Sena Kuli Uuswiilila Mipailo?

“Ndakali kudooneka kuti naa Leza nkwali. Pele nokuba boobo, ndakali kupaila zimwi ziindi. Tiindakazyi kuti naa kuli uuswiilila mipailo, pele ndakalijisi bulangizi bwakuti kuli uuswiilila. Tiindakakkomene alimwi tiindakajisi mpindu mubuumi. Ndakali kuyoowa kusyoma muli Leza nkaambo ndakali kuyeeya kuti bantu balikke basyoma muli Leza mbaabo batyompedwe.”—Ba PATRICIA,a Baku IRELAND.

SENA kuli nomwakalimvwide mbuli ba Patricia? Sena mulapaila nokuba kuti muladooneka kuti Leza nkwali? Ikuti kacili boobu, tamuli nyolikke nomulimvwa boobu. Amubone twaambo ootu tutobela.

◼ Buvwuntauzi bwakacitwa butondezya kuti akati kabana Britain bali 2,200, ibasika ku 22 pesenti mbabasyoma kuti kuli Leza wakalenga nyika alimwi ulaswiilila mipailo. Pele mubuvwuntauzi oobu, 55 pesenti balapaila muziindi.

◼ Buvwuntauzi bwakacitwa butondezya kuti akati kabantu bali 10,000 muzisi ziindene-indene, ibalyaamba kuti tabasyomi kuti Leza nkwali ibatandila ku 30 pesenti balapaila.

Ino Ncinzi Cibapa Kudooneka?

Mwaalumi umwi waku England uutegwa Allan wakaamba kuti: “Ndakali kwaamba kuti tandisyomi muli Leza akaambo kakuti ndakali kuyeeya kuti bukombi bwakatalisyigwa kutegwa kabweendelezya bantu alimwi akupanga mali. Alimwi ndakali kuyeeya kuti, ikuti naa Leza nkwali nikwanyina kutalulama kuliboobu. Pele zimwi ziindi ndakali kukkala endike akulyaambauzya. Alimwi ndakali kulibuzya kuti, ‘Ino ndakazwa kuli?’”

Muntu umwi aumwi uulimvwa boobo ulijisi twaambo tumupa kudooneka kuti naa mipailo ilaingulwa. Kanji-kanji, kudooneka kulakonzya kuboola akaambo kamibuzyo njobatajisi bwiinguzi iili mbuli yeeyi iitobela:

◼ Sena kuli Mulengi?

◼ Nkaambo nzi bukombi kanji-kanji ncobuletela ntenda?

◼ Nkaambo nzi Leza ncalekelede kupenga?

Kuti kamukonzya kujana bwiinguzi kumibuzyo eeyi, sena inga camukulwaizya kupaila?

[Bupanduluzi buyungizidwe]