Ino Bbaibbele Lyaamba Nzi Kujatikizya Nguzu Zyakulisalila? Sena Leza Nguweendelezya Zyintu Zicitika Mubuumi Bwanu?
Bwiinguzi bwamu Bbaibbele
Leza wakatupa nguzu zyakulisalila muciindi cakuti walo kasalila limwi zyintu zyeelede kutucitikila naa kulekela zyintu kuti kazilicitikila. Amulange-lange ncoliyiisya Bbaibbele.
Leza wakalenga bantu mucinkozya cakwe. (Matalikilo 1:26) Mukwiimpana abanyama, balo bacita zyintu kweelana aziyanza nzyobakalengwa anzizyo, swebo twakakozya Mulengi wesu mukuba abube mbuli luyando abululami. Alimwi mbubwenya mbuli Mulengi wesu, tulijisi nguzu zyakulisalila.
Kanji-kanji, tulakonzya kucita zyintu munzila iikonzya kupa kuti zikatweendele kabotu zyintu kumbele. Bbaibbele litukulwaizya ‘Kusala buumi . . . kwiinda mukuswiilila jwi lya Leza,’ nkokuti kusala kutobela milawo yakwe. (Deuteronomo 30:19, 20) Mulawo ooyu nowatali kugwasya alimwi buya nowali walunya, ikuti notwatalijisi nguzu zyakulisalila. Muciindi cakutusungilizya kucita zyintu nzyaamba, Leza ulatukombelezya caluyando kuti: “Nicakabota niwakaswiilila milazyo yangu! Lino luumuno lwako nilwakaba mbuli mulonga.”—Isaya 48:18.
Kuzwidilila kwesu naa kwaalilwa kwesu tiikwakabikkilwa limwi. Kuti katuyanda kuzwidilila mucintu cimwi, tweelede kubeleka canguzu. Bbaibbele lyaamba kuti: “Kufumbwa milimo njaajana maanza aako, kocita canguzu.” (Mukambausi 9:10) Alimwi lyaamba kuti: “Makanze aabasungu alaleta zilyo zinji.”—Tusimpi 21:5.
Nguzu zyakulisalila ncipego cilibedelede cizwa kuli Leza, akaambo kakuti citupa kumuyanda ‘amoyo wesu woonse’—nkaambo tulayanda kucita oobo.—Matayo 22:37.
Sena Leza teendelezyi zyintu zyoonse?
Bbaibbele lilayiisya kuti Leza ngu Singuzuzyoonse, alimwi kunyina uukonzya kumwiinda nguzu. (Jobu 37:23; Isaya 40:26) Nokuba boobo, tabelesyi nguzu zyakwe kweendelezya zyintu zyoonse. Mucikozyanyo, Bbaibbele lyaamba kuti Leza ‘wakalyaanga’ kujatikizya Babuloni wansiku, sinkondonyina wabantu bakwe. (Isaya 42:14) Mbubwenya buyo, calino ubalekede buyo aabo babelesya nguzu zyabo zyakulisalila kucisa bamwi. Pele Leza takabaleki buyo mane kukabe kutamani.—Intembauzyo 37:10, 11.