Sena Inga Mwabusyoma Bukombi Mumakani Aamali?

Ba Estellea ibakali kuunka lyoonse kucikombelo antoomwe abana babo, bakaamba kuti: “Ndakaambila musololi wacikombelo kuti ndiyanda kwiiya Bbaibbele.” Pele musololi ooyu kunyina naakabayiisya ba Estelle. Mpoonya bakacileka kuunka kucikombelo. Ba Estelle bakaamba kuti: “Basololi bacikombelo bakandilembela lugwalo kundaambila kuti, ikuti naa kanditakonzyi kuunka kucikombelo ndeelede kunootuma buyo mali. Mpoonya ndakabona kuti, ‘Tiibakali kubikkila maano nokuba kuti tiindajanika kucikombelo, bakali kuyanda buyo mali aangu.’”

Ba Angelina, ibali kubikkila maano lyoonse kuzyintu zyabukombi, bakaamba kuti: “Kucikombelo cesu, bakali kwiinzya mutiba ziindi zyotatwe, alimwi twakeelede kupa mali ziindi eezyo zyoonse zyotatwe. Lyoonse bakali kulombelela mali. Ndakabona kuti, “Tabajisi muuya wa Leza.’”

Sena zikombelo zyakubusena nkomukkala zibelesya nzila ziindene-indene kusinikizya bantu kuti bape mali? Sena eeco cileendelana ancolyaamba Bbaibbele?

INO NCINZI BBAIBBELE NCOLIYIISYA?

Jesu, iwakatalisya Bunakristo wakaamba kuti: “Mwakapegwa cabuyo, amupe cabuyo.” (Matayo 10:8) Mulumbe wamu Bbaibbele taweelede kusambalwa pe, pele weelede kupegwa kubantu boonse bauyanda.

Ino Banakristo bakusaanguna bakali kwaajana buti mali aakubelesya kuzyintu zyakali kuyandika mumbungano?

Umwi aumwi wakali kusanga “mbuli mbwaasala mumoyo wakwe, ikutali kupa kumoyo kakusiide naa cakusinikizyigwa, nkaambo Leza uyanda muntu uupa kumwi kakkomene.” (2 Bakolinto 9:7) Mwaapostolo Paulo wakaamba kuti: “Twakali kubeleka masiku amasyikati notwakali kumukambaukila makani mabotu . . . kutegwa tutapi muntu naba omwe akati kanu mukuli uuminya.” (1 Batesalonika 2:9) Paulo wakali kubeleka mulimo wakupanga matente kutegwa kaligwasyilizya mumulimo wakwe wakukambauka.—Milimo 18:2, 3.

INO BAKAMBONI BA JEHOVA BACITA BUTI MUMAKANI AAYA?

Bakamboni ba Jehova balaswaangana mumaanda aalibonya kabotu aaitwa kuti Maanda aa Bwami. Ino mali ngobabelesya baajana kuli? Kunyina nobainzya mutiba wakubwezelela mali, naa kulombelela mali kubantu bamwi. Muciindi caboobo, kufwumbwa muntu uutondezya kulumba kububambe bwazyintu zyakumuuya, kakunyina kulibonesya ulakonzya kubikka cakusanga mukabbokesi kakusangila ku Ŋanda ya Bwami.

Cakutadooneka, kuyandika mali kutegwa magazini eeyi kaisimbwa akutumwa. Nokuba boobo, kunyina nomuyoobabona kulombelela mali kubuleya. Ikaambo kapati nkumwaya kasimpe kamu Bbaibbele.

Ino muyeeya buti: Sena nzila eeyi yakujana mali ileendelana amajwi aa Jesu alimwi acikozyanyo ca Banakristo bakusaanguna?

[Bupanduluzi buyungizidwe]

[Majwi aakwelelezya sikubala aali apeeji 4]

Ino zikombelo zyeelede kwaajana kuli mali?