‘Amube Aacamba’
1 Jesu naakatuma basikwiiya bakwe bataanzi, wakabaambila kuti: “Amulange. Ndamutuma mbuli imbelele akati kabaumpe.” (Mt. 10:16) Sena eeci cakapa kuti bayoowe akulengaana ikukambauka? Peepe. Bakacita mbuli bwakazikwaamba imwaapostolo Paulo ku Banakristonyina kuti: “Atube aacamba cakwaamba kuti, ‘Leza ngomugwasyi wangu, taakwe ancenjoowa pe. Ino muntu inga wandicita buti?’” (Bahi. 13:6, Ci) Tiibakatongooka ikusampaulwa akaambo kazina lya Jesu, alimwi bakazumanana lyoonse ikuyiisya akukambauka makani mabotu.—Inc. 5:41, 42.
2 Mazubaano imulimo wakukambauka wanyika yoonse mbwiizulwa uli mucibeela cakumamanino. Mbubwena mbuli mbwaakasinsima Jesu, twasulwa kumisyobo yoonse. (Mt. 24:9) Imulimo wesu wakukambauka wakazyigwa akusampaulwa kapati, alimwi mumasena amwi mane walesyegwa buya. Ikuti notwatalijisi lusyomo lwini-lwini, notwayoowa akutalika kulengaana. Pele, ikuzyiba kuti Jehova Ngomugwasyi wesu kulatukkazika moyo akutuyumya kutegwa tuzumanane.
3 Ibusicamba mbube bwakuba muntu muyumu alimwi uuzumanana. Caamba kutaba muntu mukandu, sibweemya naa imoowa. Basikwiiya ba Jesu lyoonse bakali kuyandika busicamba kutegwa bazumanane. Ikuba muntu sicamba kulayandika kapati ikuti tutatyompokelwi amuuya wanyika uuteendelani a Leza. Cilakulwaizya kaka ikuyeeya cikozyanyo cibotu ca Jesu, iwakaizunda nyika! (Joh. 16:33) Alimwi amuyeeye zyabaapostolo balo nokuba kuti bakali mumapenzi aataambiki, cabusicamba bakati: “Tuleelede kumvwa Leza kwiinda bantu.”—Inc. 5:29.
4 Tatuli Bantu Bapiluka Cifwuteesule: Tweelede kuzumanana kuukkomanina mulimo wesu. (Heb. 10:39) Lyoonse katuyeeya kuti Jehova ngookatutuma kuti tukatondezye luyando aluzyalo lwakwe kubanamaleya boonse. Kwiina natuma balanda bakwe kucita cintu cinyina mpindu. Zyoonse nzyaakatutuma kuti tuzicite ziyoobagwasya aabo ibamuyanda Leza.—Rom. 8:28.
5 Ikubaa lusyomo kuyootugwasya kuzumanana kuyandaula bantu bali mbuli mbelele mucilawo cesu. Ikutaakkomanina makani nkobacita bantu cilakonzya kuba citondezyo cakuti bali tyompedwe alimwi banyina bulangizi. Iluyando lwesu alutukulwaizye kubeetelela akubakkazikila moyo. Ciindi aciindi notusiya mabbuku naa notubona muntu uuyanda kuswiilila, imbaakani yesu yeelede kuba yakucita lweendo lwakupilukila cakufwambaana kutegwa agwasigwe kuya ambele. Tatweelede kudooneka kuti naa inga twacikonzya kutalisya ciiyo ca Bbaibbele akucisololela kabotu. Muciindi caboobo, lyoonse kwiinda mumupailo tweelede kulomba lugwasyo amalailile aa Jehova, katusyomede kuti uyootugwasya.
6 Tulisinizyide kuti Jehova uyoozumanana kutugwasya kusikila kumamanino kwamulimo ooyu. (Amweezyanisye a Ba-Filipi 1:6.) Ilusyomo lwesu ilutazungaani mulinguwe lwakuti Ngomugwasyi wesu lulatuyumya kutegwa “tutalengaani mukucita kabotu.”—Gal. 6:9.