Amubabikkile Maanu Ibamwi—Kwiinda Mukubuzya Mibizyo Akuswiilila
1 Bantu banji balakkomana kwaamba mbobayeeya pele tabayandi kulaililwa naa kubuzyigwa mbuli kuti babetekwa buya. Aboobo mbotuli babelesi Banakristo, tweelede kwiiya mbotukozya kubelesya busongo mukukulwaizya bantu kwaamba mbobayeeya kwiinda mukubabuzya mibuzyo.—Tus. 20:5.
2 Mibuzyo yesu yeelede kupa muntu kuyeeya, kutali kumukonga. Mubukambausi bwakuŋanda aŋanda, mukwesu umwi ulaakubuzya kuti: “Sena mulimvwa kuti kuli nobayakulemekana bantu?” Kweelana abwiinguzi, ulayungizya kuti, “Ncinzi ncomuyeeya kuti cilayandika mukuzuzikizya ceeci?” naa “Nkaambo nzi ncomulimvwa boobo?” Ciindi napa bumboni mukwiizya alimwi amumasena aabuleya, mukwesu umwi ulaakubuzya baabo bajisi bana kuti, “Ncinzi ncomukkomanina kapati mukuba muzyali?” Mpoonya ulabuzya kuti, “Zintu nzi nzyomulibilika kapati?” Amubone kuti mibuzyo eeyi ipa bantu kwaamba mbobayeeya kakunyina kubayoosya. Mbokunga bukkale buliindene, inga twayanda kucinca kaambo alimwi ambotwiibuzya mibuzyo kutegwa ikonzye kweelela kubantu bamucilawo cesu.
3 Kukulwaizya Bantu Kwaamba Mbobayeeya: Ikuti bantu kabaangulukide kumwaambila mbobayeeya, amuswiililisye kakunyina kubanjila mukanwa. (Jak. 1:19) Calubomba, amubalumbe kutwaambo ntobamwaambila. (Kol. 4:6) Mulakonzya kwaamba buyo kuti: “Ndalumba kapati kundaambila makani aayo.” Amubalumbaizye camoyo woonse. Calubomba amubabuzye mibuzyo aimbi kutegwa muzyibe ncobayeeya alimwi ancobayeeyela boobo. Amujane kaambo nkomuzuminana. Ciindi nomuyanda kugamika mizeezo yabo kulugwalo, mulakonzya kwaamba kuti, “Sena kuli nomwakayeeyede kuti eeci inga cakonzyeka?” Mutabi basinkazi naa basikukazya.—2 Tim. 2:24, 25.
4 Ibamwi mbobayiingula mibuzyo yesu, ciya buyo mbuli mbotuswiilila. Bantu balakonzya kuzyiba ikuti naa tulaswiilila camoyo oonse. Mulangizi weendeenda umwi wakabona kuti: “Ciindi nomulisungwide kubaswiililisya bantu, cilakulwaizya alimwi ncitondezyo cibotu cakuti tulababikkila maanu kapati ibamwi.” Kubaswiilila bamwi kubapa bulemu alimwi kupa kuti baswiilile makani mabotu ngotubaambila.—Rom. 12:10.