Atuzumanane Kuswaya
1 Sena mwakazumina ciindi cakusaanguna muntu naakamukambaukila makani mabotu? Ikuti naa pe, mweelede kamulumba kuti Bakamboni ba Jehova bakazumanana kumuswaya kusikila nomwakazumina ciiyo ca Bbaibbele. Ncomweelede kuyeeya eco lyoonse nomubeleka cilawo ncomupedwe.
2 Ibukkale bwabantu bulacinca ciindi aciindi. Baswaanganaa mapenzi naa zintu zimbi, bamvwa milumbe mibi mumunzi naa munyika, banjila mumapenzi aamali naa kubaa malwazi naa kufwidwa mumukwasyi. Eezi zintu inga zyabapa kuyanda kuziba kaambo ncokuli mapenzi aaya. Atuteelele zintu zibapenzya bantu mumizeezo kuzwawaawo tubaambile mulumbe uumbulizya.
3 Ooyu Mmulino Wakuvwuna: Amuyeeye basikuvwuna nokwacitika ntenda. Nokuba kuti bamwi balakonzya kabayandaula mumasena mwajanika buyo basikufwutuka basyoonto, tabatolwaali akucileka akaambo kakuti babelesinyina balimukujana basikufwutuka banji mumasena aambi. Imulimo wesu wakuvwuna taunamana pe. Mwaka amwaka, myaanda yazyuulu zyabaabo bayanda kufwutuka ‘mapenzi mapati’ balimukujanwa.—Ciy. 7:9, 14.
4 “Umwi aumwi uulilila izina lya-Mwami ulafutuka.” (Rom. 10:13-15) Aaya majwi ayelede kutusosela kuti tuzumanane kukambauka. Ikuzwa ciindi cilawo cesu notwakatalika kucibeleka, ibana bakomena ikusika aciimo cakuliyeeyela kumakani aabuumi bwabo bwakumbele. Taakwe mbotunga twaziba naa nguni uuyoomvwa. (Muk. 11:6) Ibanji ibakali kukazya bakazumina kasimpe. Mulimo wesu tauli wakubeteka bantu pe, ngwakuzumanana kubagwasya kumvwa kutegwa bakavwunwe kuzwa kunyika eyi yakaindi. Mbweena mbuli bwakacita basikwiiya ba Jesu bakusaanguna, ‘katuzumanana kuya’ kubantu tubakombelezye kumvwa makani aa Bwami.—Mt. 10:6, 7.
5 Ikujuka nkoucijukide mulyango wakuti katukambauka ncitondezyo caluse lwa Jehova. (2 Pet. 3:9) Ibantu twanoozumanana kubajulila mulyango wakumvwa mulumbe, tutondezya luyando lwa Leza, elyo tulamutembaula munzila eyi.