Mbotukonzya Kubasika Amoyo Aabo Mbotuyiisya
1. Ino kuyiisya kwa Jesu kwakabajatikizya buti bantu ibakali kumuswiilila?
1 Jesu Kristo wakabasika amoyo bantu ibakali kumuswiilila. Aciindi cimwi, myoyo yabasikwiiya bakwe ‘yakapya’ naakamana kubapandulwida Magwalo. (Lk. 24:32) Mbwaanga kumvwida Leza kweelede kuzwa ansi aamoyo, mbuti mbotukonzya kubasika amoyo aabo mbotuyiisya kutegwa bacince?—Rom. 6:17.
2. Ino bupampu bugwasya buti kutegwa tumusike amoyo muntu?
2 Amubelesye Bupampu: Bantu banji tabakonzyi kubweza ntaamu iili yoonse kwiinda mukubaambila buyo ciluzi acitaluzi. Ikuti twatalika kukazya nzyobasyoma kwiinda mukubabalila magwalo manji, inga capa buyo kuti batantamukile limwi. Kutegwa tumukulwaizye muntu, tweelede kusaanguna kuzyiba kaambo ikamupa kusyoma nzyasyoma naa ikamupa kucita zintu munzila imwi. Kubelesya mibuzyo cabupampu, kuyoomupa kuti aambe zili mumoyo wakwe. (Tus. 20:5) Lilikke twacita boobo, ndendilyo notukonzya kusala makani mu Jwi lya Leza aakonzya kumusika amoyo. Aboobo, tweelede kubabikkila maano alimwi akubakkazikila moyo. (Tus. 25:15) Mutalubi kuti bantu baliindene mbobakomena kumuuya. Amulekele muuya uusalala wa Jehova kuti weendelezye nzyobayeeya alimwi anzyobacita.—Mk. 4:26-29.
3. Mbuti mbotukonzya kubagwasya aabo mbotuyiisya kuba abube bubotu?
3 Amubagwasye Kuba Abube Bubotu: Zibalo zyamu Bbaibbele izyaamba bubotu bwa Jehova alimwi aluyando lwakwe zilakonzya kubagwasya aabo mbotuyiisya kutegwa babe abube bubotu. Tulakonzya kubelesya magwalo mbuli Intembauzyo 139:1-4 naa Luka 12:6, 7 kubatondezya Leza mbwamubikkila maano umwi aumwi wesu. Ikuti bantu batalika kumulumba Jehova kuzwa ansi aamoyo akaambo kaluzyalo lwakwe, luyando ndobajisi alimwi akulyaaba kwabo kwakubelekela Leza kuyookomena. (Rom. 5:6-8; 1Joh. 4:19) Alimwi ciindi nobaiya kuti nzyobacita zilamujatikizya Jehova, cilakonzya kubagwasya kucita zintu munzila iiyoomukkomanisya akumulemeka.—Int. 78:40, 41; Tus. 23:15.
4. Ciindi notubakambaukila bantu mumulimo wamumuunda, ino inga twatondezya buti kuti tulalulemeka lwaanguluko lwakulisalila ndobajisi?
4 Jehova tasungilizyi muntu uuli woonse kutobela milawo yakwe. Muciindi caboobo, ulabakulwaizya bantu boonse kwiinda mukubatondezya ncocili camaano kutobela lulayo lwakwe. (Is. 48:17, 18) Tulamwiiya Jehova ciindi notuyiisya bamwi munzila iigwasya bantu kulibonena twaambo twamasimpe. Kuti bantu balibonena kaambo ncobayandika kucinca bukkale bwabo, balagwasyigwa kapati. (Rom. 12:2) Alimwi cilabagwasya kuba acilongwe ‘asikulingula myoyo,’ Jehova.—Tus. 17:3.