‘Ino Leza Nkaambo nzi Ncowazumizyila Cintu Cili Boobu Kucitika?’
RICARDO uciyeeyede ciindi naakakkede amukaintu wakwe Maria mukaanda mulindililwa dokotela.aKunyina naba omwe akati kabo iwakali kukonzya kuti inga walisungula kubala pepa litondezya bulwazi mbwaakajanwa abwalo Mariya aciindi eeco. Mpoonya Ricardo wakajalula mvwulupu, eelyo boonse bakafwambaanina kulanga waawo dokotela mpaakalemba. Nobakabona bbala lyakuti “kkansa,” bakatalika kulila akaambo kakuti balibuzyi bulwazi oobu mbobubede.
Ricardo ulayeeya ategwa: “Dokotela wakali siluzyalo kapati, cakutadooneka weelede kuti wakazyiba mbozyakabijide zintu akaambo kakuti wakazumanana kutwaambila kuti twakeelede buyo kusyoma muli Leza.”
Katanatalika kumusilika, dokotela wakabona kuti Mariya tanaakali kukonzya kunyanyaasya cituta cakwe cakululyo. Naakamulanga-langa kwaciindi cili mbocibede, wakajana kuti bulwazi bwakkansa bwakasakana mane kusikila akubongo. Nokwakainda buyo nsondo yomwe kasilikwa, inzila yabusilisi yakali kubelesyegwa yakalekwa. Mariya wakatalika kufwumba bulamfwu, eelyo kwiinde buyo myezi yobile wakafwa. Ricardo upandulula kuti: “Cakandikkomanisya kuti penzi ndyaakajisi lyakamana, pele ndakali kumuzimba kapati cakuti zimwi ziindi ndakali kulimvwa kuti kubota andime ndafwa buyo. Ikanjikanji ndakali kumukwiilila Leza kuti: ‘Ino nkaambo nzi ncowazumizyila cintu cili boobu kucitika?’”
Nokwacitika Ntenda, Mibuzyo Minji Ilabuzyigwa
Mbubwenya mbuli Ricardo, bantu banji munyika yoonse balapenga kapati. Ibunji bwaziindi, ibantu banyina mulandu mbabapenga. Amuyeeye buyo bantu mbobatyompedwe akaambo kankondo zitamani eezyo zyazumanana kubapenzya. Alimwi amuyeeye buyo macise ngobamvwa bamakaintu banji aabo ibajatwa, kutundululwa kwabana, kulwana muŋanda, alimwi amicito mibyaabi imwi iicitwa abantu. Ikuzwa kaindi, kulibonya kuti kutalulama alimwi aluciso bantu ndobajisi kubantunyina kwaindila. (Mukambausi 4:1-3) Kuzwawaawo kuli mapenzi ngobajisi aabo bacitikilwa ntenda ziletwaa zilengwaleza antela imalwazi amana maano. Aboobo tacigambyi pe kuti bantu balabuzya kuti, “Ino nkaambo nzi Leza ncalekelede mapenzi aali boobu?”
Nobaba baabo ibasungweede kapati kumakani aakukomba, ikupenga tacili cintu cuuba-uba pe. Anywebo mulakonzya kweezeezya kaambo kapati nkajisi Leza singuzuzyoonse ikamupa kuti kaile kulangilila bantu nkobapenga. Ikujana bwiinguzi bukkazika moyo alimwi bwakasimpe kumubuzyo ooyu uunyonganya kulayandika kapati kutegwa tube bantu baliibide mumizeezo alimwi akubaa cilongwe cibotu a Leza. Ibbaibbele lilijisi bwiinguzi kumibuzyo eeyi. Amubone ncolyaamba kweelanaa mbocitondezya cibalo citobela.
Bupanduluzi buyungizidwe
a Mazina acincwa.
[Zifwanikiso izili apeeji 3]
Dokotela wakazumanana kutwaambila kuti twakeelede kusyoma buyo muli Leza