Sena Inga Mwabusyoma Bukombi Mumakani Aajatikizya Nkondo
Ba Alberto ibakabeleka mumulimo wabusikalumamba kwamyaka iinda ku 10, bakaamba kuti: “Mupaizi wankamu yesu yabasikalumamba wakatulongezya, akwaamba kuti, ‘Leza ulaandinywe.’ Pele ndakalibuzya kuti, ‘Nduunka kuyoojaya bantu, pele Bbaibbele lyaamba kuti “utajayi.”’”
Ba Ray bakali kubeleka mulimo wabusikalumamba lya Nkondo Yanyika Yabili. Cimwi ciindi, bakabuzya mupaizi wankamu yabasikalumamba kuti: “Muboola kutupailila kuti tukazunde, sena basinkondoma abalo tabapailili kuzunda?” Mupaizi wakaingula kuti, Mwami ulabeleka munzila zigambya.
Kuti naa bwiinguzi oobo tabumusiki amoyo, tamuli nyolikke pe.
INO NCINZI BBAIBBELE NCOLIYIISYA?
Jesu wakaamba kuti mulawo umwi mupati akati kamilawo ya Leza ‘ngwakuyanda simukobonyoko mbubonya mbuli mboliyanda omwini.’ (Maako 12:31) Sena Jesu wakaamba kuti kuli mpotweelede kugolela kuyanda simukoboma akaambo kabusena nkwakkala naa kucisi nkwazwa? Peepe. Wakaambila basikwiiya bakwe kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Johane 13:34, 35) Luyando lwabo kuli umwi amweenzinyina lwakali kunoolibedelede cakuti lwakali kunooba cizyibyo. Bakali kuyakwaaba buumi bwabo akaambo kaumwi amweenzyinyina muciindi cakujaya bantunyina.
Banakristo bakusaanguna bakapona kweelana amajwi aa Jesu. Ibbuku litegwa The Encyclopedia of Religion lyaamba kuti: “Bama Fwala bacikombelo cakusaanguna, kubikkilizya a Tertullian alimwi a Origen, bakaamba cakusinizya kuti Banakristo bakali kukasyigwa kujaya muntu, yalo iili ninjiisyo yakabapa kutatola lubazu mumpi yaba Roma.”
INO BAKAMBONI BA JEHOVA BACITA BUTI MUMAKANI AAYA?
Mbwaanga Bakamboni ba Jehova mobali muzisi zinji, bamwi akati kabo balajanika muzisi zyoonse zyobilo izili mukulwana nkondo. Nokuba boobo, balasolekesya kuzumanana kuyandana, calo cili ncecizyibyo cabo.
Mucikozyanyo, ciindi nikwakali mazwanga mu 1994 akati kaba Hutu alimwi aba Tutsi ku Rwanda, Bakamboni ba Jehova tiibakatola lubazu. Bakamboni bamusyobo umwi bakasisa Bakamboni bamusyobo uumbi calo kanji-kanji icakali kubikka buumi bwabo muntenda. Ciindi nobakajatwa Bakamboni bobilo ba Hutu ibakasiside bakwesu ba Tutsi, sikalumamba mu Hutu wankamu ya Interahamwe wakaamba kuti, “Mweelede kujaigwa nkaambo mwakapa kuti ba Tutsi batije.” Cuusisya ncakuti, Bakamboni aaba bobilo ba Hutu bakajaigwa.—Johane 15:13.
Ino muyeeya buti: Sena nzyobacita Bakamboni ba Jehova zileendelana amajwi aa Jesu aajatikizya luyando lwakulyaaba?
[Nkotwakajana cifwanikiso icili apeejwi 5]
Based on U.S. Army photo
[Majwi aakwelelezya sikubala aali apeeji 5]
Sena basololi bazikombelo bayiisya luyando lwini-lwini lwa Bunakristo?