba masimpe, toonse kuli mapenzi ngotwakaliletela aciindi cimwi. Aboobo cileelela kuli Jehova kutwaambila kuti katweetelelana. (1Pet. 3:8) Ciindi notumumvwida Jehova, tuyumya lukamantano lutaliboteli ndotujisi kumukwasyi wanyika yoonse. Aboobo ciindi notweendelezyanya umwi amweenzinyina, atube amakanze akuswiililana, kuzyibana kabotu alimwi akutondezyanya luzyalo. w20.04 18-19 ¶15-17

Jesu wakapa cikozyanyo cilondokede kujatikizya kumvwida Jehova. Aboobo nzila imwi iiyandika kapati mbotumumvwida Jehova, nkwiinda mukwiitobelesya mikondo ya Jesu. (Joh. 8:29) Kutegwa tuzumanane kweenda mukasimpe, tweelede kusinizya kuti Jehova ngu Leza wakasimpe, akuti zyoonse nzyatwaambila kwiinda mu Jwi lyakwe Bbaibbele, nzyamasimpe. Alimwi tweelede kusinizya kuti Jesu ngo Mesiya iwakasyomezyegwa. Mazuba aano bantu banji baladooneka kuti Jesu wakananikwa kuba Mwami wa Bwami bwa Leza. Johane wakacenjezya kuti kwakali “basilweeno banji,” ibakali kukonzya kweena baabo ibatakalibambilide kwiiminina kasimpe kajatikizya Jehova alimwi a Jesu. (2Joh. 7-11) Johane wakalemba kuti: “Ino nguni mubeji kunze lyayooyo uukaka kuti Jesu ngu Kristo?” (1Joh. 2:22) Nzila ilikke iikonzya kutugwasya kweeleba kweenwa, nkwiiya Jwi lya Leza. Ikuti naa twacita oobo, ndendilyo notukonzya kumuzyiba Jehova alimwi a Jesu. (Joh. 17:3) Alimwi ndendilyo notukonzya kusinizya kuti tujisi kasimpe. w20.07 21 ¶4-5

Inzila imwi mbotukonzya kweeleba kuba “cilebyo” kubakwesu abacizyi, nkwiinda mukubalekela kucita zintu munzila njobayanda kuti kacikonzyeka kucita boobo, muciindi cakuti lyoonse katuyanda kuti zintu kazicitwa kweelana ambotuyanda. (Rom. 14:19-21; 1Kor. 8:9, 13) Munzila eeyi iiyandika kapati, swebo tuliindene asikubalika uuli mumuzundano wancobeni, walo uusolekesya kutegwa akalijanine bulumbu bwakwe alikke. Basikubalika aaba babikkila kapati maano kucintu cikonzya kubagwasya lwabo kuzunda mumuzundano kutegwa bakajane bulumbu. Aboobo balakonzya kubatonka basikubalika bamwi kutegwa balo kabali mbabo ibali kumbele mukubalika. Mukwiimpana, swebo tatuzundani buya pe. (Gal. 5:26; 6:4) Makanze eesu ngakugwasya bantu banji kutegwa toonse tukasike akeengo kamamanino akuyootambula bulumbu bwabuumi butamani. Aboobo tulasolekesya kulutobela lulayo lwakasololelwa amuuya ‘lwakutabikkila buyo maano kuzintu nzyotuyanda swebo zilikke, pele akuzintu nzyobayanda bamwi.’ (Flp. 2:4) Mukubalika nkotujisi, caluzyalo Jehova wakasyomezya bantu bakwe bulumbu businizyide ikuti babalika kusikila kumamanino, nkokuti buumi butamani kujulu naa muparadaiso anyika. w20.04 28 ¶10; 29 ¶12

Mamiliyoni aabamaalumi alimwi abamakaintu Banakristo bayoozwa “mumapenzi mapati” akunjila munyika mpya. Aabo ibayoofwutuka anyika bayoolibonena kuzundwa kwalufwu kumbi, nkokuti kubusyigwa kwamabbiliyoni aabantu ibafwide. Amuyeeye buyo mbotuyookkomana ciindi zintu eezyi noziyoocitika! (Mil. 24:15) Alimwi boonse aabo ibasyomeka kuli Jehova cakumaninina abalo bayooluzunda lufwu ndotwakakona kuli Adamu. Bayoopona kukabe kutamani. Banakristo boonse ibapona lino beelede kulumba kumajwi aawumbulizya aayo Paulo ngaakalembela bana Korinto aajatikizya bubuke. Tulijisi twaambo tubotu itweelede kutupa kutobela lulayo lwa Paulo akucita kufwumbwa ncotukonzya lino “mumulimo wa Mwami.” (1Kor. 15:58) Ikuti lyoonse katubeleka kusikila mpotugolela mumulimo ooyu, tulakonzya kulangila kuyooba abuumi bukkomanisya kapati kumbele. Buumi oobo bunooli bubotu kapati kwiinda mbotubuyeeyela. Eeci ciyoosinizya kuti kubeleka kwesu nkotumubelekela Mwami takuli kwabuyo pe. w20.12 13 ¶16-17

Kulibonya kuti businsimi ibuli kulugwalo lwa Ezekieli 38:10-23; Daniele 2:43-45; 11:44–12:1; alimwi a Ciyubunuzyo 16:13-16, 21 bwaamba zintu zikozyenye. Ikuti naa mbocibede oobo, nceeci cilangilwa kuyoocitika. Aciindi cimwi kaanootalikide kale mapenzi mapati, ‘bami bamunyika yoonse’ bayoopanga nkamu yazisi. (Ciy. 16:13, 14) Ibbaibbele lyaamba nkamu yazisi eeyi kuti, “Gogo wakucisi ca Magogo.” (Ezk. 38:2) Nkamu yazisi eeyi iyoobalwana bantu ba Leza boonse alimwi akusola kubanyonyweeda limwi. Mubusinsimi bwakwe ibujatikizya ciindi eeco, mwaapostolo Johane wakaamba kuti civwulamabwe cipati ciyoobalokela basinkondonyina Leza. Civwulamabwe cacikozyanyo eeco ambweni ciiminina mulumbe mukali uuyakwaambilizyigwa abantu ba Jehova ooyo uuyoopa kuti Gogo waku Magogo abalwane bantu ba Leza kajisi makanze aakubanyonyoona boonse.—Ciy. 16:21. w20.05 15 ¶13-14

Muuya uusalala wa Leza ncipego ncotweelede kulumba. Tulakonzya kulumba kapati akaambo kamuuya uusalala kwiinda mukuyeeya zintu muuya uusalala nzyowazuzikizya mumazuba eesu. Katanaunka kujulu, Jesu wakaambila basikwiiya bakwe kuti: “Muyootambula nguzu muuya uusalala waakusika alindinywe, eelyo muyooba bakamboni bangu . . . kusikila kumasena aakulamfwu kapati aanyika.” (Mil. 1:8) Kwiinda mulugwasyo lwamuuya uusalala, bakombi ba Jehova ibainda ku 8.6 miliyoni babunganizyigwa kuzwa kumabazu oonse aanyika. Alimwi tulikkomene muparadaiso yakumuuya akaambo kakuti muuya wa Leza ulatugwasya kuba abube bubotu kapati, mbuli luyando, lukkomano, luumuno, kukkazika moyo, luzyalo, bubotu, lusyomo, kubomba moyo alimwi akulilesya. Bube oobu mbobupanga “mucelo wamuuya.” (Gal. 5:22, 23) Eelo kaka muuya uusalala ncipego cibotu kapati! w20.05 28 ¶10; 29 ¶13

Kuli twaambo tunji itutupa kuyeeya kuti aabo banikwaanzya bantu bayoobusyigwa bayoobazyiba bayandwa babo. Mucikozyanyo, kweelana abubuke bwakacitika kaindi, kulangilwa kuti Jehova uyoopa kuti bantu ibayoobusyigwa, kabaambaula, kuyeeya alimwi akulibonya mbubwenya mbobakabede kabatanafwa. Amuyeeye kuti Jesu wakakozyanisya lufwu kukoona, mpoonya bubuke kukubusyigwa kuzwa muŋonzi. (Mt. 9:18, 24; Joh. 11:11-13) Ciindi bantu nobabuka kuzwa muŋonzi, tabacinci mbobalibonya, mbobaambaula alimwi ambobayeeya. Amuyeeye buyo cikozyanyo ca Lazaro. Wakalifwide kwamazuba one, aboobo mubili wakwe wakalitalikide kale kubola. Nokuba boobo, ciindi Jesu naakamubusya, bacizyi bakwe bakamuzyiba mpoonya aawo alimwi awalo wakabazyiba.—Joh. 11:38-44; 12:1, 2. w20.08 14 ¶3; 16 ¶8

Munzila zimwi, bananike alimwi abambelele zimbi baleelene. Boonse Jehova ulabayanda. Eeci cili boobu akaambo kakuti muulo ngwaakabbadela kuula bananike alimwi abambelele zimbi uleelene, nkokuti buumi bwa Mwanaakwe ngwayandisya. Lwiindano luliko ndwakuti bajisi bulangizi bwiindene. Pele boonse beelede kuzumanana kusyomeka kuli Leza alimwi akuli Kristo. (Int. 31:23) Alimwi amuyeeye kuti, Jehova ulapa muuya wakwe uusalala ngwayandika muntu umwi aumwi, tacikwe makani naa muntu ooyo munanike naa ngwambelele zimbi. Jehova wakamupa bulangizi bubotu kapati umwi aumwi wababelesi bakwe balyaabide. (Jer. 29:11) Ciibalusyo calufwu lwa Kristo citupa coolwe cilibedelede toonse, cakutembaula Leza a Kristo akaambo kancobakatucitila kutegwa tukabe abuumi butamani. Ciibalusyo muswaangano uuyandika kapati ooyo Banakristo bakasimpe ngobacita mwaka amwaka. w21.01 18 ¶16; 19 ¶19

Bunji bwabantu ibajanika ku Ciibalusyo bajisi bulangizi bwakuyoopona anyika. Pele ino nkaambo nzi ncobajanika? Balacita oobo mbubwenya bantu ibajanika kumucado wabalongwe mbobacita. Balacita oobo akaambo kakuyanda kugwasyilizya basikukwatana alimwi akutondezya luyando ndobajisi kulimbabo. Mbubwenya buyo, bambelele zimbi balajanika ku Ciibalusyo akaambo kakuti bayanda kugwasyilizya Kristo abananike, alimwi akutondezya luyando ndobajisi kulimbabo. Kuyungizya waawo, bambelele zimbi balajanika kutegwa batondezye kuti balalumba kucipaizyo ca Jesu, calo cipa kuti cikonzyeke kulimbabo kuyoopona kukabe kutamani anyika. Akambi kaambo kayandika kapati ikapa kuti bambelele zimbi kabajanika ku Ciibalusyo, nkumvwida mulawo wa Jesu. Ciindi Jesu naakatalisya Mulalilo wa Mwami antoomwe abaapostolo bakwe basyomeka, wakabaambila kuti: “Kamucita oobu lyoonse kutegwa kamundiyeeya.” (1Kor. 11:23-26) Aboobo bambelele zimbi balazumanana kujanika ku Mulalilo wa Mwami kufwumbwa buyo kuti bananike kabaciliko aano anyika. w21.01 17-18 ¶13-14

Kutegwa luyando lube lwini-lwini, lweelede kutondezyegwa amumilimo. (Amweezyanisye Jakobo 2:17, 26.) Mucikozyanyo, Jehova ulatuyanda. (1Joh. 4:19) Alimwi ulalutondezya luyando oolo kwiinda mumajwi mabotu aalembedwe mu Bbaibbele. (Int. 25:10; Rom. 8:38, 39) Pele tulizyi kuti Leza ulatuyanda ikutali buyo akaambo kazintu nzyatwaambila pele akaambo kazintu nzyacita. Jehova wakazumizya kuti Mwanaakwe uuyandwa apenge alimwi akutufwida. (Joh. 3:16) Sena inga twadooneka kuti Jehova ulatuyanda ncobeni? Tulatondezya kuti tulamuyanda Jehova alimwi a Jesu kwiinda mukubamvwida. (Joh. 14:15; 1Joh. 5:3) Alimwi cacigaminina Jesu wakatulailila kuti katuyandana. (Joh. 13:34, 35) Tatweelede kubaambila buyo kuti tulabayanda bakwesu abacizyi, pele alimwi tweelede kutondezya kuti tulabayanda kwiinda muzintu nzyotucita.—1Joh. 3:18. w21.01 9 ¶6; 10 ¶8

Aabo bananikidwe amuuya uusalala bayoolela a Jesu mu Bwami bwa Leza. Bajisi bulangizi bwakuyooba antoomwe a Kristo, kumubona, kubandika anguwe alimwi akuyanzana anguwe mane kukabe kutamani. (Joh. 14:2, 3) Aabo ibajisi bulangizi bwakuyoopona anyika abalo banooyandwa alimwi akubikkilwa maano a Jesu. Nokuba kuti kunyina nobayakumubona Jesu, cilongwe cabo anguwe ciyooyuma kapati ciindi nobanookkomana abuumi Jehova alimwi a Jesu mbobakapa kuti bukonzyeke. (Is. 9:6, 7) Ciindi notukuzumina kutamba kwa Jesu kwakuba balongwe bakwe, tulajana zilongezyo zinji. Mucikozyanyo, tulagwasyigwa kuluyando alimwi alugwasyo lwakwe lino. Tulijisi coolwe cakuyoopona mane kukabe kutamani. Alimwi kwiinda zyoonse, cilongwe cesu a Jesu ciyootupa kuba acilongwe ciinda kubota, nkokuti cilongwe a Jehova. Eelo kaka tujisi coolwe cilibedelede cakuba balongwe ba Jesu! w20.04 25 ¶15-16

Mwaapostolo Paulo wakalembela Banakristo bananike ibaku Korinto, aabo ibakali kuyoobusyilwa kubuumi bwakujulu. Banakristo aabo ‘bakasalazyigwa kuba basikwiiya ba Kristo Jesu, akwiitwa kuba basalali.’ Alimwi wakaamba kujatikizya ‘baabo boona mulufwu kabakamantene a Kristo.’ (1Kor. 1:2; 15:18; 2Kor. 5:17) Mulugwalo lumbi, Paulo wakalemba zyabaabo ‘ibakamantane a Jesu mulufwu luli mbuli lwakwe,’ kuti ‘bayookamantana alimwi anguwe mububuke buli mbuli bwakwe.’ (Rom. 6:3-5) Jesu wakabusyigwa kali cilenge camuuya akuunka kujulu. Aboobo eeci nceciyoocitika akuli baabo “bakamantene a Kristo,” nkokuti bananike boonse. Paulo wakalemba kuti Kristo wakabusyigwa kali “micelo mitaanzi yabaabo bakoona mulufwu.” (1Kor. 15:20) Jesu wakali wakusaanguna kubusyigwa kuzwa kubafwu kali cilenge camuuya akutambula buumi butamani. w20.12 5-6 ¶15-16

Banakristo bananike ibafwa lino balabusyigwa mukulaba kwaliso kubuumi bwakujulu. Kaambo aaka kalasinizyigwa mumajwi aa mwaapostolo Paulo aalembedwe kulugwalo lwa 1 Bakorinto 15:51, 52. Ciindi nobabusyigwa, banabokwabo Kristo aaba balakkomana kapati. Ibbaibbele lilatwaambila mulimo ngobayoocita kujulu aabo ‘ibabusyigwa mukulaba kwaliso.’ Kujatikizya mbabo, Jesu wakaamba boobu: “Ooyo uuzunda akucita milimo yangu mane kusikila kumamanino, ndiyoomupa nguzu zyakweendelezya masi, alimwi bantu uyoobeembela ankoli yabutale cakuti bayoopwayaulwa mbuli mbozipwayaulwa zibelesyo zyabulongo, mbubonya andime mbondatambula kuzwa kuli Taata.”—Ciy. 2:26, 27. w20.12 12 ¶14-15

Kwiinda mukwaamba Jesu kuti “micelo mitaanzi,” mwaapostolo Paulo wakali kupandulula kuti abamwi kumbele bakali kuyoobusyilwa kubuumi bwakujulu. Baapostolo alimwi abamwi “bakamantene a Kristo” bakali kuyoomutobela Jesu. (1Kor. 15:18) Kumbele, bakali kuyoobusyilwa kubuumi bwakujulu mbubwenya mbuli Jesu. Kubusyilwa kujulu kwabaabo “bakamantene a Kristo” tiikwalinatalika kucitika ciindi Paulo naakalembela bana Korinto. Muciindi caboobo, Paulo wakali kwaamba ciindi cakumbele naakati: “Umwi aumwi ulabusyigwa aciindi cakwe ceelede: kusaanguna Kristo uuli njemicelo mitaanzi, mpoonya aabo bazulilwa kuli Kristo bayoobusyigwa kuciindi cakubako kwakwe.” (1Kor. 15:23; 1Tes. 4:15, 16) Mazuba aano tupona muciindi eeco cakasinsimwa kuti “kubako” kwa Kristo. Baapostolo alimwi a Banakristo bananike bamwi ibakafwa bakeelede kulindila ciindi eeco cakubako kwa Kristo, kutegwa batambule bulumbu bwabo bwakujulu alimwi ‘akukamantana anguwe mububuke buli mbuli bwakwe.’—Rom. 6:5. w20.12 5 ¶12; 6 ¶16-17

Mwaapostolo Paulo wakali kwaamba muntu iwabusyigwa amubili wakujulu, nkokuti, “mubili wamuuya.” (1Kor. 15:43, 44) Ciindi Jesu naakali anyika, wakajisi mubili wanyama. Pele naakabusyigwa, “wakaba muuya uupa buumi” akujokela kujulu. Mbubwenya buyo, abalo Banakristo bananike balabusyigwa amibili yamuuya. Paulo wakaamba kuti: “Mbwaanga tuli mucinkozya cayooyo wakabumbwa abulongo, mbubonya buyo tuyooba mucinkozya cayooyo wakazwa kujulu.” (1Kor. 15:45-49) Amuyeeye kuti Jesu tanaakabusyigwa amubili wanyama. Aboobo ciindi Paulo naakali afwaafwi kumanizya mubandi wakwe, wakapandulula ncocili boobo ciindi naakati: “Mubili wanyama abulowa taukonzyi kunjila mu Bwami bwa Leza” kujulu. (1Kor. 15:50) Baapostolo alimwi abananike bamwi tiibakali kukonzya kubusyilwa kubuumi bwakujulu amibili yanyama alimwi abulowa iikonzya kubola. w20.12 10-11 ¶10-12

Leza wakasololela basikwiiya ba Jesu bamwi mumwaanda wamyaka wakusaanguna kuti balembe kujatikizya bulangizi bwakujulu. Mwaapostolo Johane wakapandulula kuti: “Tuli bana ba Leza, pele takunayubununwa pe mbotuyooba kumbele. Tulizyi kuti aakuyubununwa tuyooba mbuli nguwe.” (1Joh. 3:2) Banakristo bananike tabazyi mbobayooba ciindi baakubusyilwa kubuumi bwakujulu kabajisi mibili yamuuya. Nokuba boobo, bayoomubona Jehova ciindi baakupegwa bulumbu bwabo. Bbaibbele lilaamba makani amwi kujatikizya bubuke oobu. Bananike banooli antoomwe a Kristo ‘baakunyonyoona mfwulumende zyoonse abweendelezi boonse alimwi anguzu zyoonse.’ Eeci cilabikkilizya ‘asinkondo wamamanino uuyoonyonyoonwa, ilufwu.’ Mpoonya, Jesu abalelinyina ‘bayoolibombya alimwi akubombya zintu zyoonse kuli Jehova.’ (1Kor. 15:24-28) Eelo kaka eeci cinooli ciindi cikkomanisya! w20.12 8 ¶2

Banakristo basyomeka boonse ibatajisi bulangizi bwakuyoopona a Kristo kujulu abalo balijisi bulangizi bwabubuke. Bbaibbele lyaamba kuti mwaapostolo Paulo alimwi abamwi ibaunka kujulu babusyilwa “mububuke bwakusaanguna kuzwa kubafwu.” (Flp. 3:11) Sena majwi aaya taatondezyi kuti kunooli bubuke bumbi? Eeci cileendelana ancaakaamba Jobu kujatikizya icakali kuyoomucitikila kumbele. (Job. 14:15) Mpoonya ‘aabo bazulilwa kuli Kristo ibayoobusyigwa kuciindi cakubako kwakwe’ banooli kujulu antoomwe a Jesu ciindi aakunyonyoona mfwulumende zyoonse abweendelezi boonse alimwi anguzu zyoonse. Naba ‘sinkondo wamamanino, nkokuti lufwu,’ uyoonyonyoonwa. Boonse aabo babusyilwa kubuumi bwakujulu kunyina nobayoofwa alimwi. (1Kor. 15:24-26) Aabo bajisi bulangizi bwakuyoopona anyika balakonzya kuba abulangizi kuzwa kumajwi ngaakaamba Paulo aajanika mulugwalo lwabuzuba bwasunu. Aboobo cilisalede kuti kunyina uutaluleme uukonzya kuunka kujulu, nkokuti majwi aaya atondezya kuti kumbele kuyooba bubuke aano anyika. w20.12 6-7 ¶18-19

Tulakonzya kulibuzya kuti, ‘Mbuti mbondikonzya kusinizya kuti Jehova wakandilekelela ncobeni?’ Kulibuzya mubuzyo ooyu, ncitondezyo cakuti Jehova ulakonzya kumulekelela. Myaka minji yainda, Ngazi Yamulindizi imwi yakaamba kuti: “Tulakonzya kunoocita cibi ncimunya cakwiinduluka-induluka. Cilakonzya kuba boobo ambweni akaambo kakuti tiitwakacileka cibi eeco katutanatalika kubelekela Leza. . . . Mutanoolimvwi kuti mwacita cibi citakonzyi kulekelelwa. Oobu mbombubo Saatani mbwaayanda kuti kamulimvwa. Kulimvwa bubi ooko naa kuusa ncitondezyo cakuti tamuli babi alimwi akuti Jehova ulakonzya kumulekelela. Kamuzumanana kulicesya akupaila kulomba kulekelelwa a Leza, kuti amugwasye kuba amanjezeezya aasalala alimwi akuti amugwasye kutaciinduluka alimwi cibi eeco. Katanaba Munakristo, mwaapostolo Paulo wakacita zibi zipati zinji. Paulo wakali kuziyeeya zintu nzyaakacita. (1Tim. 1:12-15) Pele cinunuzyo wakacibona kuba cipego cimugeme. Aboobo Paulo wakakeeleba kakole kakuciindizya kulipa mulandu akubikkila buyo maano kukubelekela Jehova camoyo woonse kuzwa ciindi naakaba Munakristo kuya kumbele. w20.11 27 ¶14; 29 ¶17

Saatani ulatusunka kwiinda mukubelesya zintu zinji kutegwa tucite cibi. Ino tucita buti? Ncuubauba kuyeeya kuti zintu eezyi kunyina mbozikonzya kundicita. Mucikozyanyo, tulakonzya kuyeeya kuti: ‘Tandikonzyi kugusyigwa mumbungano akaambo kakucita oobo, aaya taali makani mapati boobo.’ Kuyeeya kuli boobu kulilubide kapati. Inga twacita kabotu kulibuzya mibuzyo mbuli bwayeeyi: ‘Sena Saatani ubelesya sunko eeli kusola kundipa kuba aamyoyo yobilo? Ikuti naa ndazundwa akulombozya kubyaabi, sena inga ndaleta masampu kuzina lya Jehova? Sena kucita cintu eeci inga kwandipa kuswena afwaafwi a Leza wangu naa inga kwandipa kuba kulamfwu anguwe?’ Amuzinzibale kuyeeya kujatikizya mibuzyo eeyi. Amupailile busongo kutegwa mibuzyo eeyi muyiingule cakusyomeka alimwi kakunyina kulyeena. Kucita boobo kulakonzya kumukwabilila kapati. Kulakonzya kumugwasya kukaka sunko cabusicamba mbubwenya mbwaakacita Jesu naakaamba kuti: “Kozwa aawa Saatani!” (Mt. 4:10) Amuyeeye kuti kuba amyoyo yobilo takugwasyi pe. w20.06 12-13 ¶16-17

Cakulicesya tulazitobela zyeelelo zya Jehova akaambo kakuti tulizyi kuti Jehova lyoonse ulizyi zintu izikonzya kutugwasya. (Ef. 4:22-24) Kulicesya kulatugwasya kubikka kuyanda kwa Jehova mubusena bwakusaanguna kwiinda zintu nzyotuyanda swebo alimwi akubona bamwi kuti balayandika kwiinda ndiswe. Aboobo tulaba acilongwe cibotu a Jehova alimwi abasyomima. (Flp. 2:3) Ikuti naa tiitwacenjela, tulakonzya kuyungwa abantu bamubweende bwazintu bwa Saatani ibalisumpula alimwi ibaliyanda. Kulangilwa kuti Banakristo bamwi bamumwaanda wamyaka wakusaanguna C.E., bakayungwa munzila eeyi, nkakaambo kaako mwaapostolo Paulo wakalembela bana Roma kuti: “Ndaambila nyoonse ooko kuti mutayeeyi kuti mulayandika kapati kwiinda bwini mbomubede, pele kamuyeeya kabotu.” Paulo wakalizyi kuti tuyandika kuyeeya zintu zimwi zijatikizya ndiswe. Nokuba boobo, kulicesya kuyootugwasya kuzumanana kulibona munzila yeelede kwiinda bwini mbotubede. w20.07 2 ¶1-2

Mumazuba aa Asa, ciindi caluumuno tiicakazumanana. Impi yabasikalumamba ibainda ku 1 miliyoni yakasika kuzwa ku Etiopiya. Musololi wabo Zera, wakali aalusyomo lwakuti walo alimwi ampi yakwe bakali kuyoobazunda ba Juda. Pele walo Asa wakasyoma Jehova Leza wakwe ikutali myeelwe yabasikalumamba. Wakapaila kuti: “Kotugwasya, O Jehova Leza wesu, nkaambo tusyoma nduwe alimwi muzina lyako twaboola kuti tulwane nkamu eeyi.” (2Mak. 14:11) Impi yabana Etiopiya yakajisi basikalumamba banji ibainda kuvwula ziindi zitandila kuli zyobilo kumweelwe wampi yabasikalumamba ba Asa, pele Asa wakalizyi kuti Jehova ulaanguzu alimwi akuti ulakonzya kubagwasya bantu bakwe. Jehova wakabagwasya bantu bakwe. Impi yabana Etiopiya yakazundwa. (2Mak. 14:8-13) Nokuba kuti tatuzyi bwini mbobunoobede bukkale bwaumwi aumwi wesu kumbele, tulizyi kuti kufwumbwa ciindi, luumuno ndobajisi bantu ba Leza luyoomana. Kamuyeeya kuti, Jesu wakasinsima kuti mumazuba aamamanino, basikwiiya bakwe ‘bayoosulwa amasi oonse.’—Mt. 24:9. w20.09 17-18 ¶14-16

Taakwe uubotelwa kutukilwa. Nokuba boobo, ikuti naa basinkondoma batutukila, mpoonya twanyema kapati azintu nzyobaamba, tulakonzya kutyompwa. (Tus. 24:10) Pele ino tweelede kulimvwa buti ciindi notwatukilwa abasikutukazya? Mbubwenya mbuli mwaapostolo Paulo, tulakonzya ‘kubotelwa ciindi notutukilwa.’ Nkaambo nzi? Akaambo kakuti kutukilwa alimwi akukazyigwa nzitondezyo zyakuti tuli basikwiiya ba Jesu beni-beni. (1Pet. 4:14) Jesu wakaamba kuti basikumutobela bakali kuyoopenzyegwa. (Joh. 15:18-20) Eeci cakacitika mumwaanda wamyaka wakusaanguna. Kuciindi eeco, aabo ibakali kuyungwa azilengwa zya Chigiriki, bakali kubona Banakristo kuti mbafwubafwuba alimwi tabajisi nguzu. Ba Juda bakali kubona Banakristo kuti “bakali bantu-bantu buyo,” mbubwenya mbuli mwaapostolo Petro alimwi a Johane. (Mil. 4:13) Banakristo bakali kulibonya mbuli kuti tabajisi nguzu; kayi tiibakali kutola lubazu mutwaambo twamapolitikisi, aboobo bantu tiibakali kubalemeka. Sena Banakristo bamumwaanda wamyaka wakusaanguna bakatyompwa akaambo kabaabo ibakali kubakazya? Peepe. w20.07 14-15 ¶3-4

Mwaapostolo Johane wakali kubayanda kapati basyominyina alimwi wakali kuyanda kuti babe alusyomo luyumu. Luyando ndwaakajisi kulimbabo alimwi ambwaakali kubabikkila maano zilalibonya kabotu-kabotu mululayo ndwaakabapa mumagwalo aakwe otatwe. Eelo kaka cilakulwaizya kuzyiba kuti aabo ibayoolela antoomwe a Jesu kujulu, abalo balijisi luyando alimwi balabikkila maano mbubonya mbwaakali kucita Johane! (1Joh. 2:27) Aabe makanze eesu ikulutobela lulayo ndwaakapa. Atuzumanane kweenda mukasimpe, nkokuti kumumvwida Jehova mumbazu zyoonse zyabuumi bwesu. Amuliiye Jwi lyakwe alimwi akulisyoma. Amube alusyomo luyumu muli Jesu. Amubukake busongo bwabantu alimwi anjiisyo zyabasiluleyo. Amukweelebe kupona buumi bwakuupaupa ameso alimwi akucita zintu zibyaabi. Amupone kweelana azyeelelo zya Jehova zyakulilemeka izisumpukide. Alimwi atubagwasye bakwesu kuzumanana kuyuma kwiinda mukubalekelela aabo ibatunyemya alimwi akugwasya baabo ibabulide. Ikuti twacita oobo, nokuba kuti twajana buyumuyumu, tuyoozumanana kweenda mukasimpe. w20.07 24-25 ¶15

Caluyando, Jehova wakapa mubelesi wakwe uuli woonse uusyomeka busena mumbungano. Nokuba kuti tucita milimo yiindene-indene, toonse tulayandika kapati alimwi tuyandika kugwasyanya. Mwaapostolo Paulo wakakulwaizya kuti kunyina mubelesi wa Jehova iweelede kwaambila mubelesinyina kuti: “Tokwe mulimo kulindime.” (1Kor. 12:21) Kutegwa kube luumuno mumbungano, tweelede kubikkilana maano alimwi akubelekela antoomwe. (Ef. 4:16) Kuti katubelekela antoomwe calukamantano, aumwi uyoolimvwa kuyandwa alimwi mbungano iyooyuma. Baalu boonse bakasalwa amuuya uusalala wa Jehova. Pele aumwi ulijisi cipego ciindene. (1Kor. 12:17) Ambweni bamwi bakasalwa caino-ino, aboobo tabajisi luzyibo lunji. Ibamwi tabakonzyi kucita zinji akaambo kakucembaala alimwi akuciswa-ciswa. Nokuba boobo, taakwe mwaalu iweelede kwaambila mwaalunyina kuti, “Tokwe mulimo kulindime.” Muciindi caboobo, mwaalu uuli woonse weelede kulutobela lulayo lwa Paulo iluli kulugwalo lwa Baroma 12:10. w20.08 26 ¶1-2; 27 ¶4

Jehova ulatusololela munzila iitola kubuumi kwiinda mucibeela cambunga yakwe yaanyika. Ciindi mbunga ya Leza noitupa bupanduluzi bupya bwanjiisyo yamu Bbaibbele naa busolozi bujatikizya zyeelelo zyakulilemeka, tulabutambula alimwi akubutobela. Pele ino tucita buti ciindi mbunga ya Leza noyapanga kucinca ikutujatikizya, mbuli kusambalwa kwa Ŋanda ya Bwami njotubelesya? Tuyoozumanana kukkomana ikuti katuyeeya kuti mulimo ngotucita nguwa Jehova alimwi akuti nguusololela mbunga yakwe. (Kol. 3:23, 24) Mwami Davida wakapa cikozyanyo cibotu ciindi naakasanga mali aakuyasya tempele. Wakaamba kuti: “Ino mebo ndime ni alimwi abantu bangu mbaani, kuti tukonzye kupa zyakusanga zyakuliyandila mbuli zyeezyi? Nkaambo zintu zyoonse zizwa kulinduwe, alimwi zintu nzitwakupa zizwa mujanza lyako.” (1Mak. 29:14) Ciindi notwasanga mali, tupa Jehova zintu zizwa mujanza lyakwe. Nokuba boobo, Jehova ulalumba ciindi notwaaba ciindi, nguzu alimwi amali kugwasyilizya mulimo ngwayanda kuti ucitwe.—2Kor. 9:7. w20.11 22-23 ¶14-16

Mbotuli Bakamboni ba Jehova, kuzwidilila kwesu takuyeeme abunji bwabantu mbotuleta mumbunga ya Leza. (Lk. 8:11-15) Kuti naa twazumanana kukambauka makani mabotu akuyiisya bantu, Jehova utubona kuti twazwidilila mumulimo wesu. Nkaambo nzi? Nkaambo tulamumvwida walo alimwi a Mwanaakwe. (Mk. 13:10; Mil. 5:28, 29) Tujisi kaambo ikatukulwaizya kuubeleka canguzu kapati mulimo wakukambauka lino kakuti, mamanino aabweende bwazintu oobu aswena aafwaafwi! Ciindi casyaala cakukambauka kutegwa tufwutule buumi bwabantu caceya kapati. Aboobo mutawayi-wayi naa kuyeeya kuti muyootola lubazu mumulimo ooyu uuyandika kapati ciindi zintu zyaakuba kabotu. Amubweze ntaamu lino kutegwa mube aluyandisisyo lwakukambauka, muyungizye luzyibo lwanu, mube basicamba alimwi akuba abube bwakulyeendelezya. Amubasangane bazubi babantu ibainda ku 8 miliyoni, mpoonya muyooba alukkomano lwa Jehova. (Neh. 8:10; Lk. 5:10) Amube amakanze aakubeleka kusikila mpomugolela mumulimo ooyu alimwi akuzumanana kusikila ukamane. w20.09 7 ¶18-20

Tatweelede kunyonganizyigwa kwiinda mukuyanda kuba azintu zyakumubili zinji. “Koongelezyegwa kwalubono” kulakonzya kucesya luyando lwesu kuli Jehova, kulumba akaambo ka Jwi lya Leza alimwi aluyandisisyo lwesu lwakwaambila bamwi izili mulindilyo. (Mt. 13:22) Kutegwa tukwabilile zintu nzyaakatupa Jehova, tweelede kufwambaana kubweza ntaamu ciindi notwabona ntenda. Tulakonzya kuyeeyela limwi ncotukonzya kucita ikuti cakutayeeyela twabona zintu izitali kabotu, nkondo naa makani aabasiluleyo ciindi notubelesya Intaneti naa ciindi notweebelela filimu naa pulogilamu yaa TV. Ikuti twayeeyela limwi ncotukonzya kucita, tulakonzya kubweza ntaamu cakufwambaana kutegwa tulikwabilile kumuuya alimwi akuzumanana kusalala mumeso aa Jehova. (Int. 101:3; 1Tim. 4:12) Tweelede kuzikwabilila zintu nzyaakatupa Jehova, nkokuti kasimpe kamu Bbaibbele kayandisi alimwi acoolwe cakukayiisya bamwi. Kuti twacita oobo, tuyooba amanjezyeezya aasalala, tunoopona buumi ibulaampindu alimwi tuyooba alukkomano iluboola akaambo kakugwasya bamwi kumuzyiba Jehova. w20.09 30 ¶16-19

Sena mulibbapatizyidwe? Kuti kacili boobo, ciindi nomwakabbapatizyigwa, mwakatondezya kubuleya kuti mulijisi lusyomo muli Jehova alimwi akuti mulayanda kumubelekela. Mazuba aano, Jehova usololela mbunga yakwe munzila iitondezya bube bwakwe, makanze alimwi azyeelelo zyakwe. Amubone bube bwa Jehova botatwe ibulibonya mumbunga yakwe. Bube bwakusaanguna, “Leza tasalululi.” (Mil. 10:34) Luyando ndolwakapa Jehova kuti ape Mwanaakwe kacili ‘cinunuzyo cabantu boonse.’ (1Tim. 2:6; Joh. 3:16) Jehova ubelesya bantu bakwe kukambauka makani mabotu kubantu boonse ibalibambilide kuswiilila. Kwiinda mukucita boobu, Jehova upa bantu boonse coolwe cakuti bagwasyigwe acinunuzyo. Bube bwabili, ‘Jehova tali Leza wamanyongwe pe, pele ngwaluumuno.’ (1Kor. 14:33, 40) Aboobo, bakombi bakwe beelede kumubelekela munzila iitali yamanyongwe alimwi acaluumuno. Bube bwatatu, Jehova ‘Mwiiyi Mupati.’ (Is. 30:21) Nkakaambo kaako mbunga yakwe ilabikkila maano kuyiisya bantu Jwi lyakwe ilyakasololelwa amuuya mumbungano alimwi amumulimo wamumuunda. w20.10 20 ¶1-3