Kunyina Notuli Tolikke Pe

1-2. (a) Nkaambo nzi ncotukonzya kuba masimpe kuti tatuli tolikke ciindi notwajana mapenzi? (b) Ncinzi ncotutiibandike mucibalo eeci?

CIINDI notwajana mapenzi, tulakonzya kulimvwa mbuli kuti tuli tolikke mucisaka mwalo motutakonzyi kujana nzila. Nokuba boobo, inga tatuli tolikke pe. Taateesu wakujulu siluyando taboni buyo mapenzi aatucitikila, pele alimwi usyomezya kutugwasya. Caluyando, Jehova waambila babelesi bakwe basyomeka kuti: “Ndilakugwasya.”—Is. 41:10.

² Mucibalo eeci tulabandika Jehova mbwatugwasya kwiinda (1) mukutusololela, (2) mukutupa nzyotuyandika, (3) mukutukwabilila, alimwi (4) akutuumbulizya. Jehova utusyomezya kuti takatulubi pe, tacikwe makani amapenzi ngotukonzya kujana mubuumi. Kunze lyaboobo, takatulekelezyi pe. Aboobo kunyina notuli tolikke.

JEHOVA ULATUSOLOLELA

3-4. Mbuti Jehova mbwatusololela? (Intembauzyo 48:14)

³ Amubale Intembauzyo 48:14. Jehova talangili kuti katulisololela tobeni. Aboobo, mbuti mbwabasololela babalesi bakwe basyomeka mazuba aano? Nzila imwi mbwacita oobo nkwiinda mu Bbaibbele. (Int. 119:105) Kwiinda mu Jwi lyakwe lyakasololelwa amuuya, Jehova ulatugwasya kupanga zyakusala zili kabotu akuba abube ibukonzya kutugwasya kupona buumi bukkomanisya lino alimwi akuyooba abuumi butamani kumbele.a Mucikozyanyo, ulatuyiisya kuleka kunyema abukali, kuba bantu basyomeka muzintu zyoonse nzyotucita alimwi akubayanda bamwi kuzwa ansi aamoyo. (Int. 37:8; Heb. 13:18; 1Pet. 1:22) Ciindi notutondezya bube oobu, tuba bazyali, banabukwetene alimwi abalongwe bali kabotu.

⁴ Kuyungizya waawo, mu Jwi lyakwe, Jehova wakabikkilizya zibalo zyabantu beni ibakajisi mapenzi alimwi ibakali kulimvwa mbubwenya mbuli ndiswe. (1Kor. 10:13; Jak. 5:17) Ciindi notubala zibalo zyabantu aaba akubelesya ziiyo nzyotwiiya, tulagwasyigwa munzila zyobilo. Yakusaanguna, tulamvwisya kuti tatuli tolikke notujisi mapenzi mubuumi. Pele abamwi bakalijisi kale mapenzi aali boobu alimwi bakacikonzya kuliyumya kwiinda mukugwasyigwa a Jehova. (1Pet. 5:9) Kumane yabili, tulaiya mbotukonzya kuliyumya kumapenzi eesu akuzumanana kuba bantu bakkomene.—Rom. 15:4.

5. Mbaani Jehova mbabelesya kutusololela?

⁵ Jehova alimwi ubelesya basyomima kutusololela.b Mucikozyanyo, balangizi bamabazu balaswaya mbungano ciindi aciindi kutegwa batukulwaizye. Makani ngobapa alaluyumya lusyomo lwesu akutugwasya kuzumanana kukamantana. (Mil. 15:40–16:5) Baalu abalo balabeleka canguzu kugwasya umwi aumwi wesu kuzumanana kuba acilongwe a Jehova. (1Pet. 5:​2, 3) Bazyali balabayiisya bana babo kuyanda Jehova, kusala cabusongo, kuba abukkale buli kabotu alimwi abubambe busitikide bwakucita zintu zyakumuuya. (Tus. 22:6) Kunze lyaboobo, bacizyi basimide balabagwasya bacizyi bacili bana-bana kwiinda mukubapa cikozyanyo cibotu, kubapa lulayo lugwasya alimwi akubakulwaizya.—Tit. 2:​3-5.

6. Ncinzi ncotweelede kucita kutegwa tugwasyigwe abusolozi bwa Jehova?

⁶ Jehova wacita lubazu lwakwe kwiinda mukutupa busolozi mbotuyandika. Pele ncinzi ncotweelede kucita kutegwa tugwasyigwe abusolozi bwakwe? Lugwalo lwa Tusimpi 3:​5, 6 lwaamba kuti: “Kosyoma Jehova amoyo wako woonse, utasyomi maano aako omwini pe.” Ikuti twacita oobo, ‘uyoolulamika nzila zyesu’ nkokuti kutugwasya kweeleba mapenzi manji akupa kuti tukkomane mubuumi. Eelo kaka tulalumba kapati kuti Jehova ulituzyi kabotu alimwi ulatuyanda kapati, cakuti ulatupa lulayo umwi aumwi wesu ndwayandika!—Int. 32:8.

JEHOVA ULATUPA NZYOTUYANDIKA

7. Muunzila nzi Jehova mwatupa nzyotuyandika? (Bafilipi 4:19)

⁷ Amubale Bafilipi 4:19. Kunze buyo lyakutusololela kumuuya, Jehova alimwi ulakulongezya kusolekesya nkotucita kutegwa tujane zyakulya, zyakusama alimwi akwakukkala. (Mt. 6:33; 2Tes. 3:12) Masimpe kuti tacilubide kulibilika kujatikizya zintu zyakumubili, pele Jehova utukulwaizya kuti tatweelede kuciindizya kulibilika kujatikizya nzizyo. (Mt. 6:25) Nkaambo nzi? Akaambo kakuti Taateesu wakujulu kunyina nayootulekelezya. (Mt. 6:8; Heb. 13:5) Aboobo tulakonzya kumusyoma cakumaninina ciindi naamba kuti uyootupa nzyotuyandika.

8. Mbuti Jehova mbwaakamugwasya Davida?

⁸ Amubone Jehova mbwaakamugwasya Davida. Mumyaka iikatazya kapati Davida naakali simutuntuli, Jehova wakamupa zintu nzyaakali kuyandika antoomwe abaalumi mbaakali limwi kutegwa bazumanane kupona. Ciindi Davida naakayeeya Jehova mbwaakamulanganya aciindi eeco, wakalemba kuti: “Ndakali mwana lino ndacembaala, nokuba boobo tandinabwene mululami wakalekelezyegwa, nobaba bana bakwe kabalombelela cakulya.” (Int. 37:25) Mbubwenya mbuli Davida, andinywe kweelede kuti mwabona Jehova mbwamupa nzyomuyandika naa mbwabapa bakwesu alimwi abacizyi nzyobayandika muziindi zikatazya.

9. Mbuti Jehova mbwabapa zintu nzyobayandika bantu bakwe ciindi nokwacitika ntenda? (Amubone azifwanikiso.)

⁹ Jehova alimwi ulabapa bantu bakwe nzyobayandika ciindi nokwacitika ntenda. Mucikozyanyo, ciindi nokwakaba nzala mumwaanda wamyaka wakusaanguna, Banakristo kuzwa mumasena aayindene-indene bakatuma zyakulya kubakwesu abacizyi ibakajatikizyidwe apenzi eeli. (Mil. 11:​27-30; Rom. 15:​25, 26) Bantu ba Leza mazuba aano, abalo balatondezya muuya nguwenya ooyu wabwaabi. Ciindi nokwacitika ntenda, Jehova ulabakulwaizya babelesi bakwe kwaaba zintu ziyandika mbuli cakulya, meenda, zyakusama alimwi amisamu kubakwesu abacizyi ibakkala mubusena ntenda moyacitikila. Aabo babelekela mumayake, balaabambulula Maanda aa Bwami alimwi amaanda amwi aanyonyooka. Kunze lyaboobo, cakufwambaana bantu ba Jehova balabaumbulizya akubakulwaizya aabo ibanyonyookelwa maanda naa ibafwidwa bayandwa babo kwiinda mukubelesya Bbaibbele.c

10-11. Ncinzi ncomwiiya kucakuluula caba Borys?

¹⁰ Cabwaabi, Jehova ulabapa nzyobayandika nobaba baabo batanatalika kumukomba. Aboobo tulamwiiya Jehova kwiinda mukulangaula nzila zyakutondezya luzyalo kuli baabo batamubelekeli. (Gal. 6:10) Ikuti twacita oobo, tulakonzya kubagwasya kwiiya zinji kujatikizya ndiswe alimwi a Jehova. Amubone cakuluula caba Borys, bapati bacikolo ibakkala ku Ukraine. Nokuba kuti ba Borys tiibakali umwi wa Bakamboni ba Jehova, lyoonse bakali kubeendelezya caluzyalo basicikolo Bakamboni alimwi bakali kuzilemeka nzyobasyoma. Akaambo kankondo, bakasala kuzwa mumunzi mobakali kukkala akuunka kubusena bumwi mucisi imwakanyina nkondo, kwalo Bakamboni nkobakabagwasya. Kumbele ba Borys bakajanika ku Ciibalusyo calufwu lwa Kristo. Bayeeya mbobakabagwasya bakwesu, bakaamba kuti: “Bakamboni bakali aluzyalo alimwi bakandilanganya kabotu. Ndilabalumba kapati.”

¹¹ Toonse tulakonzya kumwiiya Taateesu wakujulu siluse kwiinda mukubatondezya luse aabo ibali mumapenzi, tacikwe makani mbasyomima naa pe. (Lk. 6:​31, 36) Tulombozya kuti luyando ndotubatondezya luyoobakulwaizya kuyanda kwiiya zinji kujatikizya Jehova, akutalika kumubelekela mbuli ndiswe. (1Pet. 2:12) Pele tacikwe makani naa basala kumubelekela naa pe, tuyookkomana akaambo kakuti kupa kulakkomanisya kapati.—Mil. 20:35.

JEHOVA ULATUKWABILILA

12. Ndukwabililo nzi Jehova ndwasyomezya kubapa babelesi bakwe kabali nkamu? (Intembauzyo 91:​1, 2, 14)

¹² Amubale Intembauzyo 91:​1, 2, 14. Mazuba aano, Jehova utusyomezya kutukwabilila kumuuya. Kunyina nayoolekela Saatani kuti asofwaazye bukombi bwakasimpe. (Joh. 17:15) Alimwi ciindi aakutalika “mapenzi mapati,” tulakonzya kuba alusyomo lwakuti Jehova uyoocizuzikizya cisyomezyo cakwe cakubakwabilila bantu bakwe ikutali buyo kumuuya pele akumubili.—Ciy. 7:​9, 14.

13. Mbuti Jehova mbwamukwabilila umwi aumwi wesu kumugama?

¹³ Mbuti Jehova mbwamukwabilila umwi aumwi wesu kumugama? Kwiinda mu Magwalo, Jehova ulatugwasya kuzyiba ciluzi acitaluzi. (Heb. 5:14) Alimwi ciindi notupona kweelana anjiisyo zili mu Jwi lyakwe, tulakwabililwa kuzintu zikonzya kutunyonganya kumuuya akumubili. (Int. 91:4) Kunze lyaboobo, Jehova watupa mbungano mwalo motupegwa lugwasyo ndotuyandika kutegwa tuzumanane kusyomeka kulinguwe. (Is. 32:​1, 2) Bakwesu abacizyi mumbungano balamuyanda akumumvwida Jehova. Aboobo, ikujana ciindi cakuyanzana ambabo kumiswaangano, mumulimo wamumuunda alimwi anotulikondelezya, cilatugwasya kweeleba zintu zibyaabi.—Tus. 13:20.

14. (a) Nkaambo nzi Leza ncatatukwabilili kumapenzi oonse? (b) Ino lugwalo lwa Intembauzyo 9:10 lutusyomezya nzi? (Amubone bupanduluzi buyungizyidwe.)

¹⁴ Kaindi, Jehova wakali kubakwabilila babelesi bakwe kuntenda. Pele talili lyoonse naakali kucita boobo. Bbaibbele lyaamba kuti ‘zintu zitalangilwi’ zilakonzya kumucitikila muntu uli woonse. (Muk. 9:11) Kunze lyaboobo, kuzwa kaindi Jehova wali kulekela babelesi bakwe kupenzyegwa naa kujaigwa buya kutegwa atondezye kuti Saatani mubeji. (Job. 2:​4-6; Mt. 23:34) Oobu mbocibede amazuba aano. Nokuba kuti Jehova tanaagusya mapenzi eesu, tulakonzya kuba masimpe kuti kunyina nayoobalekelezya aabo bamuyanda.d—Int. 9:10.

JEHOVA ULATUUMBULIZYA

15. Ino tuumbulizyigwa buti amupailo, Jwi lya Leza alimwi a Banakristoma? (2 Bakorinto 1:​3, 4)

¹⁵ Amubale 2 Bakorinto 1:​3, 4. Zimwi ziindi tulaakuusa, kulibilika naa kutyompwa. Ambweni muli mubukkale butyompya bwalo bumupa kulimvwa kuti muli nyolikke. Pele sena kuli muntu uukonzya kumvwisya mbomulimvwa? Inzya Jehova ulamvwisya. Tagoleli buyo aakutumvwisya, pele alimwi “ulatuumbulizya mumapenzi eesu oonse.” Mbuti mbwacita oobo? Ciindi notumwaambila Jehova zyoonse zili mumoyo wesu kwiinda mumupailo, ulatupa “luumuno lwa Leza oolo lwiinda maano oonse.” (Flp. 4:​6, 7) Kunze lyaboobo, tulaumbulizyigwa ciindi notubala Jwi lyakwe, Bbaibbele. Mulindilyo ulatwaambila mbwatuyanda kapati, ulatuyiisya mbotukonzya kuba basongo alimwi ulatupa bulangizi. Kuyungizya waawo, tulaumbulizyigwa kumiswaangano yesu kwalo nkotukulwaizyigwa kuzwa mu Bbaibbele alimwi nkotuyanzana abakwesu abacizyi balo batuyanda.

16. Ncinzi ncomwaiya kucakuluula caba Nathan aba Priscilla?

¹⁶ Kutegwa tubone Jehova mbwatuumbulizya akutukulwaizya kwiinda mu Jwi lyakwe, amubone cakuluula caba Nathan aba Priscilla, ibakkala ku United States. Myaka iili mbwiibede yainda, bakasala kulongela kubusena kubulide kwalo kwakali kuyandika basikumwaya ba Bwami. Ba Nathan bakaamba kuti: “Twakalisinizyide kuti Jehova ulakulongezya kusolekesya kwesu.” Pele nobakasika kubusena oobo, boonse bobilo bakatalika kuciswa akuba apenzi lyakubula mali. Banabukwetene aaba bakapiluka kuŋanda pele bakazumanana kuba apenzi lyakubula mali. Ba Nathan bakaamba kuti: “Ndakali kulibuzya kaambo Leza ncaatakatulongezya mbuli mbotwakali kuyeeyela. Mane buya ndakatalika kuyeeya kuti ambweni kuli cintu cibyaabi ncondakacita.” Pele mukuya kwaciindi, ba Nathan aba Priscilla bakazyiba kuti Leza kunyina naakabalekelezyede. Ba Nathan bakazumanana kwaamba kuti: “Muziindi eezyi zikatazya, Bbaibbele lyakaba mbuli mulongwe iwakali kutukulwaizya akutusololela. Kubikkila maano kubona Jehova mbwaakatugwasya kuliyumya muziindi zikatazya muciindi cakubikkila maano kumapenzi, kwakapa kuti tube alusyomo lwakuti uyoozumanana kutugwasya kumbele.”

17. Mbuti mucizyi wazina lya Helga mbwaakaumbulizyigwa? (Amubone acifwanikiso.)

¹⁷ Bakwesu abacizyi balakonzya kuzumanana kutuumbulizya. Munzila nzi? Amubone cakuluula camucizyi Helga, uukkala ku Hungary. Kwamyaka minji, wakali kujana mapenzi manji alo aakali kumupa kuusa akulimvwa kubula mpindu. Pele ayeeya zyamusyule, wakabona Jehova mbwaakamuumbulizya kwiinda mubakwesu abacizyi mumbungano. Wakalemba kuti: “Jehova lyoonse wakali kundigwasya ciindi nondakatyompedwe akaambo kamulimo, kulanganya mwanaangu iwakali kuciswa alimwi amapenzi aambi. Mumyaka yoonse iili 30 yainda, wakali kucizuzikizya cisyomezyo cakwe cakunduumbulizya buzuba abuzuba. Kanji-kanji, wakali kundikulwaizya kwiinda mumajwi aabamwi aaluzyalo. Kunze lyaboobo, ndakali kutambula tugwalo twaafooni, tukkaadi naa kulumbaizyigwa aciindi ceelede.”

18. Mbuti mbotukonzya kubaumbulizya bamwi?

¹⁸ Tulijisi coolwe cakwiiya Leza kwiinda mukuumbulizya bamwi. Mbuti mbotukonzya kucita oobo? Tulakonzya kubaswiilila cakukkazika moyo, kwaambaula caluzyalo alimwi akubagwasya cacigaminina. (Tus. 3:27) Tweelede kubagwasya boonse ibali mumapenzi kubikkilizya abaabo batanatalika kumubelekela Leza. Ciindi basimukoboma nobali mumapenzi, nobaciswa naa kulibilika, tulabaswaya, kubaswiilila akubaambila zibalo zyamu Bbaibbele zikulwaizya. Ciindi notumwiiya Jehova “Leza siluumbulizyo loonse,” tatukagwasyi buyo basyomima kuliyumya, pele alimwi tuyoogwasya abaabo batanatalika kumubelekela Leza kuti babe aluyandisisyo lwakwiiya kujatikizya nguwe.—Mt. 5:16.

JEHOVA LYOONSE UNOOTUGWASYA

19. Ncinzi Jehova ncatucitila? Mbuti mbotukonzya kumwiiya?

¹⁹ Jehova ulabalanganya boonse aabo bamuyanda. Alimwi kunyina natulekelezya ciindi notujisi mapenzi. Mbubwenya muzyali mbwamulanganya caluyando mwanaakwe, Jehova ulabalanganya bakombi bakwe basyomeka. Mucikozyanyo, ulatusololela, ulatupa nzyotuyandika, ulatukwabilila alimwi akutuumbulizya. Tulamwiiya Taateesu wakujulu siluyando ciindi notubagwasya akubaumbulizya bamwi ciindi nobali mumapenzi. Nokuba kuti twajana mapenzi, tunoosinizyide kuti Jehova unooli andiswe. Amana buya utusyomezya kuti: “Utayoowi pe, nkaambo ndilaanduwe.” (Is. 41:10) Eelo kaka cilakulwaizya cisyomezyo eeci! Masimpe kunyina notuli tolikke pe.