Sena Mulakambauka Cabusicamba?
1 Nokuba kuti bakali kwaangwa alimwi akukongwa abasikukazya, Petro alimwi a Johane bakazumanana kwaambilizya mulumbe wa Bwami cabusicamba. (Inc. 4:17, 21, 31) Ino ikukambauka cabusicamba caamba nzi kulindiswe sunu?
2 Ikupa Bumboni Cabusicamba: Ibbala likozyenye alya “busicamba” ndyakuti “kutayoowa” lyalo lyaamba “ikutayoowa cili coonse, ikutazungaana alimwi akuliyumya.” Ku Banakristo bakasimpe, ikukambauka cabusicamba caamba ikutayoowa kwaambaula kufwumbwa nokuli coolwe cakwaabila bamwi makani mabotu. (Inc. 4:20; 1 Pet. 3:15) Caamba kuti tatujisi nsoni amakani mabotu. (Int. 119:46; Rom. 1:16; 2 Tim. 1:8) Aboobo busicamba mbube buyandika kapati mukumaniizya mulimo wesu wakukambauka makani mabotu aa Bwami kuciindi ecino camamanino. Busicamba bulatukulwaizya ikwaabila bantu makani mabotu kuli koonse nkobakonzya kujanika.—Inc. 4:29; 1 Kor. 9:23.
3 Busicamba Kucikolo: Sena bukandu naa buyoofwu bulamusinkilila kukambaukila basicikolonyoko? Zimwi ziindi tacili cuuba-uba pe; inzya nciyumu kapati. Nokuba boobo, Jehova uyoomuyumya ikuti naa mwamulomba mumupailo kutegwa amugwasye kuba basicamba mukukambaukila bamwi. (Int. 138:3) Busicamba buyoomugwasya ikulizibya kuti muli umwi wa Bakamboni ba Jehova alimwi akuliyumya nomufwubaazigwa. Aboobo, ikukambauka kwenu kucikolo kulakonzya kuyoobafwutula aabo ibamuswiilila.—1 Tim. 4:16.
4 Busicamba Kumilimo: Sena kumilimo nkomubeleka balimuzi kuti muli umwi wa Bakamboni ba Jehova? Inzila ilikke beenzinyoko mbomubeleka limwi njobanga basikilwaa makani mabotu nkwiinda mukubakambaukila lwenu buya kumugama. Busicamba bwanu buyoomugwasya ikunoolomba ciindi kumilimo kutegwa kamujanika kumiswaangano ya Bunakristo yambungano alimwi amiswaangano mipati.
5 Kuba Basicamba Ciindi Nomuli Mukusunkwa: Ikuba sicamba kulayandika kapati eelyo notuli mukukazigwa. (1 Tes. 2:1, 2) Kulatugwasya kukakatila mulusyomo lwesu ciindi notuli mukukongwa, kufwubaazigwa nokuba mukupenzyegwa buya. (Flp. 1:27, 28) Kulatuyumya ikuti twiime nji eelyo notusinikizigwa kusiya kutobela zyeelelo zya Leza wesu Jehova. Kulatuyumya kuzumananaa luumuno lwesu ciindi ibamwi nobatukazya cakutunyemya.—Rom. 12:18.
6 Kufwumbwa mapenzi aatusikila, atukakatile kukambauka makani mabotu cabusicamba.—Ef. 6:18-20.