Ino ‘Nkaambo Kalibuti Kamupa Kukondwa’?
1. Ino nkaambo kalibuti keelede kutupa kukkomana kumamanino aamwezi?
1 Ciindi mwezi nowasika kumamanino alimwi boonse nobalombwa kupa malipooti aabo aamumulimo wamumuunda, ino ‘nkaambo kalibuti kamupa kukondwa’? (Gal. 6:4) Kufwumbwa naa tuli bapainiya baalubazu babeleka mawoola aali 130 mumulimo naa basikumwaya bakazumizyigwa kulipoota maminiti aali 15, toonse tweelede kukkomana kumulimo ngotwakabelekela Jehova camoyo woonse.—Int. 100:2.
2. Nkaambo nzi ncotweelede kubeleka canguzu mumulimo wa Jehova?
2 Mbwali Mwami Wabubumbo boonse, Jehova uleelela kupegwa zyintu ziinda kubota. (Malk. 1:6) Akaambo kakuti tulamuyanda, twakalyaaba kuti tucite kuyanda kwakwe. Aboobo, kumamanino aabuzuba naa mwezi, ikuti naa tulasyoma kuti twamupa “kabalwebalwe wamicelo” naa micelo yakusaanguna yaciindi cesu, matalenta, alimwi anguzu mumulimo wa Jehova, nkokuti tulijisi kaambo keelede kutupa kukkomana. (Tus. 3:9) Pele ikuti naa manjezyeezya eesu atupa mulandu, nkokuti tweelede kubona mpotweelede kubambulula kutegwa tucite kabotu.—Lom. 2:15.
3. Nkaambo nzi ncocitali camaano kulyeezyanya abantu bambi?
3 “Ikutali Akaambo Kakulyeezyanya Amuntu Uumbi”: Tacili camaano kulyeezyanya abantu bamwi naa kuyeeya ciindi nitwakajisi nguzu zinji. Bukkale bulacinca. Zyintu nzyotukonzya kucita ziliindene. Kulyeezyanya kanji-kanji kuletela muzundano naa kulimvwa kubula mpindu. (Gal. 5:26; 6:4) Jesu tanaakali kweezyanya milimo yabantu. Muciindi caboobo, wakalumbaizya kweelana anzyaakali kukonzya kucita muntu umwi aumwi.—Mk. 14:6-9.
4. Nziiyo nzi zigwasya nzyotukonzya kwiiya kucikozyanyo ca Jesu camatalenta?
4 Mucikozyanyo ca Jesu camatalenta, aumwi mubelesi wakatambula matalenta “kweelana anguzu zyakwe.” (Mt. 25:15) Simalelo naakapiluka akubuzya umwi aumwi mbwaakabeleka, aabo bakabeleka cabusungu kweelana abukkale bwabo bakalumbaizyigwa, kumane bakakondwa antoomwe asimalelaabo. (Mt. 25:21, 23) Andiswe kuti twabeleka canguzu mumulimo wakukambauka makani mabotu aa Bwami, tulakonzya kusyoma kuti Leza ulatukkomanina alimwi tuyookajana kaambo katupa kukkomana.