“Lino Ndilaukkomanina Mulimo Wakukambauka!”

LUKKOMANO LWANGU LWAMANA

Cuusisya ncakuti, nondakakkwanya myaka iitandila ku 13, cilongwe cangu a Jehova cakatalika kuyaabumana. Basicikoloma bakali kulibonya kuba alwaanguluko, aboobo ndakali kulimvwa kuti ndakali kwiindwa zintu zimwi. Ndakalimvwa kuti milawo yabazyali bangu azyeelelo zya Bunakristo zyakali kuminya, alimwi ndakabona kuti kukomba Jehova wakali mulimo uuminya. Nokuba kuti kunyina nondakali kudooneka kuti naa Jehova nkwali, cilongwe cangu anguwe cakatalika kuyaabumana.

Tiindakacilekela limwi kukambauka, pele ndakali kucita oobo cakwiinzya buyo mulawo. Nondakali kuunka mubukambausi, tiindakali kulibambila, aboobo cakali kundikatazya kutalika alimwi akuzumanana amubandi. Eeci cakapa kuti kanditaunki ambele mumulimo wangu alimwi akuleka kuukkomanina, calo cakapa kuti ndiindile buya kutauyanda. Aboobo ndakali kulibuzya kuti, ‘Mbuti muntu mbwakonzya kuukkomanina mulimo wakukambauka nsondo ansondo alimwi mwezi amwezi?’

Ciindi nondakakkwanya myaka iili 17, ndakali kuyanda lwaanguluko. Aboobo ndakalongela zintu zyangu, ndakazwa aŋanda akuunka ku Australia. Bazyali bangu bakausa kapati nondakazwa aŋanda. Bakalilibilikide, pele bakali kuyeeya kuti ndiyoozumanana kumubelekela Jehova.

Ku Australia, ndakaunka ansi kapati kumuuya. Ndakatalika kusotaukila kujanika kumiswaangano. Ndakatalika kuyanzana abakubusima, aabo ibakali mbuli ndime, nkokuti ibakali kujanika kumuswaangano buzuba bumwi, pele butobela baunka kuyoonywa makoko alimwi akuzyana mumabbiyaholo. Ndalanga musyule, ndilabona kuti kuulu kumwi kwakali mukasimpe mpoonya kumbi kwakali munyika, pele kunyina nkondakali kwaanguluka.

CIIYO NCONDATAKALI KULANGILA PELE CIGWASYA

Nokwakainda myaka iitandila kuli yobilo, twakaswaangana amucizyi ooyo iwatakazyi kuti wakandipa kutalika kuyeeya kujatikizya mbondakali kupona. Ndakali kukkala abacizyi bosanwe batakwetwe, mpoonya twakatamba mulangizi wabbazu abakaintu bakwe ba Tamara, kuti tukkale limwi kwansondo yomwe. Ciindi balumi babo nobakali kulanganya mikuli yambungano, ba Tamara bakali kujana ciindi cakuba andiswe akwiizya calukkomano. Eeci cakandikkomanisya kapati. Bakali kulicesya alimwi akusikilika. Cakandigambya kubona muntu uubikkila maano kapati kuzintu zyakumuuya, pele uusangalizya.

Ba Tamara bakali basungu kapati. Luyando ndobakajisi kukasimpe alimwi akumulimo wakukambauka lwakali kukulwaizya. Bakali kukkomana kubelekela Jehova kusikila mpobagolela, pele mebo tiindakakkomene akaambo kakuti ndakali kubeleka buyo cakwiinzya mulawo. Zintu mbobakali kuzilanga munzila mbotu alimwi alukkomano lwini-lwini ndobakajisi zyakandijatikizya kapati mubuumi. Cikozyanyo cabo cakandipa kuyeeya kaambo kamu Magwalo aaka kayandika kapati kakuti: Jehova uyanda kuti toonse katumubelekela “cakukondwa” alimwi ‘akoongolola cakukondwa.’—Int. 100:2.

KUBUKULUSYA LUYANDO LWANGU LWAKUKAMBAUKA

Ndakali kuyanda kuba alukkomano ndobakajisi ba Tamara, pele kutegwa eeci cikonzyeke, ndakeelede kucinca mumbazu zimwi. Cakatola ciindi, pele mukuya kwaciindi ndakatalika kucinca asyoonto-syoonto. Ndakatalika kulibambila kanditanaunka mumulimo wakukambauka alimwi ciindi aciindi ndakali kucita bupainiya bwakugwasyilizya. Eeci cakandigwasya kucesya buyoofwu alimwi akuba sicamba. Akaambo kakulibelesya kapati Bbaibbele mumulimo wakukambauka, ndakatalika kuukkomanina kapati mulimo. Tiilyakalampa, ndakali kucita bupainiya mwezi amwezi.

Ndakatalika kusala balongwe baziimo zyoonse ibakali kucita kabotu mukasimpe alimwi aabo ibakali kuukkomanina mulimo wabo kuli Jehova. Cikozyanyo cabo cibotu cakandigwasya kulanga-langa zintu ziyandika kapati mubuumi bwangu, alimwi akutalika kubala Bbaibbele buzuba abuzuba. Mpoonya ndakatalika kuukkomanina kapati mulimo wakukambuka, cakuti mukuya kwaciindi, ndakaba mupainiya waciindi coonse. Kwaciindi cakusaanguna mumyaka minji, ndakakkomana alimwi akuliiba mumbungano.

KUJANA MUPAINIYA MWEENZUMA WALYOONSE

Nokwakainda mwaka, twakazyibana aba Alex, imukwesu siluzyalo, uumuyanda Jehova alimwi amulimo wakukambauka. Wakali kubeleka kali mukutausi alimwi wakali mupainiya kwamyaka iili cisambomwe. Kunze lyaboobo, wakabeleka kwaciindi cili mbocibede kubusena kubulide ku Malawi. Okuya, wakayanzana abamisyinali ibakali zikozyanyo zibotu alimwi ibakamukulwaizya kuzumanana kubikka ziyandika zya Bwami mubusena bwakusaanguna.

Mu 2003, twakakwatana aba Alex, alimwi kuzwa ciindi eeco twazumanana mumulimo waciindi coonse. Twaiya ziiyo zibotu kapati alimwi Jehova watulongezya munzila zinji.

ZILONGEZYO ZIYUNGIZYIDWE

Mu 2009, twakatambwa kuyoobeleka katuli bamisyinali ku Timor-Leste, cisi cisyoonto icili ku Indonesia archipelago. Twakagambwa kapati, twakakkomana alimwi akuyoowa aciindi nciconya. Nokwakainda myezi yosanwe, twakasika mudolopo lipati liitwa kuti Dili.

Kulonga ooku kwakacinca zintu zinji kapati mubuumi bwesu. Twakeelede kuzizyibila zilengwa zipya, mwaambo, zyakulya alimwi abukkale. Notwakali kuunka mumulimo wakukambauka, kanji-kanji twakali kulibonena mbobakali bacete kapati bantu, mbobatakayiide alimwi ambobakali kudyaamininwa. Kuyungizya waawo, bantu banji bakalipengede kumubili alimwi amumizeezo akaambo kankondo abugwebenga.a

Mulimo wakukambauka wakali kukondelezya kapati! Mucikozyanyo, aciindi cimwi ndakajana musimbi uujisi myaka iili 13 iwakauside kapati wazina lya Maria.b Banyina bakafwa myaka misyoonto yakaindide musyule, bausyi kanji-kanji tanaakali kubabona nkaambo tiibakali kukkala limwi. Mbubwenya mbuli bana banji bamusela wakwe, Maria tanaakazyi cakucita mubuumi. Ndilayeeya aciindi cimwi wakalila naakali kupandulula mbwaakali kulimvwa. Pele tiindakamvwa ncaakali kwaamba akaambo kakuti tiindakalinauzyiba kabotu mwaambo wakwe. Ndakapaila kuli Jehova, ikumulomba kuti andigwasye kumukulwaizya, mpoonya ndakamubalila magwalo aakulwaizya. Mumyaka buyo misyoonto yakatobela, ndakabona kasimpe mbokakatalika kumucinca bube bwakwe, mbwaakali kulibonya alimwi abuumi bwakwe boonse. Wakabbapatizyigwa aboobo lino ulasololela ziiyo zyakwe zya Bbaibbele. Lino Maria ujisi mukwasyi mupati wakumuuya alimwi ulimvwa kuyandwa.

Jehova ulaulongezya mulimo mu Timor-Leste. Nokuba kuti basikumwaya banji bakabbapatizyigwa mumyaka buyo iili 10 yakaindide, banji balabeleka kabali bapainiya, bakutausi naa baalu. Ibamwi balabeleka kumaofesi aabasanduluzi alimwi akugwasyilizya mukubamba cakulya cakumuuya mumyaambo yakubusena oobu. Icakandikkomanisya kapati kubamvwa kabaimba kumiswaangano, kubabona kabamweta-mweta alimwi akubona mbobakomena kumuuya.

TANDIKONZYI KWEEZEEZYA BUUMI BUKKOMANISYA KAPATI KWIINDA BOOBU

Mulimo wesu ku Timor-Leste wakaliindene kapati abuumi bwaku Australia, pele tandikonzyi kweezeezya buumi bukkomanisya kapati kwiinda boobu. Zimwi ziindi, twakali kutanta kabbaasi kazwide bantu, nswi ziyumu alimwi amilwi yazisyumani kuzwa kumaaketi. Mazuba aamwi, twakali kusololela ziiyo zya Bbaibbele mukaanda imupya kapati alimwi mutaindi muwo, ansi kakuli dooti kapati alimwi nkuku kazili mukuyanga afwaafwi. Pele nokuba kuti kwakali buyumuyumu, kanji-kanji ndakali kulyaambauzya kuti, ‘Eelo kaka eeci cilakondelezya!’

Ndalanga musyule, ndilalumba kuti bazyali bangu bakasolekesya kundiyiisya nzila zya Jehova alimwi akundigwasya, nomuba muciindi cikatazya cabukubusi. Ncolwaamba lugwalo lwa Tusimpi 22:6 ncamasimpe kulindime. Bamaama abataata balatuyanda mebo aba Alex; balikkomene kutubona katubelesyegwa a Jehova. Kuzwa mu 2016, tubeleka mulimo wamubbazu mucilawo camutabi wa Australasia.

Cilakatazya kusyoma kuti aciindi cimwi mulimo wakukambauka ndakali kuucita buyo cakwiinzya mulawo. Lino ndilaukkomanina. Ncindaiya ncakuti, kufwumbwa cikonzya kucitika mubuumi bwesu, lukkomano lwini-lwini luzwa mukubelekela Leza camoyo woonse. Mubwini, myaka iili 18 yainda njondamubelekela Jehova antoomwe aba Alex, yali myaka iikkomanisya kapati mubuumi bwangu. Lino ndabona mbwaali aamasimpe majwi sintembauzyo Davida ngaakaamba kujatikizya Jehova aakuti: “Aabo boonse bayuba mulinduwe bayookondwa; banoosekelela lyoonse. . . . Alimwi aabo bayanda zina lyako bayookondwa mulinduwe.”—Int. 5:11.