Mibuzyo Yabasikubala
Ino “mukaintu” waambidwe ku Isaya 60:1 nguni, alimwi mbuti ‘mbwabuka’ ‘akumwesya mumuni’?
Lugwalo lwa Isaya 60:1 lwaamba kuti: “Buka, yebo omukaintu, komwesya mumuni, nkaambo mumuni wako wasika. Bulemu bwa Jehova bwakumunika.” Makani aayengelede atondezya kuti “mukaintu” wakali Ziyoni, naa Jerusalemu, dolopo pati lya Juda aciindi eeco.a (Is. 60:14; 62:1, 2) Dolopo lyakali kwiiminina cisi coonse ca Israyeli. Tulaingula mibuzyo yobilo kujatikizya kapango aaka: Wakusaanguna, ndilili alimwi mbuti Jerusalemu ‘mbwaakabuka’ alimwi akumwesya mumuni munzila yacikozyanyo? Wabili, sena majwi aa Isaya alazumanana kuzuzikizyigwa?
Ndilili alimwi mbuti Jerusalemu ‘mbwaakabuka’ alimwi akumwesya mumuni munzila yacikozyanyo? Jerusalemu alimwi atempele lyanguwo akaba matongo ciindi ba Juda nobakali mubuzike ku Babuloni kwamyaka iili 70. Pele ciindi bana Babuloni nobakazundwa abana Medi a Persia, bana Israyeli ibakali kukkala kumasena aindene-indene aabulelo bwa Babuloni bakazumizyigwa kupiluka kumunzi ookwabo akuyoobukulusya bukombi busalala. (Ezr. 1:1-4) Kumatalikilo amwaka wa 537 B.C.E., bantu ibakasyeede basyomeka kuzwa kumisyobo yoonse iili 12 bakapiluka. (Is. 60:4) Bakatalika kupa zipaizyo kuli Jehova, kusekelela mapobwe alimwi akuyakulula tempele. (Ezr. 3:1-4, 7-11; 6:16-22) Alimwi bulemu bwa Jehova bwakatalika kumweka mu Jerusalemu, nkokuti kubantu ba Leza ibakapiluka. Bakaba mumuni wacikozyanyo kumasi aatakamuzyi Jehova.
Nokuba boobo, businsimi bwa Isaya bujatikizya kubukulusya bwakazuzikizyigwa buyo asyoonto aciindi eeco. Bana Israyeli banji tiibakazumanana kumumvwida Leza. (Neh. 13:27; Malk. 1:6-8; 2:13, 14; Mt. 15:7-9) Kumbele mane buya, bakamukaka Mesiya, Jesu Kristo. (Mt. 27:1, 2) Mu 70 C.E., Jerusalemu alimwi atempele lyanguwo zyakanyonyoonwa ciindi cabili.
Jehova wakasinsima kuti eeci cakali kuyoocitika. (Dan. 9:24-27) Masimpe kuti, tanaakali makanze aakwe kuti Jerusalemu waanyika abuzuzikizye businsimi boonse bwaambidwe ku Isaya caandaano 60.
Sena majwi aa Isaya alazumanana kuzuzikizyigwa? Inzya, pele ajatikizya mukaintu uumbi wacikozyanyo, nkokuti “Jerusalemu wakujulu.” Kujatikizya mukaintu ooyu, mwaapostolo Paulo wakalemba kuti: “Mbabamaama.” (Gal. 4:26) Jerusalemu wakujulu ncibeela cambunga ya Leza yakujulu, iipangwa azilenge zyamuuya zisyomeka. Bana bakwe ngu Jesu a Banakristo bananike ibali 144,000 balo mbubwenya mbuli Paulo, ibajisi bulangizi bwakujulu. Banakristo bananike bapanga “cisi cisalala,” nkokuti “iba Israyeli ba Leza.”—1Pet. 2:9; Gal. 6:16.
Mbuti Jerusalemu wakujulu ‘mbwabuka’ alimwi ‘akumwesya mumuni’? Ulacita oobo kwiinda mubana bakwe bananike ibali aanyika. Amubone nzyobacita mbozikozyenye acakasinsimwa ku Isaya candaano 60.
Banakristo bananike bakeelede ‘kubuka,’ nkaambo bakali mumudima wacikozyanyo ciindi basiluleyo nobakamwaika, kuzwa nobakamana kufwa baapostolo. (Mt. 13:37-43) Aciindi eeco bakatalika kweendelezyegwa a Babuloni Mupati, ibulelo bwanyika yoonse bwabukombi bwakubeja. Bananike bakazumanana kuba bazike kusikila ‘kumamanino aabweende bwazintu’ ibwakatalika mu 1914. (Mt. 13:39, 40) Mpoonya mu 1919, bakaangununwa akutalika kumwesya mumuni wacikozyanyo, kwiinda mukukambauka makani mabotu aa Bwami cabusungu.b Kwamyaka minji, bantu bazwa muzisi zyoonse bali kuboola mumumuni ooyu, kubikkilizya aba Israyeli ba Leza basyeede, nkokuti “bami” ibaambidwe ku Isaya 60:3.—Ciy. 5:9, 10.
Kumbele, Banakristo bananike bayakuumwesya kapati mumuni wa Leza. Mubuti? Ciindi nobamanizya buumi bwabo bwaanyika, baba cibeela ca “Jerusalemu mupya,” naa nabwiinga wa Kristo antoomwe abasikulelanyina alimwi bapaizi ibali 144,000. —Ciy. 14:1; 21:1, 2, 24; 22:3-5.
Jerusalemu mupya unoojisi lubazu lupati mukuzuzikizyigwa kwabusinsimi ibuli ku Isaya 60:1. (Amweezyanisye Isaya 60:1, 3, 5, 11, 19, 20 a Ciyubunuzyo 21:2, 9-11, 22-26.) Mbubwenya mbuli mfwulumende mu Israyeli yansiku mbuyakali mu Jerusalemu waanyika, Jerusalemu Mupya a Kristo mbabayoobamba mfwulumende mubweende bwazintu bupya. Mbuti Jerusalemu mupya ‘mbwaboola ansi kuzwa kujulu kuli Leza’? Kwiinda mukubikkila maano kuzintu nzyobeelede kucitilwa bantu anyika alimwi akubamunikila. Bantu bayoowa Leza mumasi oonse ‘bayakweenda mumumuni wanguwo.’ Alimwi bayakwaangununwa kucibi alufwu. (Ciy. 21:3, 4, 24) Kweelana ambwaakasinsima Isaya abasinsimi bambi, eeci ciyooba ciindi ‘cakubukulusya zintu zyoonse’ cakumaninina. (Mil. 3:21) Kubukulusya ooku kupati kwakatalika ciindi Kristo naakaba Mwami alimwi buyoomana kumamanino aa Bulelo bwa Myaka Iili 1,000.
a Ku Isaya 60:1, Bbaibbele lya Busanduluzi Bwanyika Mpya libelesya “mukaintu” muciindi ca “Ziyoni,” naa “Jerusalemu,” nkaambo kakuti mabala aa Chihebrayo aakasandululwa kuti “buka” alimwi akuti “komwesya mumuni” aamba mukaintu.
b Kubukulusyigwa kwabukombi bwakasimpe ikwakacitika mu 1919 kulaambidwe akulugwalo lwa Ezekieli 37:1-14 alimwi aku Ciyubunuzyo 11:7-12. Ezekieli wakasinsima kubukulusyigwa kwakumuuya kwa Banakristo bananike boonse nobakamana kuba mubuzike kwaciindi cilamfwu. Businsimi buli ku Ciyubunuzyo bwaamba kuzyalwa alimwi kwakumuuya kwakakamu kasyoonto kabakwesu bananike ibakali kusololela nokwakainda ciindi cisyoonto kuzwa nobakaangununwa muntolongo. Mu 1919, bakasalwa kuba “muzike uusyomeka alimwi uucenjede.”—Mt. 24:45; amubone bbuku lyakuti Bukombi Busalala—Bwabukulusyigwa!, peeji 118.