Amuzumanane Kwaamba Jwi lya Leza Cabusicamba
1 Mbotuli babelesi Banakristo, tulizyi kuti tabali boonse bayooswiilila notukambauka. (Mt. 10:14) Nokuba boobo, kunyina notulekela ikutabikkila maano nkobacita bamwi kutulesya kwaambilizya makani mabotu. (Tus. 29:25) Ncinzi citugwasya kuzumanana kwaamba ijwi lya Leza cabusicamba?
2 Mwaapostolo Paulo waacimvwisya mbociyandika ‘cintu eci ciinda loko kubota cakuziba Jesu Kristo.’ Eeci cakamukulwaizya kwaamba “cakutadonaika mumoyo.” (Flp. 3:8; 1 Bate. 1:5, Ci) Nokuba kuti ibamwi bakali kubona mulumbe ngwaakali kukambauka kuti ngwabuyo alimwi ngwabufwuba-fwuba, wakalizyi kuti wakali aa ‘nguzu zya Leza zyakufutula boonse basyoma.’ (Rom. 1:16) Aboobo, noliba leelyo naakali kukazyigwa wakazumanana ‘kukambauka ecamba mu-Mwami.’—Inc. 14:1-7; 20:18-21, 24.
3 Nkotujana Nguzu: Paulo tanaakapa bumboni cabusicamba kwiinda munguzu zyakwe mwini pe. Kalyaamba mwini alimwi a Sila, Paulo wakalemba kuti: “Nokuba kuti twakapenzegwa kale akucitilwa bubi ku-Filipi, . . . twakaba akaanzambwene muli-Leza wesu kumwaambila Makani Mabotu aa-Leza akati kankondo zinjizinji.” (1 Tes. 2:2; Inc. 16:12, 37) Kuyungizya waawo, kaangidwe ku Roma, Paulo wakalomba kuti ibamwi bamupailile kutegwa acikonzye kuzumanana kwaambilizya makani mabotu ‘cabusicamba mbuli mbwaakeelede.’ (Ef. 6:18-20) Kwiinda mukusyoma Jehova muciindi cakulisyoma mwini, Paulo wakacikonzya kuzumanana kwaamba ijwi lya Leza cabusicamba.—2 Kor. 4:7; Flp. 4:13.
4 Ncimwi buyo amazuba aano. Mukwesu umwi iwakakatazyigwa kapati kuti aambile mbaakali kubeleka limwi kuti ngumwi wa Bakamboni ba Jehova alimwi akubakambaukila mukwiizya, wakaapailila makani aaya mpoonya wakatalika kukambauka. Mwaalumi umwi ngwaakali kubeleka limwi kusaanguna wakakaka kusoleka nkwaakacita mukwesu, pele naakaamba zya bulangizi bwa bubuke, eeci cakasololela kuciiyo ca Bbaibbele. Kuzwa ciindi eeco, mukwesu ooyu wakali kubelesya kufwumbwa ciindi kupa bumboni. Naakanjila mulimo kumbi, wakagwasya bantu mbaakali kubeleka limwi ibali 34 kubbapatizyigwa mumyaka iili 14. Andiswe tulakonzya kusyoma kuti Jehova uyootuyumya-yumya kutegwa ‘tuzumanane kwaamba ijwi lyakwe cabusicamba.’—Inc. 4:29.