Ncibotu Kapati Kumvwana Abakwesu Abacizyi!

1-2. Makani nzi aayandika kapati kuli Jehova? Ino uyanda kuti tucite nzi?

MBOTUBEENDELEZYA bamwi makani aayandika kapati kuli Jehova. Jesu wakayiisya kuti tweelede kuyanda basimukoboma mbubonya mbotuliyanda tobeni. (Mt. 22:​37-39) Eeci cilabikkilizya akutondezya luzyalo kuli baabo batasyomi nzyotusyoma. Ikuti twacita oobo, tutondezya kuti twiiya Jehova Leza walo ‘uupasuzya zuba kubantu babi ababotu alimwi uupa mvwula kubantu baluleme abataluleme.’—Mt. 5:45.

² Nokuba kuti Jehova ulabayanda bantu boonse, pele uyandisya kapati aabo bamumvwida. (Joh. 14:21) Alimwi uyanda kuti tumwiiye. Aboobo, utukulwaizya kuti ‘katubayanda kapati’ bakwesu abacizyi. (1Pet. 4:8; Rom. 12:10) Luyando oolu lulikozyenye aluyando ndotutondezya kuli wacibbululu naa kumulongwe ngotumvwana kapati.

3. Ncinzi ncotweelede kuzyiba kujatikizya luyando?

³ Luyando luli mbuli cisyango ceelede kulanganizyigwa kabotu kutegwa cizumanane kukomena. Mwaapostolo Paulo wakakulwaizya Banakristo kuti: “Luyando lwanu lwabunyina aluzumanane.” (Heb. 13:1) Jehova uyanda kuti tuzumanane kubayanda bamwi. Mucibalo eeci, tulabandika kaambo ncotweelede kumvwana abakwesu abacizyi alimwi ambotukonzya kuzumanana kucita boobo.

IKAAMBO NCOTWEELEDE KUMVWANA ABAKWESU ABACIZYI

4. Mbuti mbotukonzya kuzumanana kutondezya kulumba akaambo kalukamantano lwabunyina ndotujisi, ilwaambidwe kulugwalo lwa Intembauzyo 133:1? (Amubone azifwanikiso.)

⁴ Amubale Intembauzyo 133:1. Tulazuminana ancaakaamba sintembauzyo kuti kuba acilongwe abaabo bamuyanda Jehova “ncibotu” alimwi “cilakondelezya.” Pele mbubwenya muntu mbwakonzya kuleka kubikkila maano kucisamu cigambya kapati ncabona abuzuba, andiswe tulakonzya kuleka kubikkila maano kububotu bwalukamantano ndotujisi abakwesu abacizyi. Cilakonzya kuba boobo akaambo kakuti tulabonana abakwesu abacizyi ziindi zili mbozibede nsondo ansondo. Aboobo, mbuti mbotukonzya kuzumanana kutondezya kuti balayandika kapati? Luyando ndotujisi kubakwesu abacizyi luyookomena kuti katujana ciindi cakuzinzibala kuyeeya mbobayandika kapati mumbungano alimwi akulindiswe.

5. Ino luyando ndotujisi kubakwesu abacizyi inga lwabajatikizya buti bamwi?

⁵ Bamwi ibajanika kumuswaangano ciindi cakusaanguna balakulwaizyigwa kapati akaambo kaluyando ndotujisi akati kesu. Akaambo kaceeci, balakonzya kusinizya kuti bakajana kasimpe. Jesu wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:35) Amubone cakuluula camukubusi wazina lya Chaithra walo iwakali kwiiya a Bakamboni ba Jehova. Naakatambwa kuyoojanika kumuswaangano wacooko, wakazumina. Naakajanika buzuba bwakusaanguna, wakaambila bakali kumuyiisya Bbaibbele kuti: “Bazyali bangu tabanabuzuba bandikumbata. Pele kumuswaangano wanu, ndakakumbatwa ziindi zili 52 mubuzuba bomwe buyo. Ndakabona mbwandiyanda Jehova kwiinda mukubelesya mukwasyi ooyu wakumuuya. Ndiyanda kuba cibeela camukwasyi ooyu.” Mukubusi ooyu wakazumanana kuyaambele mpoonya wakabbapatizyigwa mu 2024. Masimpe, ciindi bapya nobabona milimo yesu mibotu alimwi aluyando luli akati kesu, kanji-kanji balakulwaizyigwa kutalika kubelekela Jehova.—Mt. 5:16.

6. Mbuti kumvwana abakwesu abacizyi mbokutukwabilila?

⁶ Kumvwana abakwesu abacizyi kulakonzya kutukwabilila. Paulo wakaambila Banakristonyina kuti: “Amuzumanane kukulwaizyanya abuzuba . . . kutegwa kutabi muntu naba omwe akati kanu uuyuma moyo akaambo kakweenwa anguzu zyacibi.” (Heb. 3:13) Ikuti twatyompwa kapati cakuti catalika kutuyumina kucita ciluzi, Jehova ulakonzya kukulwaizya musyomima umwi uubuzyi bukkale bwesu kuti atugwasye. (Int. 73:​2, 17, 23) Masimpe, kugwasyigwa abasyomima kulakonzya kutugwasya kweeleba kucita zintu zitaluzi.

7. Ino luyando alukamantano ziswaangene buti? (Bakolose 3:​13, 14)

⁷ Tuzulilwa kunkamu yabantu ibabeleka canguzu kutondezyanya luyando, aboobo eeci cipa kuti tulongezyegwe kapati. (1Joh. 4:11) Mucikozyanyo, luyando lupa kuti “tuzumanane kweengelelana” calo cipa kuti tuzumanane kukamantana. (Amubale Bakolose 3:​13, 14; Ef. 4:​2-6) Aboobo, kumiswaangano yesu mbusena bubotu kapati bwalo butakonzyi kweezyanisyigwa ankamu iili yoonse anyika.

AMULEMEKANE

8. Ino Jehova utugwasya buti kutegwa katukamantene abakwesu abacizyi?

⁸ Lukamantano ndotujisi abakwesu abacizyi nyika yoonse lulakonzyeka akaambo ka Jehova. Nguupa kuti eeci cikonzyeke nokuba kuti tatulondokede. (1Kor. 12:​24, 25) Bbaibbele lyaamba kuti “tuyiisyigwa a Leza kuti katuyandana.” (1Tes. 4:9) Eeci caamba kuti Jehova ubelesya Bbaibbele kutwaambila ncotweelede kucita kutegwa katumvwana abakwesu abacizyi. Tulakonzya “kuyiisyigwa a Leza” kwiinda mukwiiya njiisyo zyakwe cakulomya akuzitobela. (Heb. 4:12; Jak. 1:25) Aboobo, eeci ncobasolekesya kucita Bakamboni ba Jehova.

9. Ncinzi ncotwiiya kulugwalo lwa Baroma 12:​9-13 kujatikizya kulemekana?

⁹ Ncinzi Jwi lya Leza ncolituyiisya kujatikizya mbotukonzya kumvwana abakwesu abacizyi? Amubone Paulo ncaakaamba kujatikizya makani aaya kweelana ambokutondezyedwe kulugwalo lwa Baroma 12:​9-13. (Amubale.) Amubone kuti wakaamba kuti “mumakani aakulemekana, amube ndinywe nomuli kumbele kulemeka bamwi.” Ino eeci caamba nzi? Caamba kuti tweelede kutondezya kuti ‘tulabayanda kapati’ bamwi kwiinda mukubalekelela, kubasamausya alimwi akuba baabi. (Ef. 4:32) Tamweelede kulindila mucizyi naa mukwesu kuti atalike nguwe kucita zintu eezyi. Mulakonzya kuba ndinywe ‘nomuli kumbele kucita boobo.’ Kuti mwacita oobo, muyoolibonena mbwaali aamasimpe majwi aa Jesu aakuti: “Kupa kulakkomanisya kapati kwiinda kupegwa.”—Mil. 20:35.

10. Mbuti mbotukonzya kuba bankutwe caboola kukugwasya bamwi? (Amubone acifwanikiso.)

¹⁰ Cikkomanisya ncakuti, mbwaakamanina buyo kwaamba kuti tweelede kuba kumbele mumakani aakulemekana, Paulo wakatukulwaizya “kuba bankutwe, ikutali batolo pe.” Muntu munkutwe musungu alimwi ulabeleka canguzu. Ikuti wapegwa cakucita, ulacicita cabusungu. Lugwalo lwa Tusimpi 3:​27, 28 lutukulwaizya kuti: “Utawayiwayi kubacitila zibotu aabo mboyelede kucitila boobo ikuti naa kocikonzya kubagwasya.” Aboobo, ikuti twabona kuti umwi uyandika lugwasyo, tweelede kucita kufwumbwa ncotukonzya kutegwa tumugwasye. Tatweelede kuwayawaya naa kuyeeya kuti muntu umwi ulamugwasya.—1Joh. 3:​17, 18.

11. Ncinzi cikonzya kutugwasya kumvwana abakwesu abacizyi?

¹¹ Nzila imwi mbotukonzya kutondezya kuti tulabalemeka bakwesu abacizyi, nkwiinda mukufwambaana kubalekelela ciindi nobatulubizyila. Lugwalo lwa Baefeso 4:26 lwaamba kuti: “Mutabbizyi zuba kamunyemede.” Nkaambo nzi? Nkaambo kapango 27 kaamba kuti kucita boobo kulakonzya “kumupa coolwe Diabolosi.” Mu Jwi lyakwe, cakwiinduluka-induluka, Jehova utwaambila kuti tweelede kulekelelana. Lugwalo lwa Bakolose 3:13 lutukulwaizya kuti ‘tweelede kuzumanana kulekelelana camoyo woonse.’ Kulekelela bakwesu abacizyi ninzila mbotu iikonzya kutugwasya kumvwana ambabo. Ikuti katubalekelela bamwi, ciyoopa kuti ‘tuzumanane alukamantano lwamuuya mucaanzyo caluumuno.’ (Ef. 4:3) Aboobo, ikulekelela bakwesu abacizyi kupa kuti tuzumanane kuba alukamantano alimwi aluumuno.

12. Mbuti Jehova mbwatugwasya kuba bantu balekelela?

¹² Masimpe kuti cilakatazya kulekelela baabo bakatulubizyila. Pele inga twacikonzya kwiinda mukugwasyigwa amuuya wa Leza. Kunze aakutwaambila kuti ‘tuyandane kapati’ alimwi akuti tube “bankutwe,” Bbaibbele litwaambila kuti: “Amupye moyo akaambo kamuuya.” Muntu ‘uupya moyo,’ inga musungu kapati akaambo kamuuya uusalala. (Rom. 12:11) Aboobo, muuya wa Leza ulakonzya kutugwasya kuyandana akulekelelana camoyo woonse. Nkakaambo kaako, tweelede kumulomba Jehova kuti atugwasye.—Lk. 11:13.

“TAKWEELEDE KUBA LWAANDAANO AKATI KANU”

13. Ncinzi cikonzya kupa kuti kube lwaandaano akati kesu?

¹³ Mbungano ipangwa “abantu boonse” ibazwa mubukkale bwiindene-indene. (1Tim. 2:​3, 4) Akaambo kaceeci, umwi aumwi wesu ulakonzya kupanga zyakusala ziindene mumakani aajatikizya kusama akulibamba, busilisi naa zyakulikondelezya. Aboobo, ikuti tiitwacenjela kwiindana ooku kulakonzya kutwaandaanya. (Rom. 14:4; 1Kor. 1:10) Pele mbwaanga Leza watuyiisya kuti katuyandana, tuyandika kucenjela kutegwa katutayuminini kuti zyakusala zyesu zili kabotu kwiinda zyabamwi.—Flp. 2:3.

14. Ino tweelede kusolekesya kuba bantu bali buti? Nkaambo nzi?

¹⁴ Tulakonzya kupa kuti kutabi lwaandaano mumbungano kwiinda mukusolekesya kuba bantu bakatalusya alimwi bakulwaizya bamwi ciindi coonse. (1Tes. 5:11) Caino-ino, bantu banji ibatakacisungweede naa bakagusyidwe mumbungano bapiluka kuli Jehova. Tulabatambula camaanza obilo! (2Kor. 2:8) Amumvwe ncaakaamba mucizyi umwi iwatakacisungweede kwamyaka iili 10 ciindi naakatalika alimwi kuunka ku Ŋanda ya Bwami. Wakaamba kuti: “Boonse bakanditambula kabamweta-mweta akundaanzya mumaanza.” (Mil. 3:19) Ino eeci cakamujatikizya buti? Wakaamba kuti: “Cakandipa kulimvwa kuti Jehova wakali kundigwasya kuti ndikkomane alimwi.” Ikuti twasolekesya kuba bantu bakulwaizya, Kristo ulakonzya kutubelesya kukatalusya baabo ‘ibakatede akulemenwa.’—Mt. 11:​28, 29.

15. Ninzila nzi aimbi mbotukonzya kukulwaizya lukamantano? (Amubone acifwanikiso.)

¹⁵ Nzila aimbi mbotukonzya kukulwaizya lukamantano nkwiinda muŋambawido yesu. Lugwalo lwa Jobu 12:11 lwaamba kuti: “Sena kutwi takusoli majwi mbubonya mulaka mboulabila cakulya?” Mbubwenya sikujika mbwalabila cakulya kutegwa amvwe naa cilanona katanacaabila bambi, andiswe tweelede kusaanguna kuyeeya zintu nzyotuyanda kwaamba katutanazyaamba. (Int. 141:3) Tweelede kuba masimpe kuti nzyotuyanda kwaamba zilayaka, kukatalusya alimwi ‘akugwasya baswiilizi.’—Ef. 4:29.

16. Ino mbaani kwaambisya ibeelede kwaamba zintu zikulwaizya?

¹⁶ Balumi abazyali beelede kubikkila maano kuti zintu nzyobaamba zilakulwaizya. (Kol. 3:​19, 21; Tit. 2:4) Mbubwenya buyo, baalu beelede kukatalusya akuumbulizya butanga bwa Jehova. (Is. 32:​1, 2; Gal. 6:1) Kasimpi kamwi kamu Bbaibbele katuyeezya kuti: “Ijwi lyaambwa aciindi ceelede, eelo kaka ndibotu kapati!”—Tus. 15:23.

LUYANDO “ALUBE LWAMUMILIMO AMUKASIMPE”

17. Mbuti mbotukonzya kuba masimpe kuti luyando ndotujisi kubakwesu abacizyi ndwancobeni?

¹⁷ Mwaapostolo Johane utukulwaizya kuti “luyando lwesu lutabi lwamajwi buyo naa lwaamulomo pe, pele alube lwamumilimo amukasimpe.” (1Joh. 3:18) Tuyanda kuti luyando ndotujisi kubakwesu abacizyi kaluzwa ansi aamoyo. Mbuti mbotukonzya kucita boobo? Ikuti kanji-kanji katuyanzana abakwesu abacizyi, cilongwe cesu ambabo ciyooyuma alwalo luyando ndotujisi akati kesu luyookomena. Aboobo, atujane ciindi cakuyanzana ambabo kumiswaangano alimwi akubeleka antoomwe mumulimo wamumuunda. Atujane ciindi cakubaswaya. Ikuti twacita oobo, tutondezya kuti “tuyiisyigwa a Leza kuti katuyandana.” (1Tes. 4:9) Aboobo, tuyoozumanana kulibonena mbwaali aamasimpe majwi aakuti, “eelo kaka ncibotu alimwi cilakondelezya kuti babunyina kabakkede antoomwe calukamantano!”—Int. 133:1.