Buzuba Bwaalubazu Bwakutalisya Ziiyo zya Bbaibbele
1 Kutalikila mu January, mbungano aimwi iyoosala buzuba bomwe amwezi ibwakumamanino aansondo, ambweni nsondo yakusaanguna, kutegwa ibikkile maano kukutalisya ziiyo zya Bbaibbele. Buzuba oobu bulakonzya kuba mu Mujibelo naa mu Nsondo, kweelana abukkale bwakubusena ooko. Mubuzuba oobu ikuti bamukamwiniŋanda bakaka kuba aciiyo ca Bbaibbele, basikumwaya balakonzya kwaabila bbuku lya Bbaibbele Ncoliyiisya naa mamagazini mapya. Baalu boonse alimwi abakutausi beelede kutola lubazu kusikila mpobakonzya mumulimo ooyu akugwasya basikumwaya kutalisya ziiyo zya Bbaibbele.
2 Kkomiti Yamulimo Yambungano iyoosala nsondo eeyo iinoobelesyegwa mumulimo ooyu wakutalisya ziiyo zya Bbaibbele. Ciindi aciindi basikumwaya beelede kuyeezyegwa kutegwa kabalibambila alimwi akusoleka kutalisya ziiyo zya Bbaibbele mumulimo wakuŋanda aŋanda alimwi anobapilukila kuli baabo ibakatondezya luyandisisyo.
3 Mbokulibambilwa: Tulakonzya kujana nzila zipedwe zyakutalisya ziiyo zya Bbaibbele mupepa lyamukati lya Mulimo Wesu wa Bwami wa January 2006 alimwi amubbuku lya Kukambitsirana apeeji 13. Bamwi balakonzya kusala kubelesya katulakiti, mbuli kakuti Sena Mulayanda Kuzyiba Bwiinguzi Bwakasimpe? Alimwi, apeeji 3 mu Mulimo Wesu wa Bwami wa August 2007 kuli nzila zipedwe zyakutalisya ziiyo zya Bbaibbele ciindi notuswaya baabo ibakatambula mamagazini. Kuyoobikkwa mulongo wabaalu abakutausi ibanooyendelezya muswaangano wamulimo wamumuunda mubufwaafwi uutola maminiti aali 10 kusika ku 15, kwalo ikuyoobandikwa naa kucitwa citondezyo comwe naa zyobilo kutondezya nzila zikonzya kubelesyegwa mukutalisya ziiyo zya Bbaibbele.
4 Masimpe tabali boonse ibayoozumina kuba aciiyo ca Bbaibbele naa kuzumanana kwiiya kwaciindi cili mbocibede. Eeci taceelede kutulesya kutalisya ziiyo, nkaambo Jehova nguukwela bantu babombe myoyo kumbunga yakwe. (Joh. 6:44) Mulimo wesu tauli buyo wakusyanga mbuto zyakasimpe, pele alimwi ngwakuliminina akutilila zyeezyo zyakamena kale, calo cibikkilizya kwiiya Bbaibbele abantu babombe myoyo. Kwiinda mukucita boobo, tuba babelesinyina Leza.—1 Kor. 3:9.