Mulongo Wamiswaangano Yamulimo

Nsondo Iitalika mu November 12

Lwiimbo 5

8 min: Zyakwaambilizya zyambungano. Zyakwaambilizya zisalidwe kuzwa mu Mulimo Wesu Wabwami. Amupandulule bubambe bwamumulimo wamumuunda bwakumamanino aamvwiki.

15 min: “Amulangile Jehova Kuti Amuyumye.”a Amubikkilizye amajwi masyoonto kuzwa mu Ngazi Yamulindizi yamu October 1, 1999, apeeji 28 mincali ya 6-8.

22 min: “Izilongezyo Zijanika Akaambo Kakutondezya Kulumba Kuluyando lwa Jehova—Cibeela 1.”b Ciindi nomubandika mincali ya 3-6, amubatambe baswiilizi baluule izyakacitika zikulwaizya eezyo nzyobakajana mumulimo wakuŋandaa ŋanda, mubukambausi bwamumugwagwa, munyendo zyakupilukila alimwi amukweendelezya ziiyo zya Bbaibbele.

Lwiimbo 21 amupailo wakujala.

Nsondo Iitalika November 19

Lwiimbo 9

8 min: Zyakwaambilizya zyambungano. Lipooti yamaakkaunti.

15 min: Ziyandika zyambungano.

22 min: “Amuyiisye Miyeeyo Yanu.”c Munzila iikondelezya, imwaalu ainduluke pulogilamu yamuswaangano waalubazu wakacitwa mwaka wamulimo wainda.

Lwiimbo 17 amupailo wakujala.

Nsondo Iitalika mu Novermber 26

Lwiimbo 7

15 min: Zyakwaambilizya zyambungano. Amubayeezye basikumwaya kuleta malipooti aamulimo wamumuunda aamu November. Kwiinda mukubelesya malailile aapedwe mucibeela cakuti “Ncomunga Mwaamba Kujatikizya Mamagazini,” amucite zitondezyo zyobilo zyalibambilwa kabotu mbokumwaigwa mamagazini—comwe citondezyo mubelesye Ngazi Yamulindizi yamu December 1 alimwi eeci cimbi mubelesye Galamukani! yamu December 8. Mpoonya amupandulule mbokujanwa nzila yakubelesya ciindi notwaabila bbuku lya Muntu Mupati naa bbuku limbi buyo mumwezi wa December. Amulange mu Watch Tower Publications Index amutwe wakuti “Presentations” alimwi akatwe kamukati kaamba kuti “List by Publication.” Amupandulule cikozyanyo comwe naa zyobilo. Amubayeezye boonse ikukaabila kubantu boonse katulakiti kakuti Sena Mulayanda Kuzyiba Zinji Kujatikizya Bbaibbele?

15 min: “Ino Inga Ndacijana Kuli Ciindi?” Makani alimwi akubandika abaswiilizi. Amubikkilizye atwaambo tupati-pati kuzwa mu Ngazi Yamulindizi yamu October 1, 2000, peeji 29 mincali 9-10 ansaa katwe kamukati kakuti, “Ibamwi Mbobajana Ciindi Cakwiiya.” Amubatambe baswiilizi baluule nzila zigwasya nzyobajana mukubaa ciindi cakucita zintu ziyandika kapati kwiinda mukuleka kucita zintu zitayandiki. Amukankaizye mbociyandika ikubaa ciindi caciiyo cesu tobeni alimwi acamukwasyi, camiswaangano yambungano, camulimo wamumuunda alimwi acakubala Bbaibbele abuzuba.

15 min: Bana Basyoonto Bali Mukutembaula Jehova. Mubandi abaswiilizi. Mbungano zinji zilijisi bana basyoonto ibatola lubazu mumulimo wakukambauka. Cilayandika kapati kuti kabacita oobo nokuba kuti bunji bwaziindi bapa bumboni kubantu bapati. (Int. 148:12, 13; Mt. 21:15, 16) Ciindi bazyali alimwi abasikumwaya bambi nobababikkila maanu, ikubayiisya alimwi akubakulwaizya, ibana basyoonto balaukkomanina kapati mulimo wamumuunda. Amubatambe baswiilizi kupa malailile mbobanga baunka ambabo bana basyoonto mumulimo wakuŋandaa ŋanda alimwi amunyendo zyakupilukila. Amubabuzye bazyali baluule ncobakacita mukugwasya bana babo ikwiiya mbokumwaigwa mamagazini, ikubelesya Bbaibbele mumibandi yabo alimwi akukanana cakusinizya mumaandaa bantu. Amukankaizye bubotu bwakubalumbaizya bana. Amubuzye-buzye sikumwaya mwana-mwana omwe naa bobilo, baambe icibakkomanisya mumulimo wakukambauka alimwi akaambo kabakkomanisya.

Lwiimbo 17 amupailo wakujala.

Nsondo Iitalika mu December 3

Lwiimbo 13

10 min: Zyakwaambilizya zyambungano. “Ibamwi Basyoma Ndinywe.”d Amubakulwaizye boonse kujatikizya mulimo ngobabeleka mukuyaka mikwasyi yabo alimwi ambungano. Toonse buyo tulasoleka kapati mukuyumya bamwi kwiinda muzikozyanyo nzyotubapa alimwi amajwi aakulwaizya.

15 min: Izibeela zyamu Bbuku lya Kukambitsirana. Mubandi abaswiilizi. Amulange-lange zikozyanyo eezyi zitobela zyazibeela zisiyene-siyene zyamubbuku eeli mbozigwasya mukupandulula njiisyo zyamu Bbaibbele: Mbuli bupanduluzi bwa “Ufumu” (mapeeji 374-5) naa “mzimu” (apeeji 319); ikweezyanisya busanduluzi busiyene-siyene butondezya nkolijanika alimwi mbolibelesyegwa zina lya Leza mu Bbaibbele. (mapeeji 415-7) naa makani aaluzi kujatikizya helo (mapeeji 144-6); mulongo wazintu utondezya njiisyo zitwaandaanya kuzikombelo zimwi (mapeeji 270-3) naa ikutondezya muntu mbwakonzya kuziba cikombelo ciluzi (mapeeji 89-91); makani aakaindi aatondezya mboyakatalika Kkilisimasi (mapeeji 239-41) naa ikutatola lubazu mumakani aacisi kwa Banakristo bakusaanguna (mapeeji 371-3); bumboni bwasayaansi businizya kulenga (mapeeji 75-6) naa ikutondezya bubi buboola kwiinda mukufweba lubanje alimwi atombwe (mapeeji 250-3). Amubakulwaizye basikumwaya ikubelesya cibelesyo eeci cibotu kapati kufwumbwa nokwayandika ciindi nobali mumulimo wamumuunda.

20 min: “Tujisi Cibelesyo Cipya Cigwasya Kutalisya Ziiyo!” Mubandi abaswiilizi weendelezyegwaa mulangizi wamulimo. Amubalailile basikugwasilizya ikwaabila umwi aumwi wajanika amuswaangano ooyu katulakiti komwe aaka kapya kakuti, Sena Mulayanda Kuzyiba Zinji Kujatikizya Bbaibbele? ikuti katuliko. Amubikkilizye azitondezyo zyalibambilwa kabotu kwiinda mukubelesya malailile aapedwe mukabbokesi kakuti “Nzyomweelede Kwaamba Kujatikizya Mamagazini.” Sikumwaya omwe atondezye mbokumwaigwa Ngazi Yamulindizi ya December 1 alimwi uumbi atondezye mbokumwaigwa Galamukani! ya December 8. Muzitondezyo zyoonse zyobilo, sikumwaya ulamanizya kwiinda mukusiila mwiniŋanda katulakiti ka Kuzyiba Bbaibbele—kuli yooyo wakaka kubweza mamagazini alimwi ayooyo wabweza. Amubakulwaizye boonse ikwaabila katulakiti aaka kapya kubantu boonse mbobanooyaanya mumulimo wamumuunda.

Lwiimbo 23 amupailo wakujala.

Bupanduluzi buyungizidwe