Amubweze Ntaamu Kuti Musumpule Buumi Bwanu

SENA mucibayeeyede ba Ram baambwa mucibalo cakusaanguna muzibalo eezyi zitobelana? Mbubwenya buyo mbuli bantu banji nyika yoonse mboizulwa, ba Ram tiibakazyi mbociyandika kulya kabotu alimwi amicito imwi mboibujatikizya buumi. Bakaamba kuti: “Cibalo cimwi camu Sinsimuka! ya May 8, 2002 yamu Chingisi icakajisi mutwe wakuti: ‘Nutritious Foods Within Your Reach’ cakandigwasya kubona mbociyandika kubikkila maano kuzilyo zili aabusani.”

Ba Ram bakapandulula kuti: “Mbuli mukwasyi, twakasola kutobela nzyotwakaiya mucibalo. Nokwakainda kaindi, nguzu zikwabilila mubili zyakayumizigwa. Katutanatalika kubikkila maano kuzilyo zyakajisi busani, kanji-kanji twakali kuciswa cisyini, pele mazuba aano tatuciciswi-ciswi. Alimwi cibalo camu Sinsimuka! ya September 22, 2003 yamu Chingisi icakajisi mutwe wakuti: ‘Six Ways to Safeguard Your Health,’ twakaiya kujatikizya ikutasowaila lubono alimwi anzila nguba-uba yakujanina meenda mabotu aakunywa, eelyo kaka twakalumba.”

“Acimbi cibalo camu Sinsimuka! cakandigwasya kusumpula buumi bwamukwasyi wangu. Cakajisi mutwe wakuti ’Soap—A “Do-It-Yourself Vaccine,”’ mumagazini yamu Chingisi ya November 22, 2003. Twakasola kuzibelesya nzila zyakaambwa mucibalo eeci mbotwakamanina buyo kucibala. Mazuba aano taakwe notuciswa bulwazi bwameso mbuli kaindi.”

“Kubusena nkotukkala, bantu tababikkili maano kunziniini amasenya azwide mubusena. Muvidiyo iijisi mutwe wakuti The Bible—Its Power in Your Life,a mukwasyi wesu wakaiya kuti tweelede kutantamuna tuuka tuli boobu. Luzyibo oolu lulatugwasya kuzumanana kuba abuumi buli kabotu.”

Mutaleki! Kufwumbwa naa kuli kucinca nkomuyanda kucita, mulakonzya kuzwidilila kuti mwatalika asyoonto-syoonto akutalibikkila mbaakani nzyomutakonzyi kuzuzikizya. Mucikozyanyo, amusole kucileka kulya zilyo zitayaki mubili, kutali kuzilekela limwi mpoona-mpoona. Amusole kufwaambana koona alimwi akucita zisobano zinyanyaasya mubili. Ncibotu kucita cimwi cintu kwiinda kutacita cili coonse. Pele citola ciindi—mvwiki naa myezi—kutegwa cibe cilengwa. Kwacino ciindi, kuti naa tiimwabona bubotu akaambo kakusolekesya kwanu mutatyompwi pe. Kuti mwazumanana nokuba kuti kuli zyintu zimukatazya, muyoocikonzya kusumpula buumi bwanu.

Munyika iino iitalondokede, tacikonzyeki kuba abuumi bulondokede. Mwaciswa takuli kuti tamubikkili maano kubuumi bwanu, pele tulaciswa akaambo kacibi ncotwakakona tobantu. Aboobo, mutalekeli kulibilika zyabuumi naa cintu cili coonse kumupa kutyompwa akulibilika kapati. Jesu wakabuzya kuti: “Ino nguni akati kanu ikwiinda mukulibilika uukonzya kulansya buumi bwakwe naaceya?” (Luka 12:25) Muciindi caboobo, amuzitantamuke zyintu zikonzya kufwiinsya akunyonyoona buumi bwanu. Kucita boobo kulakonzya kumugwasya kuba abuumi bubotu kusikila buzuba oobo munyika mpya ya Leza ciindi nokutakabi “naba omwe akati kabantu banyika uuamba kuti, Ndaciswa.”—Isaya 33:24.

[Bupanduluzi buyungizidwe]