Ino Mbuti Kuyanzana kwa Bunakristo Mbokuyandika?
1 “Simweendaalikke kaamutola kalonga.” Ikaambyo aako kadumide katondezya ncolyaamba Bbaibbele kujatikizya muntu ncayandika kapati—ikuyanzana. (Tus. 18:1) Ikuyanzana kwesu kwa Bunakristo kulacizuzukizya eeci ciyandika. Ino muunzila nzi izigwasya kapati?
2 Mumulimo: Impindu yomwe iiyandika kapati ninzila bakwesu mbobatuyumya-yumya alimwi akutugwasya mumulimo wakubuleya. Jesu wakatuma basikwiiya bakwe “bobile bobile” kuyookambauka. (Mk. 6:7; Lk. 10:1) Mukutobela cikozyanyo eeci, ciindi notubeleka abamwi mumulimo wamumuunda, tulakubona kululama kwalugwalo lwa Mukambausi 4:9, 10. Mbotubeleka antoomwe mumulimo, lusyomo, kumvwa alimwi aluyando lwabeenzuma lutupa kubaa camba alimwi akubukulusya busungu bwesu.
3 Tulagwasyigwa Cacigaminina: Alimwi ibunyina bwesu bulatukulwaizya akutusololela kutegwa tuliyumye mubuyumuyumu alimwi akukaka kutepaulwa. Balongwe besu Banakristo balakonzya kutuyeezya magwalo aakonzya kutugwasya kujatikizya kulibilika nkotujisi. Balakonzya kutupailila mbubwenya mbuli mbotubacitila. (2 Kor. 1:11) Alimwi camasimpe, icitondezyo cabo cibotu cilatukulwaizya mumilimo mibotu alimwi akutuyumya.
4 Kumiswaangano: Izilongezyo zyakuyanzana kwa Bunakristo zilajanwa ciindi notujanika lyoonse kumiswaangano yambungano. (Heb. 10:24, 25) Ipulogilamu ijisi lulayo lwakumuuya lunji alimwi ikujanika kwesu kumiswaangano kutugwasya kukamantana abasyomima. Miswaangano eeyi itupa coolwe cakuswiilila bakwesu alimwi abacizi nobatondezya lusyomo lwabo aacibumbili naa munkamu. (Rom. 1:12) Lukamantano lwesu lwabunyina lulayumizigwa notuyanzana cabunyina kaitanatalika alimwi anoyamana miswaangano. Ziindi zili boobo zitupa zyoolwe zyakuyiila bamwi zyakuluula zyesu ziyumya lusyomo. Bube bwesu bulayakwa munzila iigwasya ciindi notuyanzana cakulikwaya abaabo bayanda Jehova, Ijwi lyakwe, milimo yakwe alimwi abantu bakwe.—Flp. 2:1, 2.
5 Tulabayanda balongwe besu Banakristo. Ikuti kabatako, ikweenda munzila iipatide iisololela kubuumi kulakonzya kuyuma kapati. Nokuba boobo, akaambo kaluyando lwabo akukulwaizya tulakonzya kuzumanana kweenda kuya munyika mpya ya Jehova yabululami.—Mt. 7:14.