Ino Ncinzi Bbaibbele Ncolyaamba Kujatikizya Nakalindu Mariya?
Bwiinguzi bwamu Bbaibbele
Bbaibbele lyaamba kuti Mariya, banyina Jesu, bakajisi coolwe cilibedelede cakuzyala Jesu kabacili banakalindu. Bbaibbele lyakasinsima kujatikizya maleele aaya kubbuku lya Isaya alimwi lilaamba mbobwakazuzikizyigwa businsimi oobu mubbuku lya Makani Mabotu lya Matayo alya Luka.
Kujatikizya Mesiya mbwaakali kuyoolibonya, Isaya wakasinsima kuti: “Amubone! Mukaintu uucili mwana uyoomita akuzyala mwana musankwa.” (Isaya 7:14) Kwiinda mukusololelwa amuuya uusalala, mulembi wa Makani Mabotu Matayo wakabikkilizya abusinsimi bwa Isaya bwaamba kumitwa kwa Jesu kuli Mariya. Naakamana kwaamba kuti Mariya wamita munzila yamaleele, Matayo wakayungizya kuti: “Zyoonse eezyi zyakacitika kutegwa cizuzikizyigwe eeco ncaakaamba Jehova kwiinda mumusinsimi wakwe kuti: “Amubone! Nakalindua uyoomita akuzyala mwana musankwa, eelyo bayoomuulika zina lyakuti Imanueli,” ilyaamba kuti, ‘Leza Ulaandiswe’ lyasandululwa.”—Matayo 1:22, 23.
Mulembi wa Makani Mabotu Luka awalo wakaamba kujatikizya kumita kwa Mariya munzila yamaleele. Wakalemba kuti Leza wakatuma mungelo Gabriyeli “kuli nakalindu wakasinkilidwe kumwaalumi uutegwa Josefa wamuŋanda ya Davida, izina lyanakalindu ooyu wakali Mariya.” (Luka 1:26, 27) Mariya wakasinizya kuti wakali nakalindu. Naakamvwa kuti wakali kuyooba banyina Jesu, Mesiya, Mariya wakabuzya kuti: “Ino eeci ciyookonzyeka buti mbwaanga mebo tandinalede amusankwa?”—Luka 1:34.
Mbuti nakalindu mbwaakali kukonzya kuzyala?
Kumita kwa Mariya kwakacitika kwiinda mumuuya uusalala, nguzu nzyabelesya Leza. (Matayo 1:18) Mariya wakaambilwa kuti: “Muuya uusalala uyookusikila alimwi nguzu zya Mupatikampatila ziyooba alinduwe. Aboobo ooyo uyoozyalwa uyakwaambwa kuti uusalala, Mwana wa Leza.”b (Luka 1:35) Munzila yamaleele Leza wakalonzya buumi bwa Mwanaakwe akubutola mwida lya Mariya, kutegwa amite.
Ino kuzyalwa kuli nakalindu kwakajisi makanze nzi?
Leza wakapa kuti Jesu azyalwe kuli nakalindu kali muntu uulondokede kutegwa akafwutule bantu kucibi alufwu. (Johane 3:16; Bahebrayo 10:5) Leza wakalonzya buumi bwa Jesu akubutola mwida lya Mariya. Mpoonya, muuya uusalala wa Leza wakapa kuti Jesu atalike kukomena mwida akumukwabilila kukutalondoka kuli koonse.—Luka 1:35.
Aboobo Jesu wakazyalwa kali muntu uulondokede, mbubwenya mbwaakabede Adamu katanabisya. Kujatikizya Jesu, Bbaibbele lyaamba kuti: “Tanaakacita cibi.” (1 Petro 2:22) Kali muntu uulondokede, Jesu wakali kukonzya kubbadela cinunuzyo kwaangununa bantu kucibi alufwu.—1 Bakorinto 15:21, 22; 1 Timoteyo 2:5, 6.
Sena Mariya wakazumanana kuba nakalindu?
Bbaibbele talyaambi kuti Mariya wakazumanana kuba nakalindu mubuumi bwakwe boonse. Muciindi caboobo, litondezya kuti wakalijisi abana bambi.—Matayo 12:46; Marko 6:3; Luka 2:7; Johane 7:5.
Bbaibbele liyiisya kuti Jesu wakalijisi banabokwabo bali mbobabede
Sena njiisyo Yakutamitwa Mucibi ileendelana ancoliyiisya Bbaibbele?
Peepe. Kweelana abbuku litegwa New Catholic Encyclopedia, injiisyo yakutamitwa mucibi “isumpula muzeezo wakuti Mariya nakalindu tanaakajisi CIBI CAKUKONA kuzwa kumatalikilo aabuumi bwakwe, nkokuti naakamitwa. Bantu boonse bakakona cibi . . . Pele kwiinda MULUSE lulibedelede, Mariya wakakwabililwa kuti atakoni cibi.”c
Mukwiimpana, kunyina Bbaibbele mpolyaamba kuti Mariya tanaakakona cibi. (Intembauzyo 51:5; Baroma 5:12) Mane buya, Mariya wakatondezya kuti wakali aacibi ciindi naakapa cituuzyo cazibi kweelana a Mulawo wa Musa mbowakali kwaamba kujatikizya bamatumbu. (Levitiko 12:2-8; Luka 2:21-24) Ibbuku litegwa New Catholic Encyclopedia lyaamba kuti: “Kutamitwa Mucibi takwaambidwe cakusalazya mu Magwalo . . . Ooyu muzeezo buyo wakabikkwa acikombelo.”
Ino Mariya tweelede kumubona buti?
Mariya wakapa cikozyanyo cibotu cakuba alusyomo, kumvwida, kulicesya, alimwi akusima kumuuya. Uli akati kabantu basyomeka mbotweelede kwiiya.—Bahebrayo 6:12.
Nokuba kuti wakajisi coolwe caalubazu cakuba banyina Jesu, Bbaibbele kunyina noliyiisya kuti tweelede kumukomba naa kupaila kulinguwe. Jesu kunyina naakabapa bulemu bwaalubazu banyina, nokuba kwaambila basikumutobela kucita boobo. Mane buya, Mariya waambidwe buyo muzibalo izili mu Makani Mabotu alimwi amubbuku lya Milimo ciindi comwe, taambidwe mumabbuku aasyaala aali 22 aaitwa kuti Cizuminano Cipya.—Milimo 1:14.
Magwalo taatondezyi kuti Mariya wakali kupegwa bulemu bwaalubazu naa kukombwa a Banakristo bamumwaanda wamyaka wakusaanguna. Muciindi caboobo, Bbaibbele liyiisya Banakristo kukomba buyo Leza.—Matayo 4:10.
a Ibbala lya Chihebrayo lyaamba “mukaintu uucili mwana” mubusinsimi bwa Isaya ngu ʽal·mahʹ, lilakonzya kwaamba nakalindu naa mukaintu uutali nakalindu. Nokuba boobo, kwiinda mukusololelwa amuuya, Matayo wakabelesya bbala lya Chigiriki ligaminide lyakuti par·theʹnos, lyaamba “nakalindu.”
b Bamwi tabayandi kulibelesya bbala lyakuti “Mwana wa Leza,” nkaambo libapa kuyeeya kuti Leza wakoonana a Mariya. Nokuba boobo, muzeezo ooyu tauli wamu Magwalo. Muciindi caboobo, Bbaibbele lyaamba Jesu kuti “Mwana wa Leza” alimwi “imutaanzi kuzyalwa kuzilenge zyoonse” nkaambo kakuti ngowakasaanguna kulengwa alimwi wakalengwa cacigaminina a Leza. (Bakolose 1:13-15) Bbaibbele alimwi lyaamba muntu wakusaanguna, Adamu, kuti “mwana wa Leza.” (Luka 3:38) Cili boobo akaambo kakuti Adamu wakalengwa aa Leza.
c Second Edition, Volume 7, peeji 331.