Kusisikizya—muzina lya Mwami
IBUSI bukola ibwakabbosyolwa anjanji yakunsi aanyika mu Tokyo ku Japan, mu March 1995 bwakajaya bantu bali 12, ikucisizya zyuulu zyabambi, akugwasya kuyubununa maseseke amwi. Ikakamu kamwi kabukombi kazangi ikaitwa kuti Aum Shinrikyo (Kasimpe Keni-Keni) kakali kabamba mulwi wazilwanyo zyabusi bwa sarini, ibwakubelesya mukutandila makanze amwi aamaseseke.
Kwiinde buyo mwezi omwe, kwakadubuka bbomba lyakamwaya ŋanda imwi yamfwulumende mu Dolopo pati lya Oklahoma, U.S.A., akujaya bantu bali 167. Kubaanga kuli bumboni bwakuti oolu luciso kuli mboluswaangene alumamba lwamfwulumende acikombelo cizangi ca Branch Davidian ku Waco, Texas, kwalo ikwainzya myaka yobile kuzwa lini-lini nokwakacitika. Kuciindeeco kwakafwa basicikombelo eco bali 80. Ooko kudubuka kwabbomba kwakatondezya acintu cimwi icakali camaseseke kubantu banji icakuti: Kuli mpi zyalumamba izibeleka lino mu United States, zimwi kazili ziyeeyelwa kuti mumaseseke zikanza kulwana mfwulumende.
Kumbele, ikuya kumamanino aa 1995, kwakajanika mibili iipide yabantu bali 16 mucisaka cimwi kumbalaa Grenoble mu France. Aaba bakali basi Mbunga ya Tempele lya Zuba (Order of the Solar Temple), ikakombelo kasyoonto kazangi kalo mu October 1994 ikakaluulwa muli sikapepele amumapepa ku Switzerland aku Canada iciindi basikabunga aaka bali 53 nobakalijaya nokuba kuti kulakonzya kwakali kujaigwa buya. Pesi nociba ciindi naakacitika manyongwe aaya, aaka kakombelo kazangi kakazumanana kubeleka. Ambuli sunu makanze ngokajisi acivwumbilidwe mumaseseke.
Intenda Yamaseseke Aabukombi
Mbokunga izintu zyamusyobo oyu zilacitika, sena inga cagambya ikuti bantu baleebelela kubona aimwi nkamu yabukombi nkwiigama? Imasimpe ngakuti kwiina muntu uunga wayanda kugwasilizya kabunga kamaseseke—kabukombi naa katali kabukombi—kuti kakamulida masuku amutwe akaambo kalusyomo lwakwe akumupa kubelekela makanze walo ngatazuminide. Ncinzi ncobanga bacita bantu ikutantamuka tooze twakutola lubazu mutubunga twamaseseke tulibonya kutalulama?
Aneeno kufwumbwa muntu uukanza kunjila kabunga kamusyobo oyu inga cagwasya kuti wasinizya makanze aankako eeni-eni. Kuleelede kulikasya kuyungwa aabalongwe alimwi takweelede kutobelwa buyo moyo pele kweelede kutobela lusinizyo. Kamuyeeyede kuti lwakwe muntu—kutali bambi—nguulangilwa kuyoopenga kufwumbwa ziyoomucitikila kuzwa mukusala ooko.
Ikutobela njiisyo zya Bbaibbele njenzila iini-ini yakutantamuka tubunga tubi itulaa makanze aatalondokede. (Isaya 30:21) Eeci caamba kutatola lubazu mumapolitikisi, kutondezya luyando kubantu bambi, nokuba kuli basinkondonyoko, ikutantamuka “milimo yanyama,” alimwi akwiiya micelo yamuuya wa Leza. Ibanakristo beni-beni baleelede ikapati kutaba banyika, mbubonya Jesu mbwaakabede, alimwi eeci ciimo tacisoleli limwi kuzumizya kutola lubazu mutubunga twamaseseke twanyika.—Ba-Galatiya 5:19-23; Johane 17:14, 16; 18:36; Ba-Roma 12:17-21; Jakobo 4:4.
Balo Bakamboni ba Jehova mbaasikwiiya Bbaibbele basinizizye balo ibatalusobanyi pe ilusyomo lwabo alimwi ibasoleka kulutobela mubukkale bwabo caantangalala. Inyika yoonse mbwiizulwa balizizilwe kuti nimbunga yabukombi ‘iiyandaula luumuno akulutobela.’ (1 Petro 3:11) Ibbuku lyabo litegwa Jehovah’s Witnesses—Proclaimers of God’s Kingdom lililuzi nolyaamba kuti: “Bakamboni ba Jehova takali kabunga kamaseseke pe. Iziyiisyo zyabo zyalo zizwa mu Bbaibbele zilapandululwa kabotu-kabotu mumabbuku aanga abalwa amuntu uuli woonse. Kunze lyaboobo, balasoleka kapati kutamba banamaleya kuti bajanike kumiswaangano yabo bakalibonene akulimvwida zicitika nkuko.”
Ibukombi bwini-bwini tabuli bwakusisikizya pe. Bakombi ba Leza beni-beni balailidwe kutalisisa pe naa kusisikizya makanze aabo mbobali Bakamboni ba Jehova. Basiciiya ba Jesu bakusaanguna bakazuzya Jerusalemu aziyiisyo zyabo. Ziyiisyo zyabo alimwi amilimo yabo, zyoonse zyakali antangalala. Ncimwi buyo a Bakamboni ba Jehova sunu. Kalalimvwisya kaambo kakuti iciindi mfwulumende zyalunya nozisinkilila lwaanguluko lwabukombi, Banakristo beelede kuzumanana kuucita mulimo wabo cabunkutwe abusicamba, kabamvwa “Leza kwiinda bantu,” iciimo ncobasinikizigwa buya akaambo kabumboni bwabo mbobacitila buleya cabusicamba.—Incito 5:27-29; 8:1; 12:1-14; Matayo 10:16, 26, 27.
Kuti kakuli ciindi nomwakayeeyede kuti Bakamboni ba Jehova ncikombelo cizangi naa camaseseke, mulakonzya kuti mwakayeeya boobo akaambo kakuti nywebo teemwakabazi kabotu. Eeco cileelede kuti ncicakali ciimo cabanji mwaanda wamyaka wakusaanguna.
Ibbuku lya Milimo muka Bbaibbele ka Cizuminano Cipya kucaandaano ca 28 lilatwaambila zyamuswaangano umwi ngwaakacita ku Roma Paulo alimwi “[a]basololi ba Bajuda.” Balo bakati kulinguwe: “Tulayanda kumvwa miyeeyo yako mbwiibede, nkaambo ncobeni tulizi kuti koonse-koonse bantu baamba zyakukazya nkamu yabuzangi njonjilide.” (Milimo 28:16-22, Ci) Ikubaingula Paulo “wakali kubapandulwida makani aamba zyabwami bwa Leza,” eelyo “bamwi babo bakazumina.” (Milimo 28:23,24, Ci) Mmasimpe cakali cintu cigwasya cini-cini kuti bazibe lusinizyo lwini-lwini kujatikizya Bunakristo bwini-bwini.
Mbobalyaabide boobu kukubelekela Leza caantangalala kubuleya, Bakamboni ba Jehova bayookkomana kuyubunwida muntu uuli woonse uuyanda kuziba ncobeni imasimpe aajatikizya milimo yabo alimwi aziyiisyo zyabo. Mbuti ino kuti nywebo lwenu mwalivwuntauzizya nobeni akuluziba kabotu lusyomo lwabo?
[Cifwanikiso icili apeeji 6]
Bakamboni ba Jehova balakkomana kulizyibya kuti mbaani alimwi akuti bacita nzi