Lusyomo Lutucitya Kuba Basicamba Alimwi Ibasungu

“Amukazike myoyo yanu, amuliyumye, nkaambo kuboola [kubako, NW] kwa-Mwami kuli afwaafwi.”—JAKOBO 5:8.

1. Nkaambo nzi ncotweelede kwaabikkila maanu makani aali kuli Jakobo 5:7, 8?

“KUBOOLA” naa kubako kwa Jesu Kristo ikwakali kulindilwa kwaciindi cilamfwu, ono kulizuzikizidwe. (Matayo 24:3-14) Kwiinda lyoonse, boonse ibalyaamba kubaa lusyomo muli Leza amuli Kristo bajisi kaambo kakwaayeeyesya majwi aayaa Jakobo siciiya ngaakati: “Bakwesu, amukazike myoyo mane kusikila kukuboola [kubako NW] kwa-Mwami. Amubone, mukamwini muunda ulalindilila micelo miyandisi yaansi, waikazikila moyo mane ikawigwe imvula yakuntangilo ayabili. Anywebo amukazike myoyo yanu, amuliyumye, nkaambo kuboola [kubako NW] kwa-Mwami kuli afwaafwi.”—Jakobo 5:7, 8.

2. Mapenzi nzi amwi ngobakalaawo aabo Jakobo mbaakalembela?

² Aabo Jakobo mbaakalembela lugwalo lwakwe lwakasololelwaa muuya bakeelede kuba basicamba naa bakkazikide myoyo akumanizya mapenzi manji aakali akati kabo. Ibanji tiibakali kulilemeka mbuli mbobeelede kulilemeka bantu baamba kuti balaa lusyomo muli Leza. Mucikozyanyo, kubweza ntaamu kujatikizya zisusi zimwi nzyobakatalikide kubaazyo bamwi mumyoyo yabo. Iluumuno lwakeelede kuboozyegwa akati ka Banakristo aabo bakusaanguna. Alimwi bakeelede kulaigwa kuti bazumanane kuba basicamba abasungu. Mbotuya bubandika ncaakabaambila Jakobo, atubone mbuli mbotunga twaabelesya majwi aakwe mubukkale bwesu.

Izisusi Zibi Zileta Lunyonyooko

3. Ncinzi cakaleta mazwanga aamumbungano, alimwi ino ncinzi ncotunga twaiya kumakani aaya?

³ Kwakanyina luumuno akati kabantu bakali kulyaamba kuti Mbanakristo, alimwi izisusi zibi nzizyakaleta ciimo eeci. (Jakobo 4:1-3) Ikwiimpana kwakali kubanyonganya, alimwi bamwi bakali kuyeeyela ibanabokwabo mizeezo mibi. Eeci cakali kucitika akaambo kazisusi zyakulikondelezya zyakali kulwana mumibili yabo. Swebo tweelede kupailila lugwasyo lwakukazya zyakulikumbuzya zyakumubili zyakulwanina lusumpuko, zyuuno alimwi abuvwubi ikutegwa tutaciti cintu cinga canyonganya luumuno lwambungano. (Ba-Roma 7:21-25; 1 Petro 2:11) Akati ka Banakristo bamumwaanda wakusaanguna, kunyonokelana kwakalitalikide mane kusika aciimo cakubaa muuya wakusulaikana, wabujayi. Akaambo kakuti Leza kwiina naakaingula kulomba kwabo nkobakali kulomba amizeezo mibyaabi, bakazumanana kulwanina mbaakani zyabo. Ikuti katujisi mizeezo mibyaabi iili boobo, tulakonzya kulomba pele kwiina notunga twapegwa, nkaambo Leza wesu uusetekene kwiina naingula mipailo iili boobo.—Malilo 3:44; 3 Johane 9, 10.

4. Nkaambo nzi Jakobo bamwi ncabaita kuti “nobasimamambe,” alimwi ino makani aaya ayelede kutujatikizya buti?

⁴ Imuuya wanyika, ibbivwe alimwi akulisumpula kwakaliko akati ka Banakristo bamwi bakusaanguna. (Jakobo 4:4-6) Jakobo bamwi ubaita kuti ‘mbaasimamambe’ nkaambo bakali balongwe banyika aboobo bakalaa mulandu wabumambe bwakumuuya. (Ezekiele 16:15-19, 25-45) Aswebo tutabi banyika mumizeezo, mukukanana alimwi amumicito nkaambo kucita boobo inga kwatucitya kuba basinkondonyina a Leza. Ijwi lyakwe litondezya kuti muuya ‘wakufwa ibbivwe’ naa “muuya,” uuli mubantunsi basicinyonyoono. (Matalikilo 8:21; Myeelwe 16:1-3; Intembauzyo 106:16, 17; Mukambausi 4:4) Aboobo ikuti naa twabona kuti tujisi muuya wabbivwe, wakulisumpula naa miyeeyo imwi mibyaabi nzyotweelede kulwana, atulombe lugwasyo kuli Leza kwiinda mumuuya uusalala. Inguzu ezyo, izipegwa kwiinda muluzyalo lwa Leza, zilaanguzu zyakuzunda muuya ‘wakufwa ibbivwe.’ Alimwi mbwaanga Jehova tabayandi balisumpula, uyakutufwida luzyalo ikuti naa twailwana miyeeyo yoonse mibyaabi.

5. Ikutegwa Leza atufwide luzyalo, nzintu nzi ziyandika nzyotweelede kucita?

⁵ Mbuti mbotunga twafwidwa luzyalo a Leza? (Jakobo 4:7-10) Ikutegwa Jehova atufwide luzyalo, tweelede kumuteelela, ikutanyansya zintu nzyatupa alimwi akulibombya kuzintu zyoonse nzyayanda. (Ba-Roma 8:28) Alimwi tweelede ‘kumukazya,’ naa ‘kumulwana’ Diabolosi. ‘Uyootucija’ ikuti naa twazumanana kuyuma kusumpula bweendelezi bwa Jehova bupati kampatila. Jesu ulatugwasya kukazya zintu zibi izibikkilidwe kunyonganya kuti zitatunyonganizizyi limwi. Alimwi mutalubi kuti: Kwiinda mumupailo, kumvwida alimwi alusyomo, tuswena kuli Leza alimwi awalo ulaswena kulindiswe.—2 Makani 15:2.

6. Nkaambo nzi Banakristo bamwi Jakobo ncabaita kuti “nobasizibi”?

⁶ Nkaambo nzi Jakobo ncabelesya ibbala lyakuti “nobasizibi” kubantu balyaamba kuti balaalusyomo muli Leza? Nkaambo bakali kucita zintu ziteendelani abukkale bwa Bunakristo mbuli kulwana “inkondo” alimwi akusulaikana kwabujayi. (Tito 3:3) “Maanza” aabo aakazwide micito mibyaabi, akali kuyandika kusalazya. Alimwi bakeelede kusalazya “myoyo” yabo, icikkalilo cankulwaizyo zyoonse. (Matayo 15:18, 19) Aabo bantu “basimyoyo-yobile” bakali kwiile kudooneka kabatazi cakusala, naa mbulongwe a Leza naa mbulongwe anyika. Mbwaanga twacenjezegwa acikozyanyo cabo cibyaabi, atuzumanane cakutaleka kuba bantu bapakamene ikutegwa zintu zili boobu zitajayi lusyomo lwesu.—Ba-Roma 7:18-20.

7. Nkaambo nzi Jakobo bamwi ncabaambila kuti ‘boomoke akuungumana akulila’?

⁷ Jakobo waambila basikubala bakwe kuti ‘boomoke akuungumana akulila.’ Ikuti naa batondezya kuusa kwabunaleza, ciyakutondezya kuti beempwa. (2 Ba-Korinto 7:10, 11) Sunu bamwi baamba kuti bajisi lusyomo bajisi bubi kuyandaula bulongwe anyika. Ikuti naa bamwi bandiswe bali mukutobela ciimo cili boobo, sena tatweelede kulila akaambo kaciimo cesu cakukompama munzila yakumuuya alimwi akubweza ntaamu cakufwambaana kululamika ciimo eco? Ikucinca mpotuyandika akulekelelwa kuli Leza ciyakutupa kuba bantu bakkomene akaambo kamanjezeezya esu aasalala alimwi abulangizi bwakumbele bukkomanisya bwabuumi butamani.—Intembauzyo 51:10-17; 1 Johane 2:15-17.

Mutabetekani

8, 9. Nkaambo nzi ncotuteelede kuvwiyana naa kubetekana?

⁸ Ncintu cibyaabi kapati kuvwiya musyomima. (Jakobo 4:11, 12) Pele bamwi batongooka Banakristonyina, antela akaambo kakulibona kuba bantu balulami naa akaambo kakuyanda kulisumpula kwiinda mukucesya ciimo cabamwi. (Intembauzyo 50:20; Tusimpi 3:29) Ibbala lya Cigiliki lyakasandululwa kuti ‘kuvwiyana’ lyaamba kusulaika alimwi lijisi muzeezo wakutamikizya naa kubejelezya muntu. Eeci cileelene buyo akubeteka mukwesu cibyaabi. Mbuti eeci mboceelene ‘akubisya alimwi akubeteka mulawo wa Leza’? Ibalembi alimwi aba Farisi ‘bakasusya Mulawo wa Leza’ alimwi akubeteka kweelana azyeelelo zyabo beni. (Marko 7:1-13) Mbubonya buyo, ikuti naa twasinganya mukwesu Jehova ngwatasinganizizye, sena inga tatuni ‘kubeteki Mulawo wa Leza’ alimwi akucita cinyonyoono mukutondezya kuti mulawo ooyo tauzyulide? Alimwi kwiinda mukutongooka mukwesu munzila iitaluzi, tatuni kulondoli mulawo waluyando pe.—Ba-Roma 13:8-10.

⁹ Lyoonse katuyeeya ceeci: “Kuli umwi uulenga milao, uubeteka”—Jehova. ‘Mulawo wakwe uliluleme,’ kwiina mpoubulide. (Intembauzyo 19:7; Isaya 33:22) Leza alikke nguujisi nguzu zyakubikka zyeelelo alimwi amilawo yakutobela kutegwa tukafwutuke. (Luka 12:5) Eelyo Jakobo ubuzya kuti: “Ino nduweni yebo obeteka mweenzinyoko?” Tacili munguzu zyesu kubeteka akusinganya bamwi. (Matayo 7:1-5; Ba-Roma 14:4, 10) Ikuyeeya kuti Leza ngomweendelezi Mupati alimwi tasalululi alimwi akuti iswebo tuli basizibi cilatugwasya kutantamuka kubeteka bamwi akaambo kakulibona kuba balulami kwiinda mbabo.

Mutabi Bantu Balisumpula, Ibalimvwa

10. Nkaambo nzi ncotweelede kuyeeya Jehova buzubaa buzuba?

¹⁰ Lyoonse tweelede kuyeeya Jehova alimwi amulawo wakwe. (Jakobo 4:13-17) Mukutayeeya Leza, ibalimvwa baamba kuti: “Sunu na junza tulaya kuli banyomfwi, tukakale oko mwaka woonse, tukasambale, tujane impindu.” Ikuti naa ‘twaliyobweda lubono, pele katutali bavwubi kuli Leza,’ tulakonzya twafwa junza aboobo kwiina notunga twajana ciindi cimbi cakubelekela Jehova. (Luka 12:16-21) Mbubwena mbuli Jakobo mbwaamba kuti tuli buyo mbuli ngubi yamafwumofwumo “iibonwa kaindi kaniini, ndilyonya yamana.” (1 Makani 29:15) Cilikke cinga catuletela lukkomano abuumi butamani nkusyoma muli Jehova.

11. Ino caamba nzi kwaamba kuti, “Na Mwami wayanda”?

¹¹ Muciindi cakulisumpula akutalanganya Leza, tweelede katuti: “Na Mwami wayanda, tulapona, tulacita bobuya abobuya.” Ikwaamba kuti, ‘Ikuti Jehova wayanda’ kutondezya kuti tuli mukusoleka kucita zyoonse kweelana aluyando lwakwe. Inga cayandika kucita makwebo kutegwa tugwasye mukwasyi wesu, ikweenda munyendo zyamulimo wa Bwami akucita zimwi zintu zinjaanji. Pele tatweelede kulisumpula pe. “Kulikankaizya kuli bobuya koonse nkubi” nkaambo kucita kuti muntu aleke kusyoma muli Leza.—Intembauzyo 37:5; Tusimpi 21:4; Jeremiya 9:23, 24.

12. Ncinzi caambwa kumajwi aali kuli Jakobo 4:17?

¹² Kulibonya kuti mukumanizya makani aakwe aajatikizya kulikankaizya alimwi akulisumpula, Jakobo waamba kuti: “Lino oyo uuzi kucita kabotu, nekubaboobo taciti, wabisya.” Munakristo woonse cakulibombya weelede kuzyiba kuti weelede kuyaama aali Leza. Ikuti naa tanaacita boobo, “wabisya.” Aino, njiisyo njimunya eeyi ilabeleka kukukakilwa kuli koonse kwakucita zintu naa milimo iiyandika baabo basyoma muli Leza.—Luka 12:47, 48.

Ikucenjezya Kujatikizya Bavwubi

13. Ncinzi Jakobo ncaamba kujatikizya bantu batabelesyi kabotu lubono lwabo?

¹³ Nkaambo Banakristo bamwi bakusaanguna bakaba basikuyanda buvwubi naa bakali kulombozya bantu bavwubi, Jakobo wakaamba majwi aayoosya kujatikizya bantu bamwi ibavwubi. (Jakobo 5:1-6) Aabo bantu banyika ibatabelesyi lubono lwabo munzila iili kabotu ‘bayoolila akweema nkaambo kamapenzi aayakubasikila’ ciindi Leza nayakubacitila kweelana amicito yabo. Mumazuba aayo, ilubono lwabantu banji lwakali kujatikizya kapati zintu mbuli masini, zilyo alimwi awaini. (Joeli 2:19; Matayo 11:8) Zimwi ezi zilabola naa ‘zilaligwa amapempya,’ pele Jakobo aawa tali mukwaamba kutakkala kwalubono, utondezya kubula mpindu kwandulo. Nokuba kuti ngolida alimwi ansiliva tazikkalwi senke, zyakali kuyooba zintu zinyina mpindu mbubwena mbuli zintu zilidwe senke. Ikuligwa “senke” caamba kuti lubono lwakumubili tiilwabelesegwa kabotu pe. Aboobo, toonse tweelede kunikuyeeya kuti icintu cili “mbuli mulilo” ncobalangila aabo ibasyoma mulubono lwabo lwakumubili “kumazuba aamamanino” iciindi bukali bwa Leza bwaakubasikila. Mbwaanga tukkede “kumamanino aaciindi,” imakani aali mbuli bwayaaya alatujatikizya kapati.—Daniele 12:4; Ba-Roma 2:5.

14. Mbuti kanjikanji bavwubi mbobalilemeka, alimwi ino ncinzi ncotweelede kucita amakani aayo?

¹⁴ Ibavwubi kanjikanji banyengelela basikubagwasya kutebula, aboobo mali ngobabbida babelesi babo ‘alakwiila’ kuti aliigwe. (Amweezyanisye a Matalikilo 4:9, 10.) Ibantu bavwubi banyika ‘balinonya bula.’ Kwiinda mukwiindilizya kulikondelezya, balanenesya myoyo iitaswiilili, alimwi banoocizumanana kusikila “mubuzuba” mbobatikanyonyoonwe. ‘Balabeteka akujaya uululeme.’ Eelyo Jakobo wabuzya kuti, “Sa tali mukumukazya?” [NW] Pele Ibbaibbele lya New World Translation of the Holy Scriptures—With References kumajwi aakunsi lyaamba kuti, “uululeme; tali mukumukazya.” Nokuba boobo, tatweelede kuba basikusalaula kubavwubi pe. Tweelede kubikka makani aa bwami kumbele mubuumi bwesu.—Matayo 6:25-33.

Lusyomo Lulatugwasya Kukkazika Moyo

15, 16. Nkaambo nzi ncocili cintu ciyandika kapati kuba bantu bakkazika moyo?

¹⁵ Mbwaamana kubandika makani aajatikizya bavwubi basikudyaaminina bamunyika, Jakobo mpoonya ono wakulwaizya Banakristo badyaaminidwe kuti bakkazike myoyo. (Jakobo 5:7, 8) Ikuti basikusyoma baliyumya-yumya mumapenzi aabo cakukkazika moyo, bayakulumbulwa kukusyomeka kwabo muciindi cakuboola naa kubako kwa Kristo, eelyo lubeta nolutikasikile basikudyaaminina boonse. (Matayo 24:37-41) Aabo Banakristo bakusaanguna bakeelede kuba mbuli mulimi walo uunga ukkazikide moyo nalindila imvwula ntaanzi ya mpampa-luya naa mvula yamweto yakumwaka, lyalo nanga wabyala, alimwi amvwula yamamanino nsyaalizi naa nkukula-nsoke yalo iipa kuti zilyo zibizwe kabotu. (Joeli 2:23) Aswebo mbubwena tweelede kuba basicamba akukkazika myoyo yesu alimwi akutazungaana mumyoyo yesu, ikapati nkaambo tuli mukati ka “kuboola [kubako, NW] kwa-Mwami” Jesu Kristo!

¹⁶ Nkaambo nzi ncotweelede kukkazika myoyo? (Jakobo 5:9-12) Kukkazika moyo kulatugwasya kuti tutatongeli alimwi akutongauka ciindi basyomima nobatulubizizya. Ikuti twatalika ‘kutongaukana’ amuuya mubyaabi wabujayi, tuyakusinganizigwaa Sikubeteka Jesu Kristo. (Johane 5:22) Ono mbwaanga “kuboola, naa [kubako,” NW] kwakwe kwakatalika kale alimwi ono “uliimvwi amulyango,” atusumpule luumuno kwiinda mukubakkazikila myoyo bakwesu, balo ibali mukusunkwa amasunko manji aasunka lusyomo lwabo. Lusyomo lwesu lulayumizigwa ciindi notuyeeya kuti Leza wakamulumbula Jobu nkaambo wakaliyumya cakukkazika moyo mumasukusyo aakwe. (Jobu 42:10-17) Ikuti twasyoma alimwi akuba basicamba, tuyakubona kuti “Jehova ngusibuuya, ngusiluzyalo.”—Mika 7:18, 19.

17. Nkaambo nzi Jakobo ncaamba kuti, “Mutakonki”?

¹⁷ Ikuti naa tatuli basicamba, tulakonzya kubelesya lulimi munzila iitaluleme notuli mumapenzi. Mucikozyanyo, tulakonzya twafwambaana kukonka. “Mutakonki,” mbwaamba Jakobo, kacenjezya bubi bwazikonke zicitwa kakunyina kuyeeya kabotu naa notunyongene mumizeezo. Alimwi ikwiinduluka twaambo cakukonka lyoonse akwalo, nkuupaupa ameso. Aboobo, tweelede buyo kubandika kasimpe, twati ii, akube ii twati pe, akube pe. (Matayo 5:33-37) Aino, Jakobo tali mukwaamba kuti ncibi kukonka munkuta kuti mwaamba kasimpe.

Lusyomo Amipailo Yesu

18. Muziimo nzi motweelede kuzumanana ‘kukomba’ alimwi ‘akwiimba intembauzyo’?

¹⁸ Mupailo ceelede kuba cintu cipati mubuumi bwesu ikuti katuyanda kweendelezya kukanana kwesu, kukkazika moyo alimwi akuzumanana katuli bayumu mulusyomo lwesu kuli Leza. (Jakobo 5:13-20) Tweelede ‘kukomba’ ikapati ciindi notuli mukusukusigwa. Ikuti naa twabotelwa, ‘atwiimbe intembauzyo,’ mbubwena mbuli Jesu abaapostolo bakwe mbobakacita ciindi naakacita Ciibalusyo calufwu lwakwe. (Marko 14:26) Zimwi ziindi, tulakonzya katukkomene kapati kuzintu nzyatucitila Leza cakuti tulakonzya kwiimba intembauzyo nomuba mumoyo. (1 Ba-Korinto 14:15; Ba-Efeso 5:19) Alimwi tacilikkomanisizyi kaka ikutembaula Jehova munyimbo cindi camiswaangano ya Bunakristo!

19. Ncinzi ncotweelede kucita ikuti naa twaciswa munzila yakumuuya, alimwi ino nkaambo nzi ncotweelede kubweza ntaamu eeyo?

¹⁹ Pele ikuti katucisidwe munzila yakumuuya, antela akaambo kakuti twakacita cinyonyoono cimwi naa tatulidi atafwule lya Jehova lyoonse, kwiina notunga twakukkomanina kwiimba. Ikuti tuli muciimo eeco, atufwambaane cakulicesya twiite baalu ikutegwa ‘batukombele.’ (Tusimpi 15:29) Alimwi baya ‘kutunanika mafuta muzina lya-Mwami Jehova.’ Mbuli mafwuta aakubombeka cilonda, imajwi aabo aakulwaizya alimwi alulayo lwa Magwalo ziyakutugwasya kulwana penzi lyakutyompokelwa, kudooneka akuyoowa. ‘Kukomba kwabo kwamulusyomo kuyakutuponya’ ikuti andiswe notukombelwa katujisi lusyomo. Ikuti baalu bajana kuti bulwazi bwesu bwakumuuya bwakaletwaa cibi cipati cimwi, balatwaambila cibi ncotwakacita alimwi akusoleka kutugwasya. (Intembauzyo 141:5) Ikuti naa tweempwa, tulakonzya kusyoma kuti Leza uyakwiiswiilila mipailo yabo akutulekelela.

20. Nkaambo nzi ncotweelede kwaamba zibi zyesu alimwi akukombelana?

²⁰ ‘Ikulyaamba zibi zyesu umwi aumwi kumweenzinyina’ kulatugwasya kutabweedela mucinyonyoono. Kulakulwaizya muuya wakufwidilana luzyalo uutitupe kuti ‘katukombelana.’ Tulakonzya kusyoma kuti eeci inga catugwasya nkaambo mupailo ‘wamuntu uululeme’—imuntu uusyoma alimwi uubonwa kuba muntu uululeme a Leza—ulagwasya kapati kuli Jehova. (1 Petro 3:12) Musinsimi Elija wakali kompeme mbweena mbuli ndiswe, pele mipailo yakwe yakabeleka. Wakapaila, nkabela ncobeni teeyakawa imvula myaaka ili yotatwe acisela. Naakaindulula kupaila, imvwula yakawa.—1 Bami 17:1; 18:1, 42-45; Luka 4:25.

21. Ncinzi ncotukonzya kucita ikuti naa Munakristoma ‘waleya munzila yalusinizyo’?

²¹ Ino mbuti kuti umwi mumbungano ‘waleya munzila yalusinizyo,’ wazwa munjiisyo ziluleme alimwi tacililemeki kabotu? Tulakonzya kumululamika kwiinda mululayo lwa Bbaibbele, mupailo alimwi alugwasyo lumwi. Ikuti naa twazwidilila, eeci cipa kuti azumanane kugwasigwa a cinunuzyo ca Kristo alimwi akuti avwunwe kuzwa kulufwu lwakumuuya akusinganisigwa kulunyonyooko. Kwiinda mukumugwasya sikulubila ooyo, tulazivwumba zibi zyakwe zinji-zinji. Iciindi sikubisya wasinswa naazileka inzila zyakwe zilubide, iciindi naayempwa akulomba kulekelelwa, tuyakukkomana kuti twakabeleka kukumugwasya kuti zibi zyakwe zivwumbwe.—Intembauzyo 32:1, 2; Juda 22, 23.

Lulatujatikizya Toonse

22, 23. Mbuti majwi aa Jakobo mbwaayelede kutujatikizya?

²² Masimpe lugwalo lwa Jakobo lulatugwasya toonse. Lulatutondezya mbotunga twalwana masukusyo, lulatulaya kuti tutasalululani, alimwi lutukulwaizya kutola lubazu mumilimo iiluleme. Jakobo utukulwaizya kweendelezya lulimi lwesu, ikutantamuka muuya wanyika alimwi akutukulwaizya kusumpula luumuno. Majwi aakwe alimwi ayelede kutucitya kuba acamba akuba bantu basinizizye.

²³ Masimpe, lugwalo lwa Jakobo kumatalikilo lwakalembeledwe Banakristo bananike bakusaanguna. Pele, toonse tweelede kubona kuti lulayo luli mukati lwatugwasya kukakatila kulusyomo lwesu. Majwi aa Jakobo alakonzya kukulwaizya lusyomo lwesu kuti tutole ntaamu zyakumubelekela kabotu Leza mumulimo wakwe. Alimwi lugwalo oolu lwakalembwa munguzu zya Leza luyaka lusyomo lukkalilila alimwi lupa kuti tukkazike moyo, tube Bakamboni ba Jehova basinizizye mubukombi cino ciindi ‘cakuboola’ naa kubako kwa Mwami Jesu Kristo.

Ino Inga Mwaingula Buti?

◻ Nkaambo nzi Banakristo bamwi bakusaanguna ncobakeelede kucinca miyeeyo yabo alimwi akulilemeka kwabo?

◻ Nkucenjezya nzi Jakobo nkwapa bantu bavwubi?

◻ Nkaambo nzi ncotweelede kukkazika moyo?

◻ Nkaambo nzi ncotweelede kupaila lyoonse?

[Nkotwakajana cifwanikiso icili apeeji 14]

Pictorial Archive (Near Eastern History) Est.

[Cifwanikiso icili apeeji 17]

Banakristo bakusaanguna bamwi bakeelede kubakkazikila moyo kapati basyominyina

[Cifwanikiso icili apeeji 18]

Banakristo beelede kukkazika moyo, ikutondezya luyando, ikusinizya