Kabbokesi Kamubuzyo
◼ Nkaambo nzi ncociyandika kuti baswiilizi kababala magwalo ciindi mwaambi naabalomba kucita boobo ciindi naakanana makani?
Mutwe uuli mukubandikwa alimwi akuti naa makani aayo kaajatikizya kulanga-langa kapango komwe-komwe kacibeela camu Jwi lya Leza ziyoomugwasya mwaambi ikubona ndilili naayelede kulomba baswiilizi kumutobelezya nabala magwalo.
Cilayandika kapati kuziba ikaambo kamwi ncotubalila magwalo nkuyanda kusinizya kuti eezyo zikananwa zizwa mu Bbaibbele. (Inc. 17:11) Akamwi kaambo nkakupa baswiilizi bumboni bwamu Magwalo businizya zyeezyo zibandikwa kutegwa lusyomo lwabo boonse luyumizigwe. Ikulibonena cini ncolyaamba Bbaibbele ciindi nokubalwa lugwalo ciyoobagwasya baswiilizi ikuyeeya cali kubandikwa. Kunze lyakubala buyo magwalo, cilagwasya ikulemba twaambo alimwi akutobelezya makani aabandikwa.
Nokuba kuti apepa lyamakani iipedwe aba Sosaiti kubikkidwe Magwalo manji aagwasilizya mukukanana makani, magwalo aaya abikkilidwe mwaambi kuti amugwasye nalibambila makani. Magwalo aaya ngakupa buyo makani aayungizidwe naa kugwasya mwaambi kumuyeezya njiisyo ziyandika kapati zyamu Magwalo alimwi akumvwisya bupanduluzi bwamutwe wamakani eelyo nalibambila. Mwaambi ulabona magwalo ayandika kapati nabandika makani alimwi akwaambila baswiilizi kutobelezya ciindi nabala magwalo ayo akwaapandulula. Magwalo amwi asinizya twaambo alakonzya kwaambwa naa kwaamba buyo majwi aajanika mumo pesi balo baswiilizi tabeelede kwaambilwa kuti baabale.
Ciindi mwaambi nabala magwalo ulaabala kuzwa mu Bbaibbele buya ikutali apepa lyakalembelwa akkompyuta pe. Ciindi mwaambi naambila baswiilizi kumutobelezya, ulaamba kabotu-kabotu bbuku lyamu Bbaibbele, caandaano alimwi akapango naa tupango. Kwiinda mukwiima asyoonto akubuzya mubuzyo naa kwaambaula buyo kaambo ncomubalila lugwalo oolo, ulapa ciindi kubaswiilizi cakulujana lugwalo oolo. Alimwi kwiinduluka kwaamba lugwalo kuyoobagwasya baswiilizi kuluyeeya. Pele takuyandiki ikwaamba namba yapeeji mpolujanika lugwalo lwaambwa akaambo kakuti mapeeji aliindene kweelanaa Bbaibbele ndyabelesya umwi aumwi. Baswiilizi nobabala magwalo eelyo nobalombwa kucita boobo, bagwasigwaa nguzu zyamu Jwi lya Leza ciindi nolipandululwa mumakani.—Heb. 4:12.