Sena Bakamboni ba Jehova Nkabunga Kabukombi Kazandukide?
Peepe, Bakamboni ba Jehova tabali kabunga kabukombi kazandukide. Muciindi caboobo, tuli Banakristo ibasolekesya kutobela cikozyanyo ncaakatusiila Jesu Kristo alimwi akupona kweelana anzyaakayiisya.
Ino kabunga kabukombi kazandukide ninzi?
Mabala aakuti “kabunga kabukombi kazandukide” alakonzya kwaamba zintu ziindene-indene kubantu basiyene-siyene. Nokuba boobo, atulange-lange twaambo tobilo ntobavwula kwaamba bantu kujatikizya tubunga ootu alimwi akaambo ncotutali twamasimpe kujatikizya ndiswe.
Bamwi bayeeya kuti kabunga kabukombi kazandukide ncikombelo cipya naa cikombelo citali mbuli zikombelonyina. Bakamboni ba Jehova tiibakatalisya bukombi bupya. Mukwiimpana, tubelesya nzila yakukomba njobakali kubelesya Banakristo bamumwaanda wakusaanguna, cikozyanyo cabo anjiisyo zyabo zililembedwe mu Bbaibbele. (2 Timoteyo 3:16, 17) Tusyoma kuti Magwalo Aasalala ngaajisi nguzu zyakutwaambila makani aajatikizya bukombi.
Bamwi baamba kuti kabunga kabukombi kazandukide nkabunga kabukombi kakonzya kuleta mapenzi, alimwi ikasololelwa amuntu. Bakamboni ba Jehova tabasololelwi amuntu pe. Muciindi caboobo, tutobela ceelelo Jesu ncaakabikkila basikumutobela naakaamba kuti: “Mujisi Musololi omwe, Kilisito.”—Matayo 23:10.
Muciindi cakuba kabunga kabukombi kazandukide kakonzya kuleta mapenzi, Bakamboni ba Jehova bakomba munzila iigwasya basicikombelo cabo alimwi abanamaleya. Mucikozyanyo, mulimo wesu wakukambauka wagwasya bantu banji kulwana ziyanza zikatazya kuleka, mbuli kubelesya misamu iikola alimwi akuciindizya kunywa bukoko. Kuyungizya waawo, tulagwasya bantu banji nyika yoonse kwiiya kulemba akubala. Alimwi tulatola lubazu mukugwasyilizya ciindi nokwacitika ntenda zilicitikila. Tulabeleka canguzu kugwasya bantu mbubwenya Jesu mbwaakalailila basikumutobela kuti kabacita.—Matayo 5:13-16.