Ndakabakwelelezya Balumi Bangu “Kakunyina Kubelesya Jwi”

Ndakazyalilwa ku Romania mu 1952. Nokuba kuti bamaama bakali Kamboni uubbapatizyidwe tiibakali basungu, aboobo tiindakali kujanika kumiswaangano ya Bunakristo. Kuyungizya waawo, bulelo ibwakali kweendelezya aciindi eeco ku Romania bwakaliikasyide milimo ya Bakamboni ba Jehova. Aboobo tiindakamuzyi Jehova naa ikuzyiba ncolyaamba Bbaibbele, kwamyaka iili 36 yabuumi bwangu. Pele mu 1988, mebo abalumi bangu ba István katukkala mudolopo lya Satu-Mare, kwakacitika cintu cimwi cakacinca buumi bwangu.

Kuzumina Kwiiya Bbaibbele

Buzuba bumwi bamaama bakandiswaya. Kumane bakati: “Nduunka kuyoobona baanti bako. Sena inga wandisindikila? Twamana tulaunka kuyakuula zintu antoomwe.” Mbwaanga ndakakkede buyo, ndakazumina kubasindikila.

Notwakaakusika kuli baanti, twakajana kuli muswaangano wa Bakamboni ba Jehova, kwalo kwakali bantu bali 9. Nkujana bamaama bakaba Kamboni musungu alimwi. Ncondakamvwa kumuswaangano ooyu cakandikkomanisya kapati.

Muswaangano nowakamana, ooyo iwakali kusololela wakaboola kutegwa tuzyibane. Wakati “Ndime János. Ndakubona kuti wali kubikkila maano kapati. Sena wazikkomanina nzyooyiya sunu?” Ndakamumvwiila kuti, tandinajanikide kumuswaangano mbuli yooyu alimwi ndakati ndiyakuboola alimwi. Kumane wakandibuzya kuti “Sena inga wayanda kwiiya Bbaibbele?” Ndakazumina. Aboobo ndakabona kuti ngu Leza iwakandikwela kubantu bakwe.

Buzuba bwakatobela, ba János bakandiletela ba Ida, balo mbotwakatalika kwiiya limwi Bbaibbele. Pele ndakaliyoowede kujatikizya ncobakali kukonzya kucita balumi bangu bazyiba kuti ndiiya Bbaibbele a Bakamboni ba Jehova. Ndakasola kubandika ambabo kujatikizya makani aaya, pele tiibakazyibikkila maano nzyondakali kwaamba. Mpoonya ndakazyiba kuti tiibakali kucikkomanina ncondakali kucita.

Nokuba boobo, ndakazumanana kwiiya Bbaibbele, kumane mu August 1989 ndakabbapatizyigwa. Nokwakainda myezi iili 4, bulelo bwakali kweendelezya ku Romania bwakamana, mpoonya muleli wakajaigwa.

Kukazyigwa Kwakaindila

Lwaanguluko lwakavwula bulelo oobu nobwakamana. Bakamboni ba Jehova bakazumizyigwa kunooswaangana akukambauka cakwaanguluka. Kulindime, lwaanguluko oolu akali matalikilo aamapenzi. Balumi bangu bakandaambila kuti, “Eezyi zimbi kujatikizya bukombi bwako ulakonzya kucita, nconditayandi buyo ncakuti kounka kukambauka kuŋanda aŋanda.”

Nokuba boobo, tiindakali kuyooleka kukambauka. (Milimo 4:20) Aboobo ndakasola kusisikizya. Pele buzuba bumwi, beenzyinyina babalumi bangu bakandibona kandikambauka kuŋanda aŋanda, kumane bakakundaamba. Nondakapiluka kuŋanda, balumi bangu bakandikalalila akundaambila kuti, “Wandisampuzya maningi!” Bakandeezyeka naifi akundikonga kuti bayoondijaya ikuti ndazumanana kukambauka.

Ndakasola kubandika abalumi bangu mpoonya akubaambila kuti ndilabayanda. Majwi aaya akabapa kubomba kwaciindi cili mbocibede. Nokuba boobo, nondakakaka kujanika kumucado wamunamukwasyi umwi walo wakali kweendelezyegwa acikombelo, bakanyema kapati alimwi. Kumane bakatalika kunditukila.

Cuusisya ncakuti, ndakazumanana kuba mubukkale oobu kwamyaka iili 13. Muciindi eeci, bakali kundikonga kuti balandileka. Zimwi ziindi, bakali kundikkiila aanze. Mpoonya mazuba aamwi bakali kundaambila kuti ndipakiŋe tuntu twangu akuzwa aŋanda.

Icakandigwasya kuliyumya mubukkale oobu, nkupaila kuli Jehova akumulomba kuti andigwasye kubatama, alimwi buya wakandilanganya. (Intembauzyo 55:22) Bakwesu abacizyi bamumbungano abalo bakandigwasya kapati. Baalu alimwi abacizyi bamwi basimide bakali kundikulwaizya kuti nditatyompwi. Bakandiyeezya ncolyaamba Bbaibbele kujatikizya bamakaintu mbobakwelelezya balumi babo “kakunyina kubelesya jwi” ikwiinda mukutazungaana akuzumanana kusyomeka kuli Jehova. (1 Petro 3:1) Mukuya kwaciindi, eeci cakacitika mbubwenya mbolyaamba Bbaibbele.

Ikucinca

Mu 2001, balumi bangu bakalebuka cakuti tiibakali kukonzya kweenda. Bakakkala mucibbadela kwamwezi omwe, kumane bakatola nsondo zili mbozibede kaboololwa. Muciindi eeci, ndime ndakali kubalwazya. Ndakali kubasanina, kubandika ambabo akubona kuti balijisi zyoonse nzyobakali kuyandika.

Bakwesu abacizyi bakali kuboola kubabona. Balumi bangu bakalubona luyando ndobakali kubatondezya bakwesu abacizyi alimwi ambobakali kubabikkila maano. Ibanji bakali kutugwasya kubeleka tulimo twaaŋanda. Abalo baalu bakali kutuumbulizya akutugwasyilizya lyoonse.

Zintu nzyobakali kucita bakwesu zyakapa kuti balumi bangu babe aansoni kujatikizya mbobakali kundeendelezya. Kumane bakabona kuti kunyina mweenzyinyina naba omwe wakaboola kubalingula. Aboobo mbobakazwida buyo mucibbadela bakaamba kuti, “ndiyanda kwiiya Bbaibbele akuba umwi wa Bakamboni ba Jehova.” Ndakakkomana kapati cakuti ndakalila!

Balumi bangu bakabbapatizyigwa mu May 2005. Mbwaanga tiibakali kukonzya kweenda, bakwesu bakabatola akacinga kabalema kumbali abusena bwakubbapatizyila, kwalo nkobakabanyamuna akubabbapatizya. Kuzwa waawo, bakaba bakambausi bamakani mabotu basungu. Ndilayeeya mazuba ngondakali kubeleka ambabo mubukambausi. Cakali kukkomanisya kaka! Amuciyeeyele buyo, imuntu wakali kundikasya kukambauka Jwi lya Leza lino nkujana tulakambauka anguwe makani mabotu katukkomene!

Balumi bangu bakatalika kumuyanda kapati Jehova alimwi ciindi cinji bakali kucibelesya kubala akuswata tupango twamu Bbaibbele. Bakali kukukkomanina kubandika tupango ootu abasimbungano. Eeci nceciindi ncobakali kubelesya kukulwaizya bakwesu alimwi abacizyi.

Balumi bangu bakali kuyaabwiindila kuciswa. Kulebuka kwakazumanana kumane bakacileka akwaambaula alimwi mukuya kwaciindi koonse kubuka cakatalika kubaalila. Sena eeci cakapa kuti baunke ansi kumuuya? Peepe! Bakazumanana kubala akucita ciiyo cabo beni kusikila mpobagolela. Ciindi nobakali kuswaigwa abakwesu, bakali kubelesya kancini kubandika ambabo alimwi akubayumyayumya kumuuya. Kumane mukwesu umwi wakati: “Cilandikkomanisya kubaswaya balumi banu, nkaambo lyoonse ndapiluka kuŋanda inga ndilakatalukwa alimwi akuyumizyigwa.”

Cuusisya ncakuti, mu December 2015, balumi bangu bakafwa. Nokuba kuti cakandicisa kapati kufwidwa balumi, pele alimwi cakandiletela luumuno lwini-lwini. Cili boobo akaambo kakuti kabatanafwa bakazyi kuba mulongwe wa Jehova, eeci ncecindikkomanisya kapati. Calino balo abamaama Jehova ulabayeeya. Ndiyookkomana kapati kuyoobabona munyika mpya akubatambula.

Lino kwainda myaka iinda ku 35 kuzwa ciindi mebo abamaama notwakaswaide baanti, alimwi kuswaya ooku tandikakulubi pe. Calino ndili amyaka iinda ku 70 alimwi ndili mupainiya waciindi coonse. Tandijisi majwi aakubelesya kulumba Jehova akaambo kazintu zyoonse eezyi nzyaandicitila. (Intembauzyo 116:12) Wakandigwasya kuzumanana kusyomeka akubatama ciindi nondakali kukazyigwa. Nokuba kuti ndakali kukazyigwa, ndakaiya kuti bukkale bulakonzya kucinca. Nokuba kuti kunyina nocakali kuyeeyelwa, ndakabakwelelezya balumi bangu kakunyina kubelesya jwi.