‘Ino Inga Ndicita Nzi?’
1 ‘Ino inga ndicita nzi?’ Cakutadooneka oyo ngowakali mubuzyo ngobakali kulibuzya bamukabunga kabasikwiiya Bbaibbele kakeendelezyegwaa Charles Taze Russell mumyaka yamuma 1870. Nobakali kuyaabuyungizya luzibo lwabo bucebuce kujatikizya kuyanda kwa Leza, basikwiiya Bbaibbele bakusaanguna beelede kuti tiibakazi ncobakeelede kucita kutegwa bagwasye bamwi kwiiya makani aajatikizya makanze aa Leza. Wakali mulimo mupati kapati ikuzibya bantu nyika yoonse mboizulwa kujatikizya luzibo lwamu Bbaibbele ndobakali kwiiya.
2 Tulalumba kuti bakazwidilila. Munzila nzi? Umwi aumwi wabo wakagwasilizya munzila isyoonto, aboobo sunu Bakamboni ba Jehova balaampuwo nyika yoonse mboizulwa—nimbunga ijisi basikumwaya batandila kutuulunzuma tuli cisambomwi, balo ibali mumbungano zitandila ku 90,000 muzisi zili 234 alimwi ansumbu!—Is. 60:22.
3 Amugwasilizye Cakumaninina Mumulimo: Umwi aumwi wandiswe uyandika kutola lubazu mumulimo Jesu ngwakasinsima kuti uyoocitwa kumazubaano aakumamanino. (Mk. 13:10) Mulimo wakukambauka ooyu tuukonzyi kulekelwa buyo baalu balikke; antela kulekela buyo bapainiya balikke kuti baucite. Munakristo uli woonse ulyaabide ulaamulimo mupati ngwayelede kucita. Toonse buyo tulakonzya kutola lubazu mumulimo wakukambauka. (1 Tim. 1:12) Kufwumbwa buyo ncotukonzya kucita mumulimo ooyu, tulaligwasya tobeni alimwi abamwi.—1 Tim. 4:16.
4 Alimwi umwi aumwi ulakonzya kugwasilizya babunyina Banakristo munzila zimbi ziyandika. Tulakonzya kugwasilizya mumiswaangano yambungano kwiinda mukujanika lyoonse akutola lubazu cabusungu. (Int. 122:1, 8, 9) Tulakonzya kuzuzikizya mbazu zyesu mukulilemeka kutegwa mbungano kiisalala lyoonse. Tulakonzya kugwasilizya kwiinda mukusanga mali kumulimo wanyika yoonse kweelanaa mbotukonzya. Tulakonzya kutola lubazu mukusalazya Ŋanda ya Bwami. Toonse tulakonzya kulisungula kutondezya muuya waluyando alimwi alukamantano mumbungano kwiinda mukugwasilizya bapya abana basyoonto kubikkilizya abaabo bakacembaala.—Kol. 3:12, 14.
5 Aboobo mulakonzya kubuzya kuti ‘Ino inga ndicita nzi?’ Nokuba kuti kusola-sola nkomucita kulakonzya kubonwa mbuli kuti kunyina mpindu, kwiinda mukucita lubazu lwanu mulagwasilizya mukuyaka mbungano njumu isungweede alimwi mbotu. Aboobo, toonse tulayandika mukutembaula zina lya Jehova!