Kabbokesi Kamubuzyo

◼ Sena cileelede kulemba twaambo tuyoolangwa-langwa mu Cikolo Camulimo Weendelezyegwa a Leza akutupa bamwi?

Cilazumizigwa kucita boobu kuti babelesye bamumukwasyi wesu kutugama alimwi abalongwe basyoonto. Nokuba boobo, twaambo twamusyobo ooyu tatweelede kupegwa kubantu boonse naa kusambalwa pe akaambo kakuti eeci inga kwaba kutyola milawo iikasya kulembulula.—Rom. 13:1.

Kumakani amwi mu Cikolo Camulimo Weendelezyegwa a Leza, mutwe wamakani ulikke nguupedwe; takutondezyedwe bbuku nkwaazwa makani pe. Sena inga cagwasya kumuntu kubamba mulongo wamabbuku naa kulemba bbuku nkwaazwa makani aakonzya kubelesyegwa abaabo bapegwa makani aamusyobo ooyu? Peepe. Alimwi inga tiicagwasya pe kulemba bwiinguzi kumibuzyo iili mu Kwiinduluka Kwamu Cikolo Camulimo Weendelezyegwa a Leza kuti bamwi bakabelesye, akaambo kakati eeci tacikonzyi kubagwasya kwiibaluka twaambo tuyandika. Basicikolo beelede kuvwuntauzya bamukamwini. Eeci ncibeela ciyandika cakuyiisya calo Jehova ncapa kwiinda mucikolo ikutugwasya kubandika “lulimi lwabaiyide.”—Is. 50:4.