Malifalensi Aamu Kabbuku Kamuswaangano Wabuumi Amulimo Wesu
MARCH 4-10
MBONO IZILI MU JWI LYA LEZA | BAROMA 12-14
“Ncocaamba Kutondezya Luyando lwa Bunakristo”
(Baroma 12:10) Muluyando lwabunyina amuyandane kapati. Mumakani aakulemekana, amube ndinywe nomuli kumbele kulemeka bamwi.
it-1 55
Luyando
Luyando lwabunyina (Mu Chigiriki bbala lyakuti phi·la·del·phiʹa, lyaamba, “kumuyanda mukwesu”) lweelede kutondezyegwa akati kabasimbungano boonse Banakristo. (Rom. 12:10; Heb. 13:1; alimwi amubone 1Pet. 3:8.) Aboobo, lukamantano iluli mumbungano lweelede kuti kaluli luyumu, kalutazungaani alimwi lweelede kuba mbuli loolo luli akati kabanamukwasyi. Nokuba kuti basimbungano balalutondezya kale luyando lwabunyina, bakulwaizyigwa kuti kabalutondezya kusikila mpobagolela.—1Tes. 4:9, 10.
Ibbala lya Chigiriki lyakuti phi·loʹstor·gos, lyalo ilyaamba “kuyandana kapati,” lilabelesyegwa kubantu bamvwana kapati. Bbala lyakuti sterʹgo lizwa kubbala lyakuti phi·loʹstor·gos lyalo kanji-kanji ilibelesyegwa kwaamba luyando lwakuzyalwa andulo, mbuli loolo luba akati kabanamukwasyi. Mwaapostolo Paulo wakakulwaizya Banakristo kuba abube oobu. (Rom. 12:10) Paulo alimwi wakatondezya kuti mazuba aamamanino akali kuyoozyibwa kwiinda mubantu “batajisi luyando lwakuzyalwa andulo” (Mu Chigiriki aʹstor·goi) alimwi akuti bantu bali boobo beelede kufwa.—2Tim. 3:3; Rom. 1:31, 32.
(Baroma 12:17-19) Mutapilusizyi muntu uuli woonse bubi. Amuzibikkile maano zintu zibonwa kuti nzibotu abantu boonse. 18 Kamusoleka kusikila mpomugolela kukkala muluumuno abantu boonse. 19 Nobayandwa, mutapilusizyi muntu cibi, pele amubusiile busena bukali bwa Leza; nkaambo kulembedwe kuti: “‘Ndime ndisubula; ndime nendiyoopilusya cibi,’ mbwaamba Jehova.”
‘Amukkale muluumuno abantu boonse’
Amubale Baroma 12:17. Paulo wakaamba kuti notupenzyegwa, tatweelede kujosya. Cilayandika kapati kulutobela lulayo oolu, ikapati mumikwasyi oomo mobaindene bukombi. Umwi wabanabukwetene Imunakristo naafwubaazigwa naa kupenzyegwa, ulalijata. ‘Ikupilusya cibi kumuntu’ takugwasyi pe. Pele cipa buyo kuti mapenzi azumanane.
“Mutapilusizyi Muntu Cibi”
Lulayo alumwi lwa Paulo mbuli mbobeelede kubonwa batali bakamboni alimwi abamwi buyo: ‘Nkutabweedezya cibi kumuntu.’ Majwi aaya aleendelana amajwi ngaamba mumincali yainda aakuti: “Amusesemwe kububi.” Baccu, ino mbuti muntu mbwakonzya kwaamba kuti ulabusesemwa bubi naa cibi ikuti watalika kujolela cibi kubantu? Ikucita boobu kulakonzya kuti nkubula luyando lutali “lwakuupaupa ameso.” Kumane Paulo wati: “Amucite zibotu kuti bantu boonse bazibone.” (Baroma 12:9, 17, Ci) Ino mbuti mbotukonzya kubelesya majwi aayo?
Kumatalikilo, mulugwalo lwakwe ku Bakorinto, Paulo wakalemba kupenzyegwa baapostolo nkobakapenzyegwa. Wakati: “Twaba ceebelo kumeso aabalengwi boonse. . . Ciindi ncitupenzegwa tulaumuna buyo, nkabela ciindi ncitutukilwa tulakombelezya.” (1 Ba-Korinto 4:9-13) Ncimwi buyo asunu, Banakristo beni-beni baleebelwa abantu munyika eeyi. Iciindi aabo mbotuli limwi nobabona milimo mibotu njotucita notupenzyegwa, balakonzya kuba aluyando kumulumbe wesu ngotumwaya Tobanakristo.—1 Petro 2:12.
(Baroma 12:20, 21) Pele “ikuti sinkondonyoko kafwide nzala, komupa cakulya; ikuti kafwide nyota, komupa cakunywa; nkaambo kwiinda mukucita boobo, ulalundika makala aamulilo amutwe wakwe.” 21 Utalilekeli kuzundwa abubi pe, pele kozumanana kuzunda bubi kwiinda mukucita zibotu.
Kamulekelelana Camoyo Woonse
Zimwi ziindi mulakonzya kulimvwa kuti inga mwagwasya muntu umwi wamubisizya kutegwa katobela zyeelelo zya Bunakristo. Mwaapostolo Paulo wakalemba kuti: “‘Ikuti sinkondonyoko kafwide nzala, komupa cakulya; ikuti kafwide nyota, komupa cakunywa; nkaambo kwiinda mukucita boobo, ulalundika makala amulilo amutwe wakwe.’ Utalilekeli kuzundwa abubi, pele kozumanana kuzunda bubi kwiinda mukucita zibotu.” (Rom. 12:20, 21) Kwiinda mukucita zyintu zibotu ciindi bamwi nibamulubizyila, mulakonzya kupa kuti bacince mizeezo alimwi akupa kuti batalike kucita kabotu. Kwiinda mukutondezya kumvwisya, lweetelelo—niluba luzyalo—kumuntu wamulubizyila, ambweni mulakonzya kumugwasya kwiiya kasimpe kamu Bbaibbele. Kufwumbwa naa cili buti, kwiingula amoyo mubombe kupa muntu coolwe cakuyeeya kulilemeka kwanu kubotu.—1 Pet. 2:12; 3:16.
Kuyandaula Mbono Zyakumuuya
(Baroma 12:1) Aboobo ndamulomba kwiinda mulubomba lwa Leza lupati, bakwesu, kuti mutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.
Mbotukonzya Kusala Zyakulikondelezya
Zyoonse nzyotucita mubuumi zilabujatikizya bukombi bwesu kuli Jehova. Paulo wakacipandulula eeci naakati: ‘Amutuule mibili yanu kaili cipaizyo cuumi, cisalala, cizuminwa a Leza.’ (Baroma 12:1) Jesu wakaamba kuti: “Weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Marko 12:30) Lyoonse tuyanda kupa Jehova zintu ziinda kubota. Mu Israyeli yansiku, ciindi bantu nobakali kutuula banyama kuli Jehova, bakeelede kutuula munyama uuli kabotu. Ikuti kuli cakalubide kumunyama ooyo, Leza tanaakali kumutambula. (Levitiko 22:18-20) Mbubwenya buyo, bukombi bwesu bulakonzya kukakwa a Jehova. Munzila nzi?
Jehova utwaambila kuti: “Mweelede kusalala, nkaambo mebo ndilasalala.” (1 Petro 1:14-16; 2 Petro 3:11) Jehova uyoobutambula bukombi bwesu lilikke buyo kuti kabusalala. (Deuteronomo 15:21) Bukombi bwesu tabukonzyi kusalala ikuti katucita zintu nzyatayandi Jehova, zintu zijatikizya kutalilemeka naa izijatikizya madaimona. (Baroma 6:12-14; 8:13) Pele alimwi inga tacimukkomanisyi Jehova kuti katulikondelezya azintu zili boobu. Eeci cilakonzya kupa kuti bukombi bwesu kabutasalali alimwi kabutamukkomanisyi Jehova alimwi eeci cilakonzya kupa kuti cilongwe cesu anguwe cinyongane kapati.
(Baroma 13:1) Muntu uuli woonse kalibombya kubeendelezi, nkaambo kunyina bweendelezi bukonzya kuba ccita kuti bwazumizyigwa a Leza; ibeendelezi aabo ibali muzyuuno zyaandeene-andeene balizumizyidwe a Leza.
Twaambo Tugwasya Mubbuku lya Ba-Roma
13:1—Muunzila nzi beendelezi ‘ibali muzyuuno zyaandeene-andeene mobazumizyidwe a Leza’? Beendelezi bamfwulumende ‘balabikkwa a Leza’ munzila yakuti baleendelezya kwiinda mukuzumizyigwa a Leza, alimwi munzila zimwi bweendelezi bwabo bwakasinsimwa a Leza. Eeci cilalibonya muli ceeco Bbaibbele ncolyakasinsima kujatikizya beendelezi bali mbobabede.
AMUSUNGWAALE MUMULIMO WAMUMUUNDA
Mitelo—Sena Mweelede Kwiitela?
Mitelo Amanjezeezya
Mubwini, mitelo imwi njobakali kutela Banakristo bamumwaanda wamyaka wakusaanguna yakali kubelesyegwa mumulimo wabusikalumamba. Aaka kaambo kamanjezeezya nkekakapa kuti ba Gandhi aba Thoreau baleke kutela mitelo.
Amubone kuti Banakristo bakautobela mulawo uujanwa mulugwalo lwa Baloma caandaano 13, kutali buyo akaambo kakuyoowa kusubulwa, pele alimwi akaambo “kamanjezyeezya [aabo].” (Baloma 13:5) Inzya, manjezyeezya aa Munakristo ayelede kumukulwaizya kutela mitelo, nokuba kuti mitelo eeyi ibelesyegwa kugwasyilizya micito eeyo walo njakaka. Kutegwa tumvwisye twaambo ootu tulibonya mbuli kuti tulakazyanya, tweelede kuzyiba bwini kujatikizya manjezyeezya eesu, ijwi lyamukati ilitwaambila naa micito yesu ili kabotu naa mibi.
Ba Thoreau bakaamba kuti, muntu umwi aumwi ulijisi jwi lyamukati, pele talikonzyi kusyomwa. Kutegwa tumukkomanisye Leza, manjezyeezya eesu ayelede kweendelana azyeelelo zyakwe zyakulilemeka. Akaambo kakuti mizeezo ya Leza ilisumpukide kwiinda yesu, lyoonse tweelede kucinca kuyeeya kwesu kutegwa kweendelane akuyeeya kwakwe. (Intembauzyo 19:7) Aboobo, tweelede kusolekesya kuzyiba mbwazibona Leza mfwulumende zyabantu. Ino uzibona buti?
Twabona kuti mwaapostolo Paulo wakaamba mfwulumende zyabantu kuti “mbabelesi ba Leza bagwasya buleya.” (Baloma 13:6) Ino eeci caamba nzi? Caamba kuti zigwasyilizya kuti zyintu kazyeenda kabotu akucitila bantu milimo imwi iiyandika. Noziba mfwulumende zitasyomeki kanji-kanji zilagwasyilizya muzyintu zili mbuli kutola magwalo, kuyiisya buleya, kukwabilila ntenda zyamulilo alimwi akubona kuti milawo ilatobelwa. Nokuba kuti Leza ulizyi kabotu-kabotu zibi zicitwa amfwulumende zyabantu, ulazizumizya kuti kaziliko kwaciindi cili mbocibede alimwi ulailila kuti katutela mitelo akaambo kakulemeka bubambe bwakwe, nkokuti, kuzizumizya nkwaazizumizya mfwulumende eezyi kuti zyeendelezye bantu.
Leza wazizumizya mfwulumende zyabantu kuti zyeendelezye kwaciindi cisyoonto buyo. Kuyanda kwakwe nkwakuti akazigwisye mfwulumende zyoonse zyabantu alimwi akuti Bwami bwakwe bwakujulu bukabambulule zyintu zyoonse zyanyonyoonwa abweendelezi bwabantu kwamyaka minji. (Daniele 2:44; Matayo 6:10) Nokuba boobo, kwaciindi cino Leza taabazumizya Banakristo kutatobela milawo yamfwulumende kwiinda mukukaka kutela mitelo naa munzila imwi iili yoonse.
Ino kuti mbuli ba Gandhi, mucilimvwa kuti ncibi kutela mitelo iigwasyilizya nkondo? Mbubwenya buyo mbotukonzya kububona kabotu busena kuti naa twatanta acilundu, tulakonzya kugwasyigwa kucinca kuyeeya kwesu kuti kweendelane akuyeeya kwa Leza kwiinda mukuzinzibala kuyeeya mbokusumpukide kuyeeya kwakwe kwiinda kwesu. Kwiinda mumusinsimi Isaya, Leza wakaamba kuti: “Mbubonya mbuli ijulu mbulisumpwidwe kwiinda nyika, mbubonya obo inzila zyangu zilisumpwidwe kwiinda inzila zyanu amiyeeyo yangu kwiinda miyeeyo yanu.”—Isaya 55:8, 9.
MARCH 11-17
MBONO IZILI MU JWI LYA LEZA | BAROMA 15-16
“Amulange Kuli Jehova Kutegwa Amuyumye Alimwi Akumuumbulizya”
(Baroma 15:4) Nkaambo zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.
“Amulile Abaabo Balila”
Cibalo icaamba kujatikizya buumba mbwaakajisi Jesu ciindi Lazaro naakafwa, ncikozyanyo comwe buyo icuumbulizya akati kazikozyanyo zinji nzyotujana mu Jwi lya Leza. Nkakaambo kaako, “zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.” (Rom. 15:4) Ikuti naa muli mubuumba, andinywe mulakonzya kuumbulizyigwa amagwalo mbuli yaaya aatobela:
▪ “Jehova ulaafwaafwi abaabo batyompedwe mumoyo; aabo bapengede mumizeezo ulabafwutula.”—Int. 34:18, 19.
▪ “Mizeezo minji iilibilisya neyakandikatazya, yebo [Jehova] wakanduumbulizya akunditontozya.”—Int. 94:19.
▪ “Mwami wesu Jesu Kristo lwakwe a Leza Taateesu, ooyo wakatuyanda akutupa luumbulizyo lutamani abulangizi bubotu kwiinda muluzyalo lwakwe, abakkazike myoyo yanu akumuyumya mumilimo mibotu iili yoonse alimwi amajwi.”—2Tes. 2:16, 17.
(Baroma 15:5) Lino Leza uutupa kuliyumya aluumbulizyo, nyoonse amupe kuba amizeezo njiyonya njaakajisi Kristo Jesu,
“Kuliyumya Amukulekele Kuti Kumanizye Mulimo Wankuko”
Amulombe Jehova kuti amupe nguzu. Jehova ngu “Leza uutupa kuliyumya aluumbulizyo.” (Baroma 15:5) Ngonguwe alikke uubumvwisya ncobeni bukkale bwesu, mbotulimvwa alimwi ambotwakakomena. Aboobo ulizyi cini ncotuyandika kutegwa tuliyumye. Ibbaibbele lyaamba kuti: “Aabo bamuyoowa ulabapa nzyobayanda; ulamvwa nobakwiilila lugwasyo, alimwi ulabavwuna.” (Intembauzyo 145:19) Pele ino Leza uyakwiingula buti mipailo yesu yakulomba nguzu zyakuti tuliyumye?
(Baroma 15:13) Aboobo Leza uupa bulangizi amuzuzye kukondwa koonse alimwi aluumuno eelyo nomumusyoma, ikutegwa mwiindile kuba abulangizi munguzu zyamuuya uusalala.
“Weelede Kuyanda Jehova Leza Wako”
Jehova ‘ulapa bulangizi ibuzuzya kukondwa koonse alimwi aluumuno.’ (Rom. 15:13) Bulangizi mbwatupa Leza butugwasya kuliyumya mumasunko aalwana lusyomo lwesu. Bananike ibazumanana ‘kusyomeka mane kusikila kulufwu bayakupegwa musini wabuumi bwakujulu.’ (Ciy. 2:10) Aabo basyomeka ibajisi bulangizi bwakupona ano anyika bayakukkomana azilongezyo zitamani mu Paradaiso. (Lk. 23:43) Ino inga tulimvwa buti abulangizi buli boobu? Cakutadooneka, myoyo yesu ilizwide alukkomano, luumuno, alimwi aluyando kuli Sikupa “cipego cibotu cili coonse alimwi acipego cilondokede cili coonse”?—Jak. 1:17.
Kuyandaula Mbono Zyakumuuya
(Baroma 15:27) Masimpe, cakababotela kucita boobo, alimwi buya bakali basicikwelete kubasalali; nkaambo ikuti bamasi bakatola lubazu muzintu zyakumuuya zyabasalali, ibamasi aaba abalo bajisi cikwelete cakubakutaukila basalali azintu zyakumubili.
w89 12/1 24 ¶3
“Ndibone Mboluli Lwini-Lwini Luyando Ndomujisi”
Cakutadooneka, bakwesu Bamasi bakeelede kubweza ntaamu yakugwasya Banakristonyina baku Jerusalemu mumapenzi aabo. Kayi buya, bakajisi ‘cikwelete’ caalubazu ku Banakristo baku Jerusalemu. Sena takuli ku Jerusalemu nkobakaamvwida makani mabotu Bamasi? Paulo wakaamba kuti: “Ikuti bamasi bakatola lubazu muzintu zyakumuuya zyabasalali, ibamasi aaba abalo bajisi cikwelete cakubakutaukila basalali azintu zyakumubili.”—Baroma 15:27.
(Baroma 16:25) Lino kuli Leza uukonzya kumuyumya kweelana amakani mabotu ngondaambilizya amukukambaukwa kwa Jesu Kristo, kweelana aciyubunuzyo camaseseke aa Leza aakasisidwe kwaciindi cilamfwu
it-1 858 ¶5
Kuzyibila Limwi, Kusalilwa Limwi
Mesiya naa Kristo, wakali kuyooba lunyungu lwakasyomezyegwa alimwi kwiinda mulinguwe balulami boonse bamunyika mobakali kuyoolongezyegwa. (Gal. 3:8, 14) “Lunyungu” oolu lwakaambwa ciindi cakusaanguna kabucitikide kale buzangi mumuunda wa Edeni, pele katanazyalwa Abelo. (Matl. 3:15) Eeci cakacitika myaka iili 4,000 kaatanayubununwa caantangalala “maseseke aa Leza” aajatikizya “lunyungu” lwabu Mesiya. Aboobo masimpe, ‘akalisisidwe kwaciindi cilamfwu.’—Rom. 16:25-27; Ef. 1:8-10; 3:4-11.
MARCH 18-24
MBONO IZILI MU JWI LYA LEZA | 1 BAKORINTO 1-3
“Sena Muli Muntu Uusololelwa Azisusi Zyanyama naa Muntu Uusololelwa Amuuya?”
(1 Bakorinto 2:14) Pele muntu uusololelwa azisusi zyanyama tatambuli zintu zyamuuya wa Leza, nkaambo nzyabufwubafwuba kulinguwe; alimwi takonzyi kuzizyiba, nkaambo zilingaulwa munzila yakumuuya.
Ino Caamba Nzi Kuba Muntu Uusimide Kumuuya?
Cakusaanguna, amulange-lange bube mbwajisi muntu uusololelwa azisusi zyanyama. Nyika ijisi bube budumide kapati ibukulwaizya kubikkila maano kuzintu zyanyama. Paulo ubupandulula kuti “imuuya ooyo lino uubeleka mubana batamvwi.” (Ef. 2:2) Imuuya ooyu uyunga bantu banji kuti babe abube budumide, nkokuti, ikwiile kutobela buyo buleya. Babikkila kapati maano kuzintu zyanyama. Akaambo kaceeco, banabunji bacita ncobayeeya kuti cililuleme mumeso aabo alimwi kunyina nobasolekesya kupona kweelana azyeelelo zya Leza. Muntu uusololelwa azisusi zyanyama uyeeya kapati zintu zyakumubili alimwi kanji-kanji ulimvwa kuti cuuno ncajisi, mali, naa zintu nzyaangulukide kucita zilayandika kapati kwiinda cintu cili coonse.
Ino nzintu nzi zimbi izikonzya kutondezya mbwabede muntu uusololelwa azisusi zyanyama? Bantu ibacita milimo iili yoonse akati ‘kamilimo yanyama’ bali akati kabantu ibasololelwa azisusi zyanyama. (Gal. 5:19-21) Lugwalo lwa Paulo lwakusaanguna kumbungano yabana Korinto lulaamba azimbi zintu izitondezya mbobabede bantu aabo ibasololelwa azisusi zyanyama. Zintu eezyi zibikkilizya: kupa kuti kube lwaandaano, kubamba tukamu-kamu, kusumpula mazwanga, kutolana kunkuta, kunyansya busilutwe, kutalyeendelezya mumakani aakulya akunywa. Iciindi nasunkwa, muntu uusololelwa azisusi zyanyama ulatyompwa akuzundwa asunko eelyo. (Tus. 7:21, 22) Juda wakaamba kujatikizya bantu ibakali kuyoosololelwa kapati azisusi zyanyama cakuti tiibakali kuyoobikkila maano “kuzintu zyakumuuya.”—Jud. 18, 19.
(1 Bakorinto 2:15, 16) Pele muntu uusololelwa amuuya ulazilingaula zintu zyoonse, pele walo kunyina muntu uumulingaula pe. 16 Nkaambo “ino nguni uuzyi mizeezo ya Jehova kutegwa amulailile?” Pele swebo tulijisi mizeezo ya Kristo.
Ino Caamba Nzi Kuba Muntu Uusimide Kumuuya?
Aboobo, ino caamba nzi kuba “muntu uusololelwa amuuya”? Muntu uusololelwa amuuya lyoonse ubikkila maano kuli Leza, calo iciimpene kapati ancacita muntu uusololelwa azisusi zyanyama. Bantu ibabikkila maano kuzintu zyakumuuya balasolekesya ‘kwiiya Leza.’ (Ef. 5:1) Eeci caamba kuti balasolekesya kuyeeya mbuli Jehova kujatikizya twaambo alimwi akubona zintu mbuli mbwazibona. Kuli mbabo, Leza mwini-mwini ncobeni. Mukwiimpana abantu basololelwa azisusi zyanyama, balasolekesya kweendelanya bukkale bwabo boonse azyeelelo zya Jehova. (Int. 119:33; 143:10) Muciindi cakubikkila maano kumilimo yanyama, muntu uubikkila maano kuzintu zyakumuuya uyanda kutondezya “mucelo wamuuya.” (Gal. 5:22, 23) Kutegwa alimwi kasalale kaambo kakuti “uubikkila maano kuzintu zyakumuuya,” amuyeeye kweezyanisya ooku: Muntu uucibwene mumakani aamakwebo waambwa kuti muntu uubikkila maano kumakwebo. Mbubwenya buyo, awalo muntu uuyandisya zintu zyakumuuya naa makani aabukombi waambwa kuti muntu uubikkila maano kuzintu zyakumuuya.
Ino Caamba Nzi Kuba Muntu Uusimide Kumuuya?
Ino mbuti swebo kutugama mbotukonzya kumwiiya Kristo? Bbaibbele kulugwalo lwa 1 Bakorinto 2:16 lyaamba kuba ‘amizeezo ya Kristo.’ Alimwi lugwalo lwa Baroma 15:5 lwaamba “kuba amizeezo njiyonya njaakajisi Kristo Jesu.” Aboobo, kutegwa tube mbuli Kristo, tweelede kuzyiba mbuli mbwaakali kuyeeya alimwi abwini mbobwakabede bube bwakwe. Mpoonya tweelede kutobela ntaamu zyakwe. Mizeezo ya Jesu ibikkilide kapati maano kucilongwe cakwe a Leza. Aboobo ikuba mbuli Jesu kutupa kuba mbuli Jehova. Akaambo katwaambo ootu, cilasalala kuti cilayandika kapati kwiiya kuyeeya mbuli Jesu.
Kuyandaula Mbono Zyakumuuya
(1 Bakorinto 1:20) Ino uli kuli musongo? Ino uli kuli mulembi? Ino uli kuli sinkazi wamubweende bwazintu obuno? Sena Leza tanaatondezya kuti busongo bwanyika iino mbufwubafwuba?
it-2 1193 ¶1
Busongo
Nyika mubusongo bwanjiyo yakakaka bubambe mbwaakabamba Leza kwiinda muli Kristo akububona kuti mbufwubafwuba; nokuba kuti beendelezi banjiyo bakali basinkuta bacibwene, ‘bakamujaya Mwami uulemekwa.’ (1Kor. 1:18; 2:7, 8) Pele mukwiimpana ambobakali kuyeeya, Leza wakatondezya kuti busongo bwamunyika mbombubo bwakali bufwubafwuba, alimwi wakapa kuti basongo banjiyo bafwe nsoni kwiinda mukubelesya ceeco ncobakali kubona kuti “mbufwubafwuba bwa Leza,” kubikkilizya abantu mbobakali kubona kuti mbafwubafwuba, ibatakwe nguzu alimwi abantu bantu buyo’ kuti azuzikizye makanze aakwe aatakonzyi kwaalilwa. (1Kor. 1:19-28) Paulo wakabayeezya Banakristo baku Korinto kuti, ‘busongo bwamubweende bwazintu obuno alimwi abwabaleli bamubweende bwazintu obuno’ bwakali kuyooba bwabuyo; aboobo busongo oobu tiibwakali cibeela camulumbe wakumuuya ngwaakali kukambauka mwaapostolo. (1Kor. 2:6, 13) Wakabacenjezya Banakristo baku Kolose kuti baleke kucegwa “mubusongo [phi·lo·so·phiʹas, mu Chigiriki bbala eeli lyaamba kuyandisisya kuba basongo] bwabantu alweeno, kweelana atunsiyansiya twabantu.”—Kol. 2:8; amweezyanisye akapango 20-23.
(1 Bakorinto 2:3-5) Alimwi nindakasika kulindinywe, ndakanyina nguzu, ndakaliyoowede alimwi ndakali kukankama kapati; 4 alimwi nzyondakali kwaamba akukambauka tanaakali majwi aabusongo aakusola kukwela bantu, pele zyakali citondezyo camuuya anguzu zya Leza, 5 kutegwa lusyomo lwanu lutayaami abusongo bwabantu pe, pele luyaame anguzu zya Leza.
Twaambo Tugwasya Mumagwalo Aakalembelwa Bana Korinto
2:3-5. Naakali kukambauka mu Korinto imunzi wabusyaabusongo alimwi aluzyibo lwa Chigiliki, kweelede kuti Paulo wakabikkila maano kujatikizya mbwaakali kunga wakonzya kupa kuti bakali kumuswiilila bamvwisye. Nokuba boobo, kunyina naakalekela kuti kukompama naa kuyoowa nkwaakali kukonzya kuba akwalo kuti kumulesye kubeleka mulimo ngwaakamupede Leza. Mbubwenya buyo, tatweelede kuzumizya bukkale buyumu naa mbotutazyibide kuti butulesye kwaambilizya makani mabotu aa Bwami bwa Leza. Tulakonzya kulangila kuli Jehova calusyomo kuti atugwasye mbubwenya mbwaakacita kuli Paulo.
MARCH 25-31
MBONO IZILI MU JWI LYA LEZA | 1 BAKORINTO 4-6
“Bumena Busyoonto Bupa Kuti Mulwi Woonse Wafulaulu Uukandidwe Ufwufwumuke”
(1 Bakorinto 5:1, 2) Mubwini kwaambwa kuti kuli bwaamu akati kanu, alimwi bwaamu oobo mboobo butacitwi naaba akati kabamasi, bwakuti mwaalumi umwi ukkala amukaintu wabausyi. 2 Pele sena eeco cilamukonda? Sena tamweelede kuusa akufwa nsoni ikutegwa mwaalumi ooyo wakacita ceeci agusyigwe akati kanu?
(1 Bakorinto 5:5-8) mukamwaabe kuli Saatani mwaalumi ooyo kutegwa mubili ukanyonyoonwe, pele muuya ukafwutulwe mubuzuba bwa Mwami. 6 Ikaambo kamupa kulidunda nywebo takali kabotu pe. Sena tamuzyi kuti bumena busyoonto bupa kuti mulwi woonse wafulaulu uukandidwe ufwufwumuke? 7 Amugusye bumena bwakaindi, kutegwa mube mulwi mupya, mbwaanga tamujisi bumena bumupa kufwufwumuka. Nkaambo ncobeni Kristo, imwanaambelele wesu wa Pobwe Lyakwiindilila wapaizyigwa kale. 8 Aboobo atucite pobwe eeli, ikutali abumena bwakaindi naa bwacibi azinyonyoono, pele azinkwa zitajisi bumena izibambwa camoyo woonse alimwi mukasimpe.
(1 Bakorinto 5:13) eelyo Leza walo nabeteka baabo bali kunze? “Amumugusye muntu ooyo mubi akati kanu.”
it-2 230
Bumena
Mwaapostolo Paulo wakabelesya cikozyanyo cabumena ciindi naakalailila Banakristo baku Korinto kugwisya muntu mumbungano walo watakali kulilemeka mumakani aakoonana. Wakaamba kuti: “Sena tamuzyi kuti bumena busyoonto bupa kuti mulwi woonse wafulaulu uukandidwe ufwufwumuke? Amugwisye bumena bwakaindi, kutegwa mube mulwi mupya, mbwaanga tamujisi bumena bumupa kufwufwumuka. Nkaambo ncobeni Kristo, imwanaambelele wesu wa Pobwe Lyakwiindilila wapaizyigwa kale.” Kumane cakutainda mumbali wakatondezya ncaakali kupandulula naakaamba kujatikizya “bumena,” wakati: “Aboobo atucite pobwe eeli, ikutali abumena bwakaindi naa bwacibi azinyonyoono, pele azinkwa zitajisi bumena izibambwa camoyo woonse alimwi mukasimpe.” (1Kor. 5:6-8) Paulo aawa wakali kupandulula ncolyakali kwaamba Pobwe lya Zinkwa Zitajisi Bumena lyaba Juda, lyalo lyakali kucitwa kwainda buyo kusekelela kwa Pobwe Lyakwiindilila. Mbubonya mbuli fulaulu musyoonto buyo uukandidwe uujisi bumena mboukonzya kupa kuti mulwi woonse ufwufwumuke, ncimwi buyo ambungano, ilakonzya kusofwaazyigwa mumeso aa Jehova ikuti naa muntu uujisi bukkale bubyaabi tanaagwisyigwa mumbungano. Aboobo beelede kubweza ntaamu yakugwisya “bumena” akati kabo, mbubonya mbuli bana Israyeli mbobatakali kuba abumena mumaanda aabo ciindi capobwe.
it-2 869-870
Saatani
Ino caamba nzi ‘kwaaba muntu kuli Saatani kutegwa mubili ukanyonyoonwe’?
Kalailila mbungano yaku Korinto kujatikizya ntaamu yakeelede kubwezegwa kumuntu umwi wamumbungano iwakali kucita cibi cipati cakoonana amukaintu wabausyi, mwaapostolo Paulo wakalemba kuti: “Mukamwaabe kuli Saatani mwaalumi ooyo kutegwa mubili ukanyonyoonwe.” (1Kor. 5:5) Aaya akali malailile aakumugwisya muntu ooyo mumbungano alimwi akulekela limwi kuyanzana anguwe. (1Kor. 5:13) Ikwaaba muntu ooyo kuli Saatani cakali kwaamba kumugwisya mumbungano kutegwa abe wanyika mwalo Saatani mwali leza amweendelezi. Mbubonya mbuli “bumena busyoonto” “mumulwi woonse” wafulaulu, muntu ooyu wakali “mubili,” naa mubili uujisi bukkale bubyaabi mumbungano; aboobo kwiinda mukugwisya muntu ooyu uujisi bukkale busesemya, basimbungano ibakali kubikkila maano kuzintu zyakumuuya bakali kuunyonyoona “mubili” kwiinda mukuugwisya mumbungano. (1Kor. 5:6, 7) Mbubonya buyo, Paulo wakaaba Humenayo alimwi a Alekizanda kuli Saatani, akaambo kakuti bakalusowela ambali lusyomo amanjezyeezya mabotu alimwi akuti lusyomo lwabo lwakanyonyooka mbuli bwato bwaloba mulwizi.—1Tim. 1:20.
(1 Bakorinto 5:9-11) Mulugwalo lwangu ndakamulembela kuti muleke kuyanzana abasibwaamu, 10 ikutali kwaamba kuti abasibwaamu boonse bamunyika eeyi naa basyaacivwulemwangu azigwebenga naa basikukomba mituni. Nkaambo ikuti naa caba boobo inga mwayandika kuti muzwe buya munyika eeyi. 11 Pele lino ndimulembela kuti muleke kuyanzana amuntu uuli woonse uutegwa mukwesu pele sibwaamu, syaacivwulemwangu, sikukomba mituni, simatusi, mukolwi, naa cigwebenga, alimwi mutasoli nokuba kulya amuntu uuli boobo.
lvs 241, bupanduluzi buyungizyidwe
Kugwisyigwa Mumbungano
Ikuti muntu iwacita cibi cipati katayandi kweempwa alimwi akukaka kutobela zyeelelo zya Jehova, ulakonzya kuleka kuba cibeela cambungano. Weelede kugwisyigwa mumbungano. Ciindi umwi naagwisyigwa mumbungano, tatweelede kuzumanana kuyanzana amuntu ooyo alimwi tweelede kuleka kubandika anguwe. (1 Bakorinto 5:11; 2 Johane 9-11) Bubambe oobu bwakugwisyigwa mumbungano, bukwabilila zina lya Jehova alimwi ambungano. (1 Bakorinto 5:6) Alimwi kugwisyigwa mumbungano, ndulayo lukonzya kugwasya muntu kweempwa kutegwa apiluke kuli Jehova.—Luka 15:17.
▸ Cibalo 3, muncali 19
Kuyandaula Mbono Zyakumuuya
(1 Bakorinto 4:9) Nkaambo kulindime cilibonya kuti swebo tobaapostolo Leza watucita kuba bamamanino kuya acibumbili katuli bantu beelede kufwa, nkaambo twaba cintu ceebelelwa mubbuwa lyazisobano kunyika, kubangelo alimwi akubantu.
Bangelo—‘Myuuya Iibeleka Mulimo Wabuleya’
Banakristo ibapenzyegwa ‘nceebelo kumeso aabangelo.’ (1Kor. 4:9) Kabakkomene kapati, bangelo balangilila milimo njotucita cakusyomeka alimwi balabotelwa ikuti sizibi weempwa. (Lk. 15:10) Kulilemeka kwabunaleza nkobacita banakazi Banakristo kulabonwa abangelo. Ibbaibbele litondezya kuti “mwanakazi uleelede kuba acitondezyo cakulibombya kumutwe wakwe nkaambo kabaangelo.” (1Kor. 11:3, 10) Masimpe, bangelo balakkomana kubona banakazi Banakristo alimwi ababelesi boonse ba Leza baanyika kabatobela bubambe bweendelezyegwa a Leza alimwi abubambe bwabusilutwe. Kumvwida kuli boobu nciyeezyo cibotu kubana ba Leza aaba bakujulu.
(1 Bakorinto 6:3) Sena tamuzyi kuti tuyoobeteka bangelo? Aboobo sena tatweeleli kubeteka makani aamubuumi oobu?
it-2 211
Mulawo
Mulawo ku Bangelo. Bangelo, balo ibasumpukide kapati kwiinda bantu, beendelezyegwa amulawo alimwi balaitobela milawo ya Leza. (Heb. 1:7, 14; Int. 104:4) Mane buya Jehova wakamulailila sinkondonyina Saatani akumukasya kucita zintu zimwi. (Job. 1:12; 2:6) Mikayeli silutwe wabangelo wakatondezya kuti wakali kumulemeka Mubetesi Mupati Jehova alimwi acuuno ncajisi ciindi naakali kukazyanya a Diabolosi eelyo naakati: “Jehova akukalalile.” (Jud. 9; amweezyanisye Zek. 3:2.) Jesu Kristo walo iwakalemekwa a Jehova Leza, wakapegwa nguzu zyakweendelezya bangelo. (Heb. 1:6; 1Pet. 3:22; Mt. 13:41; 25:31; Flp. 2:9-11) Aboobo kwiinda mukulaililwa a Jesu, mungelo umwi wakatumwa kuli Johane. (Ciy. 1:1) Nokuba boobo, kulugwalo lwa 1 Bakorinto 6:3 mwaapostolo Paulo wakaamba kujatikizya banabokwabo a Kristo kuti bakasalwa kuti babeteke bangelo, ambweni akaambo kakuti bayootola lubazu mukunyonyoona myuuya mibi.