Cibeela 1—Izilongezyo Zijanika Akaambo Kakutondezya Kulumba Kuluyando lwa Jehova
1 Imwaapostolo Johane wakalemba kuti: “Swebo tulamuyanda nkaambo [Jehova] nguwakasaanguna kuyanda ndiswe.” (1 Joh. 4:19) Twayeeya zintu zyoonse nzyatupa Jehova, citukulwaizya kumulumba. Jesu wakasiya cikozyanyo cibotu mukucita boobu kwiinda mukukambauka cakusyomeka kujatikizya izina lya Leza alimwi a Bwami. (Joh. 14:31) Cilatugwasya kapati ikulanga-langa nzila zimwi mbotukonzya kutondezya kulumba kwesu kuluyando lwa Jehova alimwi azilongezyo ziboola akaambo kandulo.
2 Ikuunka Kuŋandaa Ŋanda: Jesu wakayiisya basikwiiya bakwe mbokubelekwa mulimo wakukambauka wa Bwami. Malailile aakwe alatondezya kabotu-kabotu kuti bakali kuunka kuŋandaa ŋanda mukumwaya makani mabotu. (Lk. 9:1-6; 10:1-7) Luyando lwesu kuli Leza alimwi abasimukoboma ndolutukulwaizya kuzumanana kuunka kuŋandaa ŋanda noliba leelyo bantu nobausulaika mulumbe wesu alimwi anotukazigwa. Kwiinda mukuzumanana kuunka kuŋandaa ŋanda, tulagwasyigwa kapati nkaambo ilusyomo lwesu lulayumizigwa alimwi tulakonzya kuzibona kabotu zintu nzyotulangila kumbele.
3 Mbotubeleka mulimo ooyu kwiinda mubusolozi bwa baangelo, twacikonzya kujana bantu banji ibalaa nzala alimwi anyota yakasimpe. (Ciy. 14:6) Ibantu banji baamba kuti bali kupailila lugwasyo ciindi nobaasikilwaa Kamboni aŋanda yabo. Bakamboni bobilo antoomwe amwana musyoonto bakali kuunka mubukambausi bwakuŋandaa ŋanda kunsumbu ya Caribbean. Ciindi bapati bobilo aaba nobakali kuyanda kukotoka akupilukila kumaandaabo, imwanaa ooyu wakazumanana alikke akuya kukonkomona amulyango wakali ambele. Mwanakazi mwana-mwana wakazwa muŋanda. Ciindi nobakabona boobo bapati, bakaunka kuyookanana amwanakazi ooyu. Wakabaitila muŋanda akubapandulwida kuti wakazwaa kupaila kuli Leza kuti amutumine Bakamboni kutegwa bazoomuyiisye Bbaibbele.
4 Ikupa Bukamboni Mumigwagwa: Mbwaanga mumbazu zimwi cilakatazya kujana bantu mumaandaabo, ibukambausi bwamumugwagwa ninzila mbotu kapati mukupa bukamboni kubantu. Alimwi ibantu banji bakkala muzilawo zicingilidwe oomo motutakonzyi kunjila akukambauka kuŋandaa ŋanda. Pele ikulumba kwesu kuluyando lwa Jehova kulatukulwaizya kubelesya kabotu kufwumbwa nzila njotunga twabelesya ikusikila bantu amulumbe wa Bwami, kubikkilizyaa bukambausi bwamumugwagwa.—Tus. 1:20, 21.
5 Nyendo Zyakupilukila: Mbwaanga tuyandaula baabo ‘ibabikkila maanu kuzintu zyobayandika munzila yakumuuya,’ tulilibambilide kucita cili coonse kubagwasya kuzuzikizya zintu zyobayandika. (Mt. 5:3) Kutegwa tucite oobo, tuyandika kupilukila kuyooida mbuto zyakasimpe eezyo nzyotwakabyala. (1 Kor. 3:6-8) Imucizi umwi kucisi ca Australia wakapa katulakiti kumwanakazi umwi walo wakali kuboneka kuti taakabikkide maanu kumubandi. Nokuba boobo, imucizi wakazumanana kuunka kuŋanda yamwanakazi oyu pele tanaakali kumujana. Ibuzuba bumwi wakamujana, aboobo wakajana kuti kuzwa leelyo naakamuswayide ciindi cakusaanguna, wakaula Ibbaibbele lidula kapati. Imucizi wakatalika kwiiya amwanakazi ooyu!
6 Ikweendelezya Ziiyo zya Bbaibbele: Eeci ncecibeela cikondelezya kapati mumulimo wesu. Ncoolwe cipati kaka ikugwasya bantu kwiiya makani aajatikizya Jehova, ikubona nkobacinca bukkale bwabo ikutegwa bamukkomanisye alimwi akubona nkobabbapatizigwa mubuna Bunakristo citondezyo cakulyaaba kwabo kuli Leza.—1 Tes. 2:20; 3 Joh. 4.
7 Mucibalo citobela, tuyoolanga-langa azimbi zibeela mbotulongezyedwe akaambo kakutondezya kulumba kuluyando lwa Jehova.