SENA CAKALENGWA BUYA?
Ibbaba lya Nkonkolekwa
MABABA aankonkolekwa maubauba kapati cakuti, ikuti atikilwa meenda naa kuba akasuko kasyoonto buyo, inga taicikonzyi kuuluka. Nokuba boobo, ziindi zinji mababa aaya inga taajisi tombe alimwi taateti. Ino nkaambo nzi nkonkolekwa eeyi ncoitateti naa kukkalwa tombe?
Ibbaba lyankonkolekwa lilijisi tukwa tusyoonto-syoonto kapati tupetedwe-petedwe
Amubone kaambo aaka: Basikuvwuntauzya ibakali kwiiya nkonkolekwa iitwa kuti Giant Blue Morpho ku Ohio State University, bakajana kuti mababa aakauka aaka kwaalanga buyo ameso aboneka mbuli kuti taajisi magunyugunyu, pele alijisi tukwa tupetedwe-petedwe mbuli matailosi aakuvwumbya ŋanda. Notuba tufwolo tuniini tuli atukwa ootu tulakonzya kupa kuti kasuko naa meenda kaaselemuka kakunyina buyumuyumu. Basyaazibwene muzyakupanga-panga bayanda kwiiya mbwaapangidwe mababa aaya kutegwa abalo kabapanga zibelesyo zisumpukide kapati zyakubelesya mumafakitoli amuzibbadela zyalo zitakkalwi kasuko ameenda.
Ibbaba lyankonkolekwa ncikozyanyo acimbi basayaansi mobasola kwiiya kuzilenge. Sikuvwuntauzya Bharat Bhushan wakaamba kuti: “Muzilenge kuli zintu zinji zigambya, kutalikila kutuntu tuniini kapati kusikila kuzintu zipati zyalo kwamyaka minji izyali kukulwaizya bantu.”
Ino muyeeya buti? Sena ibbaba lyankonkolekwa lyakaba akaambo kakusanduka kwazintu naa lyakalengwa buya?