Twakagwasigwaa Miswaangano ya “Kupona Munzila Njayanda Leza”

¹ Myeezi misyoonto buyo yainda, twakali kulibambila kuyoojanika ku Miswaangano Yacooko a Yamasi yamu 1998 ya “Kupona Munzila Njayanda Leza.” Ono zyaba ziindi zyaalubazu zitalubiki mumakani aambunga aateokrasi. Twakakkomana cini-cini acakulya cakumuuya icigwasya ncotwakatambula kumiswaangano eyo mibotu.

² Imbazu izijatikizya zisi zinji mumiswaangano yakono zyakali kukkomanisya cini-cini. Kunyina makani naa bamishinali abantu bamwi bazwa mumasi aakule bakaliko naa pe ooko nkotwakajanika, toonse twakalimvwida izyakuluula zikulwaizya kumazuba mubuzuba bwakusaanguna mucibeela camutwe wakuti, “Ikubelekela Mumuunda Wabumishinali.” “Ikuluula Kuyaambele Kwamulimo Wabutebuzi” kuzwa mumasi aasiyene-siyene munyika ikwakacitwa abuzuba kwakali kukulwaizya kapati.

³ Mabbuku Mabotu Mapya Aakamwaigwa: Imakani aamamanino mubuzuba bwakusaanguna akaingula mubuzyo ngobabuzya lyoonse bantu banji ibatazyi kasimpe wakuti: “Sena Buumi Bulazumanana Muntu Afwa?” Imakani aayo aakondelezya kapati akamanizyigwa akumwaigwa kwabroshuwa mpya yakuti, Ncinzi Cicitika Kulindiswe Twafwa? Cakutadooneka kuzikusikila sunu twakaibala alimwi twazyiba mboiyandika kapati mukugwasya bantu kuzyiba kasimpe kujatikizya ciimo cabantu bafwide alimwi amukuumbulizya basikufwidwa kwiinda mubulangizi bwabubuke.

⁴ Ipulogilamu yakumazuba mubuzuba bwabili yakamanaa makani aakuti “Mulengi—Mbwabede Alimwi Anzila Zyakwe.” Munzila iimvwika akatupa kuti tubone kuti nkwali Mulengi. Ikutegwa tuubilwe-ubilwe kugwasya bamwi kuzyiba kaambo aka, ibbuku litegwa Is There a Creator Who Cares About You? lyakamwaigwa. Nokuba kuti liyungizya lusyomo lwesu muli Jehova alimwi akuzyiba mbwabede anzila zyakwe, ikapati ibbuku eli libambilidwe baabo ibanga nokuba kuti balaalwiiyo lwaatala tabasyomi muli Leza.

⁵ Makanze Aazwa Kunsi Aamoyo: Imakani aamuswaangano aamamanino akatukulwaizya toonse ategwa, “Amuzumanane Kweenda Munzila Njayanda Jehova.” Cakeelela kaka kuti twakalyaambilila kujatikizya makanzeesu aakuzumanana kupona munzila njayanda Leza, ikwiizibya alimwi akwaamba mbuli mbwiisumpukide! (Is. 30:21) Ono tweelede kukanza kwaatobelesya makanze aaya. Twakakulwaizigwa kaka munzila yakumuuya kwiinda mukujanika ku Muswaangano wa “Kupona Munzila Njayanda Leza!”