SENA CAKALENGWA BUYA?
Ibbaba Lyankonkolekwa Iliyobola Mumuni
KUTEGWA batanoosyomi buyo malaiti aapangwa kuzwa kumungwimba alimwi amalasha, basayaansi baliyandide kapati kusumpula mboibeleka mincini iipanga malaiti kuzwa kuzuba. Syaazibwene umwi wakaamba kuti: “Icikonzya kumanizya penzi eeli cili . . . buyo ambele ameso eesu.”
Tukwa tuli kubbaba lyankonkolekwa tujisi tupulo ituli mbuli cimbulwe cabuci
Amubone kaambo aaka: Kutegwa zilikasaazye ciindi camupeyo, nkonkolekwa zilayala mababa aazyo muzuba. Mababa aamusyobo umwi wankonkolekwa uutegwa swallowtail alakwaba kapati mumuni uuzwa kuzuba. Inkonkolekwa zilacikonzya kucita boobo kutali buyo akaambo kakuti mubala wazyo ulasiya-siya, pele alimwi akaambo kambotupangidwe tukwa tusyoonto kapati, tupetedwe-petedwe tuli kumababa. Tukwa ootu alimwi tulijisi milaini yatupulo mbuli totuya tujanika mucimbulwe cabuci twaandaanizyidwe atugunyugunyu twalo tupa kuti mumuni kaunjila mutupulo ootu. Tukwa ootu itupangidwe munzila yabusongo, tulakwaba mumuni uuzwa kuzuba akupa kuti mababa aankonkolekwa kaasiya kapati alimwi kaikasaalilwa.
Muteende umwi wakaamba kuti: “Mababa aankonkolekwa ali akati kazintu zipwaika buyo, pele akulwaizya basikuvwuntauzya kuyandaula nzila mpya iikonzya kuyungizya ziindi zyobilo kupanga muuya wa hydrogen kuzwa kumaanzi kuya kumumuni wazuba.” Nzila zimwi nzyobakonzya kubelesya zibikkilizya magilazi aabelesyegwa kubona zintu zimwi alimwi akupanga maseelo aajanika musola.
Ino muyeeya buti? Sena bbaba lyankonkolekwa iliyobola mumuni lyakaboola akaambo kakusanduka kwazintu naa lyakalengwa buya?