Zyakwaambilizya

◼ Mabbuku aakumwaya mu February: Ibbuku lipya lya Amubaa Cilongwe a Jehova liya kwaabilwa. March: Luzibo Lutola Kubuumi Butamani. Tuyoosolekesya kutalisya ziiyo zya Bbaibbele zyaaŋanda. April alimwi a May: Kuya kwaabilwa Ngazi Yamulindizi alimwi a Galamukani! Ciindi nomucita nyendo zyakupilukila kubantu bakatondezya luyandisisyo, balo ibakonzya kubikkilizya abaabo ibakajanika ku Ciibalusyo alimwi akumiswaangano imwi yeendelezyegwaa Leza, pele ibataswaangani lyoonse ambungano, amubabikkile maano ikutegwa mubaabile bbuku lya Amukombe Leza Mwini-Mwini Uuli Alikke. Kuyandika kusolekesya kutalisya ciiyo ca Bbaibbele caaŋanda, ikapati ikuti naa bamwi bakaliiya kale bbuku lya Luzibo alimwi abroshuwa ya Ncayanda.

◼ Mulangizi weendelezya naa umwi ngwayootuma weelede kulingula maakkaunti aambungano mu March 1 naa cakufwambaana mbuli mbocikonzyeka bwainda buzuba oobo. Mwaakumana, amukaambilizye kumbungano eelyo nokuyoobalwa lipooti yamaakkaunti. Amubale twaambo toonse tuzuminizya kutambulwa kwamali oonse mbungano ngoyakasanga kumulimo wanyika yoonse alimwi amali oonse aabelesegwa ambunga.

◼ Imulembi alimwi amulangizi wamulimo beelede kulanga-langa mulimo wabapaniya boonse baciindi coonse. Ikuti naa bamwi kabatakonzyi kusika amweelwe wamawoola uuyandika, ibaalu beelede kubaa bubambe bwakubagwasya. Imalailile ambomunga mwacicita eeci inga mwaajana mumagwalo aa Sosaiti aa S-201 ngobamulembela mwaka amwaka. Alimwi amubone muncali 12 kusikila ku 20 mupepa lyamukati lya Mulimo Wesu Wabwami wa Chichewa wamu October 1986.

◼ Makani aabuleya aalubazu aa Ciibalusyo aamu 2003 anoojisi mutwe wakuti, “Sena Casika Kale Ciindi Calubeta lwa Babuloni?” Amubone kwaambilizya kukozyenye akooku mu Mulimo Wesu Wabwami wamu September 2002.

◼ Ikutalikila mu March 1, 2003, imamagazini aa Ngazi Yamulindizi anooliko mu Chichewa mumabala mapati.