“Ngusicoolwe oyo Muntu Uukakatila Mumasukusyo”
1 Banakristo boonse balasikilwa masukusyo. (2 Tim. 3:12) Masukusyo ngobakonzya kucitikilwa alakonzya kuba munzila yakuciswa-ciswa, penzi lyakubula mali, sunko, kupenzyegwa naa munzila zimwi buyo zinji. Masukusyo ngatuletela Saatani abambilidwe kututolwaazya, kutupa kuti tuleke kubikkila maanu kumulimo wa Bunakristo, naa ambweni kutulesya kubelekela Leza buya. (Job. 1:9-11) Ino mbuti kuliyumya mumasukusyo mbokusololela kulukkomano?—2 Pet. 2:9.
2 Amulibambile Kumasukusyo: Jehova watupa Jwi lyakwe lyakasimpe, kubikkilizya azibalo zijatikizya buumi bwa Jesu alimwi anjiisyo zyakwe. Kwiinda mukuswiilila nzyaamba Jesu alimwi akuzicita, tulibikkila ntalisyo mbotu akulibambila kumasukusyo. (Lk. 6:47-49) Alimwi tulayumizigwa kuzwa kulugwasyo lwabakwesu abacizi bali mumbungano, miswaangano yambungano, alimwi amabbuku aamba zyamu Bbaibbele aazwa kuciinga camuzike musyomesi uucenjede. Atucibelesye lyoonse cipego cizwa kuli Leza camupailo.—Mt. 6:13.
3 Kuyungizya waawo, Jehova watupa bulangizi. Ciindi notuba alusyomo luyumu muzisyomezyo zya Jehova, bulangizi bwesu bulaba mbuli “musemu wamuuya, umuyumu nta.” (Heb. 6:19) Kuciindi nolyakali kulembwa Bbaibbele, maato tanaakali kweenda kuzwa acito ikuti kabutajisi musemu nokuba kuti kunyina guwo. Ikuti cakutayeeyelwa kwaba guwo, kulosya musemu mulwizi kwakali kukonzya kukwabilila bwaato kuti butaumi kubbwe lili kukkomwe. Mbubwenya buyo, kuyumya lusyomo lwesu lino muzisyomezyo zya Leza kuyootupa kuba basicamba ciindi mapenzi aali mbuli guwo naaboola. Masukusyo alakonzya kuba cakutayeeyelwa kufwumbwa ciindi. Nokuba kuti mulimo wakukambauka wa Paulo alimwi a Barnaba bakaukkomanina bantu mu Lukaoniya, bukkale bwakacinca cakufwambaana ciindi bama Juda basikukazya nobakasika.—Inc. 14.8-9.
4 Kuliyumya Kuletela Zilongezyo: Kuzumanana kukakatila mumulimo wakukambauka nokuba kuti tulakazigwa kutupa kuliiba mumizeezo. Tulakkomana ciindi notunyansigwa akaambo kazina lya Kristo. (Inc. 5:40, 41) Kuliyumya mumasukusyo kulatugwasya kuba abube mbuli kulibombya, kumvwa, alimwi akuliyumya cakumaninina. (Dt. 8:16; Heb. 5:8; Jak. 1:2, 3) Kutuyiisya kulangila Jehova, kusyoma muzisyomezyo zyakwe, alimwi akuyubila mulinguwe.—Tus. 18:10.
5 Tulizi kuti masukusyo ngaciindi buyo cisyoonto. (2 Kor. 4:17, 18) Masukusyo atupa ciindi cakutondezya mbotumuyanda Jehova. Kwiinda mukuliyumya, tulakonzya kupa bwiinguzi kububeji bwa Saatani. Aboobo, tatulengaani pe! “Ngusicoolwe oyo muntu uukakatila mumasukusyo, nkaambo na wabonwa kuti muyumu, ulapegwa musini wabuumi.”—Jak. 1:12.