December

Jesu wakakozyanisya cilongwe ncajisi abasikumutobela kucilongwe ciliko akati kamweembezi ambelele zyakwe. (Joh. 10:14) Cikozyanyo eeci cileelela kapati. Mbelele zilimuzyi mweembezi wazyo alimwi zilamuswiilila. Muntu umwi iwakalibonena makani aaya mbwaali aamasimpe, wakati: “Twakali kuyanda kukkopa mbelele zimwi aboobo twakasoleka kuziita kuti ziboole afwaafwi. Pele tiizyakatutobela akaambo kakuti tiizyakaazyi majwi eesu. Mpoonya kwakaboola mweembezi musyoonto; lino mbwaakaziitila buyo zyakamutobela.” Icakamucitikila muntu ooyo cituyeezya majwi aa Jesu kujatikizya mbelele zyakwe, nkokuti basikwiiya bakwe. Wakati: “Ziyooswiilila jwi lyangu.” Pele Jesu uli kujulu. Aboobo mbuti mbotukonzya kwaamba kuti tulaliswiilila jwi lyakwe? Nzila iiyandika kapati mbotukonzya kutondezya kuti tulaliswiilila jwi lya Simaleleesu, nkwiinda mukutobela njiisyo zyakwe mubuumi bwesu.—Mt. 7:24, 25. w21.12 16 ¶1-2

Mwaapostolo Paulo wakali kubapenzya kapati Banakristo. Pele kumbele, wakakuzyiba kulezya kwakwe alimwi wakalilibambilide kucinca. (1Tim. 1:12-16) Pele kwiinda mukugwasyigwa a Jehova, Paulo wakaba mweembezi siluyando, siluzyalo alimwi uulicesya. Pele kunyina naakabikkila maano kukulezya kwakwe, muciindi caboobo, wakalijisi lusyomo lwakuti Jehova ulamulekelela. (Rom. 7:21-25) Kunyina naakali kulangila kucita zintu cakulondoka. Muciindi caboobo, wakabeleka canguzu kutegwa abe abube bwa Bunakristo alimwi cakulicesya wakasyoma Jehova kuti amugwasye kuzuzikizya mulimo wakwe. (1Kor. 9:27; Flp. 4:13) Nokuba kuti baalu balasalwa, tabalondokede pe. Pele ncayanda buyo Jehova ncakuti kabazyi kuti balalubizya alimwi akuti beelede kubeleka canguzu kutegwa babe abube bwa Bunakristo. (Ef. 4:23, 24) Mwaalu weelede kulilingula kwiinda mukubelesya Jwi lya Leza kutegwa abone mwayandika kucinca. Mpoonya Jehova uyoomugwasya kuba alukkomano alimwi akuzwidilila.—Jak. 1:25. w22.03 29-30 ¶13-15

Ncinzi ncotweelede kucita kuti naa twabona kuti twamubeteka musyomima? Cilayandika kuyeeya kuti tweelede kubayanda bakwesu. (Jak. 2:8) Kuyungizya waawo, tweelede kupaila camoyo woonse kuli Jehova, akumulomba kuti atugwasye kuleka kubeteka. Tweelede kucita kweelana amipailo yesu kwiinda mukubweza ntaamu yakubandika amuntu ooyo ngotwateendelezya kabotu. Tulakonzya kumulomba kuti tubeleke limwi mumulimo wamumuunda naa kumutamba kucakulya. Mbotuyaabumuzyiba kabotu mukwesu, tulakonzya kusoleka kutobela cikozyanyo ca Jehova a Jesu kwiinda mukubikkila maano kuzintu zibotu nzyacita. Munzila eeyi, tutondezya kuti tulaswiilila kumulawo wamweembezi mubotu wakuleka kubeteka. Mbubwenya mbelele mboiswiilila kujwi lyamweembezi wayo, abalo basikutobela Jesu balaswiilila kujwi lyakwe. Kufwumbwa naa tuli cibeela ‘cakatanga kaniini’ naa “mbelele zimbi,” atuzumanane kuswiilila alimwi akumvwida jwi lyamweembezi mubotu.—Lk. 12:32; Joh. 10:11, 14, 16. w21.12 19 ¶11; 21 ¶17-18

Ciindi Rehoboamu naakaba mwami wa Israyeli, bantu bakwe bakamulomba cintu cimwi. Bakalomba kuti abaubizyile mukuli uulema walo usyi Solomoni, ngwaakabapede. Rehoboamu wakacita cabusongo kwiinda mukubuzya-buzya bapati bamu Israyeli kutegwa abone mbwaakali kukonzya kubaingula bantu aaba. Bapati bakamukulwaizya mwami kuti, ikuti wacita kweelana ancobalomba bantu, banooli kulubazu lwakwe lyoonse. (1Bam. 12:3-7) Pele Rehoboamu kunyina naakakkutila alulayo ndwaakapegwa, kumane wakabuzya baalumi mbaakakomena limwi. Pele aciindi aawa, bakamupa lulayo ilutali kabotu Rehoboamu. Bakamwaambila kuti abayungizyile mukuli bantu. (1Bam. 12:9-11) Rehoboamu wakeelede kupaila kuli Jehova kumulomba kuti amugwasye kusala. Muciindi caboobo, wakaswiilila baalumi bacili bana-bana. Izyakamucitikila Rehoboamu alimwi abantu bamu Israyeli zyakali zibi kapati. Andiswe, lulayo ndotutambula talili lyoonse notukonzya kulukkomanina. Nokuba boobo, kuti kaluzwa mu Jwi lya Leza, tweelede kulutambula. w22.02 9 ¶6

Muntu uulicesya alimwi uulibombya uyoobikkila buyo maano kunguzu nzyobajisi aabo ibacili bana-bana, ikutali kuluzyibo ndobajisi aciindi aawo. Uyoobabona kuba basimilimonyina, ikutali kuti mbaasikuzundana limwi. Bacembeede babona bakubusi kuti nzipego kuzwa kuli Jehova alimwi balalumba kuzintu nzyobacita. Ciindi nguzu zyabo noziyaabumana, bacembeede balalumba kuti aabo bajisi nguzu zyabukubusi balilisungwide alimwi akuti balakonzya kubeleka akugwasya mbungano. Muntu wamu Bbaibbele Naomi ncikozyanyo cibotu kapati camuntu uucembeede walo iwakatambula lugwasyo calukkomano kumwana muniini. Naakafwa mwana wa Naomi musankwa, Naomi wakaambila mukamwanaakwe Rute kuti ajokele kwabo. Nokuba boobo, ciindi Rute naakazumanana kuti atobele Naomi ku Betelehemu, Naomi wakalutambula lugwasyo lwa Rute. (Rut. 1:7, 8, 18) Eelo kaka eeci cakali cilongezyo kuli bamakaintu aaba bobilo! (Rut. 4:13-16) Kulicesya kuyoopa bacembeede kutobela cikozyanyo ca Naomi. w21.09 10-11 ¶9-11

Taateesu wakujulu, ulabumvwisya bukkale bwesu bwiindene-indene. Ambweni mulakonzya kucita zinji kwiinda bantu banji mbomuzyi alimwi mbomuyanda. Ambweni inga kakuli zintu nzyomutakonzyi kucita mbuli mbobacita bamwi, ambweni akaambo kakucembaala, kuciswa naa mikuli yamukwasyi. Mutatyompwi pe. (Gal. 6:4) Jehova takailubi milimo yanu. Kufwumbwa buyo kuti kamubeleka kusikila mpomugolela alimwi kamujisi makanze mabotu, uyookkomana. Jehova ulizizyi noziba zintu nzyomulombozya buyo mumoyo. Uyanda kuti kamukkomene alimwi akukkutila abukombi mbomukonzya kumupa. Tulijisi kale luumuno lwamumizeezo, nkaambo tulizyi kuti Jehova ulabagwasya bakombi bakwe ciindi nobali mumapenzi. (Is. 41:9, 10) Eelo kaka tulijisi twaambo tubotu itweelede kutupa kukkomana ciindi notukomba Taateesu siluyando, walo ‘iweelela ikutambula bulemu alulemeko’ kuzwa kuzilenge zyakwe zyoonse!—Ciy. 4:11. w22.03 24 ¶16; 25 ¶18

Tweelede kwiiya cikozyanyo ca Jesu, pele tatweelede kutyompwa kuti naa twaalilwa kumwiiya Jesu cakulondoka. (Jak. 3:2) Sicikolo takonzyi kumwiinda mwiiyi wakwe. Pele ciindi sikwiiya naiya kukulubizya kwakwe alimwi akusolekesya kwiiya cikozyanyo camwiiyi wakwe, ulazumanana kucita kabotu. Mbubwenya buyo, kuti katuzibelesya nzyotwiiya muciiyo cesu ca Bbaibbele alimwi akusolekesya kucinca, tulakonzya kumwiiya Jesu kabotu-kabotu. (Int. 119:59) Bantu banji munyika mazuba aano balaliyanda kapati. Pele bantu ba Jehova baliindene. Twakulwaizyigwa amuuya wakulyaaba ngwaakajisi Jesu, aboobo tuliyandide kumwiiya. (1Pet. 2:21) Ciindi notusolekesya kumwiiya Jesu, tuyookkomana nkaambo tukkomanisya Jehova. w22.02 24 ¶16; 25 ¶18

Jehova ulapa busolozi kubantu bakwe kwiinda mu Jwi lyakwe, Bbaibbele. Ikuti katujana ciindi cakuzinzibala kuyeeya nzyatuyiisya Jehova, tuyoocikonzya kutobela busolozi bwakwe alimwi akuzuzikizya mulimo wesu wakukambauka. (1Tim. 4:15, 16) Nzila aimwi Jehova mwatupa busolozi nkwiinda ‘mumuzike uusyomeka alimwi uucenjede.’ (Mt. 24:45) Zimwi ziindi, muzike ulakonzya kutupa malailile ngotutamvwisyi. Mucikozyanyo, tulakonzya kutambula malailile aabambilidwe kutukwabilila kuntenda zilicitikila swebo nzyotuyeeya kuti inga tiizyacitika mucilawo motukkala. Ino tweelede kucita buti kuti katulimvwa kuti malailile aapegwa taagwasyi? Amuyeeye zibalo zimwi zyamu Bbaibbele nzyotwakabala. Zimwi ziindi bantu ba Leza bakali kutambula busolozi ibwakali kulibonya kuti tabugwasyi, pele bwakafwutula buumi bwabo.—Bab. 7:7; 8:10. w22.03 18-19 ¶15-16

Kasinizyide, Jesu wakaamba majwi aali mulugwalo lwabuzuba bwasunu. Jesu wakalizyi kuti buumi bwakwe bwakumbele bwakayeeme ali Jehova, alimwi wakalisinizyide kuti Bausyi bakali kuyoomuyeeya. Ncinzi ncotukonzya kwiiya kumajwi aa Jesu? Amulisungule kubikka buumi bwanu mumaanza aa Jehova. Kutegwa mucite boobu, mweelede ‘kusyoma Jehova amoyo wanu woonse.’ (Tus. 3:5) Amubone cikozyanyo ca Joshua, Kamboni uujisi myaka iili 15 walo uuciswa bulwazi bujaya. Wakakaka kutambula busilisi bupa kutyola milawo ya Leza. Katanafwa, wakaambila banyina kuti: “Baama, ndili mumaanza aa Jehova. . . . Eeci ncondimwaambila Baama, ndilisinizyide: Ndilizyi kuti Jehova kakunyina kudooneka uyoondibusya. Ulizyi mbondiyeeya alimwi ambondilimvwa, andime ndilamuyanda.” Umwi aumwi wesu weelede kulibuzya kuti, ‘Kuti ndalijana mubukkale bukonzya kusunka lusyomo lwangu, sena inga ndabikka buumi bwangu mumaanza aa Jehova akusyoma kuti ulakonzya kundiyeeya?’ w21.04 12-13 ¶15-16

Bantu ba Jehova balayumizyigwa kwiinda mumulimo wakukambauka. Ciindi notwaambila bamwi kasimpe kamu Bbaibbele, tulakatalukwa akuba anguzu, tacikwe makani naa baswiilila naa pe. Akaambo kabukkale bwabo, bamwi inga balimvwa kuti tabakonzyi kucita zinji mumulimo wakukambauka. Ikuti naa mbomulimvwa oobo, amuyeeye kuti Jehova ulakkomana kuti mwabeleka kusikila mpomugolela. Jehova ulabona akulumba kumakanze ngotujisi aakukambauka, nokuba kuti tatubukili bulo. Ulakonzya kutujalwida zyoolwe zyakupa bumboni kuli baabo batulanganya naa kubasilisi. Ikuti katweezyanisya nzyotucita lino kulizyeezyo nzyotwakali kucita kaindi, tulakonzya kutyompwa. Pele kuti twabona mbwatugwasya Jehova lino, tuyooba anguzu nzyotuyandika kutegwa tuliyumye mumasunko cakukondwa. Tatuzyi naa njiili mbuto yakasimpe njotusyanga iikonzya kusimpa miyanda akukomena.—Muk. 11:6. w21.05 24-25 ¶14-17

Bulyato bwakapa Mwami Davida kuluba zintu nzyaakamupede Jehova, nkokuti lubono, mpuwo alimwi akucikonzya kuzunda basinkondonyina banji. Cakulumba Davida wakabona kuti zipego zya Leza zyakali ‘zinji kapati cakuti tiicakali kukonzyeka kuzibandauka zyoonse!’ (Int. 40:5) Pele aciindi cimwi, Davida wakaziluba zintu nzyaakamupede Jehova. Nokuba kuti Davida wakajisi bamakaintu banji, wakalekela kulombozya kubyaabi kujatikizya mukamuntu kukomena mumoyo wakwe. Mukaintu ooyo wakali Bati-seba, mulumaakwe wakali Uriya muna Heti. Cabulyato Davida wakoonana a Bati-seba, mpoonya Bati-seba wakamita. Ncaakacita Davida cakabija kapati, pele wakacita cibyaabi kwiinda waawo. Davida wakabikka bubambe bwakuti Uriya ajaigwe! (2Sam. 11:2-15) Ncinzi ncaakali kuyeeya Davida? Sena wakali kuyeeya kuti Jehova takonzyi kubona? Muntu ooyu iwakali mubelesi wa Jehova uusyomeka wakazundwa abulyato, aboobo eeci cakamuletela mapenzi manji kapati. Pele cikkomanisya ncakuti, mukuya kwaciindi Davida wakakuzumina kulubizya kwakwe aboobo wakeempwa. Eelo kaka wakalumba kapati kuti Jehova wakatalika kumukkomanina alimwi!—2Sam. 12:7-13. w21.06 17 ¶10

Tulakonzya kuyeeya kuti tatukonzyi kusololela ciiyo ca Bbaibbele. Ambweni tulimvwa kuti, tweelede kuba aluzyibo lunji naa mwiiyi uucibwene katutanatalika kwiiya amuntu. Kuti naa mbomulimvwa oobo, atulange-lange twaambo totatwe tukonzya kumupa kusyoma kuti inga mwacikonzya kwiiya amuntu. Kakusaanguna, Jehova ubona kuti nywebo muleelela kuyiisya bamwi. Kabili, Jesu, iwakapegwa “nguzu zyoonse kujulu alimwi aanyika,” wakamuzumizya kuyiisya. (Mt. 28:18) Katatu, amusyome kuti bamwi balakonzya kumugwasya. Jesu wakasyoma zintu nzyobakamuyiisya Bausyi kuti aambe, andinywe mulakonzya kucita mbubonya oobo. (Joh. 8:28; 12:49) Kuyungizya waawo, mulakonzya kulomba mulangizi wakabunga, mupainiya, naa sikumwaya uucibwene kutegwa amugwasye kutalisya alimwi akusololela ciiyo ca Bbaibbele. Nzila imwi momukonzya kuba mwiiyi uucibwene, nkwiinda mukusangana umwi wabasikumwaya aaba ciindi nasololela ciiyo ca Bbaibbele. w21.07 6 ¶12

Mamanino anyika eeyi mbyaabi ali afwaafwi, aboobo tweelede kusyoma nzila Jehova mbwacita zintu lino kwiinda kaindi. Nkaambo nzi? Lyamapenzi mapati, tuyootambula malailile aayoolibonya mbuli kuti alakatazya kumvwisya naa kutobela. Masimpe ngakuti, Jehova takabandiki andiswe cacigaminina. Kulangilwa kuti uyootupa malailile kwiinda mubaiminizi bakwe. Eeco tacinooli ciindi cakudooneka naa kutalika kulibuzya kuti, ‘Mwati malailile aaya azwa kuli Jehova, naa mizeezo buyo yabakwesu beendelezya?’ Sena muyoomusyoma Jehova alimwi ambunga yakwe muciindi cikatazya eeco? Mbomububona busolozi buzwa kubaiminizi ba Leza lino kulakonzya kumugwasya kujana bwiinguzi bwamubuzyo ooyu. Kuti kamubusyoma busolozi mbomutambula mazuba aano alimwi akufwambaana kubutobela, ciyoomuubila kucita oobo lyamapenzi mapati. w22.02 6 ¶15

Jehova wakagwasya Gideoni abaalumi bali 300 kuzunda munkondo calo icakali kukonzya kubapa kulisumpula citaambiki. Baalumi bana Efraimu bakaboola kumulwana Gideoni, ikutali kumulumbaizya nkaambo kunyina nobakatambwa kuti babasangane mukulwana. (Bab. 8:1) Gideoni wakabapa cikozyanyo comwe icitondezya Jehova mbwaakabalongezyede. Akaambo kaceeci, baalumi aaba “bakatontomana.” (Bab. 8:3) Gideoni wakalicesya kutegwa abambe luumuno akati kabantu ba Leza. Kuzwa kucikozyanyo cabana Efraimu, twiiya kuti tatweelede kubikkila maano kapati kukulijanina bulemu, pele tweelede kubikkila maano kukulemeka Jehova. Basilutwe bamikwasyi alimwi abaalu kuli ncobakonzya kwiiya kucikozyanyo ca Gideoni. Kuti naa umwi wanyema akaambo kacintu cimwi ncobacita, beelede kumvwisya camupa kunyema muntu ooyo. Alimwi balakonzya kumulumbaizya muntu ooyo mumbazu nzyacita kabotu. Kucita boobo kuyandika kulicesya. Pele ciyandika kapati, nkuba acilongwe cibotu abakwesu muciindi cakulitondezya kuti balo baliluzi. w21.07 16-17 ¶10-12

Jehova wakatondezya kuti ulatuyanda kwiinda mukutulenga mucinkozya cakwe. Akaambo kakuti twakalengwa mucinkozya ca Leza, tulakonzya kutondezya bube bunji bubotu mbuli luyando, luzyalo, kusyomeka alimwi abululami. (Int. 86:15; 145:17) Ciindi notuba abube oobu, tulamulemeka Jehova alimwi akutondezya kuti tulalumba. (1Pet. 1:14-16) Ciindi notupona munzila iimukkomanisya Taateesu wakujulu, andiswe tulakkomana. Alimwi kwiinda mukutulenga mucinkozya cakwe, Jehova wakatupa nguzu zyakucikonzya kuba bantu mbayanda mumukwasyi wakwe. Jehova wakatupangila munzi uulibedelede. Katanalenga muntu wakusaanguna, Jehova wakabambila bantu nyika. (Job. 38:4-6; Jer. 10:12) Akaambo kakuti ulaaluzyalo alimwi mwaabi, Jehova wakalenga zintu zinji zibotu kutegwa katukkomana. (Int. 104:14, 15, 24) Aciindi cimwi, wakalanga zintu nzyaakalenga ‘akubona kuti nzibotu.’—Matl. 1:10, 12, 31. w21.08 3 ¶5-6

Toonse tulijisi mukuli wakukambauka alimwi akugwasya bantu kuba basikwiiya. (Mt. 28:19, 20; Rom. 10:14) Sena inga mwayanda kuyungizya luzyibo lwanu mumulimo ooyu uuyandika kapati? Amulibikkile mbaakani zigaminide ciindi nomwiiya alimwi akuzibelesya nzyomwiiya mubroshuwa ya Kubala Alimwi Akuyiisya. Ciindi nomulanga-langa mbaakani nzyomukonzya kulibikkila, mutailubi mbaakani imwi iiyandika kapati, nkokuti kuba abube bwa Bunakristo. (Kol. 3:12; 2Pet. 1:5-8) Cakutadooneka, toonse tulombozya kubelekela Jehova munzila zinji kwiinda mbotucita lino. Munyika mpya ya Leza, tuyoocikonzya kumubelekela cakumaninina. Calino, ikuti naa twabeleka kusikila mpotugolela muzintu zili zyoonse nzyotukonzya kucita lino, tulakonzya kuba alukkomano lunji alimwi akucesya kutyompwa. Pele iciyandika kapati kwiinda ncakuti, tuyoopa kuti ‘Leza wesu uukkomene,’ Jehova alemekwe alimwi akutembaulwa. (1Tim. 1:11) Aboobo atujane lukkomano mumilimo njotujisi! w21.08 25 ¶18-20

Ikuti naa mwakakomezyegwa kamuli umwi wa Bakamboni ba Jehova, mweelede kuti mwakaiya kujatikizya Jehova kamuli baniini. Mwakayiisyigwa kuti Jehova Mulengi, uli abube bubotu, alimwi ujisi makanze mabotu kujatikizya bantu. (Matl. 1:1; Mil. 17:24-27) Bantu banji tabasyomi kuti Leza nkwali, naa kuti ngowakalenga zintu zyoonse. Muciindi caboobo, basyoma kuti buumi bwakalitalikila buya, alimwi akuti asyoonto-syoonto bwakasanduka kuba zintu zipati zipona. Bantu bamwi ibasyoma boobo, mbantu bayiide kapati. Baamba kuti sayaansi ilatondezya kuti Bbaibbele taliluzi alimwi akuti bantu basyoma mu Mulengi, mbantu batayiide alimwi ibatakwe busongo. Tacikwe makani naa twali umwi wa Bakamboni ba Jehova kwaciindi cilamfwu, toonse tweelede kuzumanana kuyumya lusyomo lwesu. Kwiinda mukucita boobo, tatukacengwi ‘abusongo bwabantu alweeno’ ibuyiisyigwa abantu ibakazya Jwi lya Leza.—Kol. 2:8. w21.08 14 ¶1-3

Abelo, Nowa, Abrahamu alimwi a Jobu bakatondezya bulemu alimwi aluyando kuli Jehova kwiinda mukumumvwida, kusyomeka kulinguwe alimwi akupa zituuzyo. Bakabeleka canguzu kutegwa bamulemeke alimwi bukombi bwabo bwakali kutambulika kulinguwe. Mpoonya Jehova wakapa baluzubo lwa Abrahamu Mulawo wa Musa. Mulawo ooyo, wakali kubikkilizya amalailile kujatikizya mbobakeelede kukomba Jehova munzila njakkomanina. Naakafwa alimwi akubusyigwa Jesu, Jehova tanaakacili kuyanda kuti bantu kabatobela Mulawo wa Musa. (Rom. 10:4) Aboobo Banakristo bakeelede kutobela mulawo mupya, nkokuti “mulawo wa Kristo.” (Gal. 6:2) Bakali kukonzya kuutobela “mulawo” ooyo ikutali kutobela mulongo wazintu nzyobakeelede kucita naa kutacita, pele kwiinda mukwiiya cikozyanyo ca Jesu alimwi akutobela njiisyo zyakwe. Mbubwenya buyo amazuba aano, Banakristo balasolekesya kusikila mpobagolela kutobela Kristo kutegwa bamukkomanisye Jehova alimwi ‘akukatalusyigwa.’—Mt. 11:29. w22.03 20-21 ¶4-5

Jehova ulabaswiilila bana bakwe. Wakaiswiilila mipailo minji njaakapaila Mwanaakwe ciindi naakali anyika. Wakamuswiilila Jesu kapaila kujatikizya kusala kuyandika kapati, mbuli ciindi naakali kusala baapostolo bakwe ibali 12. (Lk. 6:12, 13) Alimwi Jehova wakamuswiilila Jesu kapaila ciindi naakali mumapenzi. Katanaabwa, Jesu wakapaila kuli Bausyi kujatikizya zintu izyakali aafwaafwi kumucitikila. Jehova tanaakauswiilila buyo mupailo wa Jesu, pele alimwi wakatuma mungelo kuzoomuyumya-yumya Mwanaakwe uuyandwa. (Lk. 22:41-44) Mazuba aano, Jehova wazumanana kuswiilila mipailo yababelesi bakwe, kuyiingula aciindi ceelede alimwi munzila ziinda kubota. (Int. 116:1, 2) Mucizyi ku India wakabona Jehova mbwaakaingula mipailo yakwe. Wakali kuciswa bulwazi bwakulibilika kapati, alimwi wakali kupaila kuli Jehova lyoonse kujatikizya penzi eeli. Wakalemba kuti: “Pulogilamu ya JW Broadcasting^® yamu May 2019 iijatikizya mbotukonzya kulwana penzi lyakulibilika, yakasika aciindi ceelede. Bwakali bwiinguzi bwamipailo yangu.” w21.09 21-22 ¶6-7

Sena inga mweezyeezya mbocakali kukatazya ku Banakristo aabo bamumwaanda wamyaka wakusaanguna kusiya zintu zinji nzyobakajisi akuyootalika buumi bupya kubusena bumbi? Bakali kuyandika lusyomo kutegwa basinizye kuti Jehova wakali kuyoobapa nzyobakali kuyandika. Pele kuli cintu cimwi icakali kuyoobagwasya. Kakucili myaka yosanwe bana Roma kabatanazinguluka Jerusalemu, mwaapostolo Paulo wakapa bana Hebrayo lulayo oolu luyandika lwakuti: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo wakaamba kuti: ‘Ziyume zitete, tandikakusiyi pe alimwi tandikakulekelezyi pe.’ Aboobo tulakonzya kuba basicamba akwaamba kuti: ‘Jehova ngomugwasyi wangu; tandikooyoowa pe. Ino muntu inga wandityani?’” (Heb. 13:5, 6) Cakutadooneka, aabo ibakalutobela lulayo lwa Paulo bana Roma kabatanasaala, cakabaubila-ubila kukkutila azintu zisyoonto nzyobakajisi mubusena bwabo bupya. Bakali masimpe kuti Jehova uyoobalanganya muzintu nzyobakali kuyandika. w22.01 4 ¶7, 9

Ciindi notuyeeya kujatikizya muntu uulaaluse, inga tuyeeya muntu uuli aluzyalo, lweetelelo, mubotu moyo alimwi mwaabi. Amana buya tulakonzya kuyeeya caano ca Jesu camu Samariya mubotu. Uuya mwaalumi uuzwa kucisi cimbi “wakamufwida luzyalo” mu Juda iwakafwumpwa ababbi. Mu Samariya “wakamufwida luzyalo” mu Juda iwakaumidwe alimwi caluyando wakabikka bubambe bwakuti alanganizyigwe. (Lk. 10:29-37) Cikozyanyo eeci citondezya luse, bube bubotu bwa Leza wesu. Leza ulaaluse nkaambo ulatuyanda. Alimwi ulatondezya kuti ulaaluse kulindiswe munzila zinji buzuba abuzuba. Kuli nzila iimbi muntu mwakonzya kutondezya luse. Muntu uulaaluse inga wasala kutamusubula muntu weelede kusubulwa. Mubukkale buli boobu, Jehova ulatondezya luse kapati kulindiswe. Sintembauzyo wakaamba kuti: ‘Kunyina natucitila kweelana azibi zyesu.’ (Int. 103:10) Nokuba boobo, zimwi ziindi, Jehova ulakonzya kumulaya canguzu muntu iwakacita cibi cipati. w21.10 8 ¶1-2

Jehova ulatondezya luyando lutamani kuli baabo balikke bajisi cilongwe ciyumu anguwe, nkokuti babelesi bakwe. Eeci cilalibonya kumajwi ngaakaamba Mwami Davida alimwi amusinsimi Daniele. Mucikozyanyo, Davida wakaamba kuti: “Kozumanana kutondezya luyando lwako lutamani kuli baabo bakuzyi. Luyando lwa Jehova lutamani nkoluli lyoonse alyoonse mane kukabe kutamani kuli baabo bamuyoowa.” Mpoonya Daniele wakaamba kuti: ‘O Jehova Leza mwini-mwini, uutondezya luyando lutamani kuli baabo bamuyanda abaabo babamba milawo yakwe.’ (Int. 36:10; 103:17; Dan. 9:4) Kweelana amajwi aaya aakasololelwa amuuya, Jehova ulatondezya luyando lutamani kubabelesi bakwe akaambo kakuti balimuzyi, balamuyoowa, balamuyanda alimwi akubamba milawo yakwe. Jehova ulatondezya luyando lutamani kubantu bakwe, nkokuti bakombi bakwe bakasimpe. Nitwatakaningatalika kumubelekela Jehova, twakali kutondezyegwa luyando oolo Leza ndwatondezya kubantu boonse. (Int. 104:14) Pele mbwaanga twakaba bakombi bakwe, tulagwasyigwa aluyando lwakwe lutamani. w21.11 4 ¶8-9

Ziyume zitete, tulikanzide kutobela majwi aa Jesu aali atala aawa. Mazuba aano, bantu banji balayanda kuswiilila kubasololi babukombi ibalaampuwo kapati. Balabakkomanina kapati basololi aaba cakuti inga bayanda kubakomba. Bantu banji balaunka kuzikombelo zyabo, balaula mabbuku aabo alimwi akusanga mali manji kugwasyilizya mbunga zyabo. Bamwi balazisyoma zyoonse nzyobabaambila. Cilakatazya kweezeezya naa bantu aaba inga baindila kukkomana kuti babona Jesu! Mukwiimpana, bakombi ba Jehova bakasimpe tabajisi basololi bacikombelo. Nokuba kuti tulabalemeka aabo basololela, tulaitobela njiisyo ya Jesu iisalede yakuti: “Nywebo nyoonse muli babunyina.” (Mt. 23:8-10) Tatukombi bantu, tacikwe makani mbasololi bazikombelo naa mbeendelezi bazisi. Tatubagwasyilizyi kusumpula bukombi bwabo naa cisi. Tatutoli lubazu mutwaambo twazisi alimwi tulalyaandaanya anyika. Aboobo mumbazu zyoonse eezyi, tuliindene kapati abasizikombelo banji ibalitaminina kuti Mbanakristo.—Joh. 18:36. w21.10 20 ¶6-7

Munakristo uuli woonse weelede kubikkila maano kubona kuti kunyina cintu naa muntu weelede kunyonganya cilongwe cakwe a Leza. Alimwi mbwaanga tuli Bakamboni ba Jehova, tulikanzide kutantamuka micito iili yoonse iikonzya kuleta masampu naa kusofwaazya zina lyakwe lisalala. (Lev. 19:12; Is. 57:15) Bana Israyeli, bakali kutondezya kuti Jehova ngu Leza wabo kwiinda mukutobela milawo yakwe. Levitiko 18:4 yaamba kuti: “Mweelede kutobela mbeta zyangu, amilawo yangu mweelede kwiitobela akweenda mulinjiyo. Ndime Jehova Leza wanu.” Caandaano 19 cibikkilizya “milawo” imwi iyakapedwe bana Israyeli. Mucikozyanyo, tupango 5-8, 21, 22 twaamba kujatikizya zituuzyo zyabanyama. Bana Israyeli bakeelede kutuula banyama aaba munzila ‘iitasofwaazyi cintu cisalala ca Jehova.’ Notubala tupango ootu, tweelede kukulwaizyigwa kuyanda kumukkomanisya Jehova akutuula zipaizyo zitambulika kulinguwe, mbweena mbotukulwaizyigwa ku Bahebrayo 13:15. w21.12 5-6 ¶14-15

Banabukwetene bacili bana-bana balakonzya kugwasyigwa kuzyakuluula zyabamwi ibakaiya kusyoma Jehova. Banabukwetene bamwi ambweni babeleka myaka minji mumulimo waciindi coonse. Mulakonzya kubalomba kuti bamugwasye ikuti naa mwabona kuti muyandika kuzilanga-langa mbaakani zyanu. Eeyi ninzila aimbi yakutondezya kuti mulamusyoma Jehova. (Tus. 22:17, 19) Kamuyeeya kuti, cikwati ncipego kuzwa kuli Jehova. (Mt. 19:5, 6) Uyanda kuti banabukwetene kabakkomana acipego eeci. Nobanabukwetene bana-bana, amuzilange-lange zintu nzyomucita mubuumi bwanu. Sena mulabeleka kusikila mpomugolela kutegwa mumutondezye Jehova kuti mulalumba kapati kuzipego nzyaakamupa? Amubandike a Jehova mumupailo. Amuvwuntauzye mu Jwi lyakwe njiisyo nzyomukonzya kutobela mubukkale bwanu. Mpoonya amulutobele lulayo ndwamupa Jehova. Eelo kaka mulakonzya kuba masimpe kuti muyooba abuumi bukkomanisya alimwi ibulaampindu, ikuti naa mucikwati canu mwabikkila maano kapati kubelekela Jehova! w21.11 19 ¶16, 18

Jakobo wakali kulibona munzila yeelede. Jakobo kunyina naakali kulibona kuti wakalisumpukide kwiinda Banakristo bamwi akaambo buyo kakuti wakali mwanookwabo a Jesu naa akaambo kamukuli uulibedelede ngwaakajisi. Wakali kwiita Banakristonyina kuti “bakwesu nomuyandwa.” (Jak. 1:16, 19; 2:5) Kunyina naakali kulitondezya kuti wakalilondokede. Ncotwiiya: Katuyeeya kuti toonse tuli basizibi. Tatweelede kulitondezya munzila iili yoonse kuti tulabainda aabo mbotuyiisya. Nkaambo nzi? Kuti twapa sikwiiya wesu kuyeeya kuti swebo tatulubizyi, ulakonzya kutyompwa akutalika kuyeeya kuti takacikonzyi kutobela milawo ya Leza cakulondoka. Pele kuti cakusyomeka twamwaambila kuti tiicali cuuba-uba kulindiswe kutobela njiisyo zyamu Magwalo alimwi akumupandulwida Jehova mbwaatugwasya kuzunda buyumuyumu, tuyoomugwasya kubona kuti awalo inga wacikonzya kubelekela Jehova. w22.01 11-12 ¶13-14

Kuti katuyeeya mbuli mbwayeeya Jesu, tunoocita zintu mbuli nguwe alimwi akuzwidilila kutondezya bube bwakwe. (Heb. 1:3) Tulakonzya kwaamba kuti: ‘Jesu ulilondokede. Tandikonzyi kuba mbuli nguwe.’ Kuti kamulimvwa boobo, amuyeeye twaambo ootu. Kakusaanguna, mwakalengwa mucinkozya ca Jehova alimwi a Jesu. Aboobo mulakonzya kusoleka kusala kubaiya, mpoonya inga mwazwidilila. (Matl. 1:26) Kabili, muuya uusalala wa Leza ngowiinda kuba anguzu mububumbo. Kwiinda mukugwasyigwa anguwo, tulakonzya kucita zintu nzyotutakonzyi kucita munguzu zyesu. Katatu, Jehova talangili kuti tutondezye mucelo wamuuya cakulondoka lino. Alimwi buya, Taateesu siluyando wakabikka myaka iili 1,000 yakuti aabo bayoopona anyika bakalondoke. (Ciy. 20:1-3) Calino, Jehova uyanda buyo kuti katusolekesya kusyoma nguwe kutegwa atugwasye. w22.03 9 ¶5-6

Mupailo taili nenzila ilikke yakuyumya cilongwe cesu a Jehova. Kwiiya Jwi lya Leza alimwi akujanika kumiswaangano yambungano akwalo kulakonzya kutugwasya kuyumya cilongwe cesu a Leza. Sena kuli ncomukonzya kucita kutegwa kamugwasyigwa ciindi nomwiiya alimwi anomuli kumiswangano yambungano? Amulibuzye kuti, ‘Ncinzi cindinyonganya ciindi camiswaangano naa nondicita ciiyo cangu?’ Sena nkutambula mafooni, tugwalo naa kusobanya fooni naa tabbuleti? Kuti mwabona kuti mizeezo yanu ilisakene ciindi nomwiiya naa lyamuswaangano wambungano, amumulombe Jehova kutegwa amugwasye. Cilakonzya kumuyumina kubikkila maano kuzintu zyakumuuya, pele kucita boobo kulayandika kapati. Amupailile luumuno lwalo iluyookwabilila moyo wanu alimwi “amizeezo yanu.”—Flp. 4:6, 7. w22.01 29-30 ¶12-14

Mwami Uziya wakalukaka lulayo. Wakanjila mubusena bwatempele lya Jehova mwalo bapaizi balikke mobakazumizyidwe kunjila, alimwi akusunkwa kuumpa tununkilizyo. Bapaizi ba Jehova bakamwaambila kuti: “Tauli mulimo wako yebo Uziya wakuumpa tununkilizyo kuli Jehova! Balikke bapaizi mbabeelede kuumpa tununkilizyo.” Ino Uziya wakacita buti? Ikuti naakalicesya akuswiilila lulayo alimwi akuzwa mutempele cakufwambaana, ambweni Jehova naakamulekelela. Muciindi caboobo, “Uziya . . . wakanyema.” Ncinzi icakapa kuti alukake lulayo? Kweelede kuti wakalimvwa kuti mbwaanga mwami, wakalijisi nguzu zyakucita kufwumbwa ncaakali kuyanda. Pele Jehova kunyina naakazibona munzila iili boobo zintu. Akaambo kakucita cintu ncaatakeelede, Uziya wakaba acinsenda alimwi “wakazumanana kali sicinsenda kusikila buzuba naakafwa.” (2Mak. 26:16-21) Cikozyanyo ca Uziya cituyiisya kuti, kufwumbwa naa ndiswe bani, ikuti twalukaka lulayo lwamu Bbaibbele, Jehova inga waleka kutukkomanina. w22.02 9 ¶7

Muntu weendelezyegwa ‘abuntu bwakaindi’ kanji-kanji ulayeeya alimwi akucita zintu zibyaabi. (Kol. 3:9) Inga kajisi bube bwakuliyanda, kanyema-nyema, katalumbi akulisumpula. Ulakonzya keebelela zintu ziletela muzeezo wakoonana, mafilimu aankondo alimwi amicito yakutalilemeka. Inga kajisi bube bubotu alimwi kalimvwa kuusa akaambo kazintu zibyaabi nzyacita naa nzyaamba. Pele kunyina cimukulwaizya kucinca mbwayeeya abukkale bwakwe. (Gal. 5:19-21; 2Tim. 3:2-5) Mbwaanga toonse tatulondokede, tatukonzyi kucilekela limwi kuyeeya alimwi akulombozya zintu zibyaabi. Zimwi ziindi, tulakonzya kwaamba naa kucita cintu cikonzya kutupa kuusa. (Jer. 17:9; Jak. 3:2) Pele kuti twabusamununa buntu bwesu bwakaindi, nkokuti micito mibyaabi taicinootweendelezyi. Mpoonya inga twacinca.—Is. 55:7 w22.03 3 ¶4-5

Nobaalu, amubikkile maano kubube bubotu mbobajisi bakwesu abacizyi. Toonse tatulondokede; nokuba boobo, aumwi ulijisi bube bubotu mbotukonzya kukkomanina. Masimpe kuti, ciindi aciindi baalu balakonzya kupa mukwesu naa mucizyi lulayo. Pele mbubwenya mbuli mwaapostolo Paulo, baalu beelede kusolekesya kutabikkila maano kapati kumajwi aanyemya naa micito yamuntu ooyo. Muciindi caboobo, inga bacita kabotu kubikkila buyo maano kuluyando ndwajisi kuli Jehova muntu ooyo, kuliyumya kwakwe mukubelekela Jehova alimwi akuti ulakonzya kucita kabotu. Baalu ibabikkila buyo maano kubube bubotu mbobajisi bamwi, bagwasya bakwesu abacizyi kulimvwa kuyandwa abantu boonse mumbungano. Amuyeeye kuti Jehova talangili kuti mulondoke buya; uyanda buyo kuti kamusyomeka. (1Kor. 4:2) Andinywe mulakonzya kuba alusyomo lwakuti Leza ulaukkomanina mulimo ngomumubelekela. Alimwi ‘takailubi milimo yanu alimwi aluyando ndomutondezya kuzina lyakwe kwiinda mukubabelekela alimwi akuzumanana kubabelekela basalali.’—Heb. 6:10. w22.03 31 ¶19, 21