July

Tweelede kuba acilongwe a Jesu kutegwa mipailo yesu kayiingulwa. Eeci caamba kuti tatweelede kwaamba buyo majwi aakuti “kwiinda muzina lya Jesu” cakwiinzya buyo mulawo. Tweelede kuzyiba Jehova mbwamubelesya Jesu kutegwa mipailo yesu yiingulwe. Jesu wakaambila basikwiiya bakwe kuti: “Kufwumbwa ncomulomba muzina lyangu, ndiyoocicita cintu eeco.” (Joh. 14:13) Nokuba kuti Jehova ngonguwe uuswiilila akwiingula mipailo yesu, wakapa Jesu nguzu kutegwa azuzikizye kuyanda kwakwe. Aboobo Leza katanayiingula mipailo yesu, ulabona naa twakalutobela lulayo ndwaakapa Jesu. Mucikozyanyo, Jesu wakaamba kuti: “Nkaambo kuti kamulekelela bantu milandu yabo, awalo Uso uuli kujulu uyoomulekelela; pele kuti kamutalekeleli bantu milandu yabo, awalo Uso takamulekeleli milandu yanu.” (Mt. 6:14, 15) Eelo kaka cilayandika kapati kuti katweendelezya bamwi mbubwenya Jehova alimwi a Jesu mbobatweendelezya! w20.04 22 ¶6

Mwaapostolo Paulo wakazibona zintu nzyobakali kukkomanina baswiilizi bakwe, mpoonya wakali kuzibelesya kutalisya mubandi. Mucikozyanyo, nkamu yabantu mbaakabandika limwi ku Lustro bakajisi buyo luzyibo lusyoonto kujatikizya Magwalo naa tiibakajisi luzyibo buya. Aboobo Paulo wakabelesya nzila njobakali kukonzya kumvwisya. Wakaamba kujatikizya kutebula micelo minji alimwi akukkomana mubuumi. Wakabelesya mabala mauba-uba alimwi azikozyanyo zyatakali kukatazya kubaswiilizi bakwe. Amubelesye bupampu kutegwa muzyibe zintu nzyobakkomanina bantu mucilawo canu alimwi akucinca mubandi. Ino mbuti mbomukonzya kuzyiba zintu nzyakkomanina muntu ciindi nomwamuswaanya naa nomwasika aŋanda? Amubikkile maano. Ambweni ulalima mugaadeni, ubala bbuku, ubamba mootokala naa ucita cintu cimwi buyo. Kuti kacikonzyeka, mbuti kuti mwatalisya mubandi kweelana acintu eeco ncacita? (Joh. 4:7) Mbwasamide muntu cilakonzya kwaamba cintu cimwi, nkokuti cisi nkwazwa, mulimo ngwabeleka naa cisobano ncayandisya. w20.04 11 ¶11-12

Akaambo kakulibilika kapati, bakwesu alimwi abacizyi bamwi balayoowa kapati mubukkale bwabuzuba abuzuba. Cilakonzya kubakatazya kapati kuba akati kabantu banji, pele balazumanana kujanika lyoonse kumiswaangano yambungano, yabbazu alimwi ayacooko. Cilabakatazya kubandika abantu mbobatazyi, nokuba boobo balabandika abantu mumulimo wamumuunda. Ikuti naa mbocibede oobo akulindinywe, amuzyibe kuti tamuli nyolikke pe. Bantu banji mbobalimvwa mbubwenya oobo. Amuzyibe kuti Jehova ulakkomana kapati amilimo njomubeleka camoyo woonse. Kuzumanana kwanu ncitondezyo cakuti uli mukumulongezya alimwi akumupa nguzu nzyomuyandika. (Flp. 4:6, 7) Kuti naa mulamubelekela Jehova nokuba kuti tamukonzyi kucita zyoonse nzyomuyanda akaambo kakuciswa naa penzi lyamumizeezo, mulakonzya kuba masimpe kuti mukkomanisya Jehova. Bunji bwesu tulaciswa-ciswa, nokuba boobo tulaliyumya. (2Kor. 4:16) Kwiinda mulugwasyo lwa Jehova, toonse tuyoozumanana kubalika mane kumamanino! w20.04 31 ¶20-21

Busongo bwa Leza bulalibonya caantangalala kweelana ambwaakaupanga munzi wesu, nkokuti nyika. (Heb. 3:4) Nyika yesu ililibedelede akaambo kakuti ilijisi zintu zyoonse izipa kuti bantu kabacikonzya kupona. Munzila imwi, nyika ili mbuli bwato ibuli mulwaanje. Pele kuli lwiindano lupati akati kabwato buzwide bantu alimwi anyika yesu. Mucikozyanyo, ino bantu bali mubwato inga bakkala kwaciindi cilamfwu buti ikuti kababelesya oxygen yabo, zyakulya, alimwi amaanzi alimwi akuti kabatasowi tombe lili lyoonse mumaanzi? Balakonzya kufwa cakufwambaana. Mukwiimpana, yalo nyika ilakonzya kuyobola bantu banji kapati alimwi abanyama kuti bazumanane kupona. Ilapanga muya wa oxygen weelede, cakulya, alimwi amaanzi ngotuyandika, alimwi kunyina notubulilwa zintu eezyi iziyandika kapati. Nokuba kuti tombe lyoonse lisowelwa anyika mpoonya, yalo ilazumanana kaili mbotu alimwi iyeelela kukkalwa bantu. Ino eeco cikonzyeka buti? Jehova nyika wakaipanga kuti kaicikonzya kulibambulula. w20.05 20 ¶3-4

Saatani wakali kwaambila Eva kuti Jehova mubeji. Akaambo kaceeci, Saatani wakaba diabolosi naa sikubejekezya. Eva wakeenwa cakumaninina; wakamusyoma Saatani. (1Tim. 2:14) Wakamusyoma kapati Saatani kwiinda mbwaakali kusyoma Jehova. Eeci cakapa kuti Eva asale cabufwuba-fwuba. Wakasala kumuzangila Jehova. Wakaulya mucelo ngwaakamukasyide Jehova. Kumane, wakamupa awalo Adamu. (Matl. 3:6) Amuyeeye kujatikizya Eva ncaakeelede kumwaambila Saatani. Mbuti kuti Eva naakaambila Saatani kuti: “Yebo tandikuzyi pe, pele Taata, Jehova ndilimuzyi alimwi ndilamuyanda akumusyoma. Ngowakatupa zintu zyoonse nzyotujisi. Nkaambo nzi ncoamba zintu zibyaabi kujatikizya nguwe? Kozwa awa!” Eelo kaka Jehova naakakkomana kumvwa majwi aaya aalusyomo kuzwa kumwanaakwe uuyandwa! (Tus. 27:11) Pele ba Adamu a Eva kunyina nobakajisi luyando lutamani kuli Jehova. Akaambo kaceeci, bakaalilwa kulikwabilila zina lyakwe kukusampaulwa. w20.06 4 ¶10-11

Bacizyi baleelede kulumbwa kuzintu zyoonse nzyobacita mumulimo wa Jehova. Zintu eezyo zibikkilizya kuyaka alimwi akubambulula mayake, kugwasyilizya tubunga tubelesya myaambo yakunze aacisi alimwi akubelekela ku Beteli. Balagwasyilizya ciindi nokwacitika ntenda zilicitikila, kusandulula mabbuku eesu, kubeleka kabali bapainiya alimwi abamisyinali. Kuyungizya waawo, bamakaintu balabagwasyilizya bamaalumi babo kutegwa bacikonzye kuzuzikizya mikuli yabo mumbungano alimwi amumbunga. Bakwesu aaba nobatacikonzyi kubeleka kabotu kabali “zipego mubantu” ikuti nobatali kugwasyilizyigwa abamakaintu babo. (Ef. 4:8) Baalu basongo balizyi kuti bacizyi “ninkamu mpati” yababelesi balisungwide alimwi kanji-kanji bacita kabotu mumulimo wakukambauka makani mabotu. Kuyungizya waawo, baalu balizyi kuti bacizyi basyomeka alimwi basimide balacita kabotu kugwasyilizya bacizyi bacili bana-bana ciindi nobajisi buyumuyumu. (Tit. 2:3-5) Masimpe, tuleelede kubalumba bacizyi aaba! w20.09 23-24 ¶13-14

Jehova tabalubi aabo ibakali kumubelekela pele lino ibakaleka kuyanzana abantu bakwe kwaciindi cili mbocibede; alimwi tailubi milimo njobakabeleka mumulimo wakwe. (Heb. 6:10) Musinsimi Isaya wakalemba cikozyanyo cibotu kapati icitondezya Jehova mbwababikkila maano bantu bakwe. Wakalemba kuti: “Mbubonya mbuli mweembezi, uyoolanganya butanga bwakwe. Ajanza lyakwe uyoobunganya twana twambelele antoomwe. Alimwi uyootunyamuna acamba cakwe.” (Is. 40:11) Ino mbuti Mweembezi Mupati mbwalimvwa ciindi mbelele yakwe imwi noyaleya kuzwa kubutanga? Jesu wakayubununa mbwalimvwa Jehova ciindi naakabuzya basikwiiya bakwe kuti: “Ino muyeeya buti? Ikuti muntu umwi kajisi mbelele zili 100 eelyo yomwe yasweeka, sena takoozisiya mumalundu eezyo zili 99 akuunka kuyooyandaula yeeyo yasweeka? Ncobeni ndimwaambila kuti, ikuti waijana ulakondwa kapati akaambo kanjiyo kwiinda zyeezyo zili 99 zyatasweekede.”—Mt. 18:12, 13. w20.06 19-20 ¶8-9

Tucibona kuba coolwe cipati kubelekela Jehova munzila iili yoonse njotukonzya. (Int. 27:4; 84:10) Ikuti mukwesu kalyaabide kubeleka kusikila mpagolela mumbunga ya Jehova, ulalumbaizyigwa kapati. Nokuba boobo, ciindi naapegwa mukuli tayelede kulibona kuti ulayandika kapati kwiinda bwini mbwabede. (Lk. 17:7-10) Makanze aakwe ayelede kuba aakuyanda kubelekela bamwi cakulicesya. (2Kor. 12:15) Bbaibbele lilijisi zikozyanyo zitucenjezya zyabantu bakali kuyeeya kuti balayandika kapati kwiinda bwini mbobabede. Cakulisumpula Diotrefe wakali kuyanda “kuba mutaanzi” mumbungano. (3Joh. 9) Mbubwenya buyo, cakulisumpula awalo Uziya wakasola kucita mulimo Jehova ngwaatakamwaambilide kucita. (2Mak. 26:16-21) Abisalomu wakali kuyanda kuba mwami, aboobo wakali koongelezya myoyo yabantu kutegwa babe kulubazu lwakwe. (2Sam. 15:2-6) Kweelana ambozitondezya zibalo eezyi zyamu Bbaibbele, Jehova tabakkomanini bantu ibaliyandawida bulemu lwabo beni. (Tus. 25:27) Mukuya kwaciindi, kulisumpula alimwi akulitukumuna kulakonzya kusololela kumapenzi.—Tus. 16:18. w20.07 4 ¶7-8

Mikwasyi ya Banakristo imwi yakalongela kuzisi zimbi kutegwa ijane lukwabililo naa mulimo. Mubukkale oobu, bana babo balakonzya kuunka kuzikolo ziyiisya mwaambo uubelesyegwa kapati mucisi eeco. Abalo bazyali balakonzya kwiiya mwaambo uubelesyegwa kapati mucisi eeco kutegwa bajane mulimo. Ino mbuti kuti kubusena nkobakkala kakuli mbungano naa kabunga kabelesya mwaambo wabo? Ino mukwasyi weelede kuunka kumbungano iibelesya mwaambo nzi? Sena nkuumbungano ibelesya mwaambo uubelesyegwa kapati mucisi naa kumbungano iibelesya mwaambo wabo? Silutwe wamukwasyi weelede kusala mbungano nkobeelede kunoounka. Weelede kubona cikonzya kugwasya mukwasyi wakwe. Akaambo kakuti aaya makani aakulisalila, tweelede kukulemeka kusala kwasilutwe wamukwasyi. Kufwumbwa ncakonzya kusala, atukulemeke kusala ooko kwiinda mukuutambula amaanza obilo mukwasyi wakwe alimwi akuutondezya luyando.—Rom. 15:7. w20.08 30 ¶17-18

Ikuti katuyanda kuba anguzu zizwa kuli Jehova, tatweelede kuyeeya kuti nguzu zyesu, lwiiyo, mbotwakakomezyegwa naa buvwubi nzyezitondezya kuti tulayandika kapati. Zintu eezyi tazili nzizyo zipa kuti tubelesyegwe a Jehova. Bwini mbwakuti, tabali bantu ba Leza boonse babonwa kuti “mbasongo mumeso aabantu, tabali banji basinguzu, tabali banji bana babami.” (1Kor. 1:26) Aboobo nokuba kuti tamuzijisi zintu zyaambwa kumatalikilo aamuncali ooyu, mulakonzya kumubelekela Jehova. Aboobo, bukkale bwanu amububone munzila yeelede. Ino inga mwacita buti oobo? Amuzyibe kuti ciindi nomutajisi zintu zipa bantu kuba ampuwo munyika, ndendilyo nomuyoolibonena Jehova mbwayoomupa nguzu. Mucikozyanyo, ikuti mwakongwa abaabo ibasoleka kupa kuti muzidooneke nzyomusyoma, amupaile kuli Jehova kutegwa amupe busicamba bwakwiiminina lusyomo lwanu. (Ef. 6:19, 20) Ikuti naa mulakatazyigwa akaambo kapenzi lyakuciswa-ciswa, amumulombe Jehova kuti amupe nguzu nzyomuyandika kutegwa mujate bubi mumulimo wakwe. Lyoonse nomubona Jehova mbwamugwasya, lusyomo lwanu lulayuma alimwi mulaba anguzu. w20.07 16 ¶9

Kuti katuyanda kubikka Bwami bwa Leza mubusena bwakusaanguna, tweelede kuba mbuli Abrahamu iwakalyaabide kukkomanisya Leza. (Mk. 10:28-30; Heb. 11:8-10) Mutalangili kuti buumi bwanu bunoonyina mapenzi. Nobaba baabo ibalyaaba kumubelekela Jehova mubuumi bwabo boonse balajana mapenzi. (Jak. 1:2; 1Pet. 5:9) Mazuba aano, tulijisi twaambo tunji kapati itutupa kubikkila maano kuzintu zyakumbele. Zintu zicitika munyika zilatondezya caantangalala kuti tuli kumamanino aamazuba aamamanino aabweende bwazintu oobu. Akati kazilongezyo zinji kapati nzyotuyoojana mubulelo bwa Bwami, nkubona bayandwa besu ibakafwa kababusyigwa. Aciindi eeco, akaambo kalusyomo lwakwe alimwi akukkazika moyo, Jehova uyoomulumbula Abrahamu kwiinda mukumubusya walo alimwi abamukwasyi wakwe kubuumi bwaanyika. Sena muyoojanika kutegwa mukabatambule? Inga mwaakujanika, ikuti mbubwenya mbuli Abrahamu, kamulibambilide kulyaaba akaambo ka Bwami bwa Leza, ikuti mwazumanana kusyomeka nokuba kuti mwajana mapenzi, alimwi akuti mwaiya kulindila Jehova cakukkazika moyo.—Mik. 7:7. w20.08 5-6 ¶13-14; 7 ¶17

Tulizyi kuti nokuba kuti twafwa, Jehova uyootubusya. Tulisinizyide kuti kunyina ncobakonzya kucita basinkondoma icikonzya kunyonganya cilongwe cesu a Jehova. (Rom. 8:35-39) Eelo kaka Jehova wakatondezya kuti musongo kapati kwiinda mukutupa bulangizi bwabubuke! Akaambo kaceeci, tatuyoowi ciindi aabo ibeendelezyegwa a Saatani nobatukonga kuti balatujaya akaambo kakukaka kucita nzyobaamba. Alimwi eeci ciyumya busicamba bwesu bwakuzumanana kusyomeka kuli Jehova. Ikuti basinkondonyina a Jehova bamukonga kumujaya, sena muyooba alusyomo lwakuti Jehova uyoomubusya? Mbuti mbomukonzya kuzyiba naa inga mwamusyoma Jehova aciindi eeco? Nzila imwi nkwiinda mukulibuzya mubuzyo wakuti, ‘Sena nzyondisala abuzuba mutuntu tusyoonto-syoonto zitondezya kuti ndilamusyoma Jehova?’ (Lk. 16:10) Mubuzyo uumbi ngwakuti, ‘Sena buumi mbondipona bulatondezya kuti ndilacisyoma cisyomezyo ca Jehova cakuti unoondilanganya muzintu zyakumubili nzyondiyandika ikuti ndasaanguna kuyandaula Bwami?’ (Mt. 6:31-33) Ikuti bwiinguzi kumibuzyo yoonse eeyi mbwakuti inzya, nkokuti munoolibambilide kusunko lili lyoonse ilikonzya kumusikila.—Tus. 3:5, 6. w20.08 17-18 ¶15-16

Tweelede kucizyiba kabotu kubelesya Jwi lya Leza. Tulaiya nzila zimwi mbotukonzya kulibelesya Jwi lya Leza kumiswaangano. Pele kuti katuyanda kugwasya bamwi kusyoma kuti kasimpe kamu Bbaibbele kalakonzya kubagwasya, tweelede kulibala Bbaibbele cakusitikila. Tweelede kubelesya Jwi lya Leza kuyumya lusyomo lwesu. Eeci caamba kuti tatweelede kwiile kulibala buyo Bbaibbele. Tweelede kuzinzibala kuyeeya nzyotubala alimwi akuvwuntauzya mumabbuku eesu kutegwa tumvwisye alimwi akucita ncaamba Magwalo. (1Tim. 4:13-15) Kuti twacita oobo, tuyoocikonzya kulibelesya Bbaibbele kuyiisya bamwi. Eeci caamba kuti tatweelede kwiile kubabalila buyo tupango twamu Bbaibbele. Tuyanda kugwasya baswiilizi besu kukamvwisya kapango alimwi akubona mbokabajatikizya. Kwiinda mukulibala Bbaibbele cakusitikila, tulakonzya kuba bamayi ba Bbaibbele bacibwene.—2Tim. 3:16, 17. w20.09 28 ¶12

Tulakonzya kuzumanana kubikkila maano kumulimo wakukambauka kuti naa twayeeya kujatikizya Jehova mbwatugwasya. Mucikozyanyo, ulatupa zyakulya zyakumuuya zinji kapati, mbuli mabbuku aasimbidwe, aa intaneti, zyakuswiilila zyakalekkoodwa, mavidiyo alimwi a JW Broadcasting. Amuyeeye buyo kujatikizya webbusaiti yesu ya jw.org, kuli makani manji aali mumyaambo yiinda ku 1,000! (Mt. 24:45-47) Nzila imwi motukonzya kubikkila maano kumulimo wakukambauka nkwiinda mukutobela cikozyanyo ca Jesu. Kunyina naakazumizya cintu cili coonse kuti cimunyonganye kucita mulimo wakwe wakupa bumboni kujatikizya kasimpe. (Joh. 18:37) Kunyina naakoongelezyegwa ciindi Saatani naakamutondezya “mami oonse aamunyika abulemu bwangawo”; naa kusunkwa ciindi bamwi nobakali kuyanda kumubikka kuba mwami. (Mt. 4:8, 9; Joh. 6:15) Kunyina naakoongelezyegwa amuuya wakuyandisya zintu zyakumubili; naa kukongwa abasikumukazya. (Lk. 9:58; Joh. 8:59) Ciindi lusyomo lwesu nolwasunkwa, tulakonzya kubikkila maano ikuti twayeeya lulayo lwamwaapostolo Paulo luli mulugwalo lwabuzuba bwasunu. w20.09 9-10 ¶6-7

Eelo kaka tulikkomene kuba abacizyi banji ibabeleka canguzu mumbungano! Balatola lubazu lyamiswaangano alimwi amumulimo wamumuunda. Bamwi balagwasyilizya mukubambulula Maanda aa Bwami alimwi balababikkila maano bakombinyina. Nokuba boobo, balajana buyumuyumu. Bamwi balanganya bazyali babo bacembeede. Ibamwi balakazyigwa abanamukwasyi. Mpoonya bamwi mbazyali ibali balikke ibabeleka canguzu kutegwa babajanine nzyobayandika bana babo. Nkaambo nzi ncotweelede kubagwasya bacizyi? Nkaambo kakuti kanji-kanji bantu munyika tababapi bulemu ibubeelede bamakaintu. Kuyungizya waawo, Bbaibbele litukulwaizya kubagwasya bacizyi. Mucikozyanyo, mwaapostolo Paulo wakaambila mbungano yaku Roma kuti imutambule Febi alimwi ‘akumugwasya mumakani aali woonse mwanga wayandika lugwasyo.’ (Rom. 16:1, 2) Paulo wakali cibeela cakabunga kabantu ibakali kusyoma kuti bamakaintu tabayandiki kapati alimwi buya oobo mbwaakali kubabona. Pele naakaba Munakristo, wakaiya cikozyanyo ca Jesu akutalika kubeendelezya cabulemu alimwi acalubomba bamakaintu. w20.09 20 ¶1-2

Kutegwa tugwasye basikwiiya Bbaibbele besu kuba aluyandisisyo lwakukambauka makani mabotu tulakonzya kubabuzya mibuzyo mbuli yakuti: “Sena buumi bwanu bwacinca akaambo kakutobela nzyoliyiisya Bbaibbele? Sena muyeeya kuti kuli bamwi beelede kuumvwa mulumbe ooyu? Ino inga mwabagwasya buti?” (Tus. 3:27; Mt. 9:37, 38) Amuyeeye kuti, Jesu wakatwaambila kuyiisya bantu “kutobela zintu zyoonse” nzyaakalailila. Eeci cibikkilizya milawo yobilo mipati kapati, nkokuti kuyanda Leza alimwi akuyanda basimukoboma, milawo yoonse yobilo iliswaangene kapati amulimo wakukambauka alimwi akugwasya bantu kuba basikwiiya. (Mt. 22:37-39) Masimpe ngakuti, luyando nkaambo kapati ikeelede kutupa kutola lubazu mumulimo wakukambauka. Nokuba boobo, basikwiiya Bbaibbele bamwi balakonzya kuyoowa kutola lubazu mumulimo wakukambauka. Pele tulakonzya kubaambila kuti kwiinda mulugwasyo lwa Jehova, banooyaabulizunda penzi lyakuyoowa muntu aasyoonto-syoonto.—Int. 18:1-3; Tus. 29:25. w20.11 3 ¶6-8

Ciindi nomulibambila, amupaile kuli Jehova kujatikizya nzyayandika sikwiiya. Amumulombe Jehova kuti amugwasye kuyiisya Bbaibbele munzila iiyoomusika amoyo sikwiiya. Kamuyeeyede kuti makanze aanu ngakumugwasya kutegwa ayelele kubbapatizyigwa. Sikwiiya weelede kunoobandika a Jehova. Mbuti mbwakonzya kucita oobo? Kwiinda mukuswiilila alimwi akubandika a Jehova. Ulakonzya kumuswiilila Leza kwiinda mukubala Bbaibbele abuzuba. (Jos. 1:8; Int. 1:1-3) Amumukulwaizye sikwiiya wanu kubandika a Jehova kwiinda mukupaila abuzuba. Kamupaila mipailo iizwa ansi aamoyo kumatalikilo alimwi akumamanino aaciiyo cimwi acimwi, amumwaambe zina sikwiiya mumipailo eeyo. Ciindi naswiilila mipailo yanu, uyooiya mbwakonzya kupaila kuzwa ansi aamoyo alimwi akuti weelede kupaila kuli Jehova Leza muzina lya Jesu Kristo. (Mt. 6:9; Joh. 15:16) Amweezeezye buyo kubala Bbaibbele abuzuba (kumuswiilila Jehova) alimwi akupaila (kubandika a Jehova) mbokukonzya kumugwasya sikwiiya wanu kuba acilongwe a Leza!—Jak. 1:25. w20.10 8 ¶8; 9 ¶10-11

Mazuba aano mbunga ya Jehova ilabeleka canguzu kulesya manyongwe akukulwaizya luumuno mumbungano zya Bunakristo mbubonya mbocakabede ku Banakristo bamumwaanda wamyaka wakusaanguna. (Mil. 16:4, 5) Mucikozyanyo, ikuti mwaswaangana lya Ciiyo ca Ngazi Yamulindizi kumbungano iimbi, nokuba kucisi cimbi, munoozyi ciiyo ca Ngazi Yamulindizi mbocicitwa alimwi acibalo ciyiigwa. Mpoonya-mpoonya, muyoolimvwa kwaanguluka! Muuya uusalala wa Leza ulikke nguukonzya kupa kuti kube lukamantano luli boobu. (Zef. 3:9) Ncinzi ncomukonzya kucita? Amulibuzye kuti: ‘Sena ndilakulwaizya lukamantano alimwi aluumuno mumbungano? Sena ndilabamvwida aabo basololela? Sena bamwi balakonzya kundisyoma, kwaambisya kuti kandijisi mikuli mumbungano? Sena ndilabamba ciindi, kugwasya bamwi, alimwi ndililyaabide kubeleka?’ (Jak. 3:17) Ikuti naa mwabona kuti kuli mbazu momweelede kucinca, amulombe muuya uusalala. Kuti mwalekela muuya uusalala kumweendelezya mubuumi bwanu, nkokuti bakwesu abacizyi banoomuyanda alimwi akulumba kuzintu nzyomucita mumbungano. w20.10 23 ¶12-13

Ijwi lya Leza lilakonzya kuba mbuli cimbonimboni. (Jak. 1:23-25) Bunji bwesu lyoonse mafwumofwumo inga tulalilanga mucimbonimboni katutanazwa aŋanda. Kwiinda mukucita boobo, tulakonzya kubona naa kuli mpotweelede kubambulula kabatanatubona bamwi. Mbubwenya buyo, ciindi notubala Bbaibbele abuzuba, tulabona mumbazu motweelede kucinca mbotuyeeya alimwi abube. Banji babona kuti cilagwasya kubala lugwalo lwabuzuba lyoonse mafwumofwumo kabatanazwa aŋanda. Eeci cipa kuti nzyobabala kabaziyeeya. Mpoonya buzuba boonse, balabona mbobakonzya kulubelesya lulayo luzwa mu Jwi lya Leza. Kuyungizya waawo, tweelede kuba acilengwa cakubala alimwi akuzinzibala kuyeeya nzyotubala mu Jwi lya Leza abuzuba. Kucita boobu kulayandika kapati nkaambo kulatugwasya kuzumanana kweendela munzila nsyoonto iitola kubuumi. Munzila imwi, Jwi lya Leza lili mbuli muncini wa X-ray, lilatugwasya kuzyiba zili mumoyo wesu. Pele tweelede kulicesya kutegwa tugwasyigwe alulayo lwamu Bbaibbele naa oolo ilupegwa abaiminizi ba Leza. w20.11 18 ¶3; 20 ¶8

Nokuba kuti Banakristo bamumwaanda wamyaka wakusaanguna kanji-kanji bakali kupenzyegwa, zimwi ziindi bakali kuba aciindi caluumuno. Ino bakacibelesya buti ciindi eeco? Bakali kukambauka makani mabotu cakutaleka. Cibalo cili kubbuku lya Milimo caamba kuti, bakali “kweenda cakuyoowa Jehova.” Bakazumanana kukambauka makani mabotu, akaambo kaceeci, ‘bakazumanana kuyungizyigwa.’ Jehova wakaulongezya mulimo wabo wakukambauka cabusungu muziindi zyaluumuno. (Mil. 9:26-31) Banakristo bamumwaanda wamyaka wakusaanguna bakali kucibelesya coolwe cili coonse kukambauka makani mabotu. Mucikozyanyo, ciindi mwaapostolo Paulo naakabona kuti inga wakambaukila bantu banji mu Efeso, wakakkala mumunzi ooyo kakambauka akugwasya bantu kuba basikwiiya. (1Kor. 16:8, 9) Basikwiiya aabo bakabeleka canguzu “kwaambilizya makani mabotu aa Jehova.” (Mil. 15:30-35) Ncinzi cakazwa mpawo? Lugwalo lwabuzuba bwasunu lulatwaambila. w20.09 16 ¶6-8

Ciindi Adamu naakabisya, wakaleta lufwu kulinguwe alimwi akuluzubo lwakwe. Kusikila sunu tucipenga akaambo kakutamvwida kwakwe. Pele akaambo kakuti Leza wakamubusya Mwanaakwe, tulakonzya kuyooba abuumi bubotu kumbele. Paulo wakaamba kuti: “Bubuke bwabafwu bulaboola kwiinda mumuntu omwe. Nkaambo mbubonya muli Adamu boonse balafwa, mbubonya buyo muli Kristo boonse bayoopegwa buumi.” (1Kor. 15:22) Ncinzi Paulo ncaakali kupandulula ciindi naakaamba kuti “muli Adamu boonse balafwa”? Wakali kwaamba bantu boonse, ibakakona cibi akutalondoka kuzwa kuli Adamu alimwi akuti bayoofwa. (Rom. 5:12) Adamu tali akati kabaabo “bayoopegwa buumi.” Cinunuzyo ca Kristo tacimugwasyi Adamu. Cili boobu akaambo kakuti kalondokede, wakasala kutamumvwida Leza acaali. Cakamucitikila Adamu cilikozyene aciyoocitikila baabo “mwanaamuntu” mbayoobeteka kuti nimpongo nkokuti “bayoonyonyoonwa kukabe kutamani.”—Mt. 25:31-33, 46; Heb. 5:9. w20.12 5 ¶13-14

Ikuti naa tiimwapegwa mukuli umwi, amuyeeye cikozyanyo cabangelo basyomeka. Mubulelo bwa Mwami Ahabu, Jehova wakalomba bangelo kuti bape mizeezo kujatikizya mbobakonzya kumoongelezya mwami mubyaabi ooyu. Bangelo banji bakapa mizeezo. Pele Leza wakasala buyo mungelo omwe akumwaambila kuti muzeezo wakwe uyoozwidilila. (1Bam. 22:19-22) Sena bangelo bamwi bakatyompwa, ambweni akutalika kwaamba kuti, ‘Nkaambo nzi ncindasowa ciindi kupa muzeezo?’ Kunyina nibakacita oobo pe. Bangelo balalicesya ncobeni alimwi bayanda kuti bulemu boonse kabuunka kuli Jehova. (Bab. 13:16-18; Ciy. 19:10) Amuyeeye kuti coolwe cipati ncotujisi ncakuba umwi wa Bakamboni ba Jehova alimwi akukambauka Bwami bwakwe. Mikuli taili njenjiyo iitupa kuyandwa a Leza. Nkokuti kulicesya nkokupa kuti katuyandwa kuli Jehova alimwi akubakwesu. Aboobo amumulombe Jehova kutegwa amugwasye kuba muntu uulicesya. Amuyeeye kujatikizya zikozyanyo zinji zyababelesi ba Jehova ibalicesya izili mu Bbaibbele. Amulisungule kubelekela bakwesu munzila iili yoonse njomukonzya.—1Pet. 5:5. w20.12 26 ¶16-17

Cimpoompo calufwutuko mbulangizi mbwatupa Jehova, ibulangizi bwakuti uyoobapa bulumbu boonse aabo bacita kuyanda kwakwe, alimwi akuti naa twafwa uyootubusya. (1Tes. 5:8; 1Tim. 4:10; Tit. 1:1, 2) Bulangizi bukwabilila mizeezo yesu. Bulatugwasya kubikkila maano kuzisyomezyo zya Leza, alimwi akutugwasya kuti tutatyompwi akaambo kamapenzi ngotujisi. Tulacisama cimpoompo eeci kwiinda mukuyeeya mbwayeeya Leza. Mucikozyanyo, tatusyomi lubono lutasyomeki, pele tusyoma Leza. (Int. 26:2; 104:34; 1Tim. 6:17) Panga lyamuuya ndi Jwi lya Leza, Bbaibbele. Ipanga eelyo lilijisi nguzu zyakuyubununa bubeji, alimwi akwaangununa bantu kubuzike bwanjiisyo zyakubeja akumicito mibyaabi. (2Kor. 10:4, 5; 2Tim. 3:16, 17; Heb. 4:12) Tulaiya kulibelesya kabotu panga eelyo kwiinda muciiyo cesu tobeni alimwi akwiinda mulwiiyo ndotutambula kumbunga ya Leza.—2Tim. 2:15. w21.03 27 ¶4; 29 ¶10-11

Nociba ciindi naakali muntolongo, mwaapostolo Johane wakatondezya kuti wakali kubayanda bamwi. Mucikozyanyo, wakalemba bbuku lya Ciyubunuzyo akulituma kumbungano kutegwa bazyibe zintu “zyeelede kucitika lino-lino.” (Ciy. 1:1) Mpoonya, kulibonya kuti naakaangununwa kuzwa ku Patimo, Johane wakalemba bbuku lya Makani Mabotu kujatikizya buumi bwa Jesu alimwi amulimo wakwe. Alimwi wakalemba magwalo otatwe aayitwa zina lyakwe kutegwa akulwaizye alimwi akuyumya bakwesu abacizyi. Mulakonzya kwiiya kukulyaaba kwa Johane alimwi akutondezya kuti mulabayanda bantu kwiinda muzintu nzyomusala kucita mubuumi. Nyika ya Saatani iyanda kuti kamuyeeya buyo kujatikizya buumi bwanu alimwi ambomukonzya kujana mali naa kuba ampuwo. Muciindi caboobo, bakambausi ba Bwami ibalyaabide munyika yoonse, balabeleka kusikila mpobagolela kukambauka makani mabotu, alimwi akugwasya bantu kuba acilongwe a Jehova. w21.01 10 ¶9-10

Jonatani ambweni naakamufwida munyono Davida. Mbwaanga wakali mwana wa Mwami Saulo, Jonatani naakaamba kuti nguwakeelede kuba mwami uutobela. (1Sam. 20:31) Pele Jonatani wakali muntu uulicesya alimwi uusyomeka kuli Jehova. Aboobo wakakutobela kusala kwa Jehova kwakuti Davida nguwakeelede kuba mwami. Kuyungizya waawo, wakali kusyomeka kuli Davida, nokuba kuti eeci cakali kumunyemya kapati Saulo. (1Sam. 20:32-34) Jonatani wakali kumuyanda kapati Davida, aboobo kunyina naakamufwida munyono. Jonatani wakalicibwene kumutwe kubelesya buta alimwi wakali sikalumamba sicamba. Walo alimwi abausyi ba Saulo, bakazyibidwe kuti “bakali alubilo kwiinda basikwaze” alimwi “bakali anguzu kwiinda basyuumbwa.” (2Sam. 1:22, 23) Aboobo Jonatani naakalisumpula kujatikizya zintu nzyaakali kucita cabusicamba. Nokuba boobo, Jonatani wakanyina muuya wakuzundana naa munyono. Muciindi caboobo, Jonatani wakali kumuyanda Davida akaambo kabusicamba bwakwe alimwi akusyoma Jehova. Mucikozyanyo, ciindi Davida naakajaya Goliati, Jonatani wakatalika kumuyanda kapati mbubonya mbwaakali kuliyanda mwini. w21.01 21 ¶6; 22 ¶8-9

Banakristo boonse beendelezyegwa a Jesu Kristo, imusololi uulondokede. Nokuba boobo, ciindi mukaintu Munakristo naakwatwa, utalika kweendelezyegwa asilutwe uutalondokede. Eeci talili lyoonse nocili cuuba-uba. Aboobo ciindi mucizyi nayeeya kukwatwa kumukwesu umwi, weelede kulibuzya kuti: ‘Ncinzi citondezya kuti mukwesu ooyu uyooba silutwe wamukwasyi mubotu? Sena kubelekela Jehova ukubikka mubusena bwakusaanguna mubuumi bwakwe? Kuti naa taaku, ncinzi cindipa kuyeeya kuti twaakukwatana uyooba silutwe mubotu?’ Alimwi weelede kulibuzya kuti: ‘Mbube nzi mbondijisi ibuyootugwasya mulukwatano lwesu? Sena ndili mwaabi alimwi ndilakkazika moyo? Sena ndijisi cilongwe ciyumu a Jehova?’ (Muk. 4:9, 12) Kuti mucizyi kasala camaano noliba leelyo katanakwatwa, ciyoomupa kuzwidilila alimwi akujana lukkomano mulukwatano. Bacizyi Banakristo banji nzikozyanyo zibotu caboola kukulibombya kubalumi babo. Eelo kaka tulabalumba kapati! w21.02 8 ¶1-2

Mumyaka misyoonto yainda, basikumwaya banji baiya myaambo iimbi kutegwa bayungizye mulimo kutegwa bakabelekele kumbungano zibulide basikumwaya ba Bwami izibelesya myaambo iimbi. Bakalisalila buya kucita boobo kutegwa babelekele Jehova kusikila mpobagolela. Nokuba kuti ambweni inga cabatolela myaka kwiizyiba kabotu myaambo mipya, balazigwasyilizya mbungano mumbazu zinji. Bakwesu abacizyi mumbungano balakulwaizyigwa akaambo kabube bubotu mbobajisi alimwi aluzyibo. Eelo kaka tulabayanda kapati bakwesu alimwi abacizyi aaba ibalyaabide! Kabunga kabaalu takeelede kuwayawaya kulumbaizya mukwesu kuti abe mwaalu naa mukutausi akaambo buyo kakuti tanauzyiba kabotu mwaambo uubelesyegwa ambungano. Baalu bayoomulanga-langa mukwesu kweelana azyeelelo zyamu Magwalo nzyeelede kuba anzizyo mukwesu kutegwa ayelele kuba mwaalu naa mukutausi, ikutali kweelana ambwauzyi mwaambo uubelesyegwa ambungano.—1Tim. 3:1-10, 12, 13; Tit. 1:5-9. w20.08 30 ¶15-16

Bantu balakonzya kuyeeya kuti inga bakkomana kuti kabajisi buumi buli kabotu, mali manji, alimwi aluumuno mumukwasyi. Pele musyobo walukkomano ngwaakalemba Jakobo, ncibeela camuuya wa Leza alimwi talubooli akaambo kabukkale bwamuntu. (Gal. 5:22) Munakristo ulakonzya kukkomana, naa kuba alukkomano lwini-lwini kuti kazyi kuti ukkomanisya Jehova alimwi utobela cikozyanyo ca Jesu. (Lk. 6:22, 23; Kol. 1:10, 11) Mbubwenya mbuli mulilo uuyaka mulambe, awalo musyobo walukkomano oolu ulayaka mumoyo wa Munakristo uuli woonse. Lukkomano oolu talumani ciindi notwaciswa naa notutajisi mali. Talumani nociba ciindi bantu nobatufwubaazya, kufwumbwa naa mbanamukwasyi naa kukazyigwa abantu bambi buyo. Muciindi cakuti luzime, lwalo lwiindila buya kufwumbwa ciindi basikukazya nobasola kutunyonganya. Masunko ngotujana akaambo kakuba alusyomo, ncisinizyo cakuti tuli basikwiiya ba Kristo beni-beni. (Mt. 10:22; 24:9; Joh. 15:20) Nkakaambo kaako, Jakobo wakalemba majwi aali mulugwalo lwabuzuba bwasunu. w21.02 28 ¶6

Ciindi nomwajana zibalo zyamu Bbaibbele izitondezya mbociyandika kuzumanana kubatama alimwi akusyoma Jehova, amusoleke kuziswata zibalo eezyo. Inga camugwasya kuziswata kwiinda mukuzibala cakupozya naa kuzilemba alimwi akunooziinduluka-induluka kuzibala ciindi aciindi. Jehova wakaambila Joshua kubala bbuku lya Mulawo caansaansi kutegwa kacita zintu cabusongo. Nzyaakali kubala mu Mulawo zyakamugwasya kutayoowa alimwi akuba abusicamba bwakusololela bantu ba Leza. (Jos. 1:8, 9) Zibalo zinji izili mu Jwi lya Leza zilakonzya kumugwasya kubatama mubukkale kanji-kanji ibukonzya kumupa kulibilika alimwi akuyoowa. (Int. 27:1-3; Tus. 3:25, 26) Kumiswaangano tulagwasyigwa kuzwa kumakani aapegwa acibumbili, kubwiinguzi bwabaswiilizi alimwi akumibandi iikulwaizya njotuba aanjiyo abakwesu abacizyi. (Heb. 10:24, 25) Alimwi tulakonzya kukulwaizyigwa ciindi notubaambila mbotulimvwa balongwe besu mumbungano. w21.01 6 ¶15-16

Ciindi nomwakabbapatizyigwa, mwakatondezya lusyomo luyumu alimwi akuti mulamusyoma Jehova. Alimwi Jehova wakamutambula camaanza obilo mumukwasyi wakwe. Aboobo ncomweelede kucita lino nkuzumanana kusyoma Jehova. Cilakonzya kulibonya kuti ncuubauba kusyoma Jehova ciindi nomusala zintu zipati-pati mubuumi. Pele ino mbuti aziindi zimbi? Eelo kaka cilayandika kapati kusyoma Jehova, nociba ciindi nomusala zyakulikondelezya, mulimo wakumubili alimwi ambaakani zyamubuumi! Mutanoosyomi busongo bwanu. Muciindi caboobo, amuyandaule njiisyo zyamu Bbaibbele zikonzya kubeleka mubukkale bwanu alimwi akucita kweelana abusolozi oobo. (Tus. 3:5, 6) Ikuti mwacita oobo, muyookkomanisya Jehova alimwi muyoopa kuti bamwi mumbungano yanu kabamusyoma. Masimpe, mbubonya mbulindiswe, andinywe tamulondokede alimwi zimwi ziindi munoolubizya. Nokuba boobo, eeci taceelede kumulesya kubeleka canguzu mumulimo wa Jehova. w21.03 6 ¶14-15

Sena banamukwasyi balamukazya akaambo kakuti mubelekela Jehova? Naa sena mubelekela mucisi mulimo wa Bakamboni ba Jehova moulesyedwe? Kuti kacili boobo, mulakonzya kukulwaizyigwa kwiinda mukubala lugwalo lwa 2 Timoteyo 1:12-16 alimwi a 4:6-11, 17-22. Mwaapostolo Paulo wakalemba Magwalo aaya ciindi naakali muntolongo. Kamutanatalika kubala Magwalo aaya, amumwaambile Jehova penzi ndyomujisi, alimwi ambomulimvwa kujatikizya penzi eelyo. Amwaambe bwini mbomulimvwide. Mpoonya amumulombe Jehova kumugwasya kujana njiisyo mutupango itwaamba zyakacitikila Paulo, akubona mbotukonzya kumugwasya kuzyiba cakucita. Jehova wakamucenjezya Paulo kuti wakali kuyoopenzyegwa akaambo kakuba Munakristo. (Mil. 21:11-13) Ino Jehova wakamugwasya buti Paulo? Wakayiingula mipailo ya Paulo, mpoonya kumbele wakamuyumya-yumya. Jehova wakasyomezya Paulo kuti uyootambula bulumbu akaambo kakubeleka canguzu. Alimwi Jehova wakabelesya balongwe ba Paulo basyomeka kumupa lugwasyo ndwaakali kuyandika. w21.03 17-18 ¶14-15, 19