Mulakonzya Kupa Kuti Buumi Bwanu Bubote

BA RUSTAM, ibakkala ku Russia bapona buumi bwakupakasya. Musyule, bakajisi micito mibyaabi iinyonyoona buumi bwabo, kumane bakaliyeeya kuti bakali kulipenzya beni. Bakaleka kufweba alimwi akunywa bukoko cakuciindilizya. Nokuba boobo, kubeleka ciindi cilamfwu akkompyuta kwakali kubapa kulimvwa kukatala kapati.

Nokuba kuti bakali kutalika kubeleka kuma 8 cifwumo-fwumo, bakacili kumvwa ŋonzi kusikila kuma 10, alimwi bakali kulimvwa kuciswa lyoonse. Aboobo bakabambulula bukkale bwabo. Ncinzi cakatobela? Bakaamba kuti: “Kwamyaka iili ciloba, tandilovwi-lovwi kumulimo akaambo kakuciswa. Ndilimvwa kukatalukwa alimwi ndilikkomene kapati mubuumi.”

Ba Ram abakaintu babo alimwi abana babo bakubusi bobilo bakkala kucisi ca Nepal. Kubusena nkobakkala kunyina bulondo, akaambo kaceeco kuli mansenya manji alimwi anzinini. Ba Ram amukwasyi wabo bakali kuciswa-ciswa. Abalo bakacinca kapati mubukkale bwabo calo cakapa kuti maumi aabo abote.

Amukwabilile Buumi Bwanu

Bantu banji, kufwumbwa naa balivwubide naa pe, baalilwa kuzyiba micito yabo mboyaajatikizya maumi aabo. Balakonzya kuyeeya kuti buumi bubotu buboola-boola buyo naa kuti tabakonzyi kucita cili coonse. Kuyeeya kutali kabotu kwapa kuti bantu banji kabatabikkili maano kumaumi aabo.

Masimpe ngakuti, kufwumbwa naa mulivwubide naa pe, kuli ntaamu nzyomukonzya kubweza kutegwa mukwabilile maumi aanu alimwi amukwasyi wanu. Sena kucita oobu kulagwasya? Inzya. Mulakonzya kupona kwaciindi cilamfwu muciindi cakucita zyintu zikonzya kufwiimpya buumi bwanu.

Bazyali balakonzya kubayiisya bana babo kuba abuumi bubotu kwiinda mumajwi alimwi amumicito. Kusoleka kwabo ooku kulakonzya kugwasya kapati, nkaambo kuciswa kulaceya alimwi tabanoosowi ciindi amali kuula misamu. Kusoleka buyo kusyoonto kulakonzya kugwasya kuti muntu kataciswi kapati.

Muzibalo zitobela, tulalanga-langa nzila zyosanwe izyakabagwasya ba Rustam, aba Ram alimwi abamwi. Nzila eezyi zilakonzya kumugwasya andinywe!

[Cifwanikiso icili apeeji 3]

Ba Rustam

[Cifwanikiso icili apeeji 3]

Ba Ram amukwasyi wabo banywa maanzi mabotu