Amubikke Mbaakani Yakutalisya Ciiyo ca Bbaibbele
1 “Amuvunune meso aanu, mulange mumyuunda, yayuma kale kuti itebulwe.” (Joh. 4:35) Aaka kaambo nkakaamba Jesu Kristo kalabeleka kweelana azintu zibacitikila Banakristo mazuba aano.
2 Bantu babombe myoyo ibayanda kwiiya nzila zya Jehova bacijanika. Eeci cilalibonya notubona mweelwe waziiyo zya Bbaibbele zyakeendelezyegwa mu Zambia zisika ku 240,839 mumwaka wamulimo wamu 2007 alimwi kwakali basikwiiya bapya ibakabbapatizigwa ibasika ku 9,349. Ikuti kamujisi luyandisisyo lwakweendelezya ciiyo ca Bbaibbele, ino ncinzi ncimukonzya kucita?
3 Amulibikkile Mbaakani: Cakutaanguna, amulibikkile mbaakani yakutalisya ciiyo ca Bbaibbele akuceendelezya lyoonse. Kamukayeeya kaambo aaka lyoonse nomuli mumulimo wamumuunda. Mbwaanga mulimo ngotupedwe to Banakristo ujatikizya kuyiisya akukambauka, toonse tweelede kujana nzila mbotukozya kutola lubazu mumulimo wakuba aciiyo ca Bbaibbele.—Mt. 24:14; 28:19, 20.
4 Twaambo Tumwi Tuyandika Kubikkila Maano: Kupaila camoyo oonse kulayandika kapati kubakambausi ba Bwami. Zimwi ziindi tulajana bantu bali kupailila kuti bagwasigwe kumvwisya Bbaibbele. Cilakkomanisya kaka kubelesyegwa a Jehova kujana bantu bali boobo akubayiisya!—Hag. 2:7; Inc. 10:1, 2.
5 Imucizi umwi wakapailila kuti ajane umwi wakuyiisya Bbaibbele. Nkwabelekela wakabika katulakiti kamutwe wakuti, Sena Mulayanda Kuzyiba Zinji Kujatikizya Bbaibbele? Ciindi mukaintu umwi naakabweza katulakiti komwe, wakakabala akutalika kulemba mubusena busiidwe kulembela, mucizi ooyu wakaambaula anguwe aciiyo ca Bbaibbele cakatalisigwa.
6 Basikumwayanyoko ibatakatazigwi kutalisya ziiyo zya Bbaibbele akuzyeendelezya balakonzya kumugwasya kuzwidilila mumbaakani yenu yakweendelezya ciiyo ca Bbaibbele. Amumwaambile Leza kuti muyanda kuba amuntu wakwiiya limwi Bbaibbele alimwi amuzibelesye nzila zyoonse zikonzya kumugwasya kuzuzikizya mbaakani yanu. Ndiza ino-ino muyakuba acoolwe cakutalisya ciiyo ca Bbaibbele.