Ino Mulawo Wabukkale Bubotu Ninzi?

Bwiinguzi bwamu Bbaibbele

Mabala aakuti “Mulawo Wabukkale Bubotu” taajaniki mu Bbaibbele. Nokuba boobo, bantu banji balaabelesya mabala aaya kwaamba mulawo wakucitilana zibotu ngwaakayiisya Jesu. Mumulumbe wakwe Waacilundu uuzyibidwe kapati, Jesu wakaamba kuti: “Zintu zyoonse nzyomuyanda kuti bantu bamucitile, anywebo nzyomweelede kubacitila.”​—Matayo 7:12; Luka 6:31.

• Ino Mulawo Wabukkale Bubotu waamba nzi?

• Nkaambo nzi Mulawo Wabukkale Bubotu ncougwasya?

• Sena Mulawo Wabukkale Bubotu ukulwaizya buyo kutambula?

• Mbuti mbomukonzya kuubelesya Mulawo Wabukkale Bubotu?

Ino Mulawo Wabukkale Bubotu waamba nzi?

Mulawo Wabukkale Bubotu utukulwaizya kucitila bamwi zintu mbubwenya mbotuyanda kuti batucitile. Mucikozyanyo, bantu banji bamvwa kabotu kuti bamwi kababatondezya bulemu, luzyalo, alimwi aluyando. Nkakaambo kaako, andiswe tweelede ‘kubacitila mbubonya.’​—Luka 6:31.

Nkaambo nzi Mulawo Wabukkale Bubotu ncougwasya?

Mulawo Wabukkale Bubotu ulakonzya kubeleka mubukkale buli boonse. Mucikozyanyo, ulakonzya . . .

• Kuyumya zikwati.​—Baefeso 5:28, 33.

• Kubagwasya bazyali kukomezya kabotu bana babo.​—Baefeso 6:4.

• Kusumpula bukkale akati kabalongwe, bantu bakkala abusena bomwe, alimwi ababeleka antoomwe.​—Tusimpi 3:27, 28; Bakolose 3:13.

Mulawo Wabukkale Bubotu ninjiisyo iijanika mucibeela cipati ca Bbaibbele cizyibidwe kuti Cizuminano Cakaindi. Mulawo wa Jesu wakucitilana zibotu “ncencico Mulawo [mabbuku aakusaanguna aali 5 aamu Bbaibbele] azyakalembwa a Basinsimi [mabbuku aamba zyabusinsimi] ncozipandulula.” (Matayo 7:12) Munzila imwi, mulawo ooyu waamba njiisyo iiyandika kapati iijanika mu Cizuminano Cakaindi: kuyanda basimukoboma.​—Baroma 13:8-10.

Sena Mulawo Wabukkale Bubotu ukulwaizya buyo kutambula?

Peepe. Mulawo ooyu ukulwaizya kapati kupa. Ciindi Jesu naakaupa, wakali kwaamba mbotweelede kweendelezya kutali buyo balongwe besu pele abasinkondoma. (Luka 6:27-31, 35) Aboobo Mulawo Wabukkale Bubotu ukulwaizya kucita zibotu kubantu boonse.

Mbuti mbomukonzya kuubelesya Mulawo Wabukkale Bubotu?

1. 1. Kamubikkila maano. Amubabikkile maano kapati aabo bamuzingulukide. Mucikozyanyo, mulakonzya kubona muntu uujisi buyumuyumu kunyamuna zintu, kumvwa kuti simukobonyoko ulicisidwe mucibbadela, naa kubona kuti mubelesinyoko kumulimo ulityompedwe. Ikuti ‘mwabikkila maano . . . kuzintu nzyobayanda bamwi,’ tacidoonekwi kuti munoojana zyoolwe zyakwaamba naa kucita cintu cimwi kubagwasya.​—Bafilipi 2:4.

2. 2. Amutondezye lweetelelo. Amusole kulibikka mubukkale bwabamwi. Ino inga mwalimvwa kuti kamuli mubukkale oobo? (Baroma 12:15) Ikuti mwasola kumvwisya mbobalimvwide bamwi, inga camukulwaizya kubagwasya.

3. 3. Amunyoneke. Mutalubi kuti tobantu tuliindene. Zintu nzyobayanda kucitilwa bamwi ambweni inga kaziteendelani azintu nzyotuyanda kucitilwa. Aboobo, akati kazintu zinji nzyotukonzya kubacitila, atusolekesye kusala eezyo nzyobakonzya kukkomanina kapati.​—1 Bakorinto 10:24.