October

Toonse tulakonzya kupa kuti miswaangano yambungano kaikkomanisya ikuti twaimbila antoomwe alimwi akupa bwiinguzi bwakalibambilwa kabotu. Bamwi cilabayumina kwiimba naa kupa bwiinguzi mubuleya. Sena andinywe cilamukatazya? Ikuti kacili boobo, amulange-lange icakagwasya bamwi kuzunda penzi eeli. Kujatikizya nyimbo, ibamwi bajana kuti cilagwasya kwiimba kuzwa ansi amoyo. Ciindi notwiimba nyimbo zya Bwami, makanze eesu ayelede kuba aakutembaula Jehova. Aboobo amulibambile nyimbo kuŋanda mbubonya mbomulibambila zibeela zimwi zyamiswaangano alimwi akusola kubikkila maano kubona majwi aali munyimbo mbwaayendelana amakani aabandikwa. Alimwi cilagwasya kubikkila maano kumajwi aali munyimbo ikutali mbomwiimba. Kwiingula kulakonzya kubakatazya bamwi. Pele ncinzi cikonzya kugwasya? Amusole kunoocita oobo lyoonse. Kamuyeeya kuti, cili buyo kabotu kuti bwiinguzi bwanu kabuli bufwaafwi, buubauba alimwi bugaminide. Jehova ulalumba kapati kukusolekesya nkotucita kumutembaula lyamiswaangano yambungano. w22.04 7-8 ¶12-15

Bbala lyakuti “mugwasyi” lipandulula muntu uubalikila kuyoogwasya muntu uulomba lugwasyo. Amweezyeezye buyo Jehova kabalikila kuyoogwasya muntu uuli mumapenzi. Tamudooneki buya kuti bupanduluzi oobu butondezya Jehova mbwalibambilide, inzya mbwalyaabide kuba Mugwasyi wesu. Kuti Jehova kali kulubazu lwesu tuyoozumanana kuliyumya mumasunko kumwi katukkomene. Muunzila nzi Jehova mwatugwasya? Kwiingula mubuzyo ooyu, atubale bbuku lya Isaya. Nkaambo nzi? Businsimi bunji mbwaakasololelwa kulemba Isaya bulabeleka kubabelesi ba Leza mazuba aano. Kuyungizya waawo, Isaya kanji-kanji upandulula Jehova kubelesya mabala aatakatazyi kumvwa. Mucikozyanyo, amubone Isaya caandaano 30. Omuya, mabala aabelesyedwe alatugwasya kweezyeezya, kubona Isaya napandulula Jehova mbwatugwasya kwiinda (1) mukuswiilila cakubikkila maano akwiingula mipailo yesu, (2)  mukutupa busolozi, alimwi a (3) mukutupa zilongezyo lino akumbele. w22.11 8 ¶2-3

Milumbe Jesu njaakatuma kumbungano yaku Simurna a Filadelufiya, wakaambila Banakristo bakumbungano eezyi kuti batayoowi kupenzyegwa, mbwaanga kusyomeka kwabo kwakali kuyoolumbulwa. (Ciy. 3:10) Tweelede kulangila kupenzyegwa alimwi akulisungula kuliyumya. (Mt. 24:​9, 13; 2Kor. 12:10) Bbuku lya Ciyubunuzyo litwaambila kuti bantu ba Leza bakali kuyoopenzyegwa mumazuba eesu, nkokuti “mubuzuba bwa Mwami.” (Ciy. 1:10) Ku Ciyubunuzyo caandaano 12 twaambilwa kuti, mbwaakabeda buyo Mwami Jesu, kwakabuka nkondo kujulu. Mikayeli, nkokuti Jesu Kristo iwakalemekwa, abasikalumamba bakwe bakalwana Saatani amadaimona aakwe. (Ciy. 12:​7, 8) Akaambo kaceeci, aaba basinkondonyina Leza boonse bakazundwa alimwi akusowelwa waano anyika, akuleta mapenzi aataambiki anyika akubantu.—Ciy. 12:​9, 12. w22.05 5 ¶12-13

Kulekelela kwa Jehova lyoonse nkwabululami alimwi kuliluzi. Tasalululi naaceya. Talekeleli muntu akaambo kambwalibonya, naa akaambo kakuti ulivwubide, ulaampuwo kapati naa kuti ulaazipego zinji. (1Sam. 16:7; Jak. 2:​1-4) Kunyina uukonzya kusinikizya Jehova kucita cintu cimwi naa kumuula makulo. Kusala kwakwe takweendelezyegwi aakunyema naa koongelezyegwa. (Kul. 34:7) Kakunyina akudooneka, Jehova Mubetesi iwiinda kubota nkaambo ulizyi zintu zyoonse kujatikizya ndiswe alimwi abukkale bwesu. (Dt. 32:4) Balembi ba Magwalo aa Chihebrayo bakabona kuti kulekelela kwa Jehova kulilibedelede. Bbuku limwi lyaamba kuti, mubukkale bumwi, balembi aaba bakabelesya bbala lya Chihebrayo “ilibelesyegwa buyo kupandulula nzila Leza njabelesya kulekelela basizibi. Bbala eelyo kunyina nolyaamba nzila iigaminide bantu mobalekelelana.” Alikke Jehova nguujisi nguzu zyakulekelela sizibi iweempwa ncobeni. w22.06 4 ¶10-11

Ikuti naa mukomezya bana kamuli nyolikke akuti naa mukwetwe kumuntu uutali Kamboni, amube alusyomo lwakuti cikozyanyo canu calusyomo cilabayumya alimwi akubakulwaizya aabo ibamuzungulukide. Mbuti kuti calibonya kuti mwanaanu tabikkili maano kukusolekesya kwanu? Amuyeeye kuti kuyiisya mwana citola ciindi. Ciindi nomwasyanga mbuto, zimwi ziindi muladooneka naa imbuto eeyo iyakukomena akuba cisamu cizyala micelo. Nokuba kuti tamuzyi naa cisamu eeco ciyakuzyala micelo naa pe, mulazumanana kucitilila kutegwa cikomene. (Mk. 4:​26-29) Mbubwenya buyo, mukaintu zimwi ziindi ulakonzya kudooneka naa kusolekesya kwakwe kulakonzya kubagwasya bana bakwe ikumuyanda Jehova. Kunyina ncomukonzya kucita kujatikizya nzyobakonzya kusala bana banu. Pele ikuti mwazumanana kucita zyoonse nzyomukonzya kutegwa mubayiisye, mubapa coolwe cakuba balongwe ba Leza. w22.04 19-20 ¶16-17

Ciindi Solomoni naakali mukombi wa Jehova uusyomeka, wakali kulibona munzila iili kabotu. Naakali mukubusi, cakulicesya wakalizyi mbazu mwaakali kulezya alimwi wakali kulomba busolozi bwa Jehova. (1Bam. 3:​7-9) Kumatalikilo aabulelo bwakwe, Solomoni wakaliizyi ntenda yakuba amuuya wakulisumpula. Cuusisya ncakuti, kumbele Solomoni wakaalilwa kutobela lulayo lwakwe. Aciindi cimwi kali mwami, cakulisumpula wakaunduluzya milawo ya Leza. Mucikozyanyo, mulawo umwi wakali kwaamba kuti mwami mu Hebrayo tanaakeelede “kukwata bamakaintu banji kutegwa moyo wakwe utaleyi.” (Dt. 17:17) Nokuba boobo, Solomoni wakautyola mulawo ooyu alimwi akukwata bamakaintu bali 700 abamwanakasuwa bali 300! (1Bam. 11:​1-3) Ambweni Solomoni wakali kulimvwa kuti wakali kukonzya kucita kufwumbwa ncaakali kuyanda. Kumbele, Solomoni wakacitikilwa zintu zibyaabi akaambo kakutamvwida Jehova.—1Bam. 11:​9-13. w22.05 23 ¶12

Kuli kusala kuyandika kapati nkobeelede kucita bantu mazuba aano. Sena balasala kuba kulubazu lwa Jehova Leza Mweendelezi weelela wabubumbo boonse, naa Saatani Diabolosi sinkondonyina mubyaabi? Umwi aumwi weelede kusala lubazu lomwe. Kufwumbwa lubazu ndobasala, ciyoojatikizya buumi bwabo bwakumbele. (Mt. 25:​31-33, 46) ‘Lyamapenzi mapati,’ bayoobikkwa citondezyo calufwutuko naa lunyonyooko. (Ciy. 7:14; 14:​9-11; Ezk. 9:​4, 6) Ikuti naa mwakasala kugwasyilizya bweendelezi bwa Jehova, nkokuti mwakasala cabusongo. Lino muliyandide kubagwasyilizya bamwi kusala kabotu. Aabo ibagwasyilizya bweendelezi bwa Jehova cakusyomeka bayoojana zilongezyo. Inga twacita kabotu kukalanga-langa kasimpe aaka ikayandika kapati. Kucita boobu kuyooyumya makanze eesu aakuzumanana kumubelekela Jehova. Kuyungizya waawo, tulakonzya kubelesya nzyotwaiya kugwasya bamwi kusala kubelekela Jehova alimwi akuzumanana kucita boobo. w22.05 15 ¶1-2

Tweelede kuswiilila Jehova, ikutali basinkondoma. Jobu wakaswiilila cakubikkila maano ciindi Jehova naakabandika anguwe. Leza wakabuzya Jobu kuti: Ndilizyi zintu zyoonse izyakakucitikila. Sena uyeeya kuti tandikonzyi kukulanganya?’ Cakulicesya alimwi akulumba kapati kububotu bwa Jehova, Jobu wakaingula kuti: “Ndakali kumvwa buyo mpuwo yako, pele lino ndakubona ameso aangu.” (Job. 42:5) Ciindi Jobu naakaamba majwi aaya, kweelede kuti wakacili mumulota, mubili wakwe kauzwide zilonda. Nokuba boobo, Jehova wakatondezya luyando lwakwe kuli Jobu alimwi akumwaambila kuti ulamukkomanina. (Job. 42:​7, 8) Mbubwenya buyo amazuba aano, bantu balakonzya kututukila alimwi akutweendelezya mbuli kuti tatujisi mpindu. Balakonzya kunyonganya mpuwo yesu naa yambunga. Kuzwa kucibalo ca Jobu twaiya kuti Jehova ulaalusyomo lwakuti tuyoozumanana kusyomeka kulinguwe twaakujana masunko. w22.06 24 ¶15-16

Nokuba kuti kunooli koompolola kapati calukkomano kujulu ciindi Babuloni Mupati aakunyonyoonwa, kuli cintu cimbi ciyakuleta lukkomano lunji kapati. (Ciy. 19:​1-3) Ciindi eeco cikkomanisya cilaambidwe kubbuku lya Ciyubunuzyo, nkokuti “bwiinga bwa Mwanaambelele.” Boonse iba 144,000 banooli kujulu kakusyeede buyo ciindi cisyoonto kutegwa nkondo ya Amagedoni italike. Nokuba boobo, eeco tacinooli ciindi cabwiinga bwa Mwanaambelele. (Ciy. 21:​1, 2) Bwiinga bwa Mwanaambelele buyoocitika yaakwiinda nkondo ya Amagedoni alimwi basinkondonyina Leza boonse baakunyonyoonwa. (Int. 45:​3, 4, 13-17) Ino bwiinga bwa Mwanaambelele bwaamba nzi kuli baabo ibajatikizyidwe? Mbubwenya lukwatano mboluswaanganya mwaalumi amukaintu, oobu bwiinga bwacikozyanyo buswaanganya Mwami, Jesu Kristo ‘anabwiinga’ wakwe, nkokuti ba 144,000. Bwiinga oobu bukkomanisya buyootalisya mfwulumende mpya iyoolela nyika kwamyaka iili 1,000.—Ciy. 20:6. w22.05 17 ¶11-13

Jesu wakasinsima kuti kumamanino aaciindi, uyoosala “muzike uusyomeka alimwi uucenjede” kuti kapa cakulya cakumuuya. (Mt. 24:45) Aaya masimpe. Jesu ubelesya kabunga kasyoonto kabaalumi bananike kupa bantu ba Leza alimwi abaabo ibajisi luyandisisyo cakulya cakumuuya “aciindi ceelede.” Baalumi aaba tabali basimalelo balusyomo lwabamwi. (2Kor. 1:24) Muciindi caboobo, balizyi kuti Jesu Kristo ‘ngomusololi alimwi amweendelezi’ wabantu bakwe. (Is. 55:4) Kuzwa mu 1919, muzike uusyomeka wazumanana kumwaya mabbuku aayindene-indene aakapa coolwe kuli baabo ibakajisi luyandisisyo lwakwiiya kasimpe kamu Jwi lya Leza. Mu 1921, muzike wakamwaya bbuku lyakuti The Harp of God kutegwa ligwasye baabo ibakajisi luyandisisyo lwakwiiya njiisyo zyantalisyo zyamu Bbaibbele. Mukuya kwaciindi, kwakamwaigwa amabbuku aambi. Ndibbuku nzi ilyakamugwasya kumuzyiba alimwi akumuyanda Taateesu wakujulu? w22.07 10 ¶9-10

Jehova ngowiinda bwaabi. Kufwumbwa cintu ncomwamupa, walo uyoomupilusyila zinji kwiinda aliceeco ncomwakamupa. (Mk. 10:​29, 30) Uyoomupa kupona buumi bukkomanisya, bulaampindu, nomuba munyika eeyi mbyaabi. Aaya matalikilo buyo. Mweelede kuzumanana kumubelekela Uso siluyando mane kukabe kutamani. Iluyando luli akati kandinywe a Bauso lweelede kuzumanana kukomena, alimwi muyoozumanana kupona mbubonya mbuli nguwe, mane kukabe kutamani. Ciindi nomwalyaaba akubbapatizyigwa, mupa Uso wanu cintu cimwi ciyandika kapati. Walo nguumupa zintu zibotu zyoonse nzyomujisi, izintu nzyomukkomanina kapati. Aboobo, andinywe mulakonzya kupa Mukamwini julu anyika cintu cimwi ncatajisi, nkokuti kumubelekela cakulyaaba. (Job. 1:8; 41:11; Tus. 27:11) Eelo kaka eeyi ninzila yiinda kubota yakupona! w23.03 6 ¶16-17

Ciindi nomwakubuka, muzeezo wakoonana ulakomena, alimwi bamwi balakonzya kumoongelezya koonana. Eeci Saatani ncayanda kuti mucite. Aboobo ncinzi cikonzya kumugwasya kuzumanana kusalala mukulilemeka? (1Tes. 4:​3, 4) Ciindi nomupaila kuli Jehova, amumwaambile mbomulimvwa. Alimwi akumulomba kuti amugwasye kuliyumya. (Mt. 6:13) Kamuyeeya kuti Jehova uyanda kumugwasya ikutali kumubeteka. (Int. 103:​13, 14) Mutasoli kwaalwana mapenzi ngomujisi nyolikke. Amubandike abazyali banu. Nokuba kuti tacili cuubauba kubandika makani aali boobu, pele cilayandika kucita oobo. Kwiinda mukubala Bbaibbele alimwi akuzinzibala kuyeeya, ciyoomuubaubila kusala zintu izimukkomanisya Jehova. Muyoobona kuti tamuyandiki milawo mubukkale buliboonse nkaambo muyoomvwisya mbwayeeya Jehova mumakani aali woonse. w22.08 5 ¶10-12   

Silutwe wamukwasyi Munakristo ulaubikkila maano kapati mukuli wakulanganya mukwasyi wakwe kumubili. Ikuti kamuli silutwe wamukwasyi, ambweni mulalibilika kujatikizya kusanina mukwasyi wanu naa kubbadelela ŋanda. Kunze lyaboobo, ambweni mulayoowa kuti naa mwamaninwa mulimo, tamukacikonzyi kujana uumbi. Naa ambweni mwakali kuyeeya kuti inga tiimwacikonzya kupona kuti mwaubya-ubya bukkale bwanu. Saatani wazwidilila kapati mukubelesya buyoofwu buli boobu. Saatani ulasola kutupa kusyoma kuti Jehova tatulanganyi swebo lwesu kutugama alimwi akuti takonzyi kutugwasyilizya kulanganya mukwasyi wesu. Akaambo kaceeci, tulakonzya kuyeeya kuti tweelede kucita kufwumbwa ncotukonzya kutegwa tukwabilile mulimo wesu wakumubili, nokuba kuti kucita boobo inga kwanyonganya cilongwe cesu a Leza. w22.06 15 ¶5-6

Tulizyi kuti Leza wesu ngu “Leza siluse alimwi silweetelelo, uutafwambaani kukalala alimwi uuzwide luyando lutamani akasimpe.” (Kul. 34:6) Jehova ulabuyandisya bululami. (Is. 61:8) Cilamucisa kapati kubona mbotupenga, aboobo ulilibambilide alimwi ulayandisisya kuyakwaamana mapenzi woonse aciindi ceelede. (Jer. 29:11) Eelo kaka aaya makani mabotu! Nkakaambo kaako tulamuyanda kapati Jehova! Nkaambo nzi akambi katupa kukayanda kasimpe? Kasimpe kalayandika kapati kulindiswe. Atulange-lange cikozyanyo. Kasimpe kamu Bbaibbele kabikkilizya bulangizi bwesu bwakumbele. Mbubwenya mbuli ngobyo mboyiimika bwato, bulangizi bwesu ibuyeeme a Bbaibbele bulakonzya kutupa kukkalwa moyo ciindi notuli mumapenzi. Mulugwalo lwabuzuba bwasunu, mwaapostolo Paulo wakali kubandika bulangizi bwakujulu mbobajisi Banakristo bananike. Pele majwi aaya alakonzya kubeleka aku Banakristo ibalangila kuyoopona kukabe kutamani muparadaiso anyika. (Joh. 3:16) Masimpe, kwiiya kujatikizya bulangizi bwabuumi butamani kwakatupa kuba abuumi bulaampindu. w22.08 14-15 ¶3-5

Luyando mpaayeeme lusyomo. Bakorinto bakusaanguna caandaano 13, ilaamba zibeela zyaluyando zinji izikonzya kutugwasya kuyumya lusyomo lwesu muli bamwi naa kutalika alimwi kubasyoma. (1Kor. 13:​4-8) Mucikozyanyo, kapango 4 kaamba kuti “luyando lulakkazika moyo alimwi lulaaluzyalo.” Jehova ulatukkazikila moyo nociba ciindi notumubisizya. Aboobo andiswe tweelede kubakkazyikila moyo bakwesu abacizyi ikuti baamba naa kucita cintu cimwi icatunyemya. Kapango 5 kayungizya kuti: ‘Luyando talunyemi-nyemi, talubikkilili.’ Aboobo inga tiitwayanda kuzumanana kuyeeya zintu bakwesu naa bacizyi nzyobakacita izyakatunyemya. Mukambausi 7:9 yaamba kuti tatweelede ‘kufwambaana kunyema pe.’ Bakwesu abacizyi amubabone mbuli mbwababona Jehova. Leza ulabayanda alimwi kunyina nabikkila maano zibi zyabo. Andiswe tweelede kucita oobo. (Int. 130:3) Muciindi cakubikkila maano kukulubizya kwabo, amubone bube bubotu mbobajisi.—Mt. 7:​1-5. w22.09 3-4 ¶6-7

Bbuku lya Daniele lyaamba mulongo wazintu zikkomanisya iziyoocitika muciindi camamanino. Mucikozyanyo, Daniele 12:1 yaamba Mikayeli, nkokuti Jesu Kristo, kuti ‘uliimvwi kutegwa agwasye bantu ba Leza.’ Cibeela cabusinsimi oobu cakatalika kuzuzikizyigwa mu 1914, ciindi Jesu naakabikkwa kuba Mwami wa Bwami bwa Leza bwakujulu. Nokuba boobo, Daniele awalo wakaambilwa kuti Jesu “uyakwiimikila” “ciindi camapenzi aayo aatanacitikide kuzwa ciindi nokwakaba cisi mane kusikila kuciindi eeco.” “Ciindi camapenzi aayo” caamba “mapenzi mapati” aambidwe ku Matayo 24:21. Jesu uyakwiimikila, naa kubweza ntaamu kukwabilila bantu ba Leza kumamanino aamapenzi aayo, nkokuti, lya Amagedoni. Bbuku lya Ciyubunuzyo lyaamba bantu aaba kuti ‘ninkamu mpati iyazwa mumapenzi mapati.’—Ciy. 7:​9, 14. w22.09 21 ¶4-5

Mazina aaliko aciindi ecino mubbuku eeli alakonzya kumwaigwa. Eeci cili mbuli kuti kumatalikilo Jehova wakaalemba kubelesya penso. (Ciy. 3:5) Tweelede kuba masimpe kuti zina lyesu nkolili mubbuku eeli kusikila likalembwe muinki, munzila yacikozyanyo. Ibamwi bajisi mazina aabo aalembedwe mubbuku lyabuumi, mbaabo ibakasalwa kuyoolela a Jesu kujulu. Kweelana amajwi amwaapostolo Paulo kuli ‘basimilimonyina’ ku Filipi, mazina aabananike, ibakatambwa kuyoolela a Jesu, nkwaali lino mubbuku lyabuumi. (Flp. 4:3) Pele kutegwa mazina aabo kaaliko mubbuku lyacikozyanyo, beelede kuzumanana kusyomeka. Mpoonya baakubikkwa ciganto camamanino, kufwumbwa naa ndileelyo kabatafwa naa kaatanatalika mapenzi mapati, mazina aabo anoolembedwe kukabe kutamani mubbuku eeli.—Ciy. 7:3. w22.09 14 ¶3; 15 ¶5-6

Sena kuli nomwakacitikilwa kale cintu cili boobu? Muntu umwi wamujikila cakulya ncomukkomanina. Pele ambweni akaambo kakuti mulibindide naa kuti mulikopene mumizeezo, mwacilya cakufwambaana kakunyina akucimvwa kabotu mbocinona. Lino nomwamanizya kulya, mwayeeya mbomwali kulya cakufwambaana kumane mwalimvwa kuti ani nomwali kulya asyoonto-syoonto kutegwa mucikkomanine cakulya. Eeci cilakonzya kucitika ciindi notubala Bbaibbele. Zimwi ziindi tulakonzya kubala cakufwambaana cakuti twaalilwa kucikkomanina ncatuyiisya Jehova. Mutanikubali cakufwambaana kutegwa kamuzikkomanina nzyomubala mu Jwi lya Leza; amweezyeezye busena nkozyakali kucitikila, majwi aabantu alimwi akuyeeya ncomwabala. Kuti mwacita oobo, munookkomene. Jesu wakasala “muzike uusyomeka alimwi uucenjede” kupa cakulya cakumuuya aciindi ceelede, alimwi tulasaninwa kabotu kumuuya. (Mt. 24:45) Magwalo aakasololelwa amuuya nkakasensa kabusani mbotujana muzyakulya zyoonse nzyatubambila muzike uusyomeka.—1Tes. 2:13. w22.10 7-8 ¶6-8

Bbaibbele lyakacenjezya kuti mumazuba aamamanino, kunooli basikufwubaazya. (2Pet. 3:​3, 4) Balacita oobu nkaambo bayanda ‘kutobela zisusi zyanyama zitondwa.’ (Jud. 7, 17, 18) Mbuti mbotukonzya kubikkila maano kutegwa tutabi basikufwubaazya? Nzila imwi nkwiinda mukutayanzana abantu balaacilengwa cakutongooka. (Int. 1:1) Eeci caamba kuti tatweelede kunooswiilila naa kubala makani aali woonse aabasiluleyo. Tulizyi kuti naa tiitwacenjela, tulakonzya kuba amuuya wakutongooka, kudooneka Jehova alimwi amalailile ngotutambula kuzwa kumbunga yakwe. Kutegwa tweelebe bukkale oobu, tweelede kulibuzya mibuzyo yakuti: ‘Sena ndilatongooka naaceya buyo ciindi nitwatambula malailile naa bupanduluzi bupya? Sena ndilaacilengwa cakutongooka baabo basololela?’ Kuti cakufwambaana twacileka kucita zintu eezyi, Jehova uyootukkomanina.—Tus. 3:​34, 35. w22.10 20 ¶9-10

Muuya wa Leza wakamuyumya Ezekieli kumulimo wakukambaukila bantu bamucilawo cakwe ‘basicinguni alimwi batanyoneki.’ Jehova wakaambila Ezekieli kuti: “Ndayumya busyu bwako mbubonya mbuli masyu aabo alimwi ndayumya nkumo yako mbubonya mbuli nkumo zyabo. Nkumo yako ndaiyumya mbubonya mbuli daimondi, akwiinda bbweluuma. Utabayoowi pe alimwi utakongwi amasyu aabo.” (Ezk. 3:​8, 9) Cakali mbuli kuti Jehova wakali kwaambila Ezekieli kuti: ‘Utalekeli nkazi zyabantu kukutyompya. Ndilakuyumya.’ Kumane, muuya wa Leza wakamutola Ezekieli mucilawo cakwe mwaakali kukambaukila. Aboobo Ezekieli wakalemba kuti: “Janza lya Jehova lyakali alindime canguzu.” Musinsimi ooyu cakamutolela nsondo kutegwa awumvwisye mulumbe ngwaakeelede kwaambilizya. (Ezk. 3:​14, 15) Mpoonya Jehova wakamusololela kucibanda camukkuti ooko ‘muuya nkowakamunjila.’ (Ezk. 3:​23, 24) Ezekieli wakalilibambilide kuutalika mulimo wakwe. w22.11 4-5 ¶8-9

Musinsimi Habakuku wakajana buyumuyumu bunji kapati. Aciindi cimwi, wakadooneka naa Jehova wakali kumulanganya. Aboobo wakapaila kuli Jehova kuzwa ansi amoyo. Jehova wakawiingula mupailo wamubelesi wakwe uusyomeka. (Hab. 2:​2, 3) Naakamana kuzinzibala kuyeeya Jehova mbwaakabafwutula bantu bakwe, Habakuku wakaba alukkomano alimwi. Wakasinizya kuti Jehova wakali kuyoomulanganya alimwi uyoomugwasya kuliyumya mumapenzi aali woonse. (Hab. 3:​17-19) Ino twiiya nzi? Ciindi nomwaba amapenzi, amupaile kuli Jehova akumwaambila mbomulimvwa. Mpoonya amumulombe kuti amugwasye. Kuti mwacita oobo, munoosinizyide kuti Jehova uyoomupa nguzu zyakuliyumya. Alimwi ciindi nomubona mbwamugwasya, lusyomo lwanu luyooyuma kapati. Kuti mwazumanana kucita zintu zyakumuuya, andinywe tamukazumizyi mapenzi kumwaandaanya kuli Jehova.—1Tim. 6:​6-8. w22.11 15 ¶6-7

Jesu alimwi azigwebenga zyobilo nzyaakali limwi bakapenga kapati ciindi nobakali kuyaabufwa asyoonto-syoonto. (Lk. 23:​32, 33) Zigwebenga eezyi zyakali kumusampaula Jesu. (Mt. 27:44; Mk. 15:32) Pele cigwebenga comwe cakacinca mizeezo. Cakaamba kuti: “Jesu, ukandiyeeye waakunjila mu Bwami bwako.” Jesu wakaingula kwiinda mukwaamba majwi aali mulugwalo lwasunu. (Lk. 23:​39-42) Majwi Jesu ngaakaambila cigwebenga ayelede kutupa kuyeeya mbobunoobede buumi mu Paradaiso. Mubwini tulakonzya kwiiya kujatikizya Paradaiso kuzwa kubulelo bwaluumuno bwa Mwami Solomoni. Alimwi tweelede kulangila kuti Jesu, imupati kwiinda Solomoni uyoobeleka antoomwe abasikulelanyina kuleta zilongezyo zibotu aano anyika. (Mt. 12:42) Cakutadooneka, kweelede kuti ‘bambelele zimbi’ balayandisisya kuzyiba ncobeelede kucita kutegwa beelele kuyoopona kukabe kutamani munyika ya Paradaiso.—Joh. 10:16. w22.12 8 ¶1; 9 ¶4

Isaya utusyomezya kuti Jehova uyootuswiilila twaakumulilila, mpoonya uyoofwambaana kwiingula mipailo yesu. Isaya ulayungizya kuti: “Mbwayakulimvwida buyo uyookuvwiila.” Aaya majwi aakulwaizya atuyeezya kuti Taateesu ulilibambilide, inzya uliyandide kapati kubagwasya aabo bamwiita. Kuzyiba makani aaya kulatugwasya kuliyumya kumwi katukkomene. Jehova ulaswiilila cakubikkila maano kumipailo yaumwi aumwi wesu. Nkaambo nzi ncotukonzya kwaamba boobo? Mumajwi aakusaanguna mu Isaya caandaano 30, kubelesyedwe bbala lyaamba bantu banji akaambo kakuti Jehova wakali kwaambila bantu bakwe kabali nkamu. Nokuba boobo, mukapango 19 kubelesyedwe bbala lyaamba muntu aumwi kumugama. Isaya wakalemba kuti: “Yebo tokalili pe”; “masimpe uyookufwida luzyalo”; “uyookuvwiila.” Mbwali Taata siluyando, Jehova ulatulanganya umwi aumwi kumugama alimwi akubikkila maano kumipailo yesu.—Int. 116:1; Is. 57:15. w22.11 9 ¶5-6

Kukambauka akuyiisya kutuletela lukkomano aluumuno nokuba kuti tulakazyigwa. Mumwaanda wamyaka wakusaanguna beendelezi baba Juda bakaambila baapostolo kuti bacileke kukambauka, pele aaba baalumi basyomeka bakasala kumvwida Leza. Bakazumanana kukambauka, alimwi mulimo ooyu wakabapa lukkomano. (Mil. 5:​27-29, 41, 42) Masimpe, ciindi mulimo wesu nowalesyegwa, tweelede kukambauka cabucenjezu. Pele kuti twasolekesya kusikila mpotugolela, tuyooba aluumuno luzwa kuli Jehova alimwi aloolo luzwa kumulimo ooyu uufwutula buumi bwabantu. Amusyome kuti nomuba muziindi zikatazya ncobeni, tulakonzya kuba aluumuno. Muziindi zili boobu, tweelede kuyeeya kuti tuyandika luumuno luzwa kuli Leza, nkokuti, luumuno lulikke Jehova ndwapa. Amumusyome ciindi nokwabbuka bulwazi, nokwacitika ntenda, naa nomupenzyegwa. Amukakatile kumbunga yakwe. Kamulangila buumi bwakumbele bubotu. Nomucita boobo, “Leza waluumuno unoolaandinywe.”—Flp. 4:9. w22.12 21 ¶17-18

Eeci caamba kuti tweelede kubeleka canguzu. Mucikozyanyo tweelede kubeleka canguzu kulwana bube butali kabotu, bube mbuli kulutila, bukali alimwi akunyema. (Ef. 4:​31, 32) Pele zimwi ziindi eeci cilakonzya kukatazya kapati. Nkaambo nzi? Nkaambo kakuti ambweni bube buli boobu twalibujisi kwaciindi cilamfwu. Bbaibbele lyaamba kuti “imoyo wamuntu mubi kuzwa kubwana.” (Matl. 8:21) Aboobo muntu uujisi bube oobu butali kabotu, inga wayandika kuzumanana kubeleka canguzu noliba leelyo naamana kubbapatizyigwa. (Rom. 7:​21-23) Amupaile kuli Jehova kujatikizya bube butali kabotu ibumukatazya kuleka, kamusyomede kuti ulamuswiilila alimwi akumugwasya. (1Joh. 5:​14, 15) Nokuba kuti Jehova takonzyi kubugwisya buya bube oobo camaleele, pele ulakonzya kumupa nguzu izyakucikonzya kubuzunda. (1Pet. 5:10) Pele amusolekesye kucita zintu kweelana amipailo yanu, kutegwa mutatondezyi bube bwanu bwakaindi. Alimwi mutanooyeeyi zintu zitali kabotu.—Flp. 4:8; Kol. 3:2. w23.01 10 ¶7, 9-10

Nzila imwi mbotutondezya luyando lwesu nkwiinda mukutola lubazu cabusungu mumulimo wakukambauka. Tweelede kubandika amuntu uuli woonse ngotwajana. Tatweelede kusalulula muntu uuli woonse akaambo buyo kamubala wakwe naa musyobo. Tweelede kubandika abantu boonse kufwumbwa naa mbavwubi naa mbacete akuti naa baliyiide naa pe. Kwiinda mukucita boobo, nkokuti tulabeleka kweelana amakanze aa Leza aakuti “bantu boonse bafwutulwe akuba aluzyibo lwini-lwini lwakasimpe.” (1Tim. 2:4) Kunze lyaboobo, tulatondezya luyando ndotujisi kuli Leza a Kristo kwiinda mukubayanda bakwesu abacizyi. Tweelede kubabikkila maano kapati alimwi akubagwasya ciindi nobali mumapenzi. Tweelede kubaumbulizya nobafwidwa muyandwa wabo, kubaswaya ciindi nobacisidwe alimwi akubakulwaizya ciindi nobatyompedwe. (2Kor. 1:​3-7; 1Tes. 5:​11, 14) Kuyungizya waawo, tweelede kuzumanana kubapailila nkaambo tulizyi kuti “mupailo wakukombelezya wamuntu mululami ulabeleka canguzu kapati.”—Jak. 5:16. w23.01 28-29 ¶7-8

Mbubwenya mbuli muyaki mbwayungizya luzyibo lwakwe mukuya kwaciindi, andiswe tulakonzya kuyaambele mukuyakana umwi amweenzinyina. Tulakonzya kubagwasya bamwi ikuba anguzu zyakuliyumya mumasunko kwiinda mukubaambila zikozyanyo zyabaabo ibakaliyumya kaindi. (Heb. 11:​32-35; 12:1) Tulakonzya kukulwaizya luumuno kwiinda mukwaamba bube bubotu mbotubona muli bamwi, ikubamba luumuno ciindi nokwaba zintu zikonzya kulunyonganya, naa nokwaba mazwanga akati kesu. (Ef. 4:3) Alimwi tulakonzya kuzumanana ikuyaka lusyomo lwabakwesu abacizyi, kwiinda mukubaambila kasimpe kamu Bbaibbele ikayandika kapati, ikubagwasya munzila zyacigaminina alimwi akwiinda mukugwasyilizya baabo ibali alusyomo luyaabuceya. Andiswe tulakonzya kuba alukkomano akukkutila ciindi notuyaka lusyomo lwabakwesu abacizyi mumbungano. Mukwiimpana amayake eeni-eni alo aakonzya kunyonyooka mukuya kwaciindi, bubotu bwamulimo wesu wakuyaka bamwi bulazumanana mane kukabe kutamani! w22.08 22 ¶6; 25 ¶17-18

Jesu wakaamba kuti tuyandika kubelesya maano kutegwa tuzimvwisye nzyotubala mu Bbaibbele. (Mt. 24:15) Muntu uubelesya maano ulakonzya kubona kapango kamwi mbokaswaangene akapango kambi. Alimwi ulakonzya kubona makani ngabala mbwaaswaangene azintu zicitika. Kweelana ambwaakaamba Jesu, muntu uuli boobu ulakonzya kuzyiba zintu zizuzikizya businsimi bwamu Bbaibbele. Aboobo kubelesya maano kulakonzya kupa kuti tugwasyigwe kapati azintu nzyotubala mu Bbaibbele. Jehova ulabagwasya babelesi bakwe kubelesya maano. Aboobo amupaile kulinguwe ikumulomba kuti amugwasye kucita boobo. Mbuti mbomukonzya kucita zintu kweelana amupailo wanu? Amuzilange-lange cakubikkila maano zintu nzyomubala akubona mbozyeendelana azintu nzyomuzyi kale. Amubone mbozikonzya kumugwasya kumvwisya ncocaamba cibalo cimwi camu Bbaibbele alimwi akubona nzila mbomukonzya kucibelesya mubuumi bwanu. (Heb. 5:14) Kubelesya maano ciindi nomubala, kulakonzya kumugwasya kwaamvwisya kabotu Magwalo. w23.02 10 ¶7-8

Amweezeezye kuti mweenzinyoko wamupa ŋanda. Pele njakaindi alimwi ilaloka. Nokuba kuti iili boobo, ŋanda eeyi iladula kapati. Tacidoonekwi buya kuti inga mwalumba kapati kuba anjiyo alimwi inga mwaikwabilila. Ncimwi buyo, Jehova watupa cipego citaliboteli, cipego cabuumi. Alimwi buya, wakatondezya mbwabubikkila maano kapati buumi bwesu kwiinda mukutupa Mwanaakwe kali cinunuzyo. (Joh. 3:16) Jehova ngo Kasensa kabuumi. (Int. 36:9) Awalo mwaapostolo Paulo wakatondezya kuti wakali kusyoma oobo kwiinda mukwaamba kuti: “Walo nguutupa buumi, kweenda akupona.” (Mil. 17:​25, 28) Aboobo tulakonzya kwaamba kuti buumi bwesu ncipego kuzwa kuli Leza. Alimwi caluyando, ulatupa zyoonse nzyotuyandika kutegwa tuzumanane kupona. (Mil. 14:​15-17) Pele Jehova taciti maleele mazuba aano kupa kuti tuzumanane kupona. Muciindi caboobo, uyanda kuti tucite zyoonse nzyotukonzya kutegwa katupona buumi buli kabotu akuzumanana kumubelekela.—2Kor. 7:1. w23.02 20 ¶1-2

Eelo kaka tulamulumba kapati Jehova Leza akaambo ka Bbaibbele! Kwiinda mulindilyo, ulatupa lulayo lukonzya kutugwasya kuzyiba ncotweelede kucita notwajana mapenzi. Alimwi ulatupa bulangizi bubotu bwakumbele. Kwiinda zyoonse, Jehova wabelesya Bbaibbele kutwaambila bube bunji kapati mbwajisi. Ciindi notuzinzibala kuyeeya bube bwakwe oobu, tulakulwaizyigwa kapati alimwi eeci citupa kuyanda kuba acilongwe anguwe. (Int. 25:14) Jehova uyanda kuti bantu bamuzyibe. Kaindi, wakali kuliyubununa kwiinda mukubelesya ziloto, zilengaano alimwi buya abangelo. (My. 12:6; Mil. 10:​3, 4) Pele notwatakazizyiba ziloto eezyi, zilengaano naa milumbe yakali kuzwa kubangelo ikuti nozyatakalembwa. Nkakaambo kaako, Jehova wakasololela bamaalumi ‘kuzilemba mubbuku’ izintu nzyaakali kuyanda kuti tuzyibe. Akaambo kakuti “inzila ya Leza mwini-mwini ililondokede,” tulakonzya kuba masimpe kuti inzila eeyi njaakabelesya kubandika andiswe nimbotu kapati alimwi ilagwasya.—Int. 18:30. w23.02 2 ¶1-2

Amulibikkile mbaakani zigwasya. Amusale mbaakani zikonzya kuyumya lusyomo lwanu akumugwasya kuba Munakristo uusimide. (Ef. 3:16) Mucikozyanyo, amubikkile maano kuciiyo canu alimwi akubala Bbaibbele lyoonse. (Int. 1:​2, 3) Amulange-lange ziindi nzyomupaila alimwi ambomupaila. Kuyungizya waawo, mweelede kubikkila maano kapati kujatikizya zyakulikondelezya nzyomusala aciindi ncomubelesya. (Ef. 5:​15, 16) Muyooba Munakristo uusimide ciindi nomugwasya bamwi. Mucikozyanyo, mulakonzya kulibikkila mbaakani yakugwasya bacembeede alimwi abalema mumbungano yanu. Ambweni mulakonzya kubaulila zintu akubagwasyilizya kuzyiba mbwaabelesyegwa mafooni amatabbuleti. Kuyungizya waawo, mulakonzya kutondezya luyando kuli bamwi kwiinda mukubakambaukila makani mabotu aa Bwami. (Mt. 9:​36, 37) Ikuti kacikonzyeka amulibikkile mbaakani yakutalika mulimo waciindi coonse. w22.08 6 ¶16-17