BUSONGO BWAKAINDI IBUGWASYA MAZUBA AANO
Kamulekelela Camoyo Woonse
NJIISYO YAMU BBAIBBELE: ‘Amuzumanane . . . kulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo.’—Bakolose 3:13.
Ino eeci caamba nzi? Mu Bbaibbele, cibi cikozyanisyidwe aacikwelete mpoonya kulekelela kukozyanisyidwe aakulekelela muntu cikwelete. (Luka 11:4) Ibbuku limwi lyaamba kuti mu Magwalo, ibbala lyakasandululwa kuti “kulekelela” lyaamba “kucileka buyo cikwelete, kwiinda mukutacisesa.” Aboobo, kuti twasala kulekelela muntu wakatubisizya, nkokuti tatulangili cintu cili coonse kumuntu ooyo. Kulekelela muntu tacaambi kuti tulacikkomanina cintu citali kabotu ncaakacita naa kuti tiicakatucisa kapati. Muciindi caboobo, caamba kuti twasala buyo kutabikkilila cibi eeco nokuba kuti inga ‘katujisi kaambo kakutongooka.’
Sena cilagwasya mazuba aano? Mbotuli bantu batalondokede, toonse tulabisya. (Baroma 3:23) Aboobo, ncamaano kuba acilengwa cakulekelela bamwi nkaambo andiswe kalitanalampa inga twayanda kuti bamwi batulekelele. Kuyungizya waawo, ikuti twasala kumulekelela muntu, andiswe tulagwasyigwa. Ino muunzila nzi?
Ikuti twamubikkilila naa kutamulekelela muntu, inga twaliletela mapenzi tobeni. Eeci inga catupa kubula lukkomano, kutaanguluka mubuumi, alimwi akutupa kuusa. Alimwi cilakonzya kutuletela malwazi. Lipooti iijanika mumagazini iitegwa Journal of the American College of Cardiology, iyakalembwa aba Dr. Yoichi Chida alimwi aba Andrew Steptoe, basyaabupampu mumakani aakuzyiba bantu mbobayeeya yakaamba kuti: “Buvwuntauzi bwakacitwa ino-ino butondezya kuti kunyema alusulo buliswaangene abulwazi bwamoyo bwiitwa kuti CHD [coronary heart disease].”
Kulubazu lumwi, amubone bubotu buboola akaambo kakulekelela. Ikuti twabalekelela bantu camoyo woonse, tupa kuti tuzumanane kukamantana akuba muluumuno, aboobo tulazikwabilila zilongwe zyesu. Ciinda kubota ncakuti, tutondezya kuti twiiya Leza walo uulekelela basizibi beempwa alimwi ooyo uuyanda kuti andiswe katucita oobo.—Marko 11:25; Baefeso 4:32; 5:1.