Amwiiye Kuyeeya Mbuli Mbwayeeya Jehova a Jesu

1-2. (a) Ino kuyanda Jehova cibikkilizya nzi? (b) Mbuti Jesu mbwaakatondezya kuti wakali kumuyanda Jehova amizeezo yakwe yoonse?

“WEELEDE kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.” (Mk. 12:30) Jesu wakaamba kuti ooyu ngomulawo iwakali kuyandika kapati mu Mulawo wa Musa. Amubone kuti kuyanda Jehova kubikkilizya moyo wesu, nkokuti zintu nzyotulombozya ambotulimvwa. Alimwi kulabikkilizya akulyaaba camoyo woonse anguzu zyesu zyoonse. Kunze lyaboobo, kuyanda Jehova kulabikkilizya amizeezo yesu, nkokuti mbotuyeeya kujatikizya zintu. Tweelede kusola kuyeeya mbuli mbwayeeya Jehova. Pele bwini mbwakuti, kunyina notukonzya kukumvwisya cakumaninina kuyeeya kwakwe. Nokuba boobo, tulakonzya kucita oobo kwiinda mukwiiya “kuyeeya kwa Kristo” nkaambo walo ulizyi mbobayeeya Bausyi alimwi ulabaiya cakulondoka.—1Kor. 2:16.

² Jesu wakali kumuyanda Jehova amizeezo yakwe yoonse. Wakalizyi ncaakali kuyanda kuti acite alimwi wakalilibambilide kucicita nokuba kuti wakali kuyoopenga. Mbwaanga Jesu wakabikkilide maano kukkomanisya Bausyi, kunyina naakazumizya cintu cimbi cili coonse kuba cintu ciyandika kapati mubuumi bwakwe.

3. Ncinzi Petro ncaakaiya kuli Jesu? Ncinzi ncaakakulwaizya Banakristonyina kucita? (1 Petro 4:1)

³ Petro abaapostolonyina bakalijisi coolwe cakuba a Jesu alimwi akwiiya mbwaakali kuyeeya. Ciindi Petro naakasololelwa amuuya kulemba lugwalo lwakwe lwakusaanguna, wakakulwaizya Banakristo kuliyumya amuzeezo ngoonya ooyu iwakali mbuli wa Kristo.a (Amubale 1 Petro 4:1.) Petro wakabelesya bbala libelesyegwa kujatikizya basikalumamba ciindi naakalemba kuti “Amuliyumye.” Aboobo, ikuti Banakristo baiya kuyeeya kwa Jesu naa muzeezo wakwe, nkokuti banoojisi cilikwabilizyo cibotu kapati ncobayandika ciindi nobalwana kulombozya kutali kabotu kuli koonse alimwi anyika ya Saatani.—2Kor. 10:​3-5; Ef. 6:12.

4. Ncinzi ncotutiilange-lange mucibalo eeci?

⁴ Mucibalo eeci, tulalanga-langa mbwaakali kuyeeya Jesu alimwi ambotukonzya kumwiiya. Tulaiya mbotukonzya (1) kuyeeya mbuli mbwayeeya Jehova calo cikonzya kutupa kweendelana mumizeezo abakwesu abacizyi, (2) kuba bantu balicesya, alimwi (3) kulibatamika kwiinda mukusyoma Jehova mumupailo.

AMWIIYE KUYEEYA MBULI MBWAYEEYA JEHOVA

5. Mbuti Petro aciindi cimwi mbwaakaalilwa kuyeeya mbuli mbwayeeya Jehova?

⁵ Amubone ciindi cimwi Petro naakaalilwa kuyeeya mbuli mbwayeeya Jehova. Jesu wakaambila baapostolo bakwe kuti wakeelede kuunka ku Jerusalemu, kuyakwaabwa kubasololi babukombi, kuliyumya kukupenzyegwa mpoonya akujaigwa. (Mt. 16:21) Kweelede kuti Petro cakamuyumina kusyoma kuti Jehova wakali kuyoolekela Jesu kuti ajaigwe mbwaanga mbobwakali bulangizi bwabana Israyeli alimwi ngowakali Mesiya wakasyomezyedwe. (Mt. 16:16) Aboobo wakatola Jesu ambali akumwaambila kuti: “Kolyeengelela Mwami; eeci tacikakucitikili pe.” (Mt. 16:22) Jesu a Petro tiibakeendelana mumizeezo kujatikizya makani aaya akaambo kakuti Petro tanaakali kuyeeya mbuli mbwayeeya Jehova.

6. Muunzila nzi Jesu mwaakatondezya kuti wakali kuyeeya mbuli mbwayeeya Jehova?

⁶ Jesu wakali kuyeeya mbuli mbobayeeya Bausyi bakujulu. Aboobo, wakaambila Petro kuti: “Koya kusyule lyangu, Saatani! Uli cilebyo kulindime, nkaambo ulaamizeezo yabantu ikutali ya Leza.” (Mt. 16:23) Jesu wakalizyi kuti kutegwa acite kuyanda kwa Jehova, wakeelede kupenga akufwa. Aboobo, wakakaka kutobela ncaakaamwaambila Petro nokuba kuti walo wakali kuyanda buyo kumugwasya. Petro wakaiya kuzwa kuli ceeci kuti wakeelede kuyeeya mbuli mbwayeeya Leza. Eeci nciiyo ciyandika kapati andiswe ncotukonzya kwiiya.

7. Mbuti Petro mbwaakatondezya kuti wakali kuyanda kucinca kuyeeya kwakwe kutegwa kweendelane akuyeeya kwa Jehova? (Amubone cifwanikiso aacivwumbyo.)

⁷ Mukuya kwaciindi, Petro wakatondezya kuti wakali kuyanda kuyeeya mbuli mbwayeeya Jehova. Mucikozyanyo, nocakasika ciindi cakuti Bamasi batakapalwidwe babe cibeela cabantu ba Leza, Leza wakaambila Petro kuyookambaukila Korneliyo walo iwakali wakusaanguna akati kabantu Bamasi kuba Munakristo. Kanji-kanji ba Juda tiibakali kubayanda Bamasi, aboobo Petro wakeelede kucinca mbwaakali kuyeeya kujatikizya mbabo kutegwa acikonzye kubakambaukila. Ciindi naakazyiba mbwaakali kuyeeya Leza kujatikizya Bamasi, wakacinca mbwaakali kuzibona zintu. Akaambo kaceeci, ciindi Korneliyo naakamwiita, ‘wakaunka kakunyina kukaka.’ (Mil. 10:​28, 29) Wakamukambaukila abamuŋanda yakwe, kumane bakabbapatizyigwa.—Mil. 10:​21-23, 34, 35, 44-48.

8. Mbuti mbotukonzya kutondezya kuti kuyeeya kwesu kuleendelana akuyeeya kwa Jehova? (1 Petro 3:8)

⁸ Nokwakainda myaka iili mbwiibede, Petro wakakulwaizya Banakristonyina kuba “amuzeezo omwe.” (Amubale 1 Petro 3:8.) Mbotuli bantu ba Jehova, tulakonzya kuba amuzeezo omwe kwiinda mukuyeeya mbuli mbwayeeya Jehova kweelana ambokulembedwe mu Jwi lyakwe. Mucikozyanyo, Jesu wakakulwaizya basikumutobela kubikka Bwami mubusena bwakusaanguna mubuumi bwabo. (Mt. 6:33) Aboobo, sikumwaya umwi mumbungano yanu ulakonzya kusala kutalika mulimo waciindi coonse. Pele tweelede kucenjela kutegwa mizeezo njotupa itamutyompyi kuzuzikizya mbaakani yakwe. Tweelede kwaamba zintu zibotu kujatikizya kusala kwakwe akulyaaba kumugwasya.

AMUBE BANTU BALICESYA

9-10. Mbuti Jesu mbwaakatondezya kuti wakali kulicesya kapati?

⁹ Busiku katanajaigwa, Jesu wakayiisya Petro abaapostolo bambi kujatikizya mbociyandika kapati kulicesya. Kumatalikilo, Jesu wakatuma Petro a Johane kuti bakabambe zintu ooko nkobakali kuyoolida cakulya camamanino katanafwa. Kweelede kuti cintu cimwi ncobakacita, nkuba masimpe kuti mutiba wakusambila acakulipukutizya zyakaliko kutegwa beenzu bakonzye kusanzyigwa kumaulu kabatanatalika kulya. Pele ino nguni wakali kukonzya kucita mulimo ooyu waansi kapati wakusanzya maulu aabamwi?

¹⁰ Jesu kunyina naakawayawaya kucita mulimo ooyu. Aboobo, wakatondezya kuti wakali kulicesya kapati. Kweelede kuti baapostolo bakwe bakagambwa kapati kubona Jesu kacita mulimo iwakali kucitwa ababelesi. Wakasamununa zisani zyakwe zyaatala, wakalyaanga cakulipukutizya mucibuno, wakabikka meenda mumutiba akutalika kusanzya maulu aabo. (Joh. 13:​4, 5) Kweelede kuti cakatola ciindi kusanzya maulu aabaapostolo boonse bali 12, kubikkilizya a Judasi iwakali kuyoomwaaba. Pele cakulicesya, Jesu wakaucita mulimo ooyu. Kumane cakukkazika moyo wakaamba kuti: “Sena mwacizyiba ncondamucitila? Mundiita kuti ‘Mwiiyi’ akuti ‘Mwami,’ alimwi muliluzi nkaambo mbondibede oobo. Aboobo, ikuti mebo nde Mwami alimwi nde Mwiiyi ndasanzya maulu aanu, nkokuti anywebo mweelede kusanzyanya kumaulu.”—Joh. 13:​12-14.

11. Ino Petro wakatondezya buti kuti wakaiya kulicesya? (1 Petro 5:5) (Amubone acifwanikiso.)

¹¹ Petro wakaiya kukulicesya kwa Jesu. Mucikozyanyo, Jesu naakajokela kujulu, Petro wakacita maleele aakuponya mwaalumi iwakali mulema kuzwa naakazyalwa. (Mil. 1:​8, 9; 3:​2, 6-8) Nkamu yabantu yakaabona maleele aaya aakacitika, aboobo yakaboola kuli Petro. (Mil. 3:11) Pele Petro tanaakali kuyanda kuti bantu batalike kubikkila nguwe maano nokuba kuti wakakomenena mucilawo bantu mobakali kuyandisya kuba ampuwo. Muciindi caboobo, cakulicesya wakaambila bantu kuti batembaule Jehova a Jesu kwiinda mukwaamba kuti: ‘Kwiinda muzina lya Jesu, alimwi akwiinda mulusyomo ndotujisi muzina lyakwe, imuntu ooyu ngomubona alimwi ngomuzyi wayumizyigwa.’ (Mil. 3:​12-16) Kumbele, Petro wakalembela Banakristo kaambo ncociyandika kulicesya. Mumwaambo wakusaanguna, wakabelesya bbala lipa muzeezo wakusama kulicesya mbuli kuti ncisani. Eeci cituyeezya ncaakacita Jesu naakalyaanga cisani cakulipukutizya mucibuno akusanzya maulu aabaapostolo bakwe.—Amubale 1 Petro 5:5.

12. Mbuti mbotukonzya kuzumanana kulicesya mbuli Petro?

¹² Tulakonzya kwiiya cikozyanyo ca Petro cakuba bantu balicesya. Kamuyeeya kuti kulicesya kwini-kwini kubikkilizya zinji kunze buyo lyakwaamba majwi aali kabotu. Ibbala ndyaakabelesya Petro ilyakasandululwa kuti “kulicesya,” litondezya kuti kulicesya kubikkilizya mbotulibona ambotubabona bamwi. Tulabacitila zintu zibotu bamwi akaambo kakuti tulamuyanda Jehova abantu ikutali akaambo kakuyanda kulumbaizyigwa. Aboobo tulatondezya kuti tulalicesya ncobeni, ikuti katumubelekela calukkomano Jehova abakwesu nokuba kuti bamwi tababoni nzyotucita.—Mt. 6:​1-4.

AMUBE BANTU ‘BALIBATAMIKA’

13. Ino ‘kulibatamika’ kubikkilizya nzi?

¹³ Ino ‘kulibatamika’ kubikkilizya nzi? (1Pet. 4:7) Munakristo uulibatamika ulasolekesya kupanga zyakusala zyeendelana akuyanda kwa Jehova. Munakristo uuli boobo ulizyi kuti kunyina cintu ciyandika kapati kwiinda cilongwe cakwe a Jehova. Ulalibona munzila yeelede alimwi ulizyi kuti tazyili zintu zyoonse nzyazyi. Kuyungizya waawo, ulatondezya kuti ulamusyoma Leza kwiinda mukupaila kulinguwe lyoonse.b

14. Mbuti Petro aciindi cimwi mbwaakaalilwa kusyoma Jehova?

¹⁴ Busiku bwamamanino katanafwa, Jesu wakacenjezya basikwiiya bakwe kuti: “Nywebo nyoonse mulalebwa masiku aano akaambo kandime.” Pele Petro cakusinizya wakaingula kuti: “Nokuba kuti boonse aaba balebwa akaambo kanduwe, mebo tandikoolebwa pe!” Busiku oobo Jesu wakaambila basikwiiya bakwe kuti: “Amulinde akuzumanana kupaila.” (Mt. 26:​31, 33, 41) Ikuti Petro naakaatobela malailile aaya, ambweni naatakayoowa kuzumina kuti wakali sikwiiya wa Jesu. Pele wakamukaka Jesu calo cakamupa kulimvwa bubi kapati.—Mt. 26:​69-75.

15. Ncinzi cakagwasya Jesu kuzumanana kulibatamika mubusiku bwakwe bwamamanino?

¹⁵ Jesu wakasyoma Jehova cakumaninina. Nokuba kuti wakalilondokede, wakapaila cakwiinduluka-induluka. Eeci cakamugwasya kuba sicamba kutegwa akonzye kucita ceeco Jehova ncaakali kuyanda kuti acite. (Mt. 26:​39, 42, 44; Joh. 18:​4, 5) Tacidoonekwi buya kuti mubuumi bwakwe boonse, Petro wakali kuyeeya Jesu mbwaakali kuubikkila kapati maano mupailo.

16. Mbuti Petro mbwaakatondezya kuti wakaiya kuba muntu uulibatamika? (1 Petro 4:7)

¹⁶ Mukuya kwaciindi, Petro wakaiya kusyoma Jehova kwiinda mukupaila. Jesu iwakabusyigwa wakasyomezya Petro abaapostolo bambi kuti bakali kuyootambula muuya uusalala kutegwa bakonzye kuzuzikizya mulimo wakukambauka. Nokuba boobo, Jesu wakabaambila kuti bakalindile mu Jerusalemu kusikila eeci cikacitike. (Lk. 24:49; Mil. 1:​4, 5) Ncinzi ncaakali kucita Petro ciindi naakali kulindila? Walo a Banakristonyina “bakazumanana kupaila.” (Mil. 1:​13, 14) Kumbele, mulugwalo lwakwe lwakusaanguna, Petro wakakulwaizya Banakristonyina kulibatamika akusyoma Jehova kwiinda mukupaila. (Amubale 1 Petro 4:7.) Masimpe Petro wakaiya kusyoma Jehova alimwi wakaba musemu mumbungano.—Gal. 2:9.

17. Tacikwe makani abusongo bwakuzyalwa ambubo mbotujisi, ncinzi ncotweelede kuzumanana kucita? (Amubone acifwanikiso.)

¹⁷ Kutegwa tube bantu balibatamika, tweelede kupaila kuli Jehova abuzuba. Tweelede kuzumanana kucita oobo tacikwe makani abusongo bwakuzyalwa ambubo mbotujisi. Aboobo, ciindi notuyanda kupanga zyakusala ziyandika kapati, tweelede kupaila kuli Jehova kulomba busolozi katusyomede kuti ulizyi cikonzya kutugwasya.

18. Makanze nzi ngomweelede kuba angayo?

¹⁸ Eelo kaka tulalumba kuti Jehova wakatulenga munzila yakuti katucikonzya kutondezya bube bwakwe! (Matl. 1:26) Masimpe kuti, tatukonzyi kumwiiya Jehova cakulondoka. (Is. 55:9) Nokuba boobo, mbubwenya mbuli Petro, tulakonzya kwiiya kuyeeya mbuli mbwayeeya Jehova. Aboobo, aabe makanze eesu aakuzumanana kuyeeya mbuli mbwayeeya Leza, kuba bantu balicesya alimwi balibatamika.